འཇམ་མགོན་བླ་མའི་གསུང་གི་ཡོན་ཏན་རྗེས་སུ་དྲན་པའི་བསྔགས་ཚིག་དད་པའི་མཆོད་སྤྲིན།

u=3303880326,3669819524&fm=26&gp=0.jpg

རྒྱལ་ཀུན་དབྱིངས་རིག་ཐུགས་ཀྱི་གསང་བ་ཐིག །

ཚད་མེད་ཐུགས་རྗེའི་ཤུགས་ཀྱིས་ཉེར་བསྐུལ་བས། །

སྙིགས་དུས་ཐུབ་བསྟན་སྣང་བའི་ཉིན་མོར་བྱེད། །

མི་ཕམ་འཇམ་དཔལ་དགྱེས་པའི་རོལ་གར་དྲན། །


གང་ཞིག་ལྷུན་ནས་བཞད་པའི་དེ་མ་ཐག །

དད་དང་ཤེས་རབ་སྙིང་རྗེའི་མཚོ་ཆེན་རྒྱས། །

ལྷག་པའི་ལྷ་བསྙེན་གཟུངས་སྤོབས་གཏེར་གྱིས་ཕྱུག །

བློ་གྲོས་དྲི་མེད་ནོར་བུ་གཙུག་ན་མཛེས། །


སྒྲ་ཚད་བཟོ་གསོ་ཕྱི་ནང་གཙུག་ལག་གཞུང་། །

མ་ལུས་གཟིགས་པའི་མཁྱེན་རབ་འོད་དཀར་ཅན། །

ལྔ་རིག་མཁས་པའི་རྒྱུ་སྐར་བྱེ་བ་དབུས། །

བཀྲགས་གསལ་འབར་བའི་ངོ་མཚར་མཁའ་ལ་འཕགས། །


རྒྱལ་སྲས་ཁྱུ་མཆོག་འཇིགས་མེད་ཆོས་དབང་ལས། །

རྒྱལ་སྲས་སྤྱོད་པའི་གཞུང་ལུགས་ལེགས་བཞེས་ནས། །

རྒྱལ་གསུང་དགོངས་འགྲེལ་རྒྱ་མཚོའི་བཅུད་ཀྱིས་མྱོས། །

རྒྱལ་བ་དགྱེས་པའི་ལུགས་བཟང་ཕྱོགས་སུ་སྒྲོག །


ལེགས་བཤད་སྣང་བས་རིགས་པའི་གཏེར་ཆེན་འབྱེད། །

ལོག་སྨྲའི་རྙོག་མ་ཀེ་ཏ་ཀེ་ཡིས་བགྲུང་། །

རྨོངས་པའི་མུན་པ་ངེས་ཤེས་སྒྲོན་མེས་སེལ། །

ཤིང་རྟའི་དགོངས་ཟབ་རྒྱན་འགྲེལ་ཟུང་གིས་གསལ། །


དེ་ཉིད་གཟིགས་པའི་ཡེ་ཤེས་སྤྱན་མཆོག་ལྡན། །

ལྷ་མཆོག་འཇམ་དཔལ་དགྱེས་པའི་ཞལ་ལུང་ཐོབ། །

ལྔ་རིག་སྨྲ་བའི་ལྗགས་ཡངས་ཞལ་ཁྱིམ་མཛེས། །

སྨྲ་བ་ངག་ལ་དབང་བའི་མཚན་མ་ཐོབ། །


གསང་ཆེན་རྒྱུད་སྡེའི་མཛོད་འཛིན་པདྨའི་མཚན། །

གསང་ཆེན་རྒྱུད་སྡེའི་གཉེར་བཀའ་གདམས་པའི་མཐུས། །

གསང་སྔགས་སྤྱི་དང་བླ་མེད་རྒྱུད་སྡེ་ཡི། །

གསང་བའི་བུམ་བཟང་སྙིང་པོའི་བཅུད་ཀྱིས་ཁེངས། །


ལྷག་པའི་བདེན་པ་དབྱེར་མེད་རིན་ཆེན་ཁམས། །

མ་རྨོངས་ལྟ་བའི་རླུང་གིས་ཉེར་བསྲུབས་པས། །

སྒོམ་དང་སྤྱོད་བཟང་ཐབས་མཆོག་བང་རིམ་བཀྲ། །

འབྲས་བཟང་རྣམ་རྒྱལ་བཀོད་པའི་ཐེག་པར་བསྔགས། །


ཐབས་ཤེས་རྒྱུད་ཀྱི་སྒྱུ་ལུས་འོད་གསལ་སོགས། །

ཟབ་དོན་རྟོགས་སླའི་མན་ངག་འཛད་མེད་ཀླུང་། །

གཉིས་མེད་རྒྱུད་རྒྱལ་ཕྱི་ནང་གཞན་གསུམ་གནད། །

གསལ་བའི་རྡོ་རྗེ་ཉི་མ་ལུང་གིས་བསྔགས། །


པདྨའི་རྗེ་ཚབ་འགྲོ་འདུལ་མདོ་སྔགས་གླིང་། །

སྨིན་གྲོལ་གདམས་པ་ཟབ་མོའི་དོན་བརྒྱུད་སྩོལ། །

གཞི་དབྱིངས་ཀ་དག་གཉུག་མའི་མཁའ་ཀློང་ནས། །

ལྷུན་འགྲུབ་འོད་གསལ་རིག་རྩལ་ཟེར་བརྒྱ་འབར། །


བྱང་ཆུབ་སེམས་མཆོག་ཆོས་དབྱིངས་ཀློང་ཆེན་པོ། །

རང་བྱུང་ཡེ་ཤེས་སྐུ་གསུམ་ཡེ་རྫོགས་ཆེའི། །

གཞི་ལམ་འབྲས་སྟོན་སྡེ་གསུམ་ཀློང་དགུ་ཡི། །

མངན་ངག་མངོན་ཕྱུང་རྡོ་རྗེའི་སྙིང་པོའི་མཛོད། །

སོ་སོར་ཡང་དག་རིག་བཞིའི་བློ་གྲོས་བཟང་། །

མ་ནོར་རྟོན་བཞིས་མདོ་སྔགས་གསུང་རབ་དབྱེ། །

གྲུབ་གཉིས་ཡིད་བཞིན་གཏེར་གྱི་སྒོ་འབྱེད་པའི། །

རིམ་གཉིས་རྣལ་འབྱོར་སྒྲུབ་པའི་ཐབས་མཆོག་འདོམས། །


གང་གིས་ཇི་སྙེད་གདམས་པའི་ལེགས་བཤད་ཀླུང་། །

རྒྱ་ཆེའི་དོན་འབྱེད་ལུང་རིགས་རླབས་ཕྲེང་གཡོ། །

ཟབ་གསང་གནད་འབྱིན་མན་ངག་བཅུད་དང་ལྡན། །

བྱིན་རླབས་མངོན་མཚན་བསིལ་བའི་ངོ་མཚར་ཆེ། །


བདག་འཛིན་ཉོན་མོངས་དུག་གི་རྩ་བ་གཅོད། །

སྲིད་པའི་འདུ་བྱེད་གདོན་གྱི་ནུས་པ་བཅོམ། །

སྡུག་བསྔལ་ནད་ཀྱི་ཟུག་རྔུ་ཞི་བྱེད་པའི། །

ཁྱེད་གསུང་བདུད་རྩི་འགྲོ་བའི་གདུང་སེལ་མཆོག །


དངོས་དང་མཚན་མར་ཞེན་པའི་སྟོབས་རྩལ་འཁུམས། །

དམན་པའི་ཡིད་ཅན་འཇིགས་པའི་དབུགས་དབྱུང་སྟེར། །

ཐེག་མཆོག་སྙིང་པོའི་རིང་ལུགས་ཆེར་སྒྲོག་པ། །

མི་འཇིགས་བཞི་ལྡན་སེངྒེའི་སྒྲ་ཆེན་ཡིན། །


ཁྱེད་གསུང་ཐོས་པས་རྨོངས་པའི་དྲྭ་བ་གཅོད། །

