མཁན་རབས་གཉིས་པ། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་ནི། རྗེ་འདིའི་རྣམ་ཐར་རྒྱས་པ་གོང་དུ་གདན་རབས་ཀྱི་སྐབས་སུ་སོང་ཞིང་འདིར་རང་རྣམ་ཚིགས་བཅད་མ་བཞུགས་པའང་ཚད་ཐུབ་ཁུངས་ལུང་གི་ཚུལ་དུ་བཀོད་པ་ནི། ༈ རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པའི་སྤྱོད་ཚུལ་མདོར་བསྡུས་ཚིགས་བཅད་མ་བཞུགས་སོ། །ན་མོ་གུ་རུ་བྷྱཿ མི་དུག་ལྔའི་ནད་ཀྱིས་གདུང་བ་ལ། །ཆོས་བདུད་རྩིའི་སྨན་མཆོག་སྩོལ་མཛད་པའི། །རྗེ་སྨན་པའི་རྒྱལ་པོ་བླ་མ་རྣམས། །དེང་བདེ་ཆེན་འཁོར་ལོའི་རྒྱན་དུ་བཞུགས། །མི་བདག་འདྲའི་སྒོ་གསུམ་འདུ་བྱེད་ལ། །རྣམ་ཐར་དུ་སྒྲོ་འདོགས་བགྱིས་ན་ཡང༌། །དོན་ལྡན་གྱི་དགོས་པ་མ་མཐོང་ཕྱིར། །སྔར་བརྗོད་འདོད་ཡིད་ལ་མ་མཆིས་མོད། །ད་འོན་ཀྱང་རྔ་ལ་དབྱུ་གུ་བཞིན། །ཁྱེད་དོན་གཉེར་ཆེན་པོས་བསྐུལ་ལགས་ན། །སྦ་གསང་ཡང་བྱ་དོན་མ་མཆིས་པས། །འཛེམ་མེད་དུ་བརྗོད་ལ་སྙན་གསོན་ཅིག །བདག་ཐོག་མེད་དུས་ནས་ད་བར་དུ། །ལས་ཉོན་གྱི་གྲོགས་ངན་གྱིས་བསླུས་ནས། །སྲིད་འཁོར་བ་འདི་རུ་འཁྱམས་པ་ལ། །གྲངས་བསྒྲངས་པས་ཟད་པ་མ་མཆིས་ཀྱང་༌། །དུས་ད་ལྟའི་སྐྱེ་བའི་སྲིད་པ་འདི། །ཡུལ་གང་དུ་བཟུང་བའི་ཚུལ་སྨོས་ན། །ཤར་མདོ་ཁམས་འཛིན་མའི་ལྟེ་བ་ན། །མི་ཆོས་ལྡན་རྒྱལ་པོས་བསྲུང་བའི་ཕྱོགས། །ལྷ་རྣམ་མང་ཐོས་པའི་སྲས་པོ་ཡི། །གནས་ལྷུན་སྟུག་རྫ་རི་མཐོན་པོ་ཡོད། །རིའི་ཉེ་འཁོར་སྤངས་ལྗོངས་མཛེས་པ་ལ། །སྨན་མེ་ཏོག་ཚལ་གྱིས་བཀྲ་བ་དེའི། །མིང་བརྗོད་ན་རྫ་རྒྱལ་འཕན་ཕྱུག་ཅེས། །ཆབ་ཆུ་ཀླུང་གཡོན་ནས་འབབ་པ་ཡོད། །དེའི་ཤར་ནས་ཤར་དུ་ས་འཛིན་གྱི། །རྒྱུན་དར་ཡོལ་བྲེས་འདྲ་གསུམ་གྱི་སྣ། །ཀླུང་ཉལ་འགྲོའི་བུ་མོས་བཟུང་འདྲའི་མདུན། །ཐང་རིན་ཆེན་བྱེ་མ་བརྡལ་འདྲ་ཡོད། །དེའིབཤད་གཡས་ལུང་ལམ་གསུམ་ཆུ་བོ་ཡི།།རྒྱུན་སྐམ་པའི་མིང་གིས་བཏགས་པའི་ས། །སྐམ་ཆེ་ཆུང་ཞེས་བྱའི་ཕྱི་མ་རུ། །ལོ་དྲག་པོ་ལྕགས་སྤྲེལ་ཤར་བའི་ཚེ། །བོད་མི་བུ་རུས་དྲུག་ཅེས་བྱའི་གྲས། །ལྡོང་སྨུག་པོའི་རིགས་ལ་བཙན་ཁ་བཞིར། །ཡོངས་གྱེས་པའི་བྱེ་བྲག་དགེ་རྩེ་ཡི། །ཡུལ་དགེ་མང་ཨ་དོན་རུས་རྒྱུད་ལ། །མི་འབྱོར་ལྡན་ཆོས་བཟང་བྱ་བ་བྱུང་༌། །དེའི་ཚ་བོ་ཚེ་རིང་ནོར་བུ་དང་༌། །མ་ཀརྨ་སྒྲོན་གྱི་བུ་རུ་སྐྱེས། །རྟེན་དལ་བའི་མྱུ་གུ་གསར་པ་དང༌། །མཁར་དབང་པོའི་གཞུ་རིས་ལྷན་ཅིག་མཐོང༌། །རྗེ་དགེ་བའི་བཤེས་གཉེན་འགའ་ཞིག་གིས། །འདི་སྤྲུལ་བའི་སྐུ་ཞིག་ཡིན་ཞེས་བསྒྲགས། །གཏམ་རྒྱུ་མཚན་མེད་པའི་འུད་གོག་དེས། །མི་ཀུན་ཀྱིས་སྤྲུལ་སྐུར་སྒྲོ་འདོགས་བྱས། །དེའི་རྐྱེན་གྱིས་དམ་པ་འགའ་ཞིག་གིས། །སྐྱེ་སྲིད་དུ་ཐོབ་ཤ་བྱེད་པ་བྱུང༌། །དེ་ཡིན་ཡང་སྔོན་སྨོན་དགེ་བའི་མཐུས། །ཆུང་སྐྱེས་ནས་ཆོས་ཀྱིས་བསྲུང་མཛད་ཅིང༌། །ལོ་གསུམ་ནས་དགེ་བའི་བཤེས་དང་མཇལ། །སྔོན་བསྟེན་གྱི་སྲུང་མ་འགའ་ཡང་མཐོང༌། །སྔོན་སྦྱང་གི་བག་ཆགས་ར་རི་དང༌། །ལྐོག་གྱུར་གྱི་གཏམ་འགའ་འབྲེལ་མེད་སྨྲས། །རྗེ་འཇིགས་མེད་རྒྱལ་བའི་མྱུ་གུ་དང་༌། །གླིང་གྲུབ་ཆེན་སོགས་ཀྱི་རྗེས་སུ་བཟུང་༌། །སྐབས་དེ་ཚེ་ཨར་ཇག་མ་རུངས་བས། །རྟ་འགའ་ཞིག་བརྐུས་པའི་ར་མདའ་ལ། །ཕ་དེ་ཉིད་བརྒྱུགས་པ་ལྔ་ལམ་བཏང༌། །ནོར་འབྱོར་བ་རྣམས་ཀྱང་རིམ་བཞིན་བྲི། །ཚུལ་དེ་འདྲའི་རང་བཞིན་མཐོང་ཙ་ན། །ནོར་བསགས་པ་སྲོག་གི་གཤེད་མར་གྱུར། །དཔལ་འབྱོར་པ་དབྱར་ཆུ་སྐམ་པ་འདྲ། །ཚེ་རྩ་རྩེའི་ཟིལ་བ་ལྟར་མཐོང་ནས། །ང་བསམ་བཞིན་མཚན་ལྡན་བླ་མ་དྲན། །གནས་དབེན་པ་ཞིག་ཏུ་ནམ་སླེབས་སྙམ། །མགོན་དམ་པ་གོང་མའི་རྣམ་ཐར་ལ། །ཉིན་མཚན་དུ་ཡིད་སྨོན་བྱེད་སྐབས་དེར། །རྗེ་གཞོན་ནུ་ཆོས་ཀྱི་བློ་གྲོས་དེ། །ཆོས་སྒོ་སྐྱེལ་ཚུལ་གྱིས་ཡུལ་དེར་ཕེབས། །མི་བདག་ལ་དམིགས་ཀྱིས་བཀར་ནས་སུ། །ཁྱེད་གྲུབ་དབང་བླ་མ་མཇལ་དགོས་དང༌། །གནས་རྫོགས་ཆེན་དགོན་དུ་འགྲོ་དགོས་སོགས། །གསུང་བདུད་རྩིས་དབུགས་དབྱུང་གཟེངས་བསྟོད་ནས། །མི་ཁྱེད་ཀྱི་བདག་པོ་ངེད་ཡིན་ཞེས། །ཁྲི་མཐོན་པོར་མངའ་གསོལ་དང་བཅས་མཛད། །གཞན་རྩོད་པ་བྱེད་པའི་མི་ཀུན་ཀྱང༌། །གཏམ་བརྗོད་པ་ཟད་པའི་ངང་ཚུལ་བཟུང༌། །དུས་དེ་ནས་མཚུངས་བྲལ་དགེ་བའི་བཤེས། །རྗེ་འཇིགས་མེད་ངོ་མཚར་རྒྱ་མཚོ་དང་། །ཁོང་རྗེ་དབོན་བསྟན་འཛིན་ནོར་བུ་སོགས། །མགོན་དམ་པ་དུ་མའི་ཞལ་སྔ་ནས། །ཆོས་བདུད་རྩིའི་ཟིལ་མངར་མང་དུ་མྱོང༌། །ཉམས་ལེན་ཀྱང་ཅི་ནུས་བྱེད་ཁུལ་བགྱིས། །གདམས་ཁྲིད་ཀྱི་ལག་ལེན་དེ་དག་ཀྱང་། །གོང་འོག་གི་གོ་རིམ་མ་འཁྲུལ་བར། །གནད་སྨིན་གྱི་ཚུལ་དུ་ལན་འགའ་བསྐྱར། །མཚམས་བཅད་ཀྱི་གཟུགས་བརྙན་འགའ་ཡང་བྱས། །ཁྱད་པར་དུ་རྗེ་བཙུན་བླ་མ་མཆོག །གཅེན་སྔགས་རམ་སྨོན་ལམ་དར་རྒྱས་ལས། །ཡིག་རྩིས་དང་ཡི་གེའི་བརྡའ་སྤྲོད་སོགས། །ཐུན་མོང་གི་རིག་གནས་འགའ་ཞིག་དང༌། །སྡོམ་གསུམ་དང་མཛོད་ཀྱི་བཤད་པ་སོགས། །རྗེ་ཀུན་མཁྱེན་བླ་མ་ཡབ་སྲས་ཀྱི།།གཞུང་བཟང་གི་ཆུ་བོ་ཀུན་བཏུང་པས། །བློ་ཆོས་ཀྱི་མུ་གེའི་འཕྲང་ལས་གྲོལ། །རང་བགྲང་བྱ་བཅུ་དགུར་སླེབས་ཙ་ན། །དུས་ཚེ་རབས་གཏན་གྱི་སྐྱབས་མགོན་མཆོག །ཕ་གྲུབ་དབང་ཆོས་ཀྱི་རྒྱལ་པོ་དེའི། །མཚན་གྲགས་སྙན་ཐོས་ནས་ཚུགས་ཐབས་མེད། །ཉིན་འཇིག་རྟེན་བྱ་བས་མི་གཡེང་ཞིང༌། །མཚན་གཏི་མུག་གཉིད་ལས་བཤོལ་བཏབ་སྟེ། །རྗེ་གང་དང་ནམ་ཞིག་མཇལ་འགྱུར་ཞེས། །ཡིད་དད་པའི་མེ་ལྕེས་སྲེག་བཞིན་མཆིས། །དུས་དེ་ཚེ་དོན་མཐུན་གྲོགས་འགའ་དང་༌། །ལྷན་གཅིག་ཏུ་ཕྱི་བཤོལ་མེད་པར་ཐེགས། །ལམ་བཤུལ་ཐག་རིང་པའི་རྐང་ཚེགས་དང༌། །རླུང་ལྷག་པའི་ངལ་བ་ཁྱད་དུ་བསད། །དགྲ་འཇིགས་པའི་འཕྲང་ལས་ཐར་དཀའ་ཡང་༌། །རྗེ་ཉིན་བྱེད་དབང་པོ་དྲན་བཞིན་དུ། །ཤར་ཉིན་བྱེད་དབང་པོ་ཐོད་དུ་བཅིང༌། །ལུས་གཡོ་བའི་བརྩོན་པ་དང་དུ་བླངས། །དུས་ནམ་ཞིག་ཤར་རིའི་ཕྲག་པ་ནས། །སྐྱབས་ཆོས་རྗེའི་གདན་ས་མཐོང་བའི་མོད། །གྲོགས་གཞན་དག་ཕྱག་འཚལ་གསོལ་བ་འདེབས། །ངས་དབང་བཞི་བླངས་ནས་ཐུགས་ཡིད་བསྲེས། །སེམས་གཉུག་མའི་ངང་ལ་བཞག་ཙ་ན། །མགོན་གསང་བདག་དཔའ་བོའི་སྣང་བརྙན་མཇལ། །སླར་རྗེ་བཙུན་དངོས་དང་མཇལ་བའི་ཚེ། །སྐུ་དམར་སྨུག་བརྗིད་པའི་ཕྱག་གཡས་ཀྱིས། །ཤིང་རྦ་ལྕགས་རིང་མོ་བསྣམས་པའི་རྩེར། །མགོན་རྡོ་རྗེ་འཛིན་པའི་གཟུགས་སྐུ་ཞིག །དར་སྔོན་མོའི་ཅོད་པན་གྱིས་བསྡམས་ནས། །ངེད་སྐལ་བ་ལྡན་པའི་སྤྱི་བོར་བསྩལ། །ཐུགས་གཡོ་མེད་དགོངས་པ་གཏད་བཞིན་དུ། །སྤྱན་ཧུར་རེ་གཟིགས་ནས་འདི་སྐད་དུ། །ཁྱོད་རིགས་བཟང་ཡིན་པའི་སྒྲོ་འདོགས་ལ།།མི་ཁོ་བོའི་རྟོགས་པ་ཤེས་སམ་གསུངས། །ངས་ཡིད་ལ་མེད་པའི་རྒྱུ་མཚན་དེས། །ལུས་འཇིགས་པ་སྤུ་ལོང་གཡོ་བ་དང༌། །ཡིད་ལྐོག་གྱུར་མངོན་དུ་མཁྱེན་པ་ཡི། །གཏམ་དོན་ལྡན་སྙམ་པ་ལྷན་ཅིག་བྱུང་། །དུས་དེ་ནས་ཉིན་མཚན་དབྱེར་མེད་པར། །ཕ་རྡོ་རྗེ་འཆང་དེའི་ཞབས་བསྟེན་ནས། །ཆོས་ཟབ་མོ་གསང་སྔགས་ཐབས་ལམ་ཞུས། །ལམ་རྩ་ཐིག་རླུང་ལ་གནད་དུ་བསྣུན། །ནོར་རིན་ཐང་ཆེ་བ་མ་མཆིས་ཀྱང་༌། །སེམས་དག་པས་སྤོང་དག་ལན་ལྔ་ཕུལ། །རྗེ་ཇི་ཙམ་བཞུགས་པར་བསྟེན་འདོད་ཀྱང་༌། །སྤྲང་བསོད་ནམས་དམན་པས་ལོ་གསུམ་ན། །ཕ་འོད་གསལ་ཆོས་སྐུར་གཟིམས་པ་ཡི། །དུས་ཐ་མའི་མཛད་པ་མཇལ་བ་བྱུང་༌། །སེམས་སྐྱོ་བ་ལ་ཚད་བཟུང་མ་མཆིས་ཀྱང་༌། །གནས་དབེན་པར་སྒྲུབ་པའི་དམ་བཅའ་བཟུང་༌། །རྗེ་ཉིད་ཀྱི་ལུང་བསྟན་གནང་དོན་ལྟར། །སྔོན་པཎ་ཆེན་བཻ་རོས་བྱིན་བརླབས་པའི།།གནས་རྒྱལ་མོ་རོང་གི་ས་ཕྱོགས་སོགས། །ཡུལ་ངེས་མེད་ཀུན་ཏུ་འཁྱམས་ཤིང་བསྒོམ། །སྐབས་ལ་ལར་དད་ལྡན་འདུས་ཚོགས་ལ། །ཆོས་ཟབ་མོའི་འབྲེལ་འཇོག་ཉིད་ཀྱང་བགྱིས། །སྤྱིར་བོད་ལྗོངས་དུམ་བུ་གསུམ་གྱི་ཆའི། །མཐའ་དཀར་ནག་རྒྱ་ལ་ཐུག་པ་ཚུན། །སྔོན་ལས་དབང་བཙན་པོས་ཡང་ཡང་བསྐོར། །མི་དད་ལྡན་ཀུན་ལ་ཅི་ཕན་བྱས། །ཁྱད་པར་དུ་རུ་དམ་དབེན་གནས་སུ། །མགོན་གྲུབ་པའི་དབང་ཕྱུག་རྫོགས་ཆེན་པའི། །སྐུའི་སྐྱེ་སྲིད་བཞི་པའི་ཞབས་རྡུལ་དང་། །རྗེབཤད་མཁན་ཆེན་པདྨ་མངྒ་ལ། །ཁོང་གླིང་སྲས་གཏེར་ཆེན་འགྲོ་འདུལ་རྩལ། །མགོན་དེ་སོགས་དམ་པ་དུ་མའི་ཞབས། །གནས་བདེ་ཆེན་འཁོར་ལོར་བསྟེན་བྱས་ནས། །ཆོས་བཀའ་གཏེར་གདམས་པའི་མཛོད་ཀུན་བླངས། །ཡུལ་དབུས་གཙང་ཕྱོགས་ན་གྲགས་ཆེ་བའི། །དགའ་ལྡན་དང་ས་རྙིང་བཀའ་བརྒྱུད་ཀྱི། །ཁོང་མཁས་གྲུབ་དུ་མའི་ཞབས་ལ་གཏུགས། །བཀའ་བསྟན་འགྱུར་གྱིས་མཚོན་ཆོས་མང་ཞུས། །དེ་ཀུན་ཀྱང་ཞུས་ལོ་ཙམ་མིན་པར། །དབུས་གཙང་དང་ཁམས་ཕྱོགས་ཀུན་ཏུ་སྤེལ། །སྤྱིར་དེ་སྔོན་གཙང་དབུས་ལན་གསུམ་བསྐོར།།གནས་ཁྱད་འཕགས་རྣམས་སུ་སྒྲུབ་པ་བྱས། །རྟེན་ཁྱད་འཕགས་རྣམས་ལ་ཁྲི་མཆོད་སོགས། །ཕྱག་སྐོར་དང་སྒྲིབ་སྦྱོང་གང་ནུས་བགྱིས། །མགོན་རྒྱལ་བའི་སྐུ་གསུང་ཐུགས་ཀྱི་རྟེན། །སྤྱིར་ཁམས་དབུས་ཀུན་ཏུ་ཅི་རིགས་སྤེལ། །དགོས་རུ་དམ་བསམ་གཏན་ཆོས་གླིང་གི། །རྟེན་བརྟེན་པའི་མཐུན་གྲོགས་གང་འོས་བསྒྲུབས། །དགོན་གནས་དང་གྲྭ་སའི་འཛིན་སྐྱོང་ལ། །རང་སྔོན་ནས་སྤྲོ་བ་མ་ལགས་ཀྱང་། །བཤད་སྒྲུབ་ཀྱི་བསྟན་པའི་སྲོལ་འཛིན་པའི། །དགོན་ཆུང་དང་རི་ཁྲོད་འགའ་ཡང་ཆགས། །གཞི་གསུམ་གྱིས་ལག་ལེན་གྱིས་མཚོན་པའི། །མདོ་ཕྱོགས་དང་རྒྱུད་ཀྱི་བཤད་སྲོལ་བཙུགས། །གནས་མཁའ་སྤྱོད་དཔལ་གྱི་ཙཱ་རི་ནས། །རིའི་རྒྱལ་པོ་གངས་རི་ཏི་སེ་སོགས། །མ་མཁའ་འགྲོ་འདུ་བའི་གནས་རྣམས་སུ། །ཚོགས་མེ་མཆོད་འབུམ་ཕྲག་འགའ་ཡང་བསགས། །གནས་བསྐོར་བའི་དད་ལྡན་ཕོ་མོ་ལ། །རྩམ་སུན་དང་ཇ་སུན་གྱིས་མཚོན་པའི། །བཟའ་བཏུང་དང་གོས་ཀྱི་སྦྱིན་གཏོང་སོགས། །ཡུལ་གང་ལ་གང་འོས་ཀྱི་ཕན་པ་བསྒྲུབས། ཁམས་དབུས་ཀྱི་དགོན་གནས་འགའ་ཞིག་གི། །བཤད་སྒྲུབ་ཀྱི་སྲོལ་ཁ་ཉམས་པ་དང་། །ལོངས་སྤྱོད་ཀྱི་