༄༅། །སོ་ཐར་སྡོམ་བརྒྱུད་ཀྱི་གསོལ་འདེབས་བཞུགས། །

༄༅། །སོ་ཐར་སྡོམ་བརྒྱུད་ཀྱི་གསོལ་འདེབས་བཞུགས། །

20130618090720_4596.jpg

མཚན་དཔེའི་གཟུགས་སྐུ་མཐོང་དང་ཚངས་དབྱངས་གསུང་། །ལྷན་ཅིག་ཐོས་པའི་མོད་ལ་སྲིད་ཞིའི་གདུང་། །རབ་བསལ་གང་ཐུགས་རྣམ་མཁྱེན་ལ་སྦྱོར་བ། །ཀུན་མཁྱེན་ཉི་མའི་གཉེན་ལ་གསོལ་བ་འདེབས། །ཤཱ་རིའི་བུ་དང་རྒྱལ་རིགས་སྒྲ་གཅན་འཛིན། །བྲམ་ཟེའི་བཙུན་པ་རཱ་ཧུ་ལ་གུཔྟ། །འཕགས་མཆོག་ཀླུ་སྒྲུབ་སློབ་དཔོན་ལེགས་ལྡན་འབྱེད། །དཔལ་སྦས་ཡེ་ཤེས་སྙིང་པོར་གསོལ་བ་འདེབས། །གངས་ཅན་བསྟན་པའི་ཉི་མ་ཞི་བ་འཚོ། །རྦ་རིགས་རཏྣ་གཙང་པ་རབ་གསལ་ཞབས། །ཤཱཀྱ་མུ་ནེ་གཡོར་པོ་དགེ་བ་འབྱུང་། །དགོངས་པ་རབ་གསལ་ཞབས་ལ་གསོལ་བ་འདེབས། །ཀླུ་མེས་ཚུལ་ཤེས་རྡོ་རྗེ་རྒྱལ་མཚན་དང་། །སྣེ་པོ་གྲགས་རྒྱལ་འབྲེ་ཆེན་ཤེས་རབ་འབར། །བརྩོན་འགྲུས་འབར་དང་གཞོན་ནུ་སེང་གེའི་ཞབས། །གྲོ་སྟོན་བདུད་རྩི་གྲགས་ལ་གསོལ་བ་འདེབས། །མཆིམས་ཆེན་ནམ་མཁའ་གྲགས་དང་གྲགས་ཤེར་བ། །མཆིམས་སྟོན་བློ་བཟང་གྲགས་པ་ཀུན་རྒྱལ་རྗེ། །གྲུབ་པ་ཤེས་རབ་པཎ་ཆེན་དགེ་འདུན་གྲུབ། །གནས་སྙིང་ཀུན་དགའི་མཚན་ལ་གསོལ་བ་འདེབས། །དགེ་འདུན་རྒྱ་མཚོ་དགེ་ལེགས་དཔལ་བཟང་པོ། །དཔལ་འབྱོར་རྒྱ་མཚོ་དཀོན་མཆོག་ཆོས་འཕེལ་དང་། །དཀོན་མཆོག་བསྟན་འཛིན་ངག་དབང་ཆོས་ཀྱི་དཔལ། །ཨོ་རྒྱན་ཆོས་ཀྱི་གྲགས་པར་གསོལ་བ་འདེབས། །འགྱུར་མེད་ཆོས་ལྡན་ཨོ་རྒྱན་བསྟན་འཛིན་རྗེ། །རིག་འཛིན་བཟང་པོ་པདྨ་མདྒ་ལ། ཐུབ་བསྟན་པདྨ་རྒྱས་པའི་ཉིན་བྱེད་དང་། །ཐུབ་བསྟན་ཉིན་བྱེད་རྒྱལ་མཚན་གསོལ་བ་འདེབས། །པདྨ་བཛྲ་ཐུབ་དབང་བསྟན་པའི་ཉི།  །འགྱུར་མེད་ཀུན་བཟང་ཤེས་རབ་ཕུན་ཚོགས་དང་། །ཡོན་ཏན་རྒྱ་མཚོ་ཐུབ་བསྟན་ཆོས་འཕེལ་ཞབས། །སྡོམ་བརྩོན་བཤེས་གཉེན་པདྨ་འོད་གསལ་མཚན། ཐུབ་བསྟན་ལུང་རྟོགས་བསྟན་པའི་རྒྱལ་མཚན་སོགས། །མཁན་བརྒྱུད་དམ་པ་རྣམས་ལ་གསོལ་བ་འདེབས། །ངན་སོང་གནས་གསུམ་སྡུག་བསྔལ་དྲག་པོས་མནར། །མི་དང་འདོད་ལྷ་འགྱུར་བའི་དུཿཁས་གཟིར། །གཟུགས་དང་གཟུགས་མེད་འདུ་བྱེད་འཆིང་བས་བཅིངས། །འཁོར་བའི་རང་མཚན་མངོན་སུམ་མཐོང་བར་ཤོག །ཚུལ་དེས་བཅོས་མིན་ཡིད་འབྱུང་ངེས་པ་ལྔ། །ཡོངས་བྲལ་ད་ཆོག་སྒོ་ནས་གསོལ་བཞིའི་ལས། །འཁྲུལ་མེད་ཆོ་གས་ཚངས་སྤྱོད་དཔལ་ཐོབ་སྟེ། །ངུར་སྨྲིག་འཛིན་པའི་མཆོག་ཏུ་འགྱུར་བར་ཤོག །མཐའ་གཉིས་སྤངས་པའི་བསོད་སྙོམས་ཟས་ཀྱིས་འཚོ། །ཤིང་དྲུང་ཅོག་པུ་ཙམ་གྱི་གནས་མལ་དང་། །རྙེད་སླ་ཕྱག་དར་ཁྲོད་ཀྱི་ངུར་སྨྲིག་གོས། །གཞན་གྱིས་སྤྱད་ཟིན་སྨན་ལ་བསྟེན་པར་ཤོག །ཕམ་པ་བཞི་དང་ལྷག་མ་བཅུ་གསུམ་གྲངས། །སྤང་ལྟུང་སུམ་ཅུ་ལྟུང་བྱེད་བཅུ་ཕྲག་དགུ། །སོར་བཤགས་བཞི་དང་ཉེས་བྱས་བརྒྱ་བཅུ་གཉིས། །བག་ཡོད་བརྟན་པོས་ཚུལ་བཞིན་བསྲུང་བར་ཤོག །གཞན་གྱིས་ཁྲོ་དང་མཚོན་སོགས་ཉེ་བར་བརྡེག །གཤེ་དང་མཚང་འདྲུ་ལ་སོགས་གནོད་ཀུན་ལ། །དྲན་ཤེས་བརྟན་པོས་གཉེན་པོ་ལེགས་བསྟེན་ནས། །རྟག་ཏུ་བཟོད་པའི་གོ་ཆ་བགོ་བར་ཤོག །མཁན་སློབ་དགེ་བའི་བཤེས་ལ་མཆོག་ཏུ་དད། །ཚངས་པ་མཚུངས་པར་སྤྱོད་ལ་གཅིག་ཏུ་གུས། །སྡེ་སྣོད་ལུང་ལ་རབ་སྦྱངས་བསླབ་པ་གསུམ། །མངོན་པར་རྟོག་པས་བདག་རྒྱུད་ཕྱུག་པར་ཤོག །བག་ཡོད་མཐུན་པའི་རླུང་གིས་ཚུལ་ཁྲིམས་གཟིངས། །མངོན་མཐོའི་རིན་ཆེན་གླིང་བགྲོད་ཐར་པའི་ནོར། །ལྷག་བསམ་རྒྱལ་མཚན་རྩེ་མོར་ཡོངས་བཀོད་ནས། །འགྲོ་རྣམས་ཕན་བདེའི་འདོད་རྒུས་ཚིམ་བྱེད་ཤོག །ཅེས་ཀུན་མཁྱེན་རྒྱལ་བའི་དབང་པོ་ངག་དབང་བློ་བཟང་རྒྱ་མཚོས་མཛད་པའི་སྡོམ་རྒྱུན་གསོལ་འདེབས་ལས། བརྒྱུད་པའི་ཁྱད་པར་གྱིས་ཞི་འཚོ་ཡབ་སྲས་ཀྱི་ཤོ་ལོ་ཀ་གཅིག་དང་། དགེ་འདུན་རྒྱ་མཚོ་མན་གྱི་ཤོ་ལོ་ཀ་གཅིག་མཁན་ཆེན་རིན་པོ་ཆེ་དྷརྨཱ་ཤྲཱིས་བསྣན་པར་མཛད་ཅིང་དེ་མན་བཙུན་པ་གཞན་ཕན་མཐའ་ཡས་པས་བསྣན་པ་དགེ།།  སྔ་འགྱུར་སྨད་འདུལ་སོ་ཐར་སྡོམ་བརྒྱུད་ཇི་ལྟར་ཁ་བསྐང་བགྱིས་པའི་ཚུལ་ནི། རྫོགས་ཆེན་མཁན་རབས་དང་པོ་སེང་ཕྲུག་པདྨ་བཀྲ་ཤིས་སམ་པདྨ་མངྒ་ལ་ལས་རྒྱལ་སྲས་གཞན་མཐའ་ཡས་སམ་ཐུབ་བསྟན་པདྨ་རྒྱས་པའི་ཉིན་བྱེད་བསྙེན་པར་རྫོགས་པ་དང་། དེ་ཉིད་ཀྱི་ཞལ་སྔ་ནས་མཁན་ཆེན་པདྨ་བཛྲའམ་པདྨ་དམ་ཆོས་འོད་ཟེར་བསྙེན་པར་རྫོགས་ཚུལ་རྗེ་འདི་ཉིད་ཀྱིས་མཛད་པའི་བཀའ་མ་པོད་དགུའི་དཀར་ཆག་ཏུ་གསལ་ཞིང་།  ཡིག་རྙིང་འགའ་ཞིག་ཏུ་པདྨ་མངྒ་ལ་ནས་གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན་དཔལ་བཟང་པོ་འདྲེན་པར་མཐོང་བས་ཐུབ་བསྟན་ཉིན་བྱེད་རྒྱལ་མཚན་མཆོག་པདྨ་མངྒ་ལ་ནས་བསྙེན་པར་རྫོགས་པར་སྙམ་ཡང་ད་དུང་དཔྱད་པར་འོས།  པདྨ་བཛྲ་ཀྱི་སྡོམ་བརྒྱུད་མཐར་ཆགས་སུ་འདྲེན་སྐབས་འདི་ཉིད་ཀྱི་མཁན་པོ་ཐུབ་བསྟན་པདྨ་རྒྱས་པའི་ཉིན་བྱེད་ལས་མི་དགོས་པར་སྣང་ཡང་།  གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན་དཔལ་བཟང་པོ་མཆོག་ཤྲཱི་སེང་ཆོས་གྲྭའི་མཁན་ཁྲིར་བཞུགས་ནས་གཞི་གསུམ་གྱི་ཕྱག་བཞེས་སྤེལ་བའི་རྒྱུན་ཁམས་དབུས་ཀུན་ཏུ་འཕེལ་བ་སྟེ།  ཨོ་རྒྱན་སྨིན་གྲོལ་གླིང་གི་མཁན་ཆེན་ཚུལ་ཁྲིམས་རྡོ་རྗེ་ཁམས་སུ་ཕེབས་ནས་རྗེ་འདི་ལས་བསྙེན་པར་རྫོགས་པའི་སྡོམ་བརྒྱུད་ཁམས་ནས་སྨིན་གླིང་སོགས་དབུས་སུ་ཡར་འཕེལ་བ་དང་།  ཀཿཐོག་མཁན་པོ་རྡོ་རྗེ་དཔལ་བཟང་ཡང་འདི་ཉིད་ལས་བསྙེན་པར་རྫོགས་པའི་སྡོམ་རྒྱུན་གདན་ས་ཆེན་མོ་ཀཿདཔལ་དུ་ཁྱབ་པ་སོགས་ཀྱིས་བརྒྱུད་པའི་གསོལ་འདེབས་ཏུ་སྔར་ཡོད་སོར་བཞག་བྱས་ཤིང་།  མཁན་ཆེན་པདྨ་བཛྲ་ལས་སྐུ་ཞབས་གཉིས་པ་རྒྱལ་སྲས་གཞན་ཆོས་ཀྱི་སྣང་བའམ་ཐུབ་དབང་བསྟན་པའི་ཉི་མ།  དེ་ལས་མྱ་ངན་མེད་སྤྲུལ་རབ་འབྱམས་ལྔ་པ་འགྱུར་མེད་ཀུན་བཟང་བསྟན་པའི་རྒྱལ་མཚན། དེ་ཉིད་ནས་རིམ་པར་མཁན་ཆེན་ཤེས་རབ་ཕུན་ཚོགས་དང་ཡོན་ཏན་རྒྱ་མཚོའམ་ཡོན་དགའ།  དེ་ཉིད་ལས་མཁན་ཆེན་ཐུབ་བསྟན་ཆོས་འཕེལ་ལམ་ཐུབ་དགའ་ཡིད་བཞིན་ནོར་བུ། དེ་ལས་སྡོམ་བརྩོན་བཤེས་གཉེན་ཆེན་པོ་རིག་འཛིན་དབང་རྒྱལ་ལམ་པདྨ་འོད་གསལ།  དེ་ཉིད་ཀྱི་མཁན་བུ་སྐྱབས་རྗེ་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་དཔལ་བཟང་པོ་སྟེ།  སྨད་འདུལ་སྔ་འགྱུར་རྫོགས་ཆེན་ལུགས་ཀྱི་སྡོམ་བརྩོན་གནས་བརྟན་གསེར་རིའི་ཕྲེང་བ་ཚར་དུ་དངར་བ་ལྟ་བུ་བར་མ་ཆད་པར་བྱོན་པའི་བརྒྱུད་འདེབས་ཀྱི་རིམ་པ་ལེགས་པར་བརྟགས་ཤིང་དཔྱད་དེ་ཁ་སྐོང་བགྱིད་པ་པོ་ནི།  ཤཱཀྱའི་དགེ་སློང་ཐུབ་བསྟན་ངག་དབང་བློ་གྲོས་བཤད་སྒྲུབ་བསྟན་པའི་རྒྱལ་མཚན་ནམ་བསྟན་འཛིན་ལུང་རྟོགས་ཉི་མའོ།།

 རྩོམ་སྒྲིག་པ། དོན་འགྲུབ་རྡོ་རྗེ།