གངས་སྟོད་སེངྒེ་དཀར་མོ་ཁྱོད།།
རོང་དུ་མ་འབབ་གངས་སྟོད་ཟུངས།།
བརྒྱ་ལ་རོང་དུ་བབས་པ་ན།།
གཡུ་རལ་ཉམས་ཀྱིས་མ་དོགས་སམ།།
གཡུ་རལ་ངོམས་ཤིང་གངས་སྟོད་ཟུངས།།
ད་རེས་བླ་མའི་བཀའ་ལ་ཉོན།།
བྲག་སྟོད་བྱ་རྒྱལ་རྒོད་པོ་ཁྱོད།།
ཤོད་དུ་མ་འབབ་བྲག་སྟོད་ཟུངས།།
བརྒྱ་ལ་ཤོད་དུ་འབབ་པ་ན།།
གཤོག་སྒྲོ་ཉམས་ཀྱིས་མ་དོགས་སམ།།
གཤོག་སྒྲོ་ངོམས་ཤིང་བྲག་སྟོད་ཟུངས།།
ད་རེས་བླ་མའི་བཀའ་ལ་ཉོན།།
ནགས་སྟོད་སྟག་གུ་རི་བཀྲ་ཁྱོད།།
ས་མཐར་མ་འབབ་ནགས་སྟོད་ཟུངས།།
བརྒྱ་ལ་ས་མཐར་བབས་པ་ན།།
གྲ་འཛུམ་ཉམས་ཀྱིས་མ་དོགས་སམ།།
གྲ་འཛུམ་ངོམས་ཤིང་ནགས་སྟོད་ཟུངས།།
ད་རེས་བླ་མའི་བཀའ་ལ་ཉོན།།
མཚོ་སྟོད་གསེར་གྱི་ཉ་མོ་ཁྱོད།།
མཚོ་མཐའ་མ་བསྐོར་མཚོ་དཀྱིལ་ཟུངས།།
བརྒྱ་ལ་མཚོ་མཐའ་བསྐོར་བ་ན།།
དོལ་ལ་འཐུམས་ཀྱིས་མ་དོགས་སམ།།
གསེར་མིག་ངོམས་ཤིང་མཚོ་དཀྱིལ་ཟུངས།།
ད་རེས་བླ་མའི་བཀའ་ལ་ཉོན།།
གུང་ཐང་གི་རས་ཆུང་རྡོ་གྲགས་ཁྱོད།།
རྒྱལ་ཁམས་མ་འགྲིམས་རི་ཁྲོད་ཟུངས།།
བརྒྱ་ལ་རྒྱལ་ཁམས་འགྲིམ་པ་ན།།
ཉམས་རྟོགས་འགྲིབས་ཀྱིས་མ་དོགས་སམ།།
ཉམས་རྟོགས་སྐྱོང་ཞིང་རི་ལ་སྡོད།།
ད་རེས་བླ་མའི་བཀའ་ལ་ཉོན།།
རས་ཆུང་པ་དབུས་སུ་གནས་མཇལ་ཕེབས་འདོད་ཀྱིས་ཞུ་བ་ཡང་ཡང་ཕུལ་བའི་ལན་དུ་གསུངས་སོ།།
རྩོམ་སྒྲིག་པ། དོན་འགྲུབ་རྡོ་རྗེ།