༄༅། །ལེགས་པར་བཤད་པ་ཆུའི་བསྟན་བཅོས་ལུགས་གཉིས་རླབས་ཕྲེང་བརྒྱ་ལྡན་ཞེས་བྱ་བ་བཞུགས་སོ། །
མཁྱེན་པའི་གཏིང་མཐའ་མི་མངོན་ཞིང་། །
ཐུགས་རྗེའི་ཡིད་བཞིན་ནོར་གྱིས་གཏམས། །
མཛད་པའི་རླབས་ཕྲེང་གཡོ་བ་ཅན། །
ཐུབ་དབང་ཆོས་ཀྱི་རྒྱ་མཚོ་རྒྱལ། །
རྙོག་བྲལ་དྭངས་པའི་ཆུ་རྒྱུན་གྱིས། །
ལུས་ཅན་གདུང་བ་ཞི་བྱེད་ལྟར། །
ལེགས་བཤད་གསར་པའི་བདུད་རྩི་ཡིས། །
བློ་ལྡན་སྐྱེ་བོ་དབུགས་དབྱུང་བྱ། །
དྲི་བཟང་བསྒོས་པའི་ཆུ་གཙང་དེ། །
མཆོད་ཡོན་ཞབས་བསིལ་བསང་གཏོར་སོགས། །
གང་དུ་བྱས་ཀྱང་ལེགས་པ་ལྟར། །
ལེགས་བཤད་གཏམ་ནི་ཀུན་ལ་མཛེས། །
ལུགས་གཉིས་བླང་དོར་ཤེས་པ་ཡིས། །
གནས་སྐབས་མཐར་ཐུག་དོན་འགྲུབ་སྟེ། །
བརྟག་པ་ཀུན་ལ་མཁས་པ་ཡིས། །
དེད་དཔོན་རྒྱ་མཚོར་ཞུགས་པ་བཞིན། །
ཆུ་ཕྲན་བརྒལ་བར་མི་ནུས་དེས། །
རྒྱ་མཚོ་རྐྱལ་གྱིས་ག་ལ་ཆོད། །
ཡ་རབས་ལུགས་ཀྱང་མི་ཤེས་ན། །
ཆོས་ཀྱི་དེ་ཉིད་ཇི་ལྟར་རྟོགས། །
གཟུར་གནས་རིག་པར་ལྡན་པ་དེས། །
གཞན་གྱི་ཡོན་ཏན་ལེན་པར་བྱེད། །
སྤང་ལྗོངས་གཙང་མའི་དལ་འགྲོ་མ། །
ལྷུང་ལྷུང་ཟེར་ཞིང་མེ་ཏོག་འཐུ། །
ངན་པས་ཕྱོགས་མཐའ་བསྐོར་ན་ཡང་། །
སྐྱོན་གྱི་རིགས་རྣམས་སྡུད་པར་བྱེད། །
ངམ་གྲོག་ས་རལ་ཅན་གྱི་ཆུས། །
འདམ་གྱི་སྙིགས་མ་འདྲེན་དང་མཚུངས། །
ཡོན་ཏན་དང་པོར་སློབ་དཀའ་ལ། །
ཤེས་བཞིན་མེད་ན་ཉམས་པ་སླ། །
ཆུ་ཐིགས་བསགས་པས་འགེངས་དཀའ་ཡང་། །
བོ་ན་ཅིག་ཅར་ཉིད་དུ་འཛད། །
དཀའ་སྤྱད་ཁུར་དུ་འཁྱེར་ནུས་ན། །
བྱ་བ་གང་ཡང་དཀའ་བ་མེད། །
ཆུ་ཡི་ནང་དུ་ཞུགས་པ་དེར། །
ཆར་གྱིས་ལྷག་པར་གནོད་མི་འགྱུར། །
རྒྱུན་ཆགས་བརྩོན་པ་མ་བཏང་བར། །
བགས་ཀྱིས་བསྒྲུབས་ན་ཅི་ཡང་འགྲུབ། །
ཆུ་བོ་དལ་གྱིས་འབབ་པ་ཡིས། །
ཡངས་པའི་ས་ཆེན་བསྐོར་ནས་འགྲོ། །
བྱ་བ་ཆེན་པོ་ཡུན་གྱིས་བསྒྲུབ། །
ངང་ཐུང་འབད་པས་མཐར་མི་ཕྱིན། །
རླུང་ཆེན་དལ་ཡང་རིང་འགྲོ་ལ། །
རྦ་རླབས་དྲག་ཀྱང་ཆེར་མི་འགྲོ། །
བྱ་བ་ཉམས་ཀྱིས་མི་ལྕོགས་ན། །
གཞན་གྱིས་རྦད་ཀྱང་བྱར་མི་རུང་། །
རྐྱལ་མི་ཤེས་ན་གཞན་དག་གིས། །
བསྐུལ་ཡང་ཆུ་ནང་ཅི་ཕྱིར་མཆོང་། །
ཆུ་བོ་ཐུན་མོང་མཆོད་ཡོན་ཏེ། །
ཉི་ཟླ་ཐུན་མོང་སྒྲོན་མེ་གསལ། །
དམ་པ་ཐུན་མོང་གཙུག་རྒྱན་དང་། །
དམ་ཆོས་ཐུན་མོང་བདུད་རྩི་ཡིན། །
དར་ཆེན་གྲུ་གཟིངས་རྒྱ་མཚོའི་རྒྱན། །
སྤྲིན་བྲལ་ཟླ་བ་ནམ་མཁའི་རྒྱན། །
མཁས་པའི་སྐྱེ་བོ་བསྟན་པའི་རྒྱན། །
རུ་འདྲེན་དཔའ་བོ་དཔུང་གི་རྒྱན། །
ཡ་རབས་མཛངས་སྤྱོད་དཔོན་དང་འབངས། །
ཕན་ཚུན་ལེགས་ཚོགས་གོང་དུ་སྤེལ། །
རྒྱ་མཚོ་ཆེ་དང་ཆུ་བོ་རྣམས། །
རེས་མོས་ཚུལ་གྱིས་གྲོགས་སུ་འགྱུར། །
རྗེ་བོ་ངན་དང་གཡོག་ངན་པ། །
གཉིས་ཀས་གཉིས་ཀ་རྒུད་བྱེད་དེ། །
རྫ་གསར་ནང་དུ་ཆུ་བླུགས་ན། །
གཉིས་ཀ་ཆུད་ཟོས་བརླག་པར་འགྱུར། །
ཤེས་རློམ་དབང་ཅན་མང་བ་ཡིས། །
ཡུལ་ཁམས་མདུན་གྲོས་འཇིག་འགྱུར་ཏེ། །
གཡས་གཡོན་ཀུན་ནས་ཆུ་འབུར་བའི། །
ས་ལ་མཁར་ཁྱིམ་བརྟན་མི་སྲིད། །