གཏོང་སྒོ་ཆད་པའང་གསོས། །སོ་བྱང་དང་སྔགས་ཀྱི་དམ་སྡོམ་ཀུན། །རང་གང་ནུས་སྲུང་བ་གཞིར་བཞག་ནས། །གཞན་རྣམས་ཀྱང་སྡོམ་པ་གསུམ་ལ་བསྐུལ། །ཁོང་པད་སྤྲུལ་པདྨ་དབང་རྒྱལ་དང༌། །རྗེ་ཁྲི་ཆེན་སངས་རྒྱས་ཀུན་དགའ་སོགས། །བསྟན་འགྲོ་ལ་ཕན་བཞེད་ཆེ་རྣམས་ཀྱི། །བཀས་བསྐུལ་དོན་ཇི་བཞིན་སྔ་འགྱུར་གྱི། །གཞུང་ཕྲིན་ཆོག་རྒྱུན་བཟང་བཞུགས་སོ་འཚལ། །ཕྱོགས་གཅིག་ཏུ་བསྡུས་ནས་སྤར་དུ་བསྒྲུབས། །སྤྱིར་སྒོ་གསུམ་བྱ་བ་ཆེ་ཕྲ་ཀུན། །བསྟན་འགྲོ་ལ་སྨན་པའི་རྒྱུར་བསྔོས་ནས།།གཞན་བྱས་པ་དྲིན་དུ་མི་བཟོ་བའི། །མི་དེ་དག་རྣམས་ལ་ཁྲོ་སྤངས་ཏེ། །བཟོད་པ་དང་སྙིང་རྗེས་རྗེས་སུ་བཟུང༌། །མ་འགྲོ་ལ་ཕན་པའི་ལྷག་བསམ་གྱིས། །ཆོས་བྱང་ཆུབ་སེམས་གཉིས་ལེགས་བསྒོམས་ཏེ། །ཁོང་རྒྱལ་བའི་སྲས་ཀྱི་འཇུག་ངོགས་མཆོག །ལམ་ཕྱིན་དྲུག་བསླབ་པ་རྣམ་གསུམ་དུ། །ཡོངས་བསྡུས་ནས་ཉམས་སུ་གང་ལོངས་བགྱིས། །སྤྱིར་དགེ་བ་ངོམས་པར་མི་བྱ་ཞིང་། །སྡིག་པ་རྣམས་བཅབ་པར་མི་བྱ་ཞེས། །མགོན་ཐུབ་པའི་དབང་པོས་གསུངས་ལགས་ཀྱང༌། །འདིར་མོས་ལྡན་དགེ་ལ་བསྐུལ་ཕྱིར་བྲིས། །གཞན་འགྲོ་བའི་ལས་ལ་ཟད་མེད་ཕྱིར། །ཕྱི་གནས་ཡུལ་འགྲིམ་པའི་ལམ་ཡིག་དང༌། །ནང་བྱང་སེམས་བསྐྱེད་པའི་བློ་སྦྱང་དང༌། །གསང་རིམ་གཉིས་སྒོམ་པའི་རྟོགས་བརྗོད་སོགས། །ཚིག་མང་པོའི་སྤྲོས་པ་མ་བྱས་པར། །དོན་སྙིང་པོ་དྲིལ་ཏེ་བརྗོད་པ་ཡིན། །འདི་རང་ལོ་བཅུ་ཕྲག་ལྔ་ཡན་གྱི། །ལེགས་སྤྱོད་ཀྱི་ངོས་ནས་སྨོས་པ་ལས། །མི་བདག་འདྲ་སྐྱོན་གྱི་གོང་བུ་ཡི། །སྐྱོན་བརྗོད་ན་ཟད་མཐའ་མ་མཆིས་མོད། །གཏམ་སྒྲོ་སྐུར་སྤངས་ནས་བརྗོད་པ་འདི། །ཁོང་ཆགས་སྡང་གདོན་གྱིས་སྨྱོས་པ་འགའི། །སེམས་ཕྲག་དོག་རྒྱུ་རུ་མི་འགྱུར་བར། །ཡིད་ཆོས་ལ་བསྐུལ་བའི་རྒྱུར་གྱུར་ཅིག །ཅེས་པའང་དད་དམ་ལ་གཅེས་ནོར་དུ་འཛིན་པའི་བླ་མ་ཤེས་རབ་རྒྱ་མཚོ་ནས་དོན་གཉེར་ཆེན་པོས་བསྐུལ་བའི་བཞེད་སྐོང་དུ་བཙུན་པ་རང་ཉིད་ཀྱིས་ཡེར་པ་ལྷ་རི་སྙིང་པོའི་མགུལ་ནས་སྤྲིང་པའི་ཡི་གེ་པ་ནི་རང་སློབ་བླ་མ་ཐེག་མཆོག་བསྟན་འཛིན་ནོ། །
རྫོགས་ཆེན་ཆོས་འབྱུང་དུ་གསལ་པའི་རྣམ་ཐར། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་ནི། དེ་ཡང་སྔ་འགྱུར་བསྟན་པ་རྒྱ་མཚོའི་མངའ་བདག་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཞེས་ཡོངས་སུ་གྲགས་པའི་བདག་ཉིད་ཆེན་པོ་འདི་ནི། ཇི་སྐད་དུ། རྗེ་ཉིད་ཀྱིས་མཛད་པའི་སྐྱེ་ཕྲེང་གསོལ་འདེབས་ཐར་པའི་འཁྲི་ཤིང་ལས། ཁྱད་པར་རིགས་གསུམ་སེམས་དཔའི་སྒྱུ་འཕྲུལ་གར། །ཅིར་ཡང་བསྒྱུར་བའི་བྱེ་བྲག་འཕགས་ཡུལ་གྱི། །གསང་ཆེན་བཀའ་བབ་རྒྱལ་པོ་ཛ་ཞེས་པ། །ཨིནྡྲ་བྷུ་ཏི་ཆེན་པོར་གསོལ་བ་འདེབས། །མགོན་ཁྱོད་སྐུ་གསུམ་སྟོན་པའི་གསུང་རབ་ཀུན། །སྡུད་མཛད་སོ་སོའི་རྣམ་པར་སྣང་བ་ལས། །ཞིང་འདིའི་ཐུབ་དབང་དྲུང་དུ་ཀུན་དགའ་བོར། །བསྟན་ཀྱང་ཐ་མི་དད་པར་གསོལ་བ་འདེབས། །གང་ལས་མཁའ་ཟླ་ཆུ་མཚོར་ཤར་བ་བཞིན། །འགྲོ་ངོར་སྣང་བ་འཇམ་དཔལ་བཤེས་གཉེན་དང༌། །མདོ་ལུང་འགྲེལ་མཛད་དུར་ཁྲོད་བདེ་བ་གསལ། །ཀུ་ཀཱུ་རཱ་ཛ་རྣམས་ལ་གསོལ་བ་འདེབས། །དེ་བཞིན་སློབ་དཔོན་དཔའ་བོ་བི་ན་ས། །ཐུ་མི་སམྦྷོ་ཊ་དང་རྣམ་སྣང་མཛད། །དྷརྨ་བྷ་དྲ་ཟུར་ཆེན་ཤཀྱཱ་འབྱུང༌། །གླང་ལུང་པར་གྲགས་རྣམས་ལ་གསོལ་བ་འདེབས། །གཞན་ཡང་དབུ་ཕྱག་སྲོལ་འཛིན་ཇི་སྙེད་དང༌་། །རྡོ་རྗེ་གླིང་སོགས་ཟབ་གཏེར་སྒོ་འབྱེད་པ། །དུ་མའི་གྲངས་མཐར་གཏེར་བདག་གླིང་པ་ཞེས། །ཡོངས་གྲགས་མཆོག་གཟིགས་རྣམས་ལ་གསོལ་བ་འདེབས། །ཞེས་རྡོ་རྗེའི་གསུང་གིས་ཞལ་བཞེས་མཛད་པ་དང༌། གཞན་ཡང་མཁན་ཆེན་བོ་དྷི་ས་ཏྭ་དང་ལོ་ཆེན་བཻ་རོ་ཙཱ་ན་ཟུང་དུ་འཇུག་པའི་རྣམ་འཕྲུལ་དུ་ལུང་གིས་ཡང་ཡང་ཟིན་པ་ལྟར། རྗེས་སུ་ཆགས་པའི་སྙིང་རྗེ་ཆེན་པོས་སེམས་ཅན་གྱི་ཁམས་དང་ཞིང་ཁམས་སྣ་ཚོགས་པར་སངས་རྒྱས་དང་བྱང་སེམས་ཀྱི་རྣལ་རོལ་བསམ་མི་ཁྱབ་པས་མཐའ་ཡས་པའི་འགྲོ་ཚོགས་སྨིན་པ་དང་གྲོལ་བའི་ས་ལ་བཀོད་ཅིང༌། སླར་ཡང་ཡུལ་མདོ་ཁམས་ཀྱི་ལྗོངས་འདིར་གསང་ཆེན་སྙིང་པོའི་བསྟན་པ་སྤེལ་བར་བསམ་བཞིན་དགེ་བའི་བཤེས་གཉེན་གྱི་ཚུལ་དུ་བྱོན་པའི་བདག་ཉིད་ཆེན་པོ་འདིའི་སྐུ་འཁྲུངས་པའི་ཡུལ་ནི། མདོ་སྨད་གླིང་དཀར་གྱི་སའི་ཐིག་ལེརྫ་ཆབ་སྔོན་མོ་དལ་གྱིས་འབབ་པའི་ཉེ་འགྲམ། ཡུལ་སྐྱོང་རྡོ་རྗེ་འཕན་ཕྱུག་གིས་བདག་ཏུ་བཟུང་བའི་གནས་མཆོག། མེ་ཏོག་དང་རྩི་སྨན་གྱིས་བརྒྱན་པའི་སྤང་ཐང་ཉམས་དགའ་བ་དགེ་མང་སྐམ་ཆུང་དུ་གྲགས་པའི་ནོར་འཛིན་གྱི་ལྟེ་བ་རུ། ཡབ་སྨུག་པོ་ལྡོང་གི་རིགས་ལ་བཙན་ཁ་བཞི་ཞེས་གྱེས་པའི་བྱེ་བྲག་དགེ་རྩེའི་ཨ་དོན་ཚེ་དབང་ནོར་བུ་དང་། ཡུམ་མཁའ་འགྲོའི་མཚན་རྟགས་དང་ལྡན་པ་ཀརྨ་ཆོས་སྒྲོན་གཉིས་ཀྱི་སྲས་སུ། སྤྱི་ལོ་༡༨༠༠པ་བོད་རབ་བྱུང་བཅུ་གསུམ་པའི་དྲག་པོ་ཞེས་པ་ལྕགས་སྤྲེལ་ལོར་སྐུ་བལྟམས། གཞོན་ནུ་ཉིད་ནས་དད་བརྩོན་སྙིང་རྗེ་ཤེས་རབ་སོགས་འཕགས་པའི་ཆོས་ཀུན་ལྷན་སྐྱེས་སུ་མངའ་བ་དང་༌། ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་ཤིང་རྡོ་རྗེའི་ཆོས་སྲུང་ལུས་དང་གྲིབ་བཞིན་འགྲོགས་པ་སོགས་སོ་སོའི་སྐྱེ་བོ་ལས་རིང་དུ་འདས་པའི་མངོན་རྟགས་མཐོང་ཆོས་སུ་མངའ། དགུང་གྲངས་གསུམ་ཙམ་ན་དམ་པའི་སྐྱེས་བུ་དུ་མས་སྐྱེ་སྲིད་དུ་ལུང་གིས་བསྔགས་ཤིང་དགོན་པ་འགས་ཐོབ་ཤ་བྱས་ཀྱང་མ་བྱིན། སྐུ་ན་ཅུང་ཟད་སོན་ཙམ་པའི་སྐབས་ཤིག་ན་ཁྱིམ་གྱི་རྟ་འགའ་ཨར་ཇག་གིས་བརྐུས་པའི་ར་འདའ་ལ་ཕ་ཡབ་བརྒྱུག་པ་ལྔ་ལམ་དུ་བཏང་བ་དང་། རྗེ་ཉིད་ཐོག་མ་ནས་འཁོར་བའི་གནས་ལས་ངེས་པར་འབྱུང་བའི་བློ་བཅོས་མིན་མངའ་བ་བཅས་ཀྱིས་རྐྱེན་བྱས་ཏེ་ཕྱོགས་མེད་དབེན་པར་གཤེགས་འདོད་ཁོ་ན་ཐུགས་ལ་ཤར། སྐབས་དེར་འཇམ་དབྱངས་ཆོས་ཀྱི་བློ་གྲོས་སམ་རྡོ་བླ་འཇིགས་མེད་སྐལ་བཟང་ཡུལ་དེར་ཕེབས་པས་ཐུགས་བརྩེ་ཆེན་པོས་ཉེར་བར་བཟུང་ཏེ་ཁྲི་གསོལ་མཛད་ནས་ཁྱེད་ཀྱི་བདག་པོ་ཁོ་བོ་ལས་མེད་ཅིང་། མི་རིང་བར་རྫོགས་ཆེན་དགོན་དང་གྲུབ་དབང་འཇིགས་མེད་ཕྲིན་ལས་འོད་ཟེར་གྱི་དྲུང་དུ་ཕེབས་དགོས་པའི་བཀའ་ལུང་ལྟར་ཐོག་མར་རྫོགས་ཆེན་དུ་ཕེབས་ཏེ་མི་འགྱུར་ནམ་མཁའི་རྡོ་རྗེའི་ཞབས་པད་བསྙེན། གཞན་ཡང་སྔ་ཕྱི་ཀུན་ཏུ་འཇིགས་མེད་རྒྱལ་བའི་མྱུ་གུ་དང་༌། འཇིགས་མེད་ངོ་མཚར་རྒྱ་མཚོ། རྗེ་དབོན་བསྟན་འཛིན་ནོར་བུ། སྔགས་རམ་པ་སྨོན་ལམ་དར་རྒྱས། གླིང་གྲུབ་ཆེན་སོགས་སྐྱེས་ཆེན་དུ་མ་གཙུག་རྒྱན་དུ་བསྟེན་ཏེ་ཐུན