༄༅། །ས་གསུམ་འགྲོ་བའི་གཙུག་ནོར་ཁྱབ་བདག་རྫོགས་ཆེན་པ་སྐྱབས་རྗེ་༸ བླ་མ་པདྨ་སྐལ་བཟང་མཆོག །བྱང་རྫ་ཆབ་དལ་འབབ་ཀྱ་ི་གཡས་ཕྱོགས་དྲེལ་མདའི་དཀར་མོ་ལེབ་ཏུ་ཞབས་སོར་འཁོད་དེ་དད་ལྡན་སྐྱ་སེར་མང་པོར་ལུགས་གཉིས་ལམ་སྟོན་གྱི་བཀའ་སློབ་ཟབ་རྒྱས་སྩལ་བར་ཕུལ་བའི་ལེགས་སྦྱར་སྙན་ངག །
མཁན་ཆེན་ཨོ་རྒྱན་རིག་འཛིན།
༈ ༀ་སྭ་སྟི། །ཀ་དག་སྐྱེ་མེད་སྟོང་ཆེན་དབྱིངས་སུ་གདོད་ནས་མངོན་པར་བྱང་ཆུབ་ཅིང་། །མ་འགགས་སྒྱུ་འཕྲུལ་དྲྭ་བའི་རོལ་མོ་ངེས་པ་ལྔ་ཡི་ལང་ཚོས་མཛེས། །སྣ་ཚོགས་གདུལ་བྱའི་མོས་ཁམས་དང་འཚམས་ཟབ་རྒྱས་ཆོས་ཀྱི་སྣང་བ་ཡིས། །འགྲོ་བློའི་ཆུ་སྐྱེས་རྣམ་པར་འཛུམ་མཛད་སྟོན་མཆོག་ཉིན་མོར་བྱེད་པར་འདུད། །དམར་སེར་གུར་གུམ་གསར་བའི་ལང་ཚོར་རྒྱལ་ཀུན་མཁྱེན་པའི་གཟི་འོད་འཕྲོ། །དྲན་པའི་མོད་ལ་འཁྲུལ་སྣང་མུན་སེལ་བློ་གྲོས་པདྨོ་འཛུམ་པའི་གཉེན། །གཏན་གཡོའི་སྒྲ་སྐད་གླུ་རུ་ལེན་མཁས་དབྱངས་ཅན་དཔལ་མོའི་མཛེས་སྡུག་དང་། །རྟག་པར་འགྲོགས་པའི་ཟུང་འཇུག་རོལ་གར་སྙིང་གི་དབུས་སུ་རྟག་རྩེན་མཛོད། །རབ་འབྱམས་རྒྱལ་བའི་གསང་གསུམ་ཡོན་ཏན་མ་ལུས་གཅིག་ཏུ་འདུས་པའི་གཟུགས། །ངོ་མཚར་པདྨ་བཞད་པའི་རྩེར་འཁྲུངས་རིག་འཛིན་ཌཱཀྐིའི་དབུས་ན་མཛེས། །དཔག་ཡས་ཡོན་ཏན་རྒྱ་མཚོའི་སྤྲིན་གྱིས་མཐའ་ཡས་འགྲོ་བའི་རེ་སྐོང་བ། །དཔལ་ལྡན་སངས་རྒྱས་པདྨ་རྒྱལ་པོའི་ཞབས་ཀྱི་པདྨོར་ཕྱག་བགྱིའོ། །རྨད་བྱུང་ཁྱད་ཆོས་ཆེ་བ་དྲུག་གིས་གངས་ལྗོངས་རྒྱལ་བསྟན་ཡོངས་ཀྱི་རྩེར། །མངོན་པར་འཕགས་པའི་ནང་རྒྱུད་སྡེ་གསུམ་མི་ནུབ་ཡུན་དུ་འཛིན་པ་ལ། །ཁྱད་དུ་འཕགས་པའི་སྨོན་ལམ་མཐུ་གྲུབ་འཕོ་ཆེན་རྡོ་རྗེའི་རོལ་མོ་ཡི། །གྲགས་པའི་དཔལ་གྱིས་འཇིག་རྟེན་མཛེས་པའི་གྲུབ་དབང་རྫོགས་ཆེན་ཡབ་སྲས་རྒྱལ། །ཕན་བདེའི་འབྱུང་གནས་ཐུབ་༵དབང་བསྟན་༵པ་ལུང་༵དང་རྟོགས་༵པའི་ཡིད་བཞིན་དབང་། །བཤད་དང་སྒྲུབ་པའི་ལྷ་གོས་རྩེ་མོར་མངོན་པར་བཀུར་བའི་ཤེ་མོང་ཅན། །ས་གསུམ་མཁས་དང་གྲུབ་པའི་གཙུག་ན་ཞབས་ཀྱི་པདྨོ་ངལ་འཚོ་བའི། །བསྟན་༵པའི་༵རྒྱལ་༵མཚན་༵འཛིན་ལ་ཟླ་བྲལ་སྐྱབས་མཆོག་བླ་མ་གཙུག་ཏུ་མཆོད། །ལེགས་བྱས་གསེར་གྱི་་ཤིང་རྟ་ཡིས། །མགྲོན་དུ་བོས་པའི་ཉིན་མོར་བྱེད། །སྐྱེ་རྒུའི་ནང་གི་མུན་སེལ་བ། །དེ་ལ་དད་པའི་པདྨོ་འཛུམ། །
དེ་ལ་འདིར་བོད་མདོ་སྟོད་ཆོས་རིག་གི་ཞིང་ས། གཡས་ནས་འབྲི་ཀླུང་གསེར་ལྡན་དང་གཡོན་ནས་ཟླ་ཀླུང་དངུལ་ལྡན་གཉིས་ནུབ་ནས་ཤར་གྱི་རྒྱ་མཚོར་དལ་གྱིས་འབབ་པའི་དཀྱིལ་དབུས། རི་བོ་ཤེལ་དཀར་གྱི་མདངས་འཛིན་མཁའ་དབྱིངས་མཐོན་པོར་འཕགས་པའི་འབྲི་རྫ་ཟལ་མོ་སྒང་གི་སའི་བྱེ་བྲག སྡེ་བཞི་དགེ་བཅུའི་འབྱོར་བ་ཕུན་སུམ་ཚོགས་པས་ཡོངས་སུ་བརྒྱན་ཞིང་། ས་བཀོད་ལེགས་པདྨ་འདབ་བརྒྱད། གནམ་མཐིང་སྔོན་འཁོར་ལོ་རྩིབ་བརྒྱད། བར་རི་ཕྲན་བཀྲ་ཤིས་རྟགས་བརྒྱད། མ་བཅོས་རང་བྱུང་གི་མཆོད་པ་རྣམ་བརྒྱད་སོགས་སྲིད་པའི་ལེགས་ཚོགས་མཐའ་དག་གཅིག་ཏུ་སྤུངས་པའི་གནས་ཕུན་སུམ་ཚོགས་པ་འདི་ཉིད་དུ།
དཔལ་ཨོ་རྒྱན་ཆོས་ཀྱི་རྒྱལ་པོ་ཉིད་དད་ལྡན་འགྲོ་བའི་ངོར་སླར་ཡང་དགེ་བའི་བཤེས་གཉེན་གྱི་རྣམ་པར་བྱོན་པ། མཁས་པའི་ཚུལ། བཙུན་པའི་ཚུགས། ཉམས་རྟོགས་ཀྱི་ཡོན་ཏན་གང་ནས་བསམ་ཀྱང་དེང་གི་དུས་འདིར་སའི་སྟེང་ན་འགྲན་ཟླ་དང་བྲལ་བ་གང་ཉིད་ཀྱི་ངོ་མཚར་ཞབས་ཟུང་གསེར་གྱི་འཁོར་ལོས་གནས་འདིར་དགེ་བར་བྱས་ཤིང་། ཚངས་དབྱངས་གསུང་གི་བདུད་བརྩིས་སྐྱེ་རྒུ་རྣམས་འདི་དང་གཏན་གྱི་བདེ་བར་དབུགསའབྱིན་པའི་སྐལ་བ་བཟང་པོ་མངོན་དུ་གྱུར་བའི་དུས་འདིར་་་་་་་་་་་།
སླར་སྨྲས་པ།