རྗེ་འབངས་མཐུན་ན་དགྲ་སྡེ་ཡིས། །
ཐུབ་དཀའ་སོ་སོར་གྱེས་ན་མིན། །
རྟ་ཡིས་བརྒལ་དཀའི་ཆུ་བོ་ཡང་། །
མང་དུ་གྱེས་ན་ལུག་ཀྱང་བགྲོད། །
ཆོས་ལྡན་རྒྱལ་པོས་ཁྲལ་བསྡུས་ཀྱང་། །
དེ་ཉིད་ཀྱིས་ནི་འབངས་རྣམས་སྐྱོང་། །
སྤྲིན་ཆེན་རྒྱ་མཚོའི་ཆུ་དྲངས་ཏེ། །
དལ་གྱིས་འབེབས་པས་འཛིན་མ་སྐྱོང་། །
རྒྱལ་ངན་འབངས་ཀྱི་ཟས་ནོར་ཀུན། །
ཕྲོགས་ཀྱང་ད་དུང་ལྟོགས་ཤིང་བཀྲེན། །
རྒོད་མ་ཁ་ཡིས་རྒྱ་མཚོའི་ཆུ། །
འཐུང་གིན་རྟག་ཏུ་འབར་དང་མཚུངས། །
གཙོ་བོ་ངན་པ་རྟག་བཀུར་ཡང་། །
གསུག་དང་བྲལ་བ་ཙམ་གྱིས་སྡང་། །
ཆུ་བོ་ཉིན་ཞག་མང་བསྐོལ་ཀྱང་། །
མེ་དང་བྲལ་བའི་མོད་ལ་གྲང་།
ཁེངས་དྲེགས་གདུག་རྩུབ་ཆེ་བ་ཡི། །
དཔོན་ལ་སུ་ཡང་བརྟེན་མི་སྤྲོ། །
ཤིན་ཏུ་འཁྲུགས་པའི་རྦ་ཀློང་དུ། །
ཉ་ལ་སོགས་ཀྱང་སྡོད་མི་བྱེད། །
བརྩེ་ཞིང་ཕན་གདགས་ནུས་པ་དེར། །
སྐྱེ་བོ་ཐམས་ཅད་ངང་གིས་འདུ། །
ཡིད་བཞིན་གྱི་ནི་རྒྱ་མཚོའི་ངོགས། །
འགྲོ་བ་ཀུན་གྱིས་བརྟེན་པར་བྱེད། །
ཆེ་མཐོ་བརྟེན་པས་དཔལ་ཐོབ་ཀྱང་། །
དེ་ལས་ལྷག་པའི་འཇིགས་པ་འབྱུང་། །
རྒྱ་མཚོ་རིན་ཆེན་འབྱུང་གནས་དེ། །
གདུག་ཅན་ན་ཀྲའི་གྲོང་ཡང་ཡིན། །
རྒྱུས་མེད་མི་ལ་གསར་འགྲོགས་ཀྱིས། །
ཡིད་བརྟན་བྱེད་པ་ཉམས་པའི་རྒྱུ། །
རྒྱལ་སྲས་ངང་པའི་སྡེ་དཔོན་ཡང་། །
མཚོ་གསར་བརྟེན་པས་རྙི་ཡིས་ཟིན། །
རྣ་བ་སྲབ་པའི་མཛའ་གཅུགས་དེ། །
རིང་མིན་དབྱེན་གྱིས་སོ་སོར་གཏོང་། །
ཆུ་དང་འོ་མ་རོ་གཅིག་ཏུ། །
འདྲེས་པ་ངང་པའི་མཆུ་ཡིས་འབྱེད། །
མཁས་པས་བདེན་བརྫུན་བརྟགས་ནས་བྱེད། །
བླུན་པོ་གྲགས་པའི་རྗེས་སུ་རྒྱུག །
ཆུ་ནང་ཅལ་གྱི་སྒྲ་བསྒྲགས་པས། །
གཅན་གཟན་རི་དྭགས་ཕལ་ཆེར་བྲོས། །
འགྲོགས་ན་ལེགས་སྤྱོད་འཕེལ་འགྲིབ་ལས། །
དགེ་དང་སྡིག་པའི་གྲོགས་འགྱུར་ཏེ། །
དྭངས་བསིལ་འདྲ་ཡང་ཕན་གནོད་ལས། །
སྨན་གྱི་ཆུ་དང་དུག་ཆུར་འཇོག །
སྡིག་གྲོགས་གཡེམ་མའི་འཛུམ་དཀར་ལས། །
ཤ་ཚའི་གདུག་རྩུབ་ཁྲོ་གཉེར་བཟང་། །
ཐན་ཁྱེར་སྤྲིན་གྱི་མདོག་དཀར་ཡང་། །
ཆུ་ལྡན་སྤྲིན་ནག་ཞིང་པའི་གསོས། །
བློ་ལྡན་རང་བཞིན་བཟང་པོ་དེ། །
མཆོག་དམན་བར་མ་ཀུན་གྱིས་བསྟེན། །
འཇུག་ངོགས་བདེ་བའི་རྫིང་བུ་ལ། །
སྐྱེ་བོ་ཐམས་ཅད་དགའ་བཞིན་འཇུག །
ཁེངས་དྲེགས་སྤྱོད་པ་རྩིང་བ་ལ། །
དོན་མེད་རྣམས་ཀྱང་དགྲ་རུ་སྡང་། །
རྒྱགས་ཤིང་འཕྱར་བའི་གངྒཱ་མ། །
ཛ་ཧཱུ་ཁྲོས་པས་ཧུབ་ཀྱིས་བཏུངས། །
ཉམ་ཆུང་སྟེང་དུ་དཔའ་ཐལ་ན། །
ཉམ་ངའི་གཡང་དུ་ལྷུང་འགྱུར་ཏེ། །
ཆུ་ལ་རྐྱལ་གྱིས་དྲེགས་པའི་ཉ། །
སྐམ་ལ་ཡར་ན་འཆི་བར་འགྱུར། །
རིགས་ངན་ཅུང་ཟད་འབྱོར་ན་ཡང་། །
རྒྱལ་པོ་ལྟ་བུའི་ཁེངས་དྲེགས་འཛིན། །
གཅོང་རོང་དོག་མོའི་ཆུ་ཕྲན་དེ། །
འུར་སྒྲ་རྒྱ་མཚོའི་རྦ་ཀློང་འདྲ། །
ཡངས་པའི་རྒྱལ་ཁམས་མ་མཐོང་བ། །
ས་མཐའི་བློན་པོ་རང་མཐོང་ཆེ། །
ཁྲོན་པའི་ཆུ་ལ་འགྱིངས་པ་ཡི། །
རུས་སྦལ་རྒྱ་མཚོའི་གཏམ་གྱིས་ཤི་། །
ཐ་ཤལ་རྣམས་ནི་མགུ་སླ་ཞིང་། །
