རྩམ་པ་དང་མར་ཕྱུར་སྐོར།

རྩམ་པ་ནི་བོད་མིའི་སྲོལ་རྒྱུན་གྱི་ཟས་རིགས་ཐུན་མོང་མ་ཡིན་པ་ཞིག་ཡིན་པ་སྟེ་བཟོ་བདེ་བ་དང།སྤྱོད་བདེ་བ།ཉར་བདེ་བ།ཁྱེར་བདེ་བ་སོགས་ཀྱི་ཁྱད་ཆོས་འཛོམས་པ་ཞིག་ཡིན།བཟའ་རྩམ་ལ་རིགས་མང་སྟེ་ནས་རྩམ་དང་།ཡུག་རྩམ།སྲན་རྩམ་སོགས་ཡོད་དེ་རྒྱུན་ཟས་ནི་ནས་རྩམ་ཡིན་ཞིང་།ནས་རྩམ་ནི་ཐོག་མར་ནས་སྐམ་དུ་བཅུག་རྗེས།ཆུ་འཁོར་ཉུང་ཙམ་ཞིག་གི་ནང་དཀྲུགས་ཏེ་རྔོད་སྣོན་ནང་དུ་བརྔོས་ནས་བཏགས་པའི་ཕྱེ་མ་ཡིན་ལ་དྲི་ཞིམ་ཞིང་རོ་བཅུད་ལྡན། 

  ཕྱུར་བ་ལ་ཡང་མངར་ཕྱུར་དང་།སྔོ་ཕྱུར།སྐྱུར་ཕྱུར།སྐྱ་ཕྱུར་བཅས་ཡོད་ལ་མངར་ཕྱུར་ནི་མར་དང་ཁ་སྤྲི་མ་བླངས་པར་བསྐོལ་བའི་ཕྱུར་བ་ཡིན་ཞིང་།སྔོན་ཕྱུར་ནི་དར་བ་ལན་གཅིག་བསྐོལ་ཏེ་བཏོན་པའི་ཕྱུར་བ་རོ་བཅུད་ལེགས་པ་ཞིག་ཡིན།སྐྱུར་ཕྱུར་ནི་འོ་མ་བསྲུབས་རྗེས་དར་བ་ཅུང་རིང་བར་བསྐོལ་བ་ལས་བཏོན་པའི་ཕྱུར་བ་ཡིན་ཞིང་།སྐྱ་ཕྱུར་ནི་ཕྱུར་ཁུའམ་སྔོ་ཁུ་ཡུན་རིང་བསྐོལ་ཏེ་བསྐམས་ནས་བཏོན་པའི་ཕྱུར་བ་རོ་བཅུད་ཞན་པ་ཞིག་ཡིན་ལ།ལ་ལས་མིང་ལ་ཕྱུར་བའི་ཁཎྜ་ཡང་ཟེར།
  རྩམ་པ་བཟའ་ཐབས་ལ་མར་ཟན་དང་།ཟན་ཕྱེ།གཡིས་﹙སྣུམ﹚རྩམ།ཞག་རྩམ།ཚིལ་རྩམ།ཡུག་རྩམ་བཅས་ཡོད་དེ།མར་ཟན་བརྫི་བྱེད་མར་ཁུའི་ནང་དུམ་ཕྱུར་བ་དང་རྩམ་པ་བསྲེས་ནས་བརྫིས་པའི་སྤགས་རིལ་ཞིག་ཡིན།ཟན་ཕྱེ་ནི་མར་དང་ཕྱུར་བ་།རྩམ་ཕྱེ་བཅས་བསྲེས་ནས་སྤགས་ཀྱི་ཕྱེ་མ་ལ་ཟེར་ཞིང་འགྲུལ་བཞུད་ཀྱི་སྐབས་སུ་འཁྱེར་བདེ་བ་ཞིག་ཡིན།གཡིས་རྩམ་ནི་འབྲུ་སྣུམ་སྟེ་གཡུས་ཀྱི་ནང་རྩམ་ཕྱེ་བཏབ་ནས་བརྫིས་པའི་སྤགས་རིལ་ཞིག་ཡིན།ཞག་རྩམ་ནི་ནོར་ལུག་གི་རུས་པ་གདུས་པའི་ཞག་ནང་དུ་རྩམ་ཕྱེ་བརྗེས་པའི་སྤགས་རོལ་ཞིག་ཡིན།ཚིལ་རྩམ་ནི་ལུག་གི་ཚིལ་བུ་བཙོས་པའམ་བཞུས་པའི་ནང་རྩམ་ཕྱེ་དང་ལན་ཚྭ་བཏབ་ནས་བརྗིས་པའི་སྤགས་རིལ་ཞིག་ཡིན།ཡུག་རྩམ་ནི་ཡུག་པོ་བརྔོས་ནས་བཏགས་པའི་ཕྱེ་མའི་ནང་ལ་མར་རམ་གཡིས་བླུགས་ནས་བརྫིས་པའི་སྤགས་རིལ་ཞིག་ཡིན།དེ་རིགས་ལ་བྲོ་བ་མི་གཅིག་པ་རེ་རེ་ཡོད་ལ་ནུས་པའང་ཁྱད་པར་བ་རེ་ཡོད།།

རྩོམ་སྒྲིག་པ།  དོན་འགྲུབ་རྡོ་རྗེ།