ན་མོ་གུ་རུ་པདྨ་ཀ་ར་ཡེ། ཨེ་མ་ཧོ།
བདེ་ཆེན་ཞིང་དེར་སྣང་བ་མཐའ་ཡས་མགོན། །
ཐུགས་ཀའི་ཧྲཱིཿ་ཡིག་འོ་མ་རྒྱ་མཚོར་བབས། །
ཡ་མཚན་བརྗོད་བྲལ་མཚན་དཔེའི་སྐུར་སྣང་བ།།
གུ་རུ་མཚོ་སྐྱེས་རྡོ་རྗེ་ཞེས་སུ་གྲགས། །
སྨོན་ལམ་དབང་གིས་ཨིནྡྲ་བྷོ་དྷིར་འཕྲད། །
ཡུལ་དེར་བྱོན་ནས་དམ་ཆོས་སྒྲོན་མེ་སྤར། །
འོད་འཆང་མ་སོགས་བཙུན་མོའི་འཁོར་གྱིས་སྐོར། །
གུ་རུ་པདྨ་རྒྱལ་པོ་མཚན་མཆོག་སྣང་། །
འགྲོ་དོན་ལ་དགོངས་བསིལ་བའི་ཚལ་དུ་བཞུད། །
གཟུགས་ཅན་གཟུགས་མེད་ལྷ་སྲིན་བྲན་དུ་བཀོལ། །
གསང་སྔགས་ཕྱི་རྒྱུད་སྡེ་གསུམ་གསན་བཞེས་མཛད། །
གུ་རུ་ཉི་མ་འོད་ཟེར་སྐུ་རུ་སྤྲུལ། །
ཡང་ལེ་ཤོད་དུ་ཡང་གསང་སྒྲུབ་པ་མཛད། །
ཀུན་དགའ་འབུམ་སོགས་གཤེས་གཉེན་ཚུལ་བསྟེན་ནས། །
ཐུགས་ཟབ་དགོངས་པ་ཨ་ཏི་གསང་སྡེ་གསན། །
ཤཱཀྱ་སེང་གེས་འགྲོ་དྲུག་འདྲེན་པར་མཛད། །
བདེ་བྱེད་བརྩེགས་དང་སོ་ས་གླིང་ཉིད་དུ། །
ཤྲཱི་སེང་དང་བྲ་བྷ་ཧ་ཏི་བསྟེན། །
རྫོགས་པ་ཆེན་པོའི་ཆོས་རྣམས་ཐུགས་སུ་ཆུད། །
གུ་རུ་ཨོ་རྒྱན་རྡོ་རྗེ་འཆང་ཆེན་པོ། །
ཟ་ཧོར་ཡུལ་བྱོན་གཏུལ་ཞུགས་མཛད་པ་སྐྱོང་། །
མན་དཱ་ར་བ་གསང་ལམ་རྟོགས་པ་མཉེས། །
འབྲེལ་ཚད་དོན་ལྡན་རྒྱལ་ཁབ་ཆོས་ལ་བཙུད། །
མཁྱེན་རབ་ཐོགས་མེད་བློ་ལྡན་མཆོག་སྲེད་རྒྱལ། །
ཏི་གྲོ་བྲག་དང་མཆིམས་ཕུ་གནས་རྣམས་སུ། །
ཚེ་ཡི་རིག་འཛིན་སྒྲུབ་པས་གྲུབ་པ་ཐོབ། །
ཟག་མེད་རྡོ་རྗེ་ལྟ་བུ་སྐུ་མཆོག་མཉེས། །
རིག་འཛིན་པདྨ་ཐོད་ཕྲེང་རྩལ་དུ་གྲགས། །
ཟངས་གླིང་ལ་སོགས་མུ་སྟེགས་གདུག་པའི་ཚོགས། །
ཞི་དྲག་སྣ་ཚོགས་ཐབས་ཀྱིས་བཏུལ་བ་དང་། །
སྣང་སྲིད་དབང་བསྒྱུར་སྲིད་གསུམ་མངའ་དབང་བསྡུས། །