མགུ་བའི་མོད་ལ་ཁྲེལ་ཡང་སླ། །
ཕུ་ཐག་ཐུང་བའི་ཆུ་ཕྲན་དེ། །
བྲུབས་དང་བྲི་བ་ཡུད་ཙམ་ཡིན། །
མ་རབས་གཅེས་པར་བསྐྱངས་ན་ཡང་། །
དྲིན་དུ་མི་ཚོར་འཁྲུག་པར་བྱེད། །
བསིལ་བའི་ཆུ་ཡིས་བྲན་ན་ཡང་། །
རྡོ་ཞུན་ལྷག་པར་ཁོལ་ཞིང་ཚ། །
དམ་པ་རྣམས་ལ་གནོད་བྱས་ཀྱང་། །
ཁྲོ་མེད་བཟོད་པས་བདེ་བར་གནས། །
བཙོ་ཡི་སྔགས་ཀྱིས་བཏབ་པའི་ཆུ། །
ཁོལ་བཞིན་པ་ཡིས་བྲན་ཀྱང་བསིལ། །
ཁྲེལ་མེད་རྣམས་ལ་ཕན་བཏགས་ཀྱང་། །
བྱ་བ་ཟིན་ན་བརྗེད་པར་འགྱུར། །
ཆུ་བོའི་ཕ་རོལ་བརྒལ་བ་ན། །
གྲུ་གཟིངས་ལྟོས་པ་མེད་པར་འདོར། །
མི་ངན་རེ་རེའི་བྱེད་པས་ཀྱང་། །
ཡུལ་ཁམས་ཆེན་པོ་ཕུང་བར་བྱེད། །
དྲང་སྲོང་གདུག་པ་མཆོངས་པ་ཡིས། །
སི་ཏ་ཚལ་བརྒྱར་གྱེས་ཞེས་གྲགས་། །
དམུ་རྒོད་སྐྱེ་བོས་སུན་ཕྱུང་རྣམས། །
དམ་པ་ལ་ཡང་ཡིད་མི་ཆེས། །
ཆུ་ཟླས་བསླུས་བྱས་ངང་པ་ཡིས། །
ཉིན་མོའང་པད་རྩ་ཟ་མི་བྱེད་། །
སྐྱེ་བོ་ངན་པ་བཅོས་ན་ཡང་། །
རྐྱེན་དང་འཕྲད་ཚེ་རང་མཚང་སྟོན། །
ཆུ་ཀླུང་འོལ་ཁ་བསྒྱུར་བ་དེ། །
བྲུབས་ཚེ་སྔར་གྱི་ལམ་དུ་འགྲོ། །
དམ་པ་མཐོ་དམན་འབྱོར་རྒུད་སོགས། །
ཅིས་ཀྱང་རང་བཞིན་མི་འགྱུར་ཏེ། །
ཆུ་བོ་བསིལ་ལམ་ཚ་ན་ཡང་། །
རླན་གྱི་རང་བཞིན་ག་ལ་འདོར། །
མི་བསྲུན་སྐྱེ་བོ་གདམས་པ་ལས། །
ནན་ཏུར་ལས་ཀྱིས་གདུལ་བར་སླ། །
གོས་ཀྱི་དྲི་མ་འཁྲུད་པ་ལ། །
གཙང་མའི་ཆུ་ལས་འགྱུར་བྱེད་བཟང་།
ལུས་ཅན་ནང་གི་སྐྱོན་ཡོན་རྣམས། །
ཕྱི་རོལ་སྤྱོད་པས་མཚོན་ནུས་ཏེ། །
ཆུ་སྐྱར་ལྡིང་བས་ཆུ་བོ་དང་། །
དུ་བ་ལས་ནི་མེར་ཤེས་བཞིན། །
གཞན་གྱི་སྐྱོན་ཡོན་མཐོང་སླ་ཡང་། །
རང་གི་སྤྱོད་ཚུལ་མཐོང་བར་དཀའ། །
མཚོ་ནང་ནམ་མཁའི་ཟླ་སྐར་ཀུན། །
གསལ་ཡང་རང་གི་གཏིང་མི་མཐོང་། །
བསམ་ངན་གཡོ་སྒྱུའི་བྱ་བ་ནི། །
ལམ་རྒྱུག་འདྲ་ཡང་ཕུགས་སུ་ཕུང་། །
ཆུ་ཀླུང་གྱ་གྱུར་བགྲོད་པ་ཡང་། །
བབས་ཀྱིས་ཐུར་ནས་ཐུར་དུ་འགྲོ། །
རིགས་རྒྱུད་ཟད་འདོད་བུ་ངན་སྐྱེ། །
བསོད་ནམས་ཟད་འདོད་བསམ་ངན་འཆར། །
རང་ཉིད་བརླག་འདོད་རིག་པ་རྒོད། །
ཆུ་མིག་སྐམ་འདོད་སྙིགས་མ་མང་། །
བླུན་པོས་ངལ་བརྒྱས་བསྒྲུབས་ན་ཡང་། །
གྲགས་པ་བློ་ལྡན་གཞན་གྱིས་འཁྱེར། །
རི་ལས་སྐྱེས་པའི་པད་མ་ཡང་། །
བསྐྱེད་པའི་གྲགས་པ་ཆུ་ཡིས་འཐོབ། །
ལུང་རྟོགས་ཡོན་ཏན་མི་ལྡན་ཡང་། །
དམ་པར་སྒྲོག་པས་སྐྱེ་བོ་བསླུ། །
སྦྲང་ཆར་བཅུད་དང་བྲལ་བ་ཡི། །
ཐན་ཁྱེར་སྤྲིན་གྱི་འབྲུག་སྒྲ་བཞིན། །
སྙིགས་དུས་རང་བྱུང་ཀུན་མཁྱེན་རྣམས། །
སྦྱངས་ཚེ་ཕལ་པ་ལས་ཀྱང་རྟུལ། །
རང་བྱུང་ཆུ་ཚན་སྔར་ཚ་ཡང་།
བསྐོལ་ན་ཆུ་གྲང་རྗེས་སུ་ཁོལ། །
དྲེད་པོ་ཁ་ཡི་ཆོས་བཤད་མཁན། །
ཤེས་རྒྱུད་གདོལ་པ་ལས་ཀྱང་ཐུ། །
དགུན་དུས་རླངས་པ་ན་བུན་བཞིན། །
འཐིབས་པའི་ཀློང་དེ་ལྷག་པར་གྲང་། །
དམ་པའི་སྐྱེ་བོ་ཉམ་ཐག་ཀྱང་། །
ཆོས་དང་འགལ་བའི་ལས་མི་བྱེད། །
ཆར་འདོད་བྱིའུ་སྐོམ་ན་ཡང་། །
ས་ལ་བབས་པའི་ཆུ་མི་འཐུང་། །
དགེ་སྦྱོར་བརྩོན་པར་འདོད་པ་དང་། །
ལོག་པའི་འཚོ་བ་སྒྲུབ་པ་འགལ། །
མེ་ཏོག་སྐྱེས་པར་འདོད་པ་ཡིས། །
ཆུ་ཚན་བླུགས་ན་ཕན་འགྱུར་རམ། །
ཆེན་པོ་རེ་ཞིག་རྒུད་ན་ཡང་། །
སླད་ནས་གཟི་བྱིན་རྒྱས་པར་འགྱུར། །
འཁྱགས་པའི་སྦུགས་སུ་ཚུད་པའི་མཚོ། །
སོ་ག་རིམ་གྱིས་འཕྱུར་ནས་འོང་། །
བློ་དང་རྩོལ་བ་ཞན་པའི་མིས། །
ཕུན་ཚོགས་ཐོབ་ཀྱང་མོད་ལ་འགྲིབ། །
རྫིང་ཆུང་ལྷག་ཆུ་ཆད་པ་དེ། །
སླར་ཡང་མྱུར་དུ་སྐམ་པར་འགྱུར། །
ནོར་མེད་མཆོར་དང་ཁ་ཞིམ་འདོད། །
གཞུང་ལུགས་མ་སྦྱངས་མཁས་ཁུར་འཛིན། །
ཆུ་རྐྱལ་མི་ཤེས་མཚོ་བརྒལ་བ། །
བསམ་བཞིན་རང་སྡུག་ཉོས་པ་ཡིན། །
མངའ་ཐང་བློ་རྒྱ་སྐྱེད་ཆེས་པས། །
བསོད་ནམས་ཚད་ལས་འགོང་མི་རུང་། །
མཚོ་ཆུང་རང་གི་ཁྲོན་པ་ཡི། །
ཚད་ལས་རྒྱས་ན་བོ་བར་འགྱུར། །
དོན་ཆེན་ཐོག་ཏུ་མ་བབས་པའི། །
དུས་ནས་ཐབས་དང་རིམ་གྲོ་བྱ། །
ཆུ་ལོན་སྔར་ནས་མ་བརྩིགས་ན། །
བྲུབས་ནས་འོལ་ཁ་བསྒྱུར་བ་དཀའ། །
དོན་མེད་ལས་ལ་ཕོད་བཙུགས་ནས། །
རང་ཉིད་ཉམས་བྱེད་དཔའ་བོ་མིན། །
ཆུ་ཡི་ནང་གི་གཟུགས་བརྙན་ལ། །
མཆོངས་པས་སེང་གེ་ཤི་དང་འདྲ་། །
དགྲ་བོ་འདུལ་བར་འདོད་ན་ཡང་། །
སྐྱོང་ཚུལ་དལ་ཞིང་འཇམ་པར་བྱ། །
ཆུ་སྐྱར་འཇབ་ཅིང་འགྲོ་བ་ཡིས། །
ཉ་ལ་སོགས་པ་འཛིན་ལ་ལྟོས། །
གཞན་ཕྱོགས་འབྱོར་པ་ལ་སྡང་བས། །
རང་གི་བསོད་ནམས་ཉམས་པར་ཟད། །
ཆུ་ཀླུང་དྲག་པོར་མཆོངས་པ་ན། །
བདག་ཉིད་འཆི་ཡིས་དེར་མི་གནོད། །
དེ་བས་དགྲ་ལས་རྒྱལ་འདོད་ན། །
ཡོན་ཏན་སྒྲུབ་ལ་འབད་པར་བྱ། །
ཆུ་བོ་ཆེ་ལ་བརྒལ་བའི་ཐབས། །
ཐང་ནས་གྲུ་གཟིངས་འཆོས་པ་ཡིན། །
རང་ལས་བསོད་ནམས་མ་ཉམས་ན། །
དགྲ་བོ་ཁོ་ནས་མི་ཐུབ་སྟེ། །
ཆུ་མིག་རང་བཞིན་མ་སྐམ་བར། །
ས་ཡིས་མནན་ཀྱང་འགོག་མི་ནུས། །
དབུལ་ཕྱུག་དར་རྒུད་མཐོ་དམན་ཀུན། །
སྔོན་སྤྱད་ལས་ཀྱི་གོ་རིམ་སྟེ། །
ཆུ་ཡི་དཀྱིལ་འཁོར་བསྲུབས་པ་ལས། །
རི་གླིང་ཁོར་ཡུག་རིམ་པར་ཆགས། །
མཁས་པ་ཕལ་ཆེར་དབུལ་འགྱུར་ལ། །
བླུན་པོའི་སྐྱེ་བོ་ནོར་གྱིས་ཕྱུག །
རྙོག་མ་ཅན་གྱི་ཆུ་བོ་ལ། །
སྦལ་ལྕོང་འབུ་སྲིན་ལྷག་པར་མང་། །
བརྒྱ་ཡི་ནང་ནས་དཔའ་བོ་དང་། །
སྟོང་གི་ནང་ནས་མཁས་པ་སྟེ། །
མ་དྲོས་མཚོ་ལས་ཆུ་གསེར་དང་། །
རྒྱ་མཚོ་ཆེ་ལས་ནོར་བུ་འབྱུང་། །
བློ་དང་མི་ལྡན་སྐྱེ་བོ་ཡིས། །
འབྱོར་པ་རྙེད་ཀྱང་སྤྱོད་མི་ཤེས། །
ཁྱི་ནི་སྐོམ་ཡང་ཆུ་ཀླུང་ལ། །
ཧུབ་ཀྱིས་མི་འཐུང་ལྡག་པར་བྱེད། །
རང་གཞན་སུ་ལའང་མི་ཕན་པའི། །
ནོར་དེ་མེད་པ་ཉིད་དང་མཚུངས། །
ཆུ་མེད་ས་གཞི་རྒྱ་ཆེ་ཡང་། །
མྱ་ངམ་ཐང་ཞེས་ཀུན་གྱིས་འདོར། །
ལོངས་སྤྱོད་སྤེལ་བར་འདོད་པས་ཀྱང་།།
ཅུང་ཟད་གཏོང་ཚུལ་ཤེས་དགོས་ཏེ། །
ཁྲོན་ཆུ་བཅུས་ན་འཕེལ་འགྱུར་ཞིང་། །
བཞག་ན་སྙིགས་མས་སྐམ་པར་འགྱུར། །
བླུན་རྨོངས་འབྱོར་པ་རྒྱ་ཆེ་ཡང་། །
སྡུག་བསྔལ་རྒྱུ་ལས་མ་འདས་ཏེ། །
གསེར་རིའི་བར་གྱི་རོལ་མཚོ་རྣམས། །
རྟག་ཏུ་མུན་པའི་སྨག་གིས་ནོན། །
འབྱོར་ལྡན་བསོད་ནམས་གསོག་དགོས་ཏེ། །
བསོད་ནམས་ཉམས་ན་རྒུད་པ་སླ། །