གཞུང་དོན་བསམ་པས་ངེས་ཤེས་ནོར་བཟང་བསྐྱེད། །

སྒོམ་པས་རྟོགས་པའི་གདེང་སྤོབས་མཆོག་སྩོལ་བ། །

ཡིད་བཞིན་རིན་ཆེན་སྤྲིན་དང་དཔག་བསམ་ལྗོན། །



ཐབས་ཤེས་མངོན་རྟོགས་སྦྱིན་པའི་རླུང་ཤུགས་ཀྱིས། །

དཔག་མེད་ཡོན་ཏན་འབུམ་གྱི་གཏེར་གྱུར་པའི། །

སྐུ་བཞིའི་རིན་ཆེན་གླིང་དུ་མྱུར་སྦྱོར་བའི། །

ཁྱེད་གསུང་ཐེག་མཆོག་ཐར་བའི་གྲུ་གཟེངས་ཆེ། །


རྨད་བྱུང་མཁྱེན་བརྩེའི་སྤྲིན་གྱི་བང་རིམ་ལས། །

བྱུང་བའི་ལེགས་གསུང་རིན་ཆེན་གྲུ་ཆར་བསྙིལ། །

རྒྱལ་བསྟན་ལུང་རྟོགས་མེ་ཏོག་མདངས་རྒྱས་གསོས། །

ཚུལ་འདིར་སྤྱོད་པའི་བློ་ལྡན་སྐལ་བཟང་ཕུལ། །


རབ་མཆོག་ཞི་བསིལ་འཆི་མེད་བདུད་རྩིའི་ཁམས། །

ལུང་རིགས་མན་ངག་རྦ་རླབས་གཡོ་བའི་མཚོར། །

ཤེས་བརྩོན་བཤོག་ཡངས་འདབ་བཟང་ཁྱུ་མཆོག་རྣམས། །

རྟག་པར་རྩེན་པའི་དགའ་སྟོན་ཡར་ཟླའི་དཔལ། 



ལེགས་བཤད་ཉི་ཟླའི་འོད་སྣང་འབུམ་འཆར་བས། །

འགྲོ་ཁམས་ནང་གི་མུན་ཆེན་མཐར་བྱས་ཏེ། །

ཐུབ་བསྟན་སྙིང་པོའི་འདབ་སྟོང་ཡོངས་གྲོལ་ཞིང་། །

འཇིག་རྟེན་མངོན་དགའི་དཔལ་ལ་སྤྱོད་གྱུར་ཅིག །


ཡེ་ཤེས་སྐུ་ཅན་སྨྲ་བའི་དབང་ཕྱུག་གང་། །

མཆོག་སྦྱིན་གསུང་གི་ཡོན་ཏན་རབ་འབྱམས་རྡུལ། །

ཆ་ཙམ་གླེང་བས་ཚེ་རབས་ཕྲེང་བ་ཀུན། །

མགོན་པོ་ཁྱེད་ཀྱི་གསུང་གི་རྗེས་འཛིན་མཛོད། །


མཚན་ལྡན་དགེ་བའི་བཤེས་ཀྱིས་ཡོངས་སུ་ཟིན། །

མཁྱེན་གཏེར་ལྷག་པའི་ལྷ་མཆོག་གུས་པས་བསྙེན། །

རྣམ་གྲོལ་ལམ་སྟོན་གཞུང་བཟང་རིང་དུ་འདྲིས། །

སྙིང་པོ་བསྟན་འཛིན་དམ་པས་སར་ཁྱབ་ཤོག །


འཇམ་མགོན་བླ་མ་མི་ཕམ་ཆོས་རྗེའི་རྨད་བྱུང་གསུང་གི་ཡོན་ཏན་རྗེས་སུ་དྲན་པའི་གཏམ་ཉུང་ངུ་འདི་ལི་ཐང་ཨ་ཆོས་ཀྱིས་བྲིས་པའོ། །

WechatIMG4211.jpeg

རྫོགས་ཆེན་མཁན་ཆེན་ཁྲི་ཟུར་ཨ་ཆོས་རིན་པོ་ཆེའི་སྐུ་པར།

རྩོམ་སྒྲིག་པ།  དོན་འགྲུབ་རྡོ་རྗེ།