མཐུ་ལྡན་གུ་རུ་སེང་གེ་སྒྲ་སྒྲོག་ཅེས། །
སྟག་ཚང་སེང་གེ་ལྷ་སྲིན་དམ་ལ་བཏགས། །
མི་མིན་རྒྱལ་བསེན་དམ་སྲིའི་རྒྱུ་བ་བཅད། །
ཀླུ་གཉན་སྡེ་བརྒྱད་མ་ལུས་ཟིལ་གྱིས་མནན།།
ཆེ་མཆོག་བཛྲ་ཁྲག་འཐུང་གྲོ་བོ་ལོད། །
མངའ་བདག་རྒྱལ་བོས་གུས་ཕུལ་བོད་དུ་བྱོན། །
བོད་ཡུལ་དཀོན་མཆོག་གསུམ་གྱི་བསྟན་པ་བཙུགས། །
རྒྱ་བོད་པཎ་གྲུབ་སྤྱན་དྲངས་མདོ་སྔགས་བསྒྱུར། །
རྗེས་འབངས་ལ་སོགས་གྲུབ་མཉེས་དངོས་གྲུབ་ཐོབ། །
བརྒྱ་དང་བཅུ་གཅིག་བོད་ཡུལ་འགྲོ་དོན་མཛད། །
མང་ཡུལ་གུང་ཁར་ལྷ་སྲས་སྐྱེལ་མ་མཛད། །
སིངྒ་ལ་རྒྱུད་ལྷོ་ནུབ་སྲིན་གླིང་བྱོན། །
སྲིན་པོ་མ་རུང་ཚོགས་རྣམས་ཆོས་ལ་བཙུད། །
དད་པ་ཅན་ལ་ང་ཉིད་འདུ་འབྲལ་མེད། །
གསོལ་བ་ཐོབས་དང་བྱིན་རླབས་རྟག་དུ་འཇུག །
ང་ཡི་རྗེས་འཇུག་བོད་འབངས་སྐལ་ལྡན་དག །
ལས་འབྲས་སྲུང་ཞིང་རང་རྒྱུད་ཐུལ་བར་མཛོད། །
ང་ཡི་མཚན་སྔགས་བཛྲ་གུ་རུ་བགྲངས།།
རྡོ་རྗེ་ཚིག་བདུན་བླ་མའི་རྣལ་འབྱོར་སྒོམས།།
འཆི་ཁ་དྲོད་རྟག་རང་མགོ་ཐོན་པར་བྱོས། །
མཉམ་ལེན་ཀུན་ཀྱི་རྩ་བ་དེ་ལས་མེད། །
སྐུ་དྲིན་བསམ་མི་ཡོད་ན་གསོལ་བ་ཐོབས། །
ཐུགས་རྗེ་ཟེར་ཐག་ནམ་ཡང་ཆད་མི་འགྱུར། །
སྙིང་རུས་བརྟན་པོས་སྒྲུབ་པ་བྱེད་ནུས་ན། །
བར་ཆད་བདུད་དབང་མི་བཏང་ང་ཡིས་སྐྱོབས། །
དེང་དུས་སྙིགས་མ་ལྔ་བདོ་གནས་སྐབས་འདིར།།
ལས་ངན་རྒྱུ་འབྲས་རྣམ་སྨིན་མཚོ་ལྟར་བརྡོལ།།
ཕྱི་རྐྱེན་འབྱུང་བཞི་འཇིགས་པས་སྐྱེ་འགྲོ་མནར། །
ནང་རྐྱེན་གཡུལ་འཁྲུག་འགྲོ་རྣམས་བདེ་སྐྱིད་བཅོམས།།
དེ་དུས་འགལ་རྐྱེན་བར་ཆད་འབྱུང་ཉེ་འདིར།།
དུས་གསུམ་སངས་རྒྱས་རྣམ་སྤྲུལ་འགྲོ་བའི་མགོན།།
འབྱུང་བཞིར་དབང་བསྒྱུར་ཨོ་རྒྱན་པདྨ་འབྱུང་། །
མོས་གུས་གསོལ་འདེབས་རྣམ་ཐར་ཀློག་འདོན་དང་། །
རི་བྲག་གནས་གཙང་མཆོད་རྟེན་སྐུ་བརྙན་བཞེངས། །
བ་ཛྲ་གུ་རུའི་དར་ལྕོག་ཅི་ནུས་གྱིས། །
རྣམ་དཀར་དགེ་བསགས་བྱང་ཆུབ་སེམས་མཆོག་སྒོམས། །
ཐུགས་སྐྱེད་དག་པའི་སྨོན་ལམ་རྣམ་དག་ཐོབས།།
དུས་འཁྲུག་ཞི་ཞིང་རྒྱལ་ཁབ་བདེ་ཞིང་སྐྱིད། །
འཛམ་གླིང་ཞི་བདེ་རྫོགས་ལྡན་དཔལ་གྱིས་འཚོ། །
དོན་གཉིས་ལྷུན་འགྲུབ་དགེ་ལེགས་ས་གསུམ་ཁྱབ།།
དེའི་ཕྱིར་དད་ལྡན་མོས་གུས་བུ་སློབ་རྣམས། །
པདྨའི་རྣམ་ཐར་ཉུང་བསྡུས་འདིར་སྒྲུབ་གནད། །
ཚིག་ཉུང་དོན་བསྡུས་བྱིན་རླབས་ཟབ་ཆོས་ཡིན། །
ཛཡིད་མི་ཆེས་ན་སྒྲུབ་བརྩོན་བྱེད་ལ་རག། །
དམ་མེད་ལོག་ལྟ་ཅན་ལ་གསང་བའི་རྒྱ། །
བཀའ་འདི་གསང་བའི་ལྷ་མོ་སྡེ་ལྔར་བཅོལ། །
ལས་འཕྲོ་སྐལ་ལྡན་ཅན་དང་ཕྲད་པར་ཤོག།
འཕྲད་ནས་འགྲོ་དོན་འཔག་མེད་འབྱུང་བར་ཤོག།
ཕྱག་འཚལ་མཆོད་འབུལ་སྡིག་ལྟུང་མ་ལུས་བཤགས། །
དགེ་ལ་ཡི་རངས་ཆོས་འཁོར་སྐོར་བར་ཞུ། །
མྱ་ངན་མི་འདའ་རྡོ་རྗེ་ངོ་བོར་བཞུགས། །
དུས་གསུམ་དགེ་ཚོགས་མ་ལུས་འགྲོ་ལ་བསྔོ། །
བླ་མེད་ཁྱེད་ཀྱི་ཞབས་དྲུང་སྐྱེས་བར་ཤོག །
ཨཱྃ་ཨ་ཧཱ་བཛྲ་གུ་རུ་པདྨ་སིངྷི་ཧཱུཾ།
ཞེས་པའང་མདང་ནུབ་རྨི་ལམ་དུ་བླ་མ་ཨོ་རྒྱན་རིན་པོ་ཆེ་མཇལ་བས་ཉམས་འཆར་བྱུང་བ་ལ་དགའ་དད་སྤྲོ་གསུམ་གྱི་དུས་ཚེས་ཁྱད་པར་བ་ཡར་ངོས་ཚེས་བཅུ་ལ་རྟགས་དང་རྟེན་འབྲེལ་གྱི་ཚུལ་དུ་མ་ཧ་ཙི་ནའི་ཡུལ་རབ་མཛེས་ཤེལ་གྱི་ཐོག་བརྩེགས་བཅུ་གསུམ་ལས་བདེ་སྟོང་འོད་གསལ་འཆར་བའི་ལྡིང་ཁང་ནས་སྙོམས་ལས་པ་ནམ་སྨྱོན་མིང་ཅན་གྱིས་སླར་ཡང་སྨོན་པ་དང་བཅས་ཕྱི་ལོ2024ཟླ4ཚེས་10ལ་ཕུལ་བའོ།།
རྩོམ་སྒྲིག་པ། དོན་འགྲུབ་རྡོ་རྗེ།