ལྗོན་ཤིང་ཡལ་ག་རྒྱ་ཆེ་ཡང་། །
ཆུ་དང་བྲལ་ན་སྐམ་པར་འགྱུར། །
བསོད་ནམས་མཐུ་དང་དགེ་བའི་བློ། །
ཕན་ཚུན་རྒྱུར་གྱུར་སྐལ་པ་བཟང་། །
ཆུ་ཡི་ཆར་དང་ཆར་གྱི་ཆུ། །
རྒྱས་བྱེད་རེ་མོས་གྲོགས་སུ་འགྱུར། །
ཁ་བཤད་མང་ངམ་ཉུང་ཡང་རུང་། །
དགོས་དོན་ལག་ཏུ་བླངས་ན་གོ། །
ཆུ་ཞེང་ཆེ་ཆུང་ཅི་འདྲ་ཡང་། །
ཟབ་དང་མི་ཟབ་བརྒལ་ན་ཤེས། །
ལེགས་བྱས་སྲོལ་འབྱེད་མཁས་པ་སྟེ། །
དེ་ཡི་རྗེས་སུ་འཇུག་པ་སླ། །
ཅང་ཤེས་རྟ་ཡིས་རབ་བརྒལ་བས། །
ཕྱི་བཞིན་ཁྱི་ཡང་འབྲང་བར་བྱེད། །
མཁས་པ་ཀུན་ལ་སྙོམས་ལྡན་ཞིང་། །
ཕྱོགས་རེའི་མིག་ཅན་ཆགས་སྡང་ཆེ། །
བུམ་པ་གང་བ་བཀུར་བར་སླ། །
ཕྱེད་ཙམ་གང་བ་ཡོ་འཁྱོམ་མང་། །
བསམ་ཚད་ཁ་རུ་འདོན་པ་དེར། །
གཏད་སོ་མེད་ཅེས་ཀུན་གྱིས་བརྙས། །
ཤག་ཤག་འབབ་པའི་ཆུ་བོ་ལ། །
བྱིས་པ་རྣམས་ཀྱང་རྒལ་བར་བྱེད། །
ཁ་ཉུང་བཞིན་འཛུམ་གནད་ཕིགས་པ། །
དེ་ལ་ཀུན་གྱིས་བག་ཟོན་བྱེད། །
སྒྲ་མེད་མེར་གྱིས་འགྲོ་བ་ཡི། །
ཆུ་ཀླུང་གཏིང་མཐའ་དཔོག་པར་དཀའ། །
ཆུ་ལ་རི་མོ་བྲིས་པ་བཞིན། །
སྡིག་སེམས་མོད་ལ་འདོར་བྱ་ཞིང་། །
དགེ་བའི་དམ་བཅའ་རྡོ་བ་ཡི། །
རི་མོ་བཞིན་ཏུ་བརྟན་པར་བྱ། །
བསམ་པ་བཟང་ན་འཇིག་རྟེན་གྱི། །
བྱ་བ་ཀུན་ཀྱང་ཆོས་སུ་འགྲོ། །
ཟོ་ཆུན་ལ་བརྟེན་འོབས་ཀྱི་ཆུ། །
ཤིན་ཏུ་མཐོ་བའི་རི་རྩེར་འགྲོ། །
གཙོ་བོར་ལས་འབྲས་དཀོན་མཆོག་ལ། །
བློ་ཕུགས་གཏད་ན་ཅི་བསམ་འགྲུབ། །
ལྷ་ཡི་རྒྱལ་པོས་ཆར་ཕབ་ན། །
ལོ་ཏོག་ཕུན་སུམ་ཚོགས་པར་འགྱུར། །
འཇིག་རྟེན་ཚངས་པའི་རལ་ཀློང་དུ་། །
འཁྱམས་པའི་སརྒ་མཐར་སོན་ཏེ། །
སྒྲིབ་གཉིས་དྲི་མ་འཁྲུད་པའི་ཕྱིར། །
དམ་པའི་ཆོས་ཀྱི་ལམ་དུ་འདྲེན། །
ཆུ་རིགས་བདུན་ལས་མཆོག་གྱུར་པའི། །
ཆུ་མགོ་གངས་ལ་ཐུག་པ་བཞིན། །
ཆོས་ཀྱང་འཁྲུལ་བྲལ་མ་ནོར་བ། །
རྒྱལ་བའི་བཀའ་ལས་འབྱུང་བ་དགོས། །
དེ་ནས་ཟབ་རྒྱས་ཉམས་ལེན་གྱི། །
ལམ་གསུམ་རིམ་པར་འབབ་པ་ཡི་། །
གདམས་ངག་ཚང་ལ་མ་ནོར་བ། །
སྐལ་བཟང་རྣམ་སད་མཆོད་ཡོན་ཡིན། །
འོན་ཀྱང་དུས་ཀྱིས་ཆེར་སྙིགས་ཚེ། །
འཇམ་དབྱངས་བླ་མས་གསལ་མཛད་དེ། །
རྒྱ་མཚོར་བྱིངས་པའི་རིག་བྱེད་བཞི། །
ཉ་ཡི་གཟུགས་ཀྱིས་བཏོན་པ་བཞིན་། །
འདི་འདྲའི་བསྟན་དང་མཇལ་བཞིན་དུ། །
ལྟར་སྣང་ལམ་ལ་སུ་ཞིག་འཇུག །
ལྷ་ཡི་ཆུ་བོ་གང་གཱའི་རྩར། །
བ་ཚྭའི་ཁྲོན་པ་སུ་ཞིག་བརྐོ། །
བློ་ཆུང་སྐལ་དམན་ཟབ་ཟབ་ཀྱི། །
གྲགས་པས་བསླུས་ནས་ལོག་པར་འགྲོ། །
སྨིག་རྒྱུ་ཆུ་རུ་འཁྲུལ་པ་ཡི། །
རི་དྭགས་དོན་མེད་སྡུག་བསྔལ་མྱོང་། །
ཆོས་ཀྱི་ལམ་དུ་འཇུག་པ་ལ། །
དང་པོར་དགེ་བའི་བཤེས་གཉེན་བསྟེན། །
རྒྱ་མཚོར་བགྲོད་འདོད་བྱ་བའི་འགོ། །
དེད་དཔོན་མཁས་པ་འཚོལ་བ་ཡིན། །
འཇིག་རྟེན་འཇིག་རྟེན་འདས་པ་ཡི། །
དགེ་ལེགས་རྩ་བ་བླ་མ་སྟེ། །
འཛམ་གླིང་རྩི་ཤིང་ལོ་འབྲས་ཀུན། །
མ་དྲོས་མཚོར་གནས་ཀླུ་ཡི་དྲིན། །
ང་རྒྱལ་སྤངས་ཏེ་ཞི་དུལ་གྱིས། །
དམ་ཆོས་སྣོད་དུ་རུང་བར་བྱ། །
ཆུ་བོ་སྒང་དུ་མི་གནས་པར། །