འོད་མཚན་སྟོང་དུ་འབར་བའི་ཡེ་ཤེས་དཔྱིད། ། བརྩེ་ཆེན་སྐྱ་རེང་སོ་མས་ཉེར་བསྐུལ་ཏེ། །མི་མཇེད་ཞིང་གི་མཁའ་འཆར་ཉིན་མོར་བྱེད། །མཚོ་འཁྲུངས་རྒྱལ་བའི་དབང་པོ་ཞེས་སུ་གྲགས། །གང་དེའི་ཐུགས་བསྐྱེད་ཉ་གང་ཟླ་བའི་གཟུགས། །རླབས་ཆེན་མཛད་འཕྲིན་འོད་སྣང་སྟོང་ཕྲག་གིས། །འཁྱུད་དེ་བསིལ་ལྗོངས་མདོ་ཁམས་ཤར་རིའི་རྩེར། །མངོན་པར་འཆར་གང་བདག་ཅག་མགོན་དུ་ཐོབ། །རིག་འཛིན་གྲུབ་བརྒྱའི་གཙུག་རྒྱན་པད་༵མ་༵འབྱུང་། །སྐལ༵་བཟང་༵གདུལ་བྱའི་དཔལ་དུ་སླར་བྱོན་པ། །སྡོམ་བརྩོན་མཁས་དབང་སྒྱུ་སྐར་འབུམ་གྱི་གཙོ། །སྨྲ་བའི་ཟླ་གཞོན་གང་དེར་ལན་བརྒྱར་གུས། །ལེགས་བྱས་བསོད་ནམས་སྤུར་གྱིས་ཉེར་བྲིས་པའི། །མཐོ་རིས་ལྷ་དབང་ལང་ཚོ་ཉམས་སྨད་པའི། །སྲིད་ཞིའི་མཛེས་སྡུག་གཅིག་ཏུ་སྤུངས་པའི་གཟུགས། །ངོ་མཚར་གངས་ལྡན་ཕྱུག་མོའི་རྒྱན་དུ་གྲུབ། །དབྱངས་ཅན་ཟླ་བའི་ལང་ཚོ་རྟག་རྩེན་པའི། །མཚུངས་བྲལ་མགྲིན་པའི་འོ་མཚོ་གཡོ་བ་ལས། །ཕན་བདེའི་ལྦུ་བ་དཀར་པོའི་དོག་ཕྲེང་ཅན། །སྙན་འཇེབས་ཚིག་གི་རྦ་རླབས་རྣམ་མང་འཕྱོ། །རྒྱལ་ཀུན་ཡེ་ཤེས་སེམས་དཔའ་འཇམ་པའི་དབྱངས། །སྙིང་ལ་རྗེས་སུ་ཆགས་པའི་གཟི་བྱིན་གྱིས། །ཡུན་རིང་སྦྱངས་བའི་ངལ་བ་མ་བྱས་པར། །ཇི་སྙེད་ཤེས་བྱའི་དངོས་ཀུན་མ་འདྲེས་གཟིགས། །རབ་འབྱམས་ཤེས་བྱ་རྒྱ་མཚོའི་རྗེས་འགྲོ་བའི། །མཚུངས་མེད་མཁྱེན་རབ་ལྷ་ཡི་ལམ་ཡངས་པོར། །བརྒྱུད་གསུམ་མན་ངག་སྤྲིན་ཕུང་གཡོ་བ་ལས། །ཟབ་རྒུའི་གདམས་ངག་གྲུ་ཆར་འཛད་མེད་འཇོ། །བཅས་རང་ཉེས་པ་ཕྲ་མོས་མ་གོས་པའི། །སྡོམ་གསུམ་པདྨ་དཀར་པོའི་དགའ་ཚལ་ནས། །བྱུང་བའི་དྲི་བསུང་མངར་མོས་སྐྱེ་རྒུའི་ཡིད། །དབང་མེད་བྲན་དུ་བྱས་པའི་རྣམ་ཐར་རྨད། །གངས་རྒྱན་ལྔ་ཟུང་རིག་པའི་ཆུ་སྐྱེས་ཚལ། །དུས་མཐར་སྙིགས་ལྔའི་མུན་པས་ཉམས་ཉེའི་ཚེ། །ཕྲིན་ལས་འོད་ཟེར་བརྒྱ་བས་འདབ་མ་སྟོང་། །འཛུམ་པའི་མཛད་བཟང་རི་མོ་ཀུན་དུ་གསལ། །ལེགས་བྱས་སྤྲིན་གྱི་བང་རིམ་མཐོན་པོའི་རྩེར། །དམ་པའི་ཚུལ་དགུའི་ཡོན་ཏན་ཆ་རྫོགས་ཤིང་། །མཐོ་རིས་དྲེགས་པའི་དཔལ་ཀུན་ཟིལ་གནོན་པའི། །ཡ་མཚན་ཆོས་ཀྱི་ཟླ་བ་སྲིད་པའི་མིག །ཆོལ་གསུམ་མཁས་གྲུབ་སྒྱུ་སྐར་འབུམ་གྱི་དབུས། །ངོ་མཚར་མཁྱེན་པའི་འོད་སྣང་སྤྲོ་བཞིན་དུ། །བསིལ་ལྗོངས་ལྷ་ལམ་རྒྱན་དུ་རྟག་གཞུགས་ཤིང་། །སྐལ་བཟང་ཀུ་མུད་དགའ་སྟོན་དར་གྱུར་ཅིག །ཇི་ལྟའི་ཆོས་ཉིད་བདེན་དོན་མངོན་གཟིགས་རིག་འཛིན་གྲུབ་པ་ཡོངས་ཀྱི་གཙོ། །ཇི་སྙེད་ཤེས་བྱའི་དངོས་ཀུན་མཁྱེན་པའི་དཔག་ཡས་མཁས་རྣམས་གཙུག་གི་ནོར། །བསྟན་འགྲོར་སྨན་པའི་ཕྲིན་ལས་བཟང་པོས་འཇིག་རྟེན་ཁམས་ཀུན་རྟག་ཁྱབ་པའི། །དཔལ་ལྡན་བླ་མ་པདྨའི་མཚན་ཅན་ཞིང་འདིའི་མགོན་དུ་རྟག་བཞུགས་གསོལ། །ཕྱི་ལྟར་དམ་ཆོས་འདུལ་བའི་ཀུན་སྤྱོད་ཉེས་ལྟུང་ཕྲ་མོའི་རྡུལ་དང་བྲལ། །ནང་དུ་བྱང་སེམས་བསླབ་པའི་ངོ་བོར་རང་འདོད་ཡིད་བྱེད་དུག་དང་བྲལ། །གསང་བ་གསང་ཆེན་རིག་འཛིན་དམ་ཚིག་མཚན་འཛིན་རྟོག་པས་མ་གོས་པའི། །སུམ་ལྡན་རྡོ་རྗེ་འཛིན་པའི་རྗེ་བོར་བསྐལ་མཐའི་བར་དུ་འཚོ་བཞེས་གསོལ། །བཀྲ་ཤིས་གཡས་འཁྱིལ་སྟོང་གི་སྒྲ་དབྱངས་དང་། །འགྲོགས་པའི་གྲགས་སྙན་རྒྱ་མཚོའི་མུ་ཁྱུད་ལས། །བརྒལ་བའི་དཔལ་གྱིས་ས་གསུམ་སྐྱེ་རྒུ་རྣམས། །སྲིད་པར་འཁྱམས་པའི་སྐལ་བ་ཐུང་གྱུར་ཅིག །བསྟན་འཛིན་སྐྱེས་བུའི་ཞབས་པད་སྐལ་བརྒྱར་བརྟན། །བསྟན་ལ་གུས་པའི་སྦྱིན་བདག་འབྱོར་བ་རྒྱས། །བསྟན་པ་རིན་ཆེན་མཆོག་གིས་ས་གསུམ་ཁྱབ། །བསྟན་པའི་འབྲས་བུ་ཞིང་ཀུན་སྨིན་གྱུར་ཅིག །བྱེ་བ་འབུམ་ཕྲག་ཤིས་པའི་ཉིང་བཅུད་སྲིད་དང་ཞི་བའི་གདུང་སེལ་སྨན། །ཕན་དང་བདེ་བའི་བདུད་རྩིའི་གྲུ་ཆར་འཛད་དུ་མེད་པ་འཇོ་བའི་གནས། །རྒྱལ་བསྟན་སྤྲིན་གྱི་བླ་བྲེ་སོ་མས་ས་གསུམ་མཁའ་དབྱིངས་རབ་མཛེས་ཤིང་། །ལེགས་རྒུའི་དཔལ་གྱིས་ཡིད་ཅན་མཐའ་དག་ཀུན་ཏུ་དགེ་བའི་བཀྲ་ཤིས་ཤོག །ཚངས་དབང་ལྷ་ཡི་འབྱོར་བས་མཚོན་མིན་མང་དུ་ཐོས་པའི་དགའ་སྟོན་ཆེར། །རྟག་པར་ལོངས་སུ་སྤྱོད་ལ་བྲེལ་བའི་ཚངས་སྤྱོད་དགེ་སྦྱོང་གཞོན་ནུའི་ཁྱུས། །ཡངས་པའི་ས་ཆེན་ཁྱོན་ཀུན་གང་ཞིང་འཆད་རྩོད་རྩོམ་པའི་ཤེ་མོང་གིས། །ཐུབ་བསྟན་ལྷ་ཡི་གོས་བཟང་རབ་མཛེས་སྲིད་པའི་རྩེ་མོར་བསྒྲེངས་གྱུར་ཅིག །རྣམ་པར་གཡེང་བའི་གྲོང་ལས་རབ་བརྒལ་ཞི་བའི་ནགས་ཀླུང་སྟུག་པོའི་ཁྲོད། །ཚུལ་ཁྲིམས་པད་དཀར་འཛུམ་པའི་དྲི་ཡིས་སྐལ་བཟང་བུང་བ་ཉེར་་སྡུད་ཅིང་། །གཡོ་མེད་ཞི་གནས་རབ་དྭངས་རྫིང་བུར་ལྷག་མཐོང་ཟླ་གཟུགས་རྟག་མཛེས་པའི། །ཕུལ་བྱུང་སྐྱིད་པའི་དགའ་ཚལ་གང་དེར་སྐྱེ་རྒུ་ཀུན་ཀྱང་འདུན་གྱུར་ཅིག །འདི་དང་གཏན་གྱི་རྒུད་པའི་མུན་འཇོམས་ཞིང་། །འཕྲལ་དང་ཡུན་ཏུ་སྣང་བ་མཆོག་སྦྱིན་མཁན། །མཚུངས་པ་མེད་པའི་ཤེས་རབ་ཉིན་མོར་བྱེད། །སྐྱེ་ཀུན་སྐྱེ་རྒུའི་ཡིད་མཁར་འཆར་གྱུར་ཅིག །དཔལ་ལྡན་ལེགས་བྱས་ཆུ་འཛིན་དཀར་པོས་རྣམ་པར་མཛེས་པའི་བསིལ་ལྗོངས་མཁར། །མཆོག་གསུམ་ཉི་ཟླའི་འོད་སྣང་རྟག་འཕྲོ་མེས་པོའི་གྲགས་སྙན་འབྲུག་སྒྲ་ཡིས། །ཕྱོགས་ཀྱི་སྐྱེ་རྒུའི་རྨ་བྱ་རབ་འགུགས་ལོ་རྒྱུས་རིང་མོའི་གཟི་མདངས་ཉིད། །མི་ཉམས་དཔལ་གྱིས་ས་ཆེན་འདི་ཉིད་ཡུན་ཏུ་མཛེས་པའི་བཀྲ་ཤིས་ཤོག །འདིས་མཚོན་དུས་གསུམ་ལེགས་བྱས་ཆུ་རྒྱུན་རྣམ་མཁྱེན་རྒྱ་མཚོ་ཆེར་གཞོལ་ཞིང་། །མཐའ་ཡས་སྤངས་རྟོགས་རྒྱ་ཆེའི་རླབས་ཕྲིང་མཁའ་དབྱིངས་འཕྱོ་བའི་ཟིལ་མ་འབུམ། །ས་གསུམ་འགྲོ་བའི་གཙུག་ཏུ་མངོན་བབས་མི་གཟོད་དུག་ལྔའི་ཚ་གདུངས་གཞིལ། །བདེ་སྐྱིད་བསིལ་བའི་དགའ་སྟོན་སྟུག་པོར་ཡུན་ཏུ་སྤྱོད་པའི་བཀྲ་ཤིས་ཤོག །
གུས་ཕྲན་ཨོ་རྒྱན་རིག་འཛིན་ཞེས་འབོད་པས་བོད་རབ་རྒྱན་ཤིང་ལུག་ཟླ་༧ཚེས་༡༣ ལ་བྲིས།།
རྩོམ་སྒྲིག་པ། དོན་འགྲུབ་རྡོ་རྗེ།