་མོང་དང་ཐུན་མིན་གྱི་རིག་པའི་གནས་ལ་གསན་སྦྱང་དང་༌། བཀའ་གཏེར་གྱི་སྨིན་ཁྲིད་གདམས་ངག་མ་ལུས་པ་ཡོངས་སུ་གསན་བཞེས་མཛད། དགུང་གྲངས་བཅུ་དགུ་པ་ས་སྟག་ལོར་དོན་མཐུན་གྱི་གྲོགས་འགའ་ཞིག་དང་བཅས་ཚེ་རབས་དུ་མའི་རིགས་ཀྱི་བདག་པོ་གྲུབ་དབང་འཇིགས་མེད་ཕྲིན་ལས་འོད་ཟེར་མཇལ་དུ་ཕེབས། སྐུ་དངོས་མ་མཇལ་བའི་ལམ་བར་ནས་ཀྱང་འབྲལ་བ་མེད་པའི་ཐུགས་རྗེའི་བྱིན་རླབས་ཀྱི་མཐུས་ཞལ་གཟིགས་ལུང་བསྟན་གནང་བས་དགོངས་བརྒྱུད་ཀྱི་རྟོགས་པ་བརྙེས། ལོ་ངོ་གསུམ་ལ་གྲུབ་དབང་བླ་མའི་མདུན་དུ་བཞུགས་རིང་མདོ་སྔགས་ཀྱི་ཆོས་ཚུལ་སྤྱི་དང་ཟབ་གསང་སྙིང་ཐིག་གོང་འོག་གི་གདམས་ཁྲིད་བུམ་པ་གང་བྱོའི་ཚུལ་དུ་བསྩལ་ནས་དོན་བརྒྱུད་བསྟན་པའི་བཀའ་གཏད་མཛད། དེ་དག་གི་སྐབས་སུ་བླ་མ་སངས་རྒྱས་དངོས་མཐོང་གི་མོས་གུས་ཟབ་མོས་བསྙེན་ཞིང་སྤང་དག་ལན་ལྔ་མཛད་དེ་དངོས་འབྱོར་གྱི་མཆོད་པས་བཉེས་པར་བྱས། ལྕགས་སྦྲུལ་ལོར་གྲུབ་དབང་བླ་མ་ཞིང་དུ་གཤེགས་པས་རྒྱ་རོང་བཻ་རོའི་སྒྲུབ་གནས་སོགས་ངེས་མེད་ཀྱི་རི་ཁྲོད་འགྲིམ་སྟེ་སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ་བར་མཛད། སླར་རུ་དམ་གདན་སར་ཕེབས་ཏེ་མཁན་ཆེན་སེང་ཕྲུག་པདྨ་བཀྲ་ཤིས་ཀྱི་ཞལ་སྔ་ནས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་པས་ཐུབ་བསྟན་པདྨ་རྒྱས་པའི་ཉིན་བྱེད་དཔལ་བཟང་པོ་ཞེས་མཚན་གྱི་ཅོད་པན་གསོལ། སྤྱིར་རྗེ་འདི་ཉིད་ཟབ་གཏེར་གྱི་སྐལ་བ་ལྡན་པའི་སྐྱེས་བུ་ཡིན་པར་གསུངས་ཏེ། དགུང་ལོ་བརྒྱད་ལ་སོན་སྐབས་དཔལ་གྱི་བསམ་ཡས་ཆོས་སྡེ་ལ་མེའི་གནོད་པ་ཟློག་ཐབས་ཀྱི་ཟབ་གཏེར་ཁ་བྱང་ཕྱག་ཏུ་འབྱོར་ཀྱང་ས་ཐག་རིང་བས་ཕེབས་མ་ཐུབ་ཅིང༌། ཕྱིས་བསམ་ཡས་གཙུག་ལག་ཁང་ལ་མེ་ཡི་འཇིགས་པ་བྱུང་བ་གསན་པས་ཐུགས་འགྱོད་ཆེན་པོ་གནང༌། དེ་བཞིན་ལྷ་སར་ཆུའི་འཇིག་པ་བཟློག་པའི་ལུང་བྱང་ཡོད་པ་གཞན་ལ་སྦས་ཚུལ་གྱིས་ལྷ་ལྡན་དུ་བྱོན་ཏེ་ཕྱག་རྡོར་དྲེགས་འདུལ་གྱི་སྐུ་མཚམས་ལ་བཞུགས་པས་ཆུ་ལོག་ཆེན་པོ་བྱུང་ཡང་གནོད་པ་ཆེན་པོ་མ་ནུས་པ་སོགས་ཀྱི་རྣམ་ཐར་དང༌། ཕྱིས་སུ་དཔལ་སྤྲུལ་རིན་པོ་ཆེས་ཀྱང་ཆབ་ཤོག་གི་ལམ་ནས། སོར་མོས་མ་ཡིན་སྨྱུག་གུས་ལྟ་ཅི། །དགོངས་བརྒྱུད་ཁྲོལ་དཀའ་འཁོར་ལྔའི་མདུད་རྒྱ། །གང་གིས་གཞིག་ནུས་བཅོམ་ལྡན་ལྡན་པ། །གྲུབ་བརྒྱས་བསྟེན་པའི་བཞེས་འཕྲོ་མིན་ནམ། །སྟག་ཤམ་ཐིག་ལེའི་འཛུམ་ཆེན་དགོངས་དང་། །ཟླུམ་པོའི་མཐང་གོས་པུས་མོའི་འཆིང་ཐགབསླབ་པའི་བཙོན་བུས་སྡོམ་པའི་གྲོགས་ལ། །རོ་མཉམ་རིག་སྔགས་ད་ནི་འདེབས་རན། །རྒྱན་དྲུག་རི་མོའི་འཕྱང་འཕྲུལ་དགོངས་དང་། །ཟླུམ་ཚལ་སྣམ་ཕྲན་རེ་དོགས་འཆིང་ཐག། བླང་འདས་བརྩི་བའི་གུ་དོག་བཙོན་ཁང༌། །སྤང་བླང་མེ་སྒྱོག་ད་ནི་བརྡེག་རན། །ཐོར་ཚུགས་འཁོར་ལོའི་མཛེས་པ་དགོངས་དང་༌། །མགོ་རེག་བརྟུལ་ཞུགས་དཀྱིལ་འཁོར་བརྙས་བཅོས། །གསོ་སྦྱོང་སྒྲིག་བཅད་འཛིན་པའི་བཙོན་སྲུང་། །གཏད་སོའི་སྲོག་དང་ད་ནི་བྲལ་རན། ཕ་གཅིག་པདྨའི་ཚོམ་བུའི་ཚོགས་སུ། སྨོན་ལམ་མཐུན་པའི་སྤྱོད་པའི་བོགས་འབྱིན། །རྒྱུད་པ་ཀུན་ལ་བགོ་སྐལ་ལགས་ན། །སྟོན་མོ་རང་སྐལ་ད་ནི་བཞེས་རན། །ཞེས་སོགས་སྔགས་སྤྱོད་མཛད་ན་སྐུ་ཚེ་