དམའ་བའི་གཤོང་དུ་འཁྱིལ་བར་འགྱུར། །
ཆོས་ཀུན་ཅིག་ཅར་མི་ཤེས་ཀྱང་། །
ཅི་ཙམ་ཤེས་བཞིན་དོན་དུ་འགྱུར། །
ཆུ་ཀླུང་རྫོགས་པར་མ་འཐུངས་ཀྱང་། །
ཅི་ཙམ་བཏུངས་པས་སྐོམ་པ་སེལ། །
ཐོས་མང་ཉམས་སུ་མ་བླངས་ན། །
རང་གི་རྒྱུད་ལ་མི་ཕན་ཏེ། །
ཆུ་ནང་ལོ་བརྒྱར་གནས་པ་ཡི། །
རྡོ་བའི་རང་བཞིན་སྐམ་པོར་གནས། །
སྟོང་རྐྱལ་གོམ་པའི་རིམ་པ་ཡིས། །
རྟག་འཇུ་རེས་འཇུ་མི་འཇུ་ལྟར། །
ཐོས་བསམ་སྒོམ་པ་སྒྲ་སྤྱི་ལ། །
བརྟེན་པའི་ཚུལ་ཡང་གསུམ་དུ་གསུངས། །
མི་ཡི་གྲུ་གཟིངས་རྙེད་དུས་འདིར། །
ཐོས་བསམ་སྒོམ་པའི་བ་དན་ལ། །
བརྟེན་ནས་སྲིད་མཚོ་བརྒལ་བྱ་ཡི། །
གྲུ་འདི་ཕྱི་ནས་རྙེད་པར་དཀའ། །
རིགས་དྲུག་སྐྱེ་སྒོ་མཐའ་ཡས་ཀྱང་། །
དལ་བརྒྱད་ཚང་བ་ཤིན་ཏུ་དཀོན། །
ཆུ་བོ་གྲངས་མེད་འབབ་ན་ཡང་། །
ཡན་ལག་བརྒྱད་ལྡན་རེ་རེ་ཙམ། །
སྐྱེས་པའི་སྐད་ཅིག་དེ་ཉིད་ནས། །
མི་སྡོད་འཆི་བདག་ཁར་ཕྱོགས་ཏེ། །
ཆུ་ཀླུང་སྐད་ཅིག་རེ་རེ་བཞིན། །
ཕྱིར་མི་ལྡོག་པར་རྒྱ་མཚོར་འགྲོ། །
མི་རྟག་སྲིན་པོས་བཟུང་བཞིན་དུ། །
སོས་བདེར་སྡོད་པ་ག་ལ་རིགས། །
ཆུ་སྲིན་མཆེ་བའི་ཕྲག་གནས་ལ། །
བདེ་བའི་གོ་སྐབས་ནམ་ཡང་མེད། །
བསྒྲུབས་ཀྱང་ཕ་མཐར་ཕྱིན་མེད་པའི། །
འཇིག་རྟེན་བྱ་བ་བཙན་ཆོད་བྱ། །
ཆུ་གཉེར་གཅིག་རྗེས་གཅིག་ནོན་དེ། །
ཅི་ཙམ་བདས་ཀྱང་ཟིན་དུས་མེད། །
བློ་རིག་སྟོབས་དང་རྩལ་ཆེ་ཡང་། །
དུས་ཀྱི་ཕོ་ཉས་དབང་མེད་འཆིང་། །
ཆུ་ཆེན་རླབས་ཀྱི་གར་མཁན་མ། །
དགུན་དུས་འཁྱག་པའི་སྦུབས་སུ་ཚུད། །
སྒོ་གསུམ་མི་དགེའི་སྤྱོད་ཚུལ་འདིས། །
ཕྱི་མའི་སྐྱེ་བ་ངན་འགྲོར་ངེས། །
རི་བོའི་ཟོམ་ནས་འབབ་པའི་ཆུ། །
གཡང་ས་བརྒྱུད་མར་བརྡབ་ཅིང་འཕྱོ། །
དེ་ནས་ལོ་གྲངས་བྱེ་བ་བརྒྱར། །
བསྲེགས་ཤིང་འཚེད་ཀྱང་འཆི་མི་ནུས། །
རྡོ་སོལ་རི་ལ་ཆར་གྱི་རྒྱུན། །
བབས་པ་བསྐལ་པའི་བར་དུ་ཁོལ། །
འཇིགས་ཆེན་དེ་ལས་སྐྱོབ་པའི་སྐྱབས། །
བསླུ་མེད་དཀོན་མཆོག་གསུམ་ལས་མེད། །
ཆུ་བོའི་རྒྱུན་གྱིས་ཁྱེར་བ་དེ། །
སྒྲོལ་བྱེད་མཉན་པ་ཁོ་ནར་ངེས། །
མཆོག་གསུམ་བྱིན་རླབས་མཐའ་ཡས་ཀྱང་། །
དད་པ་མེད་ན་ཇི་ལྟར་སྐྱོབ། །
རྒྱ་མཚོ་ཆེ་ཡང་ཆར་སྡོད་ཀྱི། །
བྱིའུའི་སྐོམ་པ་སེལ་མི་ནུས། །
འཁོར་བའི་འདམ་ལས་མ་བརྒལ་བའི། །
འཇིག་རྟེན་པ་ལ་བརྟེན་མི་བྱ། །
ཆུས་ཁྱེར་ཆུ་ཡིས་ཁྱེར་བ་ལ། །
འཇུས་ན་གཉིས་ཀ་བྱིང་བར་འགྱུར། །
མཆོག་གསུམ་བརྟེན་ན་དེ་ཡི་ཁྲིམས། །
ལས་འབྲས་བླང་དོར་འབད་པ་གཅེས། །
དེད་དཔོན་བསྟེན་ཀྱང་གྲུ་གཟིངས་སུ། །
མི་སྡོད་དེ་ཉིད་ཇི་ལྟར་སྒྲོལ། །
སྣོད་བཅུད་བདེ་སྡུག་སྣང་བ་ཀུན། །
འཁྲུལ་མེད་སྔོན་བསགས་ལས་ལས་འབྱུང་། །
ཆུ་ཕོར་གང་ཡང་འགྲོ་བ་བཞིར། །
སྣང་ཚུལ་ཐ་དད་འབྱུང་བར་གསུངས། །
དགེ་དང་མི་དགེ་ཆུང་ངུ་ནས། །
བསགས་པས་ཤེས་རྒྱུད་གང་འགྱུར་ཏེ། །
ཆར་གྱི་ཐིགས་པ་བསགས་པས་ཀྱང་། །
མཐའ་ཀླས་ཆུ་ཡི་དཀྱིལ་འཁོར་ཆགས། །
གནས་སྐབས་དགེ་བ་ལྟར་སྣང་ཡང་། །
བསྔོ་དང་འདུན་པས་བསླད་པ་མང་། །
མཆོག་ཏུ་མངར་བ་གང་གཱའི་ཆུ། །
རྒྱ་མཚོར་འདྲེས་ན་ཁ་བར་འགྱུར། །
རྨོངས་པའི་མུན་ནག་གིས་ལྡོངས་ཤིང་། །
ལས་ཀྱི་ཞགས་པས་བཅིངས་པ་རྣམས། །
སྲེད་པའི་ཀླུང་གིས་རབ་དྲངས་ཏེ། །
མི་བཟད་སྐྱེ་བའི་རྒྱ་མཚོར་འགྲོ། །
འདོད་པ་ལན་ཚྭའི་ཆུ་བོ་ནི། །
ཅི་ཙམ་སྤྱད་ཀྱང་མི་ངོམས་པས། །
ཆུ་མཚོ་འཁྱག་པའི་ངང་པ་ལྟར། །
སྲིད་ལས་ངེས་འབྱུང་སྐྱོ་ཤས་སྐྱེད། །
ལས་ཉོན་ན་ཀྲས་ཡོངས་གང་བ། །
སྡུག་བསྔལ་འཁོར་བའི་རྒྱ་མཚོ་ལས། །
སྒྲོལ་བྱེད་བསླབ་གསུམ་གྲུ་བོ་ཆེ། །
བཟུང་ནས་ཐར་པའི་གླིང་དུ་གཤེགས། །
ཁྱད་པར་ཁས་བླངས་ཚུལ་ཁྲིམས་ནི། །
ཉེས་ལྟུང་དྲི་མས་མ་སྦགས་པ། །
རྒྱ་མཚོ་རི་དང་མི་འགྲོགས་ལྟར། །
རྟག་ཏུ་དྲན་ཤེས་བརྟན་པོས་སྲུངས། །
འོན་ཀྱང་མ་རྒན་སེམས་ཅན་རྣམས། །
དོར་ནས་རང་དོན་བྱར་མི་འོས། །
རྒྱ་མཚོའི་གླིང་དུ་གཉེན་བཤེས་ཀུན། །
འབོར་བ་དེད་དཔོན་སྤྱོད་ཚུལ་མིན། །
མཚོར་གནས་གཡོ་དང་མི་བདེན་པའི། །
ཁྱད་པར་གསུམ་ལྡན་ཆུ་ཟླ་ལྟའི། །
འགྲོ་ལ་སྙིང་རྗེ་རྣམ་གསུམ་གྱིས། །
ཐེག་ཆེན་ལམ་གྱི་སྲོག་རྩ་ཚུགས། །
བྱང་ཆུབ་སེམས་ཀྱིས་ཟིན་པའི་དགེ། །
མི་ཟད་བྱང་ཆེན་རྒྱུར་འགྲོ་སྟེ། །
ཛམ་བུའི་འབྲས་བུ་མ་དྲོས་མཚོར། །
ལྷུང་བས་གསེར་སྦྱངས་ཁམས་སུ་འགྱུར། །
རྒྱལ་སྲས་སྤྱོད་པ་མཐའ་ཀླས་ཀྱང་།
ཕ་རོལ་ཕྱིན་པ་དྲུག་ཏུ་འདུ། །
རི་སུལ་ལ་ལུང་ཆུ་བོ་བརྒྱ། །
ཟམ་འོག་གཅིག་ཏུ་འདྲིལ་བ་བཞིན། །
རྒྱལ་སྲས་རྣམས་ནི་བདོག་པ་ཀུན། །
འབྲས་བཅས་གཏོང་སྟེ་སྦྱིན་པའི་མཆོག །
ཆར་གྱིས་རྩི་བཅུད་ལོ་ཏོག་ཀུན། །
བསྐྱངས་ཀྱང་ལན་དང་རེ་བ་མེད། །
རྣམ་དག་ཁྲིམས་ཀྱིས་ཉེས་ལྟུང་གི། །
རྙོག་པ་མ་ལུས་དྲུངས་འབྱིན་ཏེ། །
ཀེ་ཏ་ཀ་འབྲས་བྱེ་མ་ཡིས། །
ཆུ་བོའི་རྙོག་མ་དྭངས་པར་བྱེད། །
དགེ་ཚོགས་མ་ལུས་སྲེག་བྱེད་པའི། །
ཁོང་ཁྲོའི་དགྲ་འཇོམས་བཟོད་པ་སྟེ། །
ཀུན་ཟ་འབར་བའི་མེ་ལྕེ་ནི། །
གསོད་བྱེད་གཉེན་པོ་ཆུ་ཡིན་ནོ། །
རྟག་གུས་བརྩོན་པ་མ་བཏང་ན། །
མི་འགྲུབ་བྱ་བ་ཅི་ཡང་མེད། །
ཆུ་ཐིགས་རྟག་ཏུ་འབབ་པ་ཡིས། །
བྲག་གི་རི་བོ་འབིགས་ལ་ལྟོས། །
བྱིང་རྒོད་སྐྱོན་བྲལ་ཏིང་ངེ་འཛིན། །
གསལ་བར་ཡོན་ཏན་ཐམས་ཅད་འཆར། །
བཻ་ཌཱུར་མེ་ལོང་ཕྱིས་འདྲ་བའི། །
དྭངས་མཚོར་གཟུགས་བརྙན་ཅི་ཡང་གསལ། །
དངོས་ཀུན་སྟོང་པར་དམིགས་པ་ཡིས། །
འཁོར་བའི་གདུང་བ་ཀུན་སེལ་ཏེ། །
ཆུ་ཀླུང་མཐའ་དག་ཨ་གསྟྱས། །
ཧུབ་ཀྱིས་གཞལ་བས་བདུད་རྩིར་འགྱུར། །
ཀླུ་སྒྲུབ་བློ་མཚོ་རྒྱ་ཆེ་བས། །
དངོས་པོར་སྨྲ་རྣམས་སྤོབས་པ་ཕྲོགས། །
རྔམ་གནག་གཏིང་མཐའ་མི་མངོན་པའི། །
རྒྱ་མཚོས་བྱིས་པ་སྐྲག་པར་བྱེད། །
ཟབ་མོའི་དེ་ཉིད་འབྱེད་པ་ལ། །
ཐོག་མར་དགག་བྱ་ངེས་དགོས་ཏེ། །
རྒྱ་མཚོར་ནོར་བུ་ལེན་པ་ལ། །
འཇིགས་པ་གར་ཡོད་ཤེས་པ་གཅེས། །
གདགས་གཞི་ཕུང་སོགས་འདུས་པ་ལ། །
ངའོ་སྙམ་དུ་འཁྲུལ་པ་སྟེ། །
ཀླུང་ཆེན་གདོད་ནས་བྲུབས་འདྲ་ཡང་། །
ཆུ་ཕྲན་དུ་མ་འདུས་པ་ཡིན། །
བཏགས་དོན་རིགས་པས་དཔྱད་པ་ན། །
ངོ་བོས་གྲུབ་པ་འགའ་མེད་དེ། །
ཆུ་ཀླུང་ཡུར་བ་བརྒྱར་དྲངས་པའི། །
ཤུལ་ན་ཟིལ་པ་ཙམ་ཡང་མེད། །
སྟོན་པས་ཇི་སྙེད་བཀའ་བསྩལ་པ། །
སྟོང་དང་རྟེན་འབྱུང་འདིར་འཇུག་སྟེ། །
ས་སྟེང་ཆུ་བོ་མ་ལུས་པ། །
རྒྱ་མཚོ་ཆེན་པོར་གཞོལ་ཞིང་འབབ། །
རང་རྒྱུད་སྨིན་པའི་རྒྱལ་སྲས་ཀྱིས། །
བསྡུ་བ་རྣམ་བཞིས་གདུལ་བྱ་སྐྱོང་། །
རྒྱ་མཚོར་འཇུག་མྱོང་དེད་དཔོན་གྱིས། །
གཞན་ཡང་ཁྲིད་ནས་ནོར་ལ་སྦྱོར། །
རྒྱུ་ཡི་ཐེག་པའི་ལམ་རིང་ཡང་། །
གསང་སྔགས་ཐབས་ཀྱིས་མྱུར་དུ་བགྲོད། །
ཐང་དུ་འདྲེན་དཀའི་གྲུ་བོ་ཆེ། །
རྒྱ་མཚོར་ཞུགས་ན་ཡུད་ཀྱིས་འགྲོ། །
རྡོ་རྗེ་ཅན་གྱིས་ལེགས་གསུངས་པའི། །
གསང་སྔགས་ནུས་པ་བསམ་མི་ཁྱབ། །
གདུང་བ་མ་ཞེས་བོས་པས་ཀྱང་། །
ལྷ་ཡི་ཆུ་བོ་འགུགས་པར་བྱེད་། །
ཟུང་འཇུག་གདེངས་ཅན་བདག་པོའི་གནས་། །
རྡོ་རྗེ་ཐེག་པ་རྒྱ་མཚོ་ཆེའི། །
འཇུག་ངོགས་བདེ་བའི་འབབ་སྟེགས་ནི། །
དབང་བཞིའི་རིན་ཆེན་ཐེམ་སྐས་ཡིན། །
འོན་ཀྱང་དངོས་གྲུབ་རྣམ་གཉིས་ཀྱི། །
གཞི་རྟེན་དམ་ཚིག་སྡོམ་པ་སྟེ། །
རྩ་བ་ཆུ་མཚོ་སྐམ་གྱུར་ན། །
རླབས་ཀྱི་འཕྲེང་བ་གང་ལས་འབྱུང་། །
དེ་ཉིད་རིག་པའི་རྣལ་འབྱོར་པ། །
འདོད་ལ་སྤྱོད་ཀྱང་ཞེན་པ་མེད། །
ཉ་ནི་ཆུ་གཏིང་ཟབ་མོ་ན། །
འགྱུ་ཡང་ཆུ་ཡིས་འཚུབ་མི་འགྱུར། །
ཆགས་སོགས་ཉོན་མོངས་ཉེས་པ་རྣམས། །
ཉོན་མོངས་ལམ་བྱེད་ཉིད་ཀྱིས་འཇོམས། །
རྣ་བར་ཆུ་སོན་ཆུས་འབྱིན་ཞིང་། །
མེས་འཚིག་མེ་ཡིས་གདུངས་པས་ཞི། །
བསྐྱེད་རིམ་ཕྲ་རགས་རྣལ་འབྱོར་གྱིས། །
སྐྱེ་ཤི་བར་དོ་གསུམ་སྦྱོང་སྟེ། །
སྐལ་ལྡན་ཤིང་རྟའི་མཆོད་ཡོན་གྱིས། །
དུག་ཅན་དྲི་མ་འཁྲུད་པ་བཞིན། །
དགའ་བཞིའི་ལྷན་སྐྱེས་བདེ་བ་ཆེས། །
སྟོང་བཞིའི་ཡེ་ཤེས་རྒྱས་འགྱུར་ཏེ། །
ཆུ་བོ་རྣམ་བཞིའི་རྒྱུན་འབབ་པས། །
རྟ་གདོང་མེ་ཆེན་འབར་བར་འགྱུར། །
ཕྲ་བ་གཉུག་མའི་རླུང་སེམས་ལས། །
སྒྱུ་མ་ལྟ་བུའི་སྐུར་བཞེངས་པ། །
དྭངས་པའི་ཆུ་ལས་ཆུ་བུར་དང་། །
དག་པའི་མཁའ་ལས་ཆུ་འཛིན་བཞིན། །
རྩྭ་རྩེའི་ཟིལ་པ་རེ་རེར་ཡང་། །
ཟླ་བའི་གཟུགས་བརྙན་སྣང་བ་བཞིན། །
དཔེ་ཡི་རིམ་པ་རེ་རེས་ཀྱང་། །
འཁོར་འདས་ཆོས་ཀུན་མཚོན་པར་ནུས། །
འཇིག་རྟེན་ཡ་རབས་སྤྱོད་པ་ནས། །
མདོ་སྔགས་ལམ་གྱི་རིམ་པའི་བར། །
དཔེར་བྱ་གཅིག་གིས་མཚོན་པ་འདི། །
ལེགས་བཤད་འཕྲུལ་གྱི་རྒྱ་མཚོ་ཡིན། །
ལོངས་སྤྱོད་འཁོར་ལོའི་ཆུ་གཏེར་ན། །
དབྱངས་ལྡན་ངང་མོ་རྣམ་རོལ་པ། །
དེ་ཡི་ཁ་ལས་ལེགས་བཤད་ཀྱི། །
རྦ་རླབས་འཁྲི་ཤིང་ཅི་ཡང་གཡོ། །
གང་ཡང་བདག་བློའི་ཆུ་གཏེར་ལས་འཁྲུངས་ལེགས་བཤད་གསར་པའི་ཟླ་བ་ནི། །
འཇིག་རྟེན་རྨོངས་པའི་མུན་འཕྲོག་སྙིང་གི་གདུང་སེལ་བསིལ་བའི་རེག་པ་ཅན། །
དེ་ཡི་དགེ་བ་ས་གསུམ་རྣམ་དཀར་འོད་ཀྱི་གོས་བཟང་འཛིན་པ་དེས། །
སྐྱེ་དགུའི་ལེགས་བྱས་བློ་དང་ལྷན་ཅིག་བསྟན་པའི་ཆུ་གཏེར་རྒྱས་གྱུར་ཅིག། །།
རྩོམ་སྒྲིག་པ། དོན་འགྲུབ་རྡོ་རྗེ།