མཐར་ཕྱིན་པ་དང་ཟབ་གཏེར་གྱི་ཕྲིན་ལས་རྒྱ་ཆེན་འབྱུང་བར་གསུངས་ཀྱང་། ཕྱི་དུས་འདིར་སྔ་འགྱུར་ཆོས་སྡེ་ཆེན་མོར་གྲགས་པ་ཀུན་ལ་འདུལ་བསྟན་རི་མོའི་མར་མེ་ལྟར་གྱུར་ཅིང་། བསྟན་རྩ་ཆོས་འདུལ་རིན་པོ་ཆེ་རྒྱལ་བསྟན་ཡུན་དུ་གནས་པའི་གཞི་མར་དགོངས་ནས་རྗེ་ཉིད་སྐུ་ཚེ་གང་པོར་ཉེས་ལྟུང་ཕྲ་མོས་ཀྱང་མ་གོས་པ་ཉེ་བ་འཁོར་སླར་བྱོན་པ་ལྟ་བུའི་རྣམ་ཐར་བསྐྱངས་ཤིང༌། གྲུབ་དབང་རྫོགས་ཆེན་པའི་རིང་ལུགས་འཛིན་པའི་ཆོས་སྡེ་ཡོངས་ཀྱིས་གཙོས་མདོ་སྨད་དགོན་ཆེན་ཁག་ལ་གཞི་གསུམ་ཕྱག་བཞེས་གསར་བཙུགས་སོགས་སྔ་འགྱུར་གྱི་བསྟན་པ་རིན་པོ་ཆེ་དྭངས་གཙང་པདྨའི་སྦུབས་ལྟར་བྱི་དོར་མཛད་པའི་བཀའ་དྲིན་བསྐྱངས། བར་ལམ་སྦས་པའི་རྣལ་འབྱོར་འཁོས་ཆུང་གི་རྣམ་ཐར་བསྐྱངས་ཏེ་སྟོད་གངས་རི་ཏི་སེ་ནས་སྨད་རྒྱ་ནག་རི་བོ་རྩེ་ལྔ་ཡན་གྱི ་དགོན་གནས་ཆོས་སྡེ་ཁག་དང༌། དབེན་ཁྲོད་སྒྲུབ་གནས་རྣམས་སུ་མཇལ་སྐོར་དང་གནས་འབྲེལ་ལ་ཕེབས་ཤིང་། དེ་དག་གི་སྐབས་སུ་ས་དགེ་བཀའ་རྙིང་གི་དགེ་བའི་བཤེས་རྣམས་ཀྱི་དྲུང་ནས་རྒྱལ་བཀའ་རིན་པོ་ཆེ་དང་དགོངས་འགྲེལ་བསྟན་བཅོས་འགྱུར་རོ་ཅོག་གིས་གཙོས་གངས་ཅན་བོད་ཀྱི་མཁས་གྲུབ་ཕལ་མོ་ཆེའི་གསུང་འབུམ་ཐམས་ཅད་ལ་གསན་བསམ་ཕྱོགས་མེད་དུ་མཛད་ནས་ཐོས་པ་རྒྱ་མཚོའི་ཕ་རོལ་ཕྱིན། ཕྱིས་སུ་རུ་དམ་གདན་ས་ནས་འཆད་སྤེལ་གྱི་ཕྲིན་ལས་རྒྱ་ཆེར་བསྐྱངས་པའི་རྒྱུན་ད་ལྟའི་བར་དཀར་ནག་རྒྱ་ཡི་ཡུལ་གྲུ་ཚུན་ཡོངས་སུ་ཁྱབ་པ་བྱུང༌། དུས་དེར་དཔལ་རི་སྤྲུལ་སྐུ་པདྨ་དབང་རྒྱལ་དང་སྨིན་གླིང་ཁྲི་ཆེན་སངས་རྒྱས་ཀུན་དགའ་སོགས་ཀྱིས་བཀས་བསྐུལ་བ་ལྟར་སྔ་འགྱུར་གྱི་ཕྲིན་ཆོག་བཞུགས་སོ་འཚལ་ཀུན་ཆོག་སྒྲིག་གནང་བ་སྔ་འགྱུར་བཀའ་མའི་གླེགས་བམ་རིན་པོ་ཆེ་ཐེག་དགུའི་གྲངས་ལྡན་པར་དུ་བརྐོས་ཏེ་དབང་ལུང་གི་རྒྱུན་སྤེལ། དེ་བཞིན་དཔལ་གསང་བ་སྙིང་པོའི་རྒྱུད་འགྲེལ་ཆེན་མོ་རྣམས་དང་ཀུན་མཁྱེན་རོང་ཟོམ་པའི་གསུང་འབུམ་སོགས་ཆེས་ཉམས་པར་ཕངས་པའི་གསུང་རབ་དུ་མ་དབུས་གཙང་གི་ཕྱོགས་ནས་སྐུ་ངལ་ཆེན་པོས་འཚོལ་སྡུད་མཛད་ཅིང་པར་དུ་བརྐོས་ནས་བཤད་ལུང་གི་རྒྱུན་སྤེལ་བ་སོགས་གསང་ཆེན་སྔ་འགྱུར་གྱི་བསྟན་པ་ལ་སྨན་པའི་མཛད་པ་མཐའ་ཡས་པ་བསྐྱངས་ཚུལ་འཇམ་དབྱངས་མཁྱེན་བརྩེའི་དབང་པོས་མཛད་པའི་རྣམ་ཐར་གསོལ་འདེབས་བྱིན་རླབས་སྣང་གཏེར་ལས། རྒྱལ་སྲས་འཇམ་དཔལ་གཞོན་ནུའི་ཡེ་ཤེས་སྐུ། །ཐེག་མཆོག་དགེ་བའི་བཤེས་ཀྱི་ཚུལ་བཟུང་བ། །གཞན་ཕན་ཕ་མཐའ་ཡས་པའི་ཕྲིན་ལས་ཅན། །ཀུན་མཁྱེན་བླ་མའི་ཞབས་ལ་གསོལ་བ་འདེབས། །ཅེས་དང༌། སོ་སོར་ཐར་བ་གཞི་གསུམ་ཕྱག་བཞེས་དང་། །རྒྱུད་རྒྱལ་གསང་བ་སྙིང་པོའི་བཤད་སྲོལ་སོགས། །མདོ་སྔགས་ཤིང་རྟའི་ལམ་ཆེན་རབ་དབྱེ་བས། །རྒྱལ་བསྟན་ཉིན་མོར་མཛད་ལ་གསོལ་བ་འདེབས། །དགེ་འདུན་འདུས་སྡེ་ཉམས་གསོ་གསར་སྤེལ་དང་། །གསང་གསུམ་རྟེན་བཞེངས་མཆོད་སྤྲིན་སྤྲོ་བས་མཚོན། །རླབས་ཆེན་བྱ་བ་ལས་ཀྱི་འཁོར་ལོ་ཡིས། །ཕན་བདེའི་དགའ་སྟོན་སྦྱིན་ལ་གསོལ་བ་འདེབས། །ཞེས་སོགས་བསྔགས་བརྗོད་རྒྱ་ཆེར་མཛད། དགུང་གྲངས་ཞེ་དགུ་བཞེས་པ་རབ་བྱུང་བཅུ་བཞི་པའི་ས་སྤྲེལ་ཏེ་སྤྱི་ལོ་༡༨༤༨པར་མི་འགྱུར་ནམ་མཁའི་རྡོརྗེའི་བཀའ་ལུང་ལྟར་གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ཆོས་གྲྭ་གསར་དུ་ཕྱག་བཏབ་མཛད་ཅིང་། རྗེ་ཉིད་མཁན་རབས་གཉིས་པའི་གསེར་ཁྲིར་བཞུགས་ཏེ་མདོ་སྔགས་གཞུང་འགྲེལ་གྱི་འཆད་ཁྲིད་སྤྱི་དང༌། ཁྱད་པར་རྒྱུད་རྒྱལ་གསང་བ་སྙིང་པོའི་བཤད་པ་དང་དབུ་སེམས་བཀའ་སྲོལ་གཅིག་འདུས་ཀྱི་བྱང་སྡོམ། མཁན་ཆེན་ཞི་འཚོ་ནས་རྒྱུད་པའི་སྨད་འདུལ་སོ་ཐར་སྡོམ་རྒྱུན་བཅས་བཤད་སྒྲུབ་ལུང་རྟོགས་ཀྱི་བསྟན་པའི་རྒྱུན་ཕྱོགས་ཀུན་སྤེལ་བས། དེང་གི་དུས་འདིར་སྔ་འགྱུར་པའི་རིང་ལུགས་འཛིན་པ་ཞེས་རབ་ཏུ་བྱུང་བའི་སྡེ་ཆེན་པོས་སའི་ཁྱོན་ཡོངས་སུ་ཁེངས་པ་བདག་ཉིད་ཆེན་པོ་འདིའི་བཀའ་དྲིན་ཁོ་ན་ལས་བྱུང་བ་ཡིན་ནོ། ། དེ་བཞིན་བརྒྱུད་འཛིན་མཁས་གྲུབ་གཉིས་ལྡན་གྱི་ཞལ་སློབ་དཔལ་སྤྲུལ་འཇིགས་མེད་ཆོས་ཀྱི་དབང་པོ། བཀའ་བབ་བདུན་ལྡན་མཁྱེན་བརྩེའི་དབང་པོ། མཁན་ཆེན་པདྨ་བཛྲ། ཞེ་ཆེན་མ་ཧཱ་པནྚི་ཏ་མཐུ་སྟོབས་རྣམ་རྒྱལ། གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན། སྨིན་གླིང་ཁྲི་ཆེན་སངས་རྒྱས་ཀུན་དགའ། རྒྱལ་རོང་དབོན་སྤྲུལ། པད་གླིང་བརྒྱད་པ་ཀུན་བཟང་བདེ་ཆེན་རྡོ་རྗེ། རྡོ་བྲག་རིག་འཛིན་ཆེན་པོ་སོགས་བགྲངས་ཀྱིས་མི་ལང་པ་བྱུང་བ་དང་༌། ཕྱི་རབས་བསྟན་པའི་བཙས་སུ་གསང་སྙིང་སྤྱི་དོན་དང་ཞི་ཁྲོའི་དཀའ་འགྲེལ། སུམ་རྟགས་ཀྱི་འབྲུ་འགྲེལ་སོགས་ཐུན་མོང་དང་ཐུན་མོང་མ་ཡིན་པའི་གཙུག་ལག་གི་གནས་གསལ་བར་བྱེད་པའི་ལེགས་བཤད་དུ་མ་ལྗགས་རྩོམ་གནང་ནས་མཐར་དགུང་གྲངས་ལྔ་བཅུ་རྩ་དྲུག་བཞེས་པ་རབ་བྱུང་བཅུ་བཞི་པའི་ཤིང་ཡོས་ལོར་ཆོས་ཉིད་ཞི་བའི་དབྱིངས་སུ་གཤེགས་པའི་ཚུལ་བསྟན་ཏོ། །སྤྱིར་རྗེ་འདི་ཉིད་གྲུབ་དབང་སྐུ་རབས་བཞི་པ་མི་འགྱུར་ནམ་མཁའི་རྡོ་རྗེ་ལས་སྐུ་ན་ཅུང་ཟད་གཞོན་ཡང་བར་ཆད་ཀྱི་དབང་གིས་སྐུ་ཚེ་མཐར་མ་ཕྱིན་པར་མི་འགྱུར་ནམ་མཁའི་རྡོ་རྗེ་ཞིང་དུ་མ་གཟིགས་པའི་སྔོན་དུ་སྐུ་གཤེགས་ཀྱང་། གསང་ཆེན་སྔ་འགྱུར་པའི་བསྟན་པ་སྤྱི་དང་ཁྱད་པར་གྲུབ་དབང་རྫོགས་ཆེན་པའི་བསྟན་པ་ལ་ཐུགས་བསྐྱེད་མཛད་འཕྲིན་འགྲན་ཟླ་དང་བྲལ་ཞིང་། རྒྱལ་སྲས་གཞན་ཕན་མཐའ་ཡས་ཉིད་ཞལ་བཞུགས་སྐབས་གདན་ས་ཆེན་མོའི་མཆོག་གི་རྡོ་རྗེ་སློབ་དཔོན་གྱི་གསེར་ཁྲིར་མངའ་དབང་སྒྱུར་བར་མཛད་པ་དང་། ཕྱིས་ཀྱི་སྐུ་ཞབས་རིམ་བྱོན་ལ་བསྟན་བདག་མཆོག་སྤྲུལ་རྣམ་གསུམ་ཞེས་གྲགས་པའི་ཡ་གྱལ་གསེར་ཁྲི་གསུམ་པར་འདྲེན་པ་སོགས་རྒྱུ་མཚན་དུ་མས་སྐབས་འདིར་དོན་ཐོབ་ལྟར་གདན་རབས་སུ་བཀོད་པ་ཡིན་ལ། གཞན་ཡང་གྲུབ་དབང་བཞི་པ་ཞིང་དུ་གཤེགས་རྗེས་དཔོན་སློབ་བཞི་པ་འཇིགས་མེད་ཆོས་དབྱིངས་འོད་གསལ་ནས་བསྟན་སྲིད་ཀྱི་ཐུགས་འགན་བཞེས་པར་གྲགས་ཀྱང་ཕྲིན་ལས་དེ་ཙམ་མ་རྒྱས་ཤིང་། དཔལ་སྤྲུལ་རིན་པོ་ཆེ་དང་མཁན་ཆེན་པདྨ་བཛྲ་རྣམ་གཉིས་ནས་བཤད་སྒྲུབ་ཀྱི་བསྟན་པའི་ཐུགས་འགན་བཞེས་ཏེ་གྲུབ་དབང་ལྔ་པ་སོགས་ལ་མན་ངག་གི་བརྒྱུད་པ་སྤེལ་བའི་འཕྲིན་ལས་ནམ་མཁའི་མཐའ་དང་མཉམ་པ་བྱུང་ན་ཡང་། སྐུ་ཚེ་ཧྲིལ་པོར་བྱ་བཏང་དུ་བཞུགས་ཏེ་བསྟན་སྲིད་ལ་གཟིགས་གཏོགས་མ་མཛད་པས་གདན་རབས་སུ་མ་བཀོད་པའི་ཚུལ་ཡང་མཁྱེན་པར་འཚལ་ལོ། །
རྩོམ་སྒྲིག་པ། དོན་འགྲུབ་རྡོ་རྗེ།