མཁན་རབས་བཅུ་དགུ་པ། རྒྱ་ཀོང་མཁན་ཆེན་གཞན་ཕན་ཆོས་ཀྱི་སྣང་བ་ནི། དེ་ཡང་དཔལ་ལྡན་ཟླ་བ་གྲགས་པའི་རྣམ་རོལ་གཞན་དགའ་རྡོ་རྗེ་འཆང་ངམ་མཁས་མཆོག་གཞན་ཕན་སྣང་བ་ནི། མི་འགྱུར་ནམ་མཁའི་རྡོ་རྗེའི་ལུང་བསྟན་བཀའ་རྒྱ་མ་ལས། རུ་དམ་ལུང་དུ་ལུག་གི་ལོ་པ་འབྱུང༔དེ་ཡི་རིལ་མ་ཐམས་ཅད་གསེར་དུ་འགྱུར༔ ཞེས་གསལ་བར་བསྟན་པ་ལྟར། སྤྱི་ལོ་༡༨༧༡པ་སྟེ་རབ་བྱུང་བཅོ་ལྔ་པའི་ལྕགས་ལུག་ལོར་དལ་འབབ་རྫ་ཆུའི་སྟོད་རྒྱུད་ཀྱི་ཁ་ནར་ཞེས་པའི་འབྲོག་སྡེ་རུ། རིགས་རུས་ཕུན་ཚོགས་པས་མངོན་པར་མཐོ་བ་རྒྱ་ཀོང་དཔོན་ཚང་དུ་སྐུ་བལྟམས།སྐུ་བྱིས་པའི་དུས་ཡབ་ཀྱི་རུམ་ན་ཡོད་པའི་ནུབ་མོ་ཞིག་ལ་བུད་མེད་དམར་མོ་རུས་པའི་རྒྱན་ཅན་ཞིག་འོངས་ནས་ཨོ་རྒྱན་མཁའ་འགྲོའི་གླིང་གི་ཚོགས་སྐལ་ཡིན་ཟེར་ནས་ཤ་དུམ་ཞིག་བྱིན། སོས་ཆོད་པ་རྣམས་བཞེས་ཤིང་མ་ཆོད་པའི་ཤུན་པ་ཤུལ་དུ་ལུས་པ་ནང་པར་ཕས་མཐོང་ཚེ་མིའི་ལག་མཐིལ་གྱི་པགས་ཤུན་ཞིག་ཏུ་འདུག་པ་བུ་ལ་འདི་ཅི་ཡིན་ཞེས་དྲིས་པར། མདང་གི་མཐོང་སྣང་རྣམས་དྲང་པོར་བཤད་པས་ཐམས་ཅད་ངོ་མཚར་ནས་ཐ་མལ་གྱི་བྱིས་པ་ཞིག་མ་ཡིན་ཞེས་གླེང༌། དེ་ནས་དགུང་གྲངས་བཅོ་བརྒྱད་པར་ཕ་གཞིས་ཀྱི་ཁྱིམ་དུ་བཞུགས་ནས་འཇིག་རྟེན་གྱི་བྱ་བ་སྣ་ཚོགས་བསྒྲུབས། སྐབས་ཤིག་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་མཆོག་ཡུལ་དེར་དབྱར་སྒར་ཕེབས་པའི་སྣ་ཤན་ཞབས་ཞུ་ཉིན་འགར་བྱས་ཤིང༌། གྲུབ་དབང་མཆོག་ཕེབས་ཁར་ཕ་ཡབ་ཀྱིས་གོས་ཕྲུག་རྟ་ནོར་སོགས་འབུལ་བ་གཟབ་རྒྱས་ཕུལ་བར། རྗེའི་ཞལ་ནས་འདི་རྣམས་ང་རང་ལ་མི་དགོས་ཀྱང་དགོས་རྒྱུ་ཞིག་འདུག་པ་ཁྱོད་ཀྱིས་སྦྱིན་ནམ་གསུངས། ཅི་གསུང་དང་ལེན་ལས་ག་ལ་ཡོད་ཞུས་ཚེ། འོ་ན་བུ་འདི་ང་ལ་དགོས་པས་སང་ཉིན་འགྲོ་རྒྱུ་ཐོན་པར་གྱིས་གསུངས་ནས་གཙུག་ཕུད་བཞེས་ཏེ་ཁྲིད། མར་ལམ་དགེ་མང་རི་ཁྲོད་དུ་ཕེབས་ནས་དེར་ཚེ་རབས་ལས་ཀྱི་བླ་མ་རྗེ་དབོན་མཁས་པ་ཆེན་པོ་ཨོ་རྒྱན་བསྟན་འཛིན་ནོར་བུ་ལ་བཅོལ་གཏམ་མཛད་ནས་བཞགདབོན་རིན་པོ་ཆེའི་གཟིམས་ལམ་དུ་སྔགས་སྲུང་མས་གསེར་གྱི་རྡོ་རྗེ་ཞིག་བསྩལ་བ་རྨིས་པས་སློབ་མ་གོ་ཆོད་ཅིག་འོང་བར་ངེས་གསུངས་ནས་ཐུགས་རྩིས་ཆེན་པོས་རྗེས་སུ་བཟུང་ཞིང་སོར་བྱང་སྔགས་ཀྱི་སྡོམ་པ་གནང་བ་དང་། རབ་ཏུ་བྱུང་བའི་མཚན་ལ་གཞན་ཕན་ཆོས་ཀྱི་སྣང་བ་ཞེས་གསོལ་ཏེ་རྗེ་ཉིད་ཀྱི་ཁུ་བོ་རྒྱལ་སྲས་གཞན་མཐའ་ཡས་ཀྱི་རྣམ་རོལ་དུ་དོན་གྱི་ངོས་འཛིན་མཛད། དཔལ་སྤུངས་སི་ཏུ་པདྨ་དབང་མཆོག་རྒྱལ་པོ་དང་མཁྱེན་བརྩེ་ཆོས་ཀྱི་བློ་གྲོས་རྣམ་གཉིས་ཀྱིས་དཔལ་ལྡན་ཟླ་བ་གྲགས་པའི་རྣལ་རོལ་དུ་བསྔགས། ཐོག་མར་ཡི་གེ་འབྲི་ཀློག་ནས་འགོ་བཙུགས་ཏེ་བསླབ་སྦྱང་གི་གནས་ལ་འབད་པ་མཛད་ཚེ། ཆོས་གྲོགས་བློ་མ་དུལ་བ་རེ་འགས། འོ་འདིར་རྒྱ་ཀོང་ཚང་གི་ཕོ་གཞོན་གྱིས་ཀ་ཁ་ནས་ཀློག་སློབ་འགོ་འཛུགས་པ་ལ་ལྟོས་དང༌།འདིའི་མིང་ལ་བྱིས་པ་རྒན་པོ ་ཞེས་འདོགས་འཚལ་ཞེས་འཕྱ་སྨོད་བྱས།སྐབས་དེ་དག་ཏུ་ཉིན་མཚན་དབྱེར་མེད་པར་ཐོས་བསམ་ལ་བརྩོན་པ་རྒྱ་ཆེར་མཛད་པ་དང༌། ཁྱིམ་གཞིས་ས་ཐག་རིང་སྟབས་ཆོས་རྒྱགས་མ་འབྱོར་བ་སོགས་རྗེ་བཙུན་མི་ལའི་རྣམ་ཐར་དང་མཉམ་པའི་དཀའ་སྤྱད་དང་དུ་བཞེས་པ་སྟེ། བླ་བྲང་གི་མར་ལྐོག་རྙིང་པ་དོར་བ་ལས་སེན་མོས་མར་སྣུམ་བཞར་ཏེ་རླུང་ནོན་མཛད་པ་དང་། ཆུ་ལེན་དུ་ཕེབས་སྐབས་རླུང་གིས་སྐུ་གཟུགས་འཁྱོར་བ་སོགས་བླ་མས་གཟིགས་ཚེ་ཕྱག་ཐལ་མོ་སྦྱར་ཏེ་སྤྱན་ཆབ་ཕྱུང་༌། ལས་ཅན་གྱི་སློབ་མ་བྱ་བ་འདི་འདྲ་ཡིན་དགོངས་ཏེ་དང་པོ་ཁོང་ལ་འཚོ་བའི་མཐུན་རྐྱེན་ཞིག་གནང་དགོས་དགོངས་པར་སླར་ཐུགས་བསམ་བཞེས་ཏེ་རང་གི་ཕྱག་ལ་བཟུང་ནས་ཁྱོད་སྡོད་ཁྱོད་སྡོད་ཁྱོད་ཁ་རོག་སྡོད། གཞན་དགའ་ཆོས་ཕྱིར་དཀའ་སྤྱད་མཛད་པའི་བྱང་སེམས་ཀྱི་སྤྱོད་པ་ལ་བར་ཆད་མ་གཏང་གསུངས་ནས་མི་གཟིགས་པའི་ཚུལ་བཞིན་མཛད་ནས་བཞུགས། རེ་ཞིག་ན་བླ་མས་ད་ཁྱོད་ཀྱིས་སློབ་གཉེར་ཅུང་ཟད་ཞོག་ལ་ལྷག་ལྷ་དབྱངས་ཅན་དཀར་མོའི་བསྙེན་སྒྲུབ་ལ་འདུག་དགོས་གསུངས་ནས་དབང་སོགས་གནང་། དེ་ལྟར་མཛད་པས་ཞག་བདུན་ཕྲག་གཉིས་ན་དབྱངས་ཅན་དཀར་མོས་ཞལ་གཟིགས་ཏེ་སྐྱེས་ཐོབ་ཀྱི་ཤེས་རབ་མེ་ལྟར་འབར་ཞིང་། སྔོན་སྦྱངས་ཀྱི་རིགས་སད་པས་བླ་མས་གང་གསུངས་པའི་ཆོས་ཐམས་ཅད་སྐད་ཅིག་རེར་ཐུགས་སུ་ཆུད་པའི་གཟུངས་སྤོབས་བློ་གྲོས་ཀྱི་དཔལ་འབར་ཞིང༌། འཆད་རྩོད་རྩོམ་གསུམ་ལ་ཐོགས་པ་མེད་པས་མཁན་ཡོན་ཏན་རྒྱ་མཚོ་སོགས་མཆེད་གྲོགས་རྙིང་པ་སུས་ཀྱང་འགྲན་ཟླ་མེད་པར་གྱུར། སྐབས་རེར་ཞལ་སློབ་རྙིང་པ་འགའ་རེས་འཁོར་གསུམ་རེ་བསྐོར་ཐུབ་ཚེ་ལག་པ་དབུ་ཐོག་ཏུ་གཡུག་པ་ན། བླ་མས་འོ་དེ་འདྲ་མ་བྱེད། དེ་འདྲ་མ་བྱེད། གཞན་དགའི་དབུར་ལག་པ་མ་ཁྱེར་བར་རང་གར་ཞོག་ཅེས་ལན་མང་གསུངས། ཉིན་ཞིག་ཞལ་སློབ་རྙིང་པ་ཞིག་གིས་བླ་མ་རིན་པོ་ཆེ་ལགས། ཁྱེད་ལ་ཉེ་རིང་མེད་སྙམ་ཡང་སློབ་མ་གསར་པ་ཕྱུག་པོའི་བུ་གཞན་དགའ་འདིའི་རྒྱབ་གཉེར་རྟག་ཏུ་གནང་གི་འདུག་པས་བླ་མས་སློབ་མ་ལ་ཐུགས་ཉེ་རིང་གནང་བ་རིགས་སམ་ཞུས་པར། འོ་ངའི་གཞན་དགའི་རྒྱབ་གཉེར་བྱས་པ་མིན་ཁྱེད་ཅག་སྣང་བ་མ་དག་པ་རེ་བླུན། གཞན་དགའ་འདི་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཞེས་མདོ་ལས་འབྱུང་བ་དེ་འདྲ་ཡིན། འདི་ལ་འགོམ་ཡུག་དང་མགོ་ལ་ལག་པས་བསྐོར་བ་སོགས་མ་གུས་པར་བྱས་ན། རྫ་རྒྱུད་ཡུལ་བའི་གཅེས་མིང་ལ་ཀུན་འདྲིས་ཡོན་འདྲིས་ཞེས་གྲགས་པ་འདི་ཚོས་མ་འོངས་པར་ཆོས་སྟོན་པའི་འགྲོ་དོན་དང་ཕྲིན་ལས་ལ་གནོད་འོང༌། ངས་སློབ་མ་རྙིང་པ་ཚོའི་རྒྱབ་གཉེར་བྱེད་ཀྱི་ཡོད་གསུངས། དེ་ནས་བཟུང་ཆོས་སྒར་ལ་གནས་པ་ཀུན་ཀྱིས་བླ་མའི་བཀའ་བཞིན་རྗེ་འདི་ལ་གུས་པས་བཀུར། རྒྱུན་དུ་ཐོས་བསམ་འཆད་ཉན་གྱི་ཞོར་དུ་རྩ་གསུམ་ལྷའི་བསྙེན་སྒྲུབ་གནང་ཞིང་དེ་དག་གི་སྐབས་སུ་གྲུབ་པའི་རྟགས་མཚན་དུ་ཞལ་གཟིགས་ལུང་བསྟན་གྱི་དངོས་གྲུབ་དཔག་མེད་ཐོབ་པ་དང་། ཁྱད་པར་ཀུན་མཁྱེན་ཆོས་ཀྱི་རྒྱལ་པོ་ལ་མི་ཕྱེད་པའི་དད་གུས་ཀྱིས་གསོལ་བ་བཏབ་པས་ཞལ་མངོན་སུམ་དུ་མཇལ་ཞིང་ཡེ་ཤེས་ཀྱི་སྐུས་རྗེས་སུ་བཟུང་བས་དོན་བརྒྱུད་ཀྱི་རྟོགས་པ་མངོན་དུ་གྱུར་པས་ཀུན་མཁྱེན་བསྟོད་པའང་མཛད། རྗེས་ཐོབ་ཤེས་རབ་རང་བྱུང་གི་སྒྲོན་མའི་རྩལ་རྒྱས་པས་མདོ་སྔགས་བཀའ་བསྟན་གྱི་གནད་གང་འདྲ་ཞིག་དྲིས་ཀྱང་། ཕྱག་དཔེ་གཟིགས་པ་སོགས་ལ་མི་ལྟོས་པར་ལན་ཐོགས་མེད་དུ་གསུངས་ཤིང་གླེགས་བམ་གང་གི་ཐིག་ཕྲེང་གང་དུ་ཡོད་པ་ཚུན་མ་ནོར་བར་གསུང་བ་བཅས་གཞུང་ལུགས་རབ་འབྱམས་ཐུགས་ལ་མངའ། བླ་མས་ཀྱང་ཞལ་སློབ་རྣམས་ལ་ཐེ་ཚོམ་དོགས་དཔྱོད་གང་དགོས་ཐམས་ཅད་གཞན་དགའ་ཚང་ལ་དྲིས་དང་ཁོ་བོ་དང་མཉམ་པ་ཡིན་ཞེས་གསུངས། རྗེ་འདིའི་ཞབས་པད་ལ་སྔ་ཕྱིར་མི་ལོ་བཅུ་གསུམ་གྱི་བར་མཉེས་པ་གསུམ་གྱིས་བཏུད་དེ། རྒྱལ་སྲས་གཞན་ཕན་མཐའ་ཡས་དང་ཆོས་རྗེ་དཔལ་སྤྲུལ་རིན་པོ་ཆེ་སོགས་གྲུབ་དབང་རྫོགས་ཆེན་པའི་མཁས་གྲུབ་རྣམས་ཀྱི་གསུང་རྒྱུན་ལས་བྱུང་བའི་སྤྱོད་འཇུག་དང༌། རྩ་ཤེར་སོགས་རིགས་ཚོགས། འཇུག་པ། བཞི་བརྒྱ་པ། མདོ་རྒྱན། ཤེར་ཕྱིན། རྒྱུད་བླ། འབྱེད་གཉིས། ཀཱ་རི་ཀ་ཆེ་ཆུང༌། མདོ་རྩ། སྡོམ་གསུམ། མངོན་པ་གོང་འོགཚད་མ་རིགས་གཏེར། སྡོམ་པ་ཉི་ཤུ་པ། ལམ་གཙོ་རྣམ་གསུམ། ཕྱག་ཆེན་ལྔ་ལྡན། ཞེན་པ་བཞི་བྲལ། ཀུན་མཁྱེན་མཛོད་བདུན། ངལ་གསོ་སྐོར་གསུམ། ཡོན་ཏན་མཛོད། གསང་སྙིང་འགྲེལ་ཆེན་ཁག །ཡེ་ཤེས་བླ་མ་སོགས་ནས། སྒྲ་སྙན་སྨན་རྩིས་སོགས་མདོ་སྔགས་རིག་གནས་དང་བཅས་པའི་གཞུང་ལུགས་ལ་ལན་གྲངས་དུ་མར་གསན་སྦྱང་མཛད་པ་དང༌།ཁྱད་པར་མི་འགྱུར་ནམ་མཁའི་རྡོ་རྗེའི་ཞལ་སྔ་ནས་ཉེ་བརྒྱུད་དུ་བྱོན་པའི་བླ་མ་ཡང་ཏིག་གི་གྲོལ་ཁྲིད་ཆིག་བརྒྱུད་ཀྱི་ཚུལ་དུ་བཀའ་གཏད་མཛད་ནས་འོད་གསལ་གསང་བ་སྙིང་ཐིག་གི་བསྟན་པའི་བདག་པོར་མངའ་གསོལ། རྗེ་ཉིད་ཀྱི་ཕྱག་དཔེ་གཞུང་ཆེན་བཅུ་གསུམ་གཙོ་བོར་གྱུར་པའི་འགྲེལ་ཆེན་བསྟན་འགྱུར་དུ་གང་བཞུགས་ཐམས་ཅད་གནང་སྟེ་འདི་དག་ལ་གཙོར་འདོན་གྱི་འཆད་རྩོམ་རེ་གྱིས་དང་། བརྒྱུད་འཛིན་གྱི་སློབ་མ་ནམ་མཁའི་སྐར་ཚོགས་ལྟར་བྱོན་ནས་རྒྱལ་བསྟན་རིན་པོ་ཆེ་ཉིན་མོའི་སྣང་བ་ལྟར་གསལ་བར་བྱེད་ཅེས་ལུང་བསྟན་ཏེ་བརྒྱུད་འཛིན་བཤད་པའི་བཀའ་བབ་ཏུ་དབུགས་དབྱུང༌། དེ་ལྟར་རྗེ་འདི་ལས་སྔ་འགྱུར་བཀའ་གཏེར་འགྲེལ་ཊིཀ་སྙན་བརྒྱུད་དང་བཅས་པའི་ཟབ་རྒྱས་ཀྱི་ཆོས་ཚུལ་ཚང་ལ་མ་ནོར་བ་ཐུགས་བརྒྱུད་བུམ་པ་གང་བྱོའི་ཚུལ་དུ་ཡོངས་སུ་ཐོབ་པས། ཉིད་ཀྱི་ཞལ་ནས། ཡོངས་འཛིན་བཤེས་གཉེན་མང་རུང་མ་མང་རུང༌། །ངའི་བླ་མ་ཨོ་རྒྱན་བསྟན་འཛིན་ནོར་བུ་ཡིན། །ཞེས་དང་། ཨོ་རྒྱན་བསྟན་འཛིན་ནོར་བུ་རིགས་བདག་ཏུ་ཐོབ་པ། །ཁོ་བོ་ལས་འཕྲོ་མི་དམན་སྐལ་བ་རེ་བཟང་ངོ༌། །ཞེས་སོགས་ཐུགས་བློ་ཁེངས་པའི་གསུང་ཡང་ཡང་བྱོན། བླ་མ་ཞིང་དུ་གཤེགས་རྗེས་རབ་སྒྲུབ་པའི་མཆོད་པར་དགོངས་ཏེ་ལོ་གྲངས་དུ་མར་རྒྱལ་ཚབ་མཛད་དེ་ཕྱོགས་ཀྱི་སློབ་ཚོགས་རྣམས་ལ་མདོ་སྔགས་ཆོས་ཀྱི་འཁོར་ལོ་རྒྱ་ཆེར་བསྐོར། དེ་ནས་གྲུབ་དབང་རྫོགས་སྤྲུལ་ལྔ་པ་རིན་པོ་ཆེའི་གསུང་བསྐུལ་ལྟར་མདོ་ཁམས་རྫོགས་ཆེན་ཤྲཱི་སེང་ཆོས་གྲྭའི་མཁན་ཁྲིར་བཞུགས་ནས། རྒྱ་གཞུང་ཆེན་མོ་བཅུ་གསུམ་སྟེ། མདོ་དང་མདོ་རྩ་འདུལ་བའི་སྡེ་སྣོད་དང་། །མཛོད་དང་ཀུན་བཏུས་མངོན་པའི་སྡེ་སྣོད་ལ། །རྩ་འཇུག་བཞི་སྤྱོད་ཟབ་མོ་དབུ་མའི་གཞུང་། །བྱམས་ཆོས་སྡེ་ལྔ་རྒྱ་ཆེན་སྤྱོད་པའི་གཞུང་། །ཆ་ལག་དང་བཅས་རྒྱ་གཞུང་པོད་བཅུ་གསུམ། །ཞེས་ཡོངས་སུ་གྲགས་པ་ལྟར་གཙོ་ཆེར་འཕགས་ཡུལ་མཁས་པའི་ལེགས་བཤད་དྲི་མ་མེད་པ་རང་འགྲེལ་རྣམས་དང་༌། རྒྱ་གཞུང་འགྲེལ་ཆེན་གྲགས་ཆེ་བ་དག་གིས་གཞུང་བསྲང་ཐོགབོད་ཡུལ་གྲུབ་མཐའ་ཆེན་མོ་བཞིའི་མཁས་པ་དག་གི་འགྲེལ་བཤད་གྱིས་ཟུར་བརྒྱན་ཅིང་། རྒྱལ་སྲས་གཞན་ཕན་མཐའ་ཡས་དང༌། དཔལ་སྤྲུལ་སེམས་དཔའ་ཆེན་པོ། མཁན་ཆེན་པདྨ་བཛྲ་སོགས་གྲུབ་དབང་རྫོགས་ཆེན་པའི་མཁན་རབས་གོང་མ་རྣམས་ཀྱི་ཞལ་རྒྱུན་མ་ཉམས་པ་རང་ལུགས་སུ་བཞག་སྟེ་འཆད་ཁྲིད་མཛད་པས། སྟོད་རྒྱ་གར་ཁུ་ནུ་དང་ལྷོ་འབྲུག་གི་ཡུལ་ནས་སྨད་རྒྱ་སོག་ཚུན་གྲུབ་མཐའ་རིས་མེད་ཀྱི་ཐོས་བསམ་པ་དབྱར་མཚོ་ལ་ངང་པ་བཞིན་ཕྱོགས་དང་ཕྱོགས་ནས་འདུས་ཤིང་འཆད་རྩོད་རྩོམ་གསུམ་གྱི་སྣང་བས་རྒྱལ་བསྟན་ཉིན་མོ་ལྟར་གསལ་བར་མཛད་པས་ཀུན་མཁྱེན་གཞན་ཕན་པ་དང་སངས་རྒྱས་གཞན་ཕན་པ་ཞེས་ཡོངས་སུ་གྲགས་ཤིང་། འཇམ་མགོན་མི་ཕམ་རིན་པོ་ཆེའི་ཞལ་ནས། ཁོ་བོའི་གཞུང་འགྲེལ་བརྩམས་པ་རྣམས་སྔ་འགྱུར་པའི་བསྟན་པ་ཕྱི་རབས་སུ་ཡུན་དུ་གནས་པའི་ཆེད་དུ་ཡིན་ལ། དཔལ་ལྡན་ཟླ་གྲགས་དང་ཀུན་མཁྱེན་རོང་ཀློང་རྣམ་གཉིས་ཀྱི་དགོངས་པ་སྲོག་ཏུ་བཟུང་སྟེ་བཤད་སྒྲུབ་ཀྱི་བསྟན་པ་ཕྱོགས་ཀུན་སྤེལ་བ་ལ་གཞན་དགའ་རིན་པོ་ཆེར་བཀའ་བབ་པ་འདི་རྒྱལ་སྲས་གཞན་ཕན་པའི་ཐུགས་སྨོན་དང་སྐྱེ་སྤྲུལ་ཡིན་པའི་དབང་གིས་ཡིན་ཞེས་བསྔགས་པའི་མེ་ཏོག་འཐོར་བར་མཛད། རྗེ་འདིས་སྤྱོད་འཇུག་དང་འཇུག་པ་སོགས་འཆད་ཁྲིད་གནང་བའི་ཚེ། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་དང༌། གང་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། །ཞེས་སོགས་ཀྱི་སྐབས་ཐུགས་མཉམ་པར་བཞག་པ་ཙམ་གྱིས་རྫོགས་ཆེན་ཀ་དག་གི་དགོངས་པ་ཆོས་ཉིད་ཡིད་དཔྱོད་དུ་མ་ལུས་པ་མངོན་སུམ་རང་ངོ་འཕྲོད་པའི་ཞལ་སློབ་གྲངས་ཀྱིས་མི་ལང་པ་བྱུང་། རྫོགས་ཆེན་གྲུབ་དབང་ལྔ་པས་དཔལ་ལྡན་ཟླ་གྲགས་པའི་རྣམ་རོལ་ཡིན་ཞེས་སླུ་མེད་རྡོ་རྗེའི་གསུང་གིས་ལུང་བསྟན་པ་དང༌།ཐལ་འགྱུར་པའི་དགོངས་པ་གཏན་ལ་འབེབས་པ་ལ་ཟླ་བ་གྲགས་པ་གཉིས་པ་བྱོན་པ་ལྟ་བུ་ཡིན་ཞེས་རིས་མེད་མཁས་དབང་རྣམས་ཀྱིས་མགྲིན་གཅིག་ཏུ་བསྔགས། རྒ་སྟོད་ངག་དབང་ལེགས་པས་ཁོ་བོའི་རྨི་ལམ་དུ་འཇམ་མགོན་ས་སྐྱ་པཎ་ཆེན་ཡུལ་འདིར་ཕེབས་པར་རྨིས་པ་གཞན་དགའ་རིན་པོ་ཆེ་འདི་ཡིན་འདུག་ཅེས་ས་སྐྱ་པཎ་ཆེན་ཀུན་དགའ་རྒྱལ་མཚན་གྱིརྣམ་འཕྲུལ་དུ་བསྔགས། འཇམ་མགོན་བློ་གཏེར་དབང་པོ་ལས་ལམ་འབྲས་ཀྱི་དབང་ཁྲིད་གདམས་པ་ཐམས་ཅད་རྫོགས་པར་གསན་ཞིང་དེ་དུས་ཡེ་ཤེས་པ་དངོས་སུ་ཕེབས་པ་སོགས་ལམ་རྟགས་ཀྱི་ཡོན་ཏན་མངོན་དུ་གྱུར་པ་དང་༌། འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་སྨིན་ཁྲིད་ཕར་གནང་བ་བཅས་ཕན་ཚུན་བླ་སློབ་ཏུ་གྱུར། སྡེ་དགེའི་བླ་མ་འཇམ་རྒྱལ་རིན་པོ་ཆེས་དེང་སང་དཔལ་ས་སྐྱའི་བསྟན་པ་འདི་ཤིན་ཏུ་ཉམས་དམན་པས་སླར་གསོ་སོར་ཆུད་ཡོང་བ་ལ་གང་དྲག་ཅེས་ཞུས་ཚེ།ཀུན་མཁྱེན་གོ་རམས་པ་བསོད་ནམས་སེང་གེའི་གསུང་འབུམ་ཅི་ཡོད་འཚོལ་སྡུད་གྱིས་ལ་དཔར་དུ་བསྐྲུན་ཐུབ་ན་དེ་ལས་བཟང་བ་མེད་ཅེས་ཞལ་བཀོད་གནང་བ་ལྟར་དམ་པ་དེས་ཐུགས་བརྩོན་ཆེན་པོས་སྡེ་དགེར་ཤིང་དཔར་དུ་བསྐྲུན་པས་ཕྲིན་ལས་རྒྱ་ཆེར་འཕེལ། དེ་ནས་ཤྲཱི་སེང་ཆོས་གྲྭའི་ལས་ཐོག་མཁན་པོའི་ཐུགས་འགན་རྫོགས་རྗེས་དཔལ་སྤུངས་སི་ཏུ་རིན་པོ་ཆེ་པདྨ་དབང་མཆོག་རྒྱལ་པོ་དང་། མཁྱེན་བརྩེ་ཆོས་ཀྱི་བློགྲོས།འབྲི་གུང་སྐྱབས་མགོན་སོགས་རིས་མེད་བསྟན་འཛིན་ཆེན་མོ་དག་གི་གདན་ཞུས་བཞིན། རྫོང་སར་ཁམས་བྱེ་བཤད་གྲྭ་དང༌། དཔལ་སྤུངས་བཤད་གྲྭ། འབྲི་གུང་ཉི་མ་ལྕང་རའི་བཤད་གྲྭ། རྒ་སྟོད་སྐྱེ་དགུའི་བཤད་གྲྭ་སོགས་སུ་ཕེབས་ནས་མཁན་རབས་དང་པོའི་གསེར་ཁྲིར་བཞུགས་ཏེ་མདོ་སྔགས་རིག་གནས་དང་བཅས་པའི་བཤད་ཁྲིད་སྤྱི་དང༌། ཉིད་མཛད་རྒྱ་གཞུང་ཆེན་མོ་བཅུ་གསུམ་གྱི་མཆན་འགྲེལ་གྱི་འཆད་སྲོལ་བཙུགས་པས་དེ་དག་ཏུ་ཞལ་སློབ་མཁས་པའི་དབང་པོ་བསམ་གྱིས་མི་ཁྱབ་པ་བྱུང༌། སྔ་ཕྱིར་རྗེ་ཉིད་སྐུ་དངོས་དང་ཞལ་སློབ་མཁས་པའི་དབང་པོརྣམས་ཀྱིས་བཙུགས་པའི་བཤད་གྲྭ་བརྒྱ་ཕྲག་ལ་ཉེ་བས་བོད་ཡུལ་ཙམ་དུ་མ་ཟད་འབྲས་འབྲུག་སོགས་ཕྱི་ཡི་རྒྱལ་ཁབ་ཁག་དང༌། ས་དགེ་དཀའ་རྙིང་གི་གྲུབ་མཐའ་འཛིན་པའི་ཆོས་སྡེ་ཡོངས་ལ་ཁྱབ་ཚུལ་གོང་དུ་ཤྲཱི་སེང་ཆོས་གྲྭའི་ལོ་རྒྱུས་ཀྱི་སྐབས་སུ་རྒྱས་པར་བཀོད་ཟིན་པ་ལྟར་ལ།མདོར་ན་རྒྱལ་བསྟན་ལུང་རྟོགས་ཀྱི་བསྟན་པ་རིན་པོ་ཆེ་བཤད་སྒྲུབ་འཆད་ཉན་གྱིས་སྤེལ་བ་ལ་ཐུགས་བསྐྱེད་དང་སྨོན་ལམ་གྱི་མཐུ་གྲུབ་པའི་སྐྱེས་བུ་འདི་ལྟ་བུ་ཕྱོགས་དུས་གང་དུའང་མ་བྱོན་པ་མངོན་སུམ་མཐོང་ཆོས་སུ་གྲུབ་བོ། །སྐུ་ཚེའི་སྨད་དུ་རུ་དམ་གངས་ཁྲོད་གོང་མ་དང་རྒྱ་བོ་གནས་ཕུང་སོགས་དབེན་པའི་རི་ཁྲོད་རྣམས་སུ་ཕེབས་ནས། ཀུན་སྤང་བྱ་བྲལ་གྱི་རྒྱལ་པོ་རྗེ་བཞད་པ་རྡོ་རྗེའི་རྣམ་ཐར་བཞིན་སྒྲུབ་པའི་རྒྱལ་མཚན་བཙུགས་ནས་སྙིང་པོའི་ཉམས་བཞེས་ལ་གཞོལ་བ་དང༌། ཐུན་མཚམས་རྣམས་སུ་ཀུན་མཁྱེན་མཛོད་བདུན་དང་། ངལ་གསོ་སྐོར་གསུམ།ཡེ་ཤེས་བླ་མ། སྙིང་ཐིག་ཡ་བཞི་སོགས་འོད་གསལ་རྫོགས་པ་ཆེན་པོའི་སྨིན་ཁྲིད་རྒྱུན་མི་ཆད་པར་བསྩལ་ཞིང་༌། གཞུང་ཆེན་བཅུ་གསུམ་ལ་ཐོས་བསམ་དཔྱིས་ཕྱིན་པ་སྔོན་དུ་སོང་ཕྱིན་འབུམ་ལྔའི་བསགས་སྦྱང་མ་གྲུབ་ཀྱང་དེ་བས་ལྷག་པའི་བློ་སྦྱོང་མི་དགོས་ཞེས་དངོས་གཞིའི་དམར་ཁྲིད་ཀྱང་འདེབས་པར་མཛད། སྔ་ཕྱི་ཀུན་ཏུ་བསྟན་པ་ཡུན་གནས་ཀྱི་བཙས་སུ་དགོངས་ཏེ་ཞལ་གསུང་བསྟན་བཅོས་ཀྱི་སྐོར་དུ་མ་མཛད་པ་སྟེ། སྤྱོད་འཇུགབཞི་བརྒྱ་པ། འཇུག་པ། རྩ་ཤེས་སོགས་རིགས་ཚོགས། ཀཱ་རི་ཀ་ལྔ་བཅུ་པ་དང་སུམ་བརྒྱ་པ། སོར་མདོ། མདོ་རྩ། མངོན་པ་གོང་འོགབྱམས་ཆོས་སྡེ་ལྔ། གསང་བ་སྙིང་པོ་བཅས་ཀྱི་མཆན་འགྲེལ་དང༌། དབུ་མ་འཇུག་པ་དང་མངོན་པ་མཛོད་ཀྱི་རང་འགྲེལ་ལ་འགྲེལ་མཆན། མཁས་བྱའི་གནས་དྲུག་གི་བསྟན་བཅོས། ཐོག་མཐའ་བར་དགེའི་གཏམ་གྱི་འབྲུ་འགྲེལ། ཨོ་རྒྱན་བསྟན་འཛིན་ནོར་བུའི་རྣམ་ཐར་ཚིགས་བཅད་མ།གཞན་བསྟོད་ཚོགས་དང་ཞལ་གདམས་ཉམས་མགུར་བཅས་སྔར་མེད་འགྲན་ཟླ་དང་བྲལ་བ་དུ་མ་མཛད་ནས་ལུང་རྟོགས་བཤད་སྒྲུབ་ཀྱི་བསྟན་པ་རིན་པོ་ཆེ་ཕྱི་མའི་མཐར་ཡང་ཉམས་པ་མེད་པའི་དཔལ་ལ་བཀོད། དེ་ལྟར་དོན་གཉིས་ལྷུན་གྲུབ་ཀྱི་མཛད་པ་ཕྱོགས་མེད་དུ་བརྡལ་ནས་སྐུ་ཚེ་དང་སྒྲུབ་པ་མཐའ་རུ་ཕྱིན་པའི་ངང་སྙུན་གཞིའི་རྣམ་པ་ཅུང་ཟད་ཀྱང་མེད་པར། སྤྱི་ལོ་༡༩༢༧པ་རབ་བྱུང་བཅུ་དྲུག་པའི་ཐོག་མའི་མེ་ཡོས་ལོར་ཕྱི་གསལ་གཟུགས་སྐུའི་བཀོད་པ་ནང་དབྱིངས་ཀ་དག་ཆེན་པོར་མངོན་པར་བསྡུ་བར་མཛད་ཅིང༌། སྙིགས་མའི་སྐུ་གདུང་རིན་པོ་ཆེ་ཁྲུ་གང་བ་ཙམ་ལུས་པ་རྫོགས་སྤྲུལ་རིན་པོ་ཆེ་དང་༌། སི་ཏུ་པདྨ་དབང་མཆོག་རྒྱལ་པོ། ཐུགས་སྲས་ཡོན་ཏན་མགོན་པོ་སོགས་ཀྱིས་ཞུགས་སྦྱངས་མཛད་ཚེ་ཐེག་པ་མཆོག་གི་གསང་ལམ་ནས་རིགས་ལྔའི་དབྱིངས་སུ་མངོན་སངས་རྒྱས་པའིརྟགས་མཚན་དུ། གདུང་ཤ་རཱི་རམ། ཆུ་རཱི་རམ། ཉ་རཱི་རམ། བ་རཱི་རམ།བསེ་རཱི་རམ་སྟེ་འབྱུང་བའི་གནོད་པ་དང་བྲལ་བའི་གདུང་ཆེན་ལྔ་དང་རིང་བསྲེལ་ཕྲ་མོ་གྲངས་མེད་པ་ཕེབས་པ་དང༌། ནམ་མཁའ་མཐིང་ཞུན་གྱི་མདངས་ལྟར་དག་པའི་ངོས་སུ་འཇའ་འོད་སྣ་ཚོགས་ཀྱི་གུར་ཁྱིམ་འཁྲིགས་ཤིང་། མེ་ཏོག་གི་ཆར་བབ་པ་བཅས་གདུལ་བྱ་དད་པའི་ས་ལ་བཀོད་པའི་ཡ་མཚན་གྱི་རྟགས་སྣང་མཐའ་ཡས་པ་བྱུང་ངོ་། །ཞལ་སློབ་མཁས་གྲུབ་ཀྱི་སྐྱེས་བུ་ས་ཆེན་པོའི་ཁྱོན་ཀུན་ཁྱབ་པ་ཙམ་བྱུང་ཞིང་དེ་ལས་གཙོ་བོའི་མཚན་ཙམ་སྨོས་ན། རྒྱལ་བསྟན་རིས་མེད་བསྟན་འཛིན་སྐྱེས་ཆེན་རྣམ་གཉིས་ཏེ། དཔལ་སྤུངས་སི་ཏུ་པདྨ་དབང་མཆོག་རྒྱལ་པོ་དང་། རྫོང་སར་མཁྱེན་བརྩེ་ཆོས་ཀྱི་བློ་གྲོས། ཐུགས་སྲས་བུ་ཆེན་རྣམ་གཉིས་ཏེ། མཁན་ཆེན་འཇིགས་མེད་ཡོན་ཏན་མགོན་པོ་དང༌། མཁན་འཆི་མེད་ཡེ་ཤེས། མཁས་དབང་ཆོས་གྲགས་རྣམ་གཉིས་ཏེ། ར་ཧོར་ཆོས་གྲགས་དང༌། གསེར་ཁ་ཆོས་གྲགས། གྲུབ་པ་ཐོབ་པའི་སྐྱེས་ཆེན་རྣམ་གཉིས་ཏེ། ཨ་གྲོའི་མཁན་པོ་ཡེ་ཤེས་རྒྱ་མཚོ་དང༌། མཁན་ཆེན་བློ་ལྡན། རྣམ་དཔྱོད་ཕུལ་དུ་བྱུང་བའི་རབ་འབྱམས་པ་རྣམ་གཉིས་ཏེ། མཁན་ཆེན་པདྨ་ཚེ་དབང་དང་། རྫོང་སར་བཤད་གྲྭའི་མཁན་རབས་གཉིས་པ་དབོན་སྟོད་མཁྱེན་རབ། དྲག་སྔགས་ནུས་ལྡན་གྱི་སྐྱེས་བུ་གཉིས་ཏེ། མཁན་ནོར་དབྱངས་དང་། ཨ་པཎ་ཆོས་དཔལ། གཞན་ཡང་ཁམས་བྱེའི་མཁན་རབས་གསུམ་པ་བླ་མ་འཇམ་དབྱངས་རྒྱལ་མཚན། མཁན་རབས་ལྔ་པ་སྡེ་གཞུང་ཆོས་འཕེལ་ཀུན་དགའ། ངོར་ཁང་གསར་མཁན་ཆེན་ངག་དབང་བློ་གྲོས་གཞན་ཕན་སྙིང་པོ། ས་སྐྱའི་མཁན་ཆེན་ཐུབ་བསྟན་བྱང་ཆུབ།འབོ་གངས་དཀར་སྤྲུལ་སྐུ། ཟུར་མང་པད་མ་རྣམ་རྒྱལ། ཟླ་གཞུང་མཆོག་སྤྲུལ། རྫོང་སར་མཁན་རབས་བཞི་པ་བྲག་ཡབ་བློ་གྲོས། སྡེ་གཞུང་མཆོག་སྤྲུལ་ཨ་འཇམ། ཁང་དམར་རིན་ཆེན། མདོ་སྲིབ་ཐུབ་བསྟན། ཁྲི་ཚོ་རིན་ཆེན། མི་ཉག་མཁན་ཆེན་དམ་ཆོས། བ་ཐུར་མཁན་ཆེན་ཐུབ་དགའ། རྟ་ནག་ཐུབ་བསྟན་གླིང་གི་མཁན་པོ་གཞན་ཕན་ལེགས་གྲུབ། དཀར་མཛེས་བུ་རམ་སྣ་བ་བློ་བཟང་བསྟན་འཛིན། ལྷོ་འབྲུག་མཁན་ཆེན་བསྟན་པ་རིན་ཆེན། ཁུ་ནུ་བླ་མ་བསྟན་འཛིན་རྒྱ་མཚོ། དིལ་མཁྱེན་རབ་གསལ་ཟླ་བ། དགེ་བཤེས་རིན་ཆེན་རྡོ་རྗེ། དགེ་བཤེས་པདྨ་ཚེ་རིང་། དགེ་བཤེས་ཚུལ་ཁྲིམས་དཔལ་བཟང་། དགེ་བཤེས་རྣམ་རྒྱལ་དཔལ་བཟང༌། ཉག་རོང་གུ་རུ་སྤྲུལ་སྐུ། མཁན་ཆེན་ཐུབ་བསྟན་སྙན་གྲགས། མཁན་ཆེན་ངག་དབང་ནོར་བུ། ལུག་རུ་མཁན་ཆེན། ཅབ་ར་མཁན་ཆེན། སྒྲུབ་རྒྱུད་རིན་པོ་ཆེ་སོགས་སྐབས་དེའི་མདོ་སྨད་ཀྱི་མཁས་པ་ཐམས་ཅད་ཀྱིས་རྗེ་འདིའི་གསུང་གི་བདུད་རྩི་མ་བཞེས་པ་མེད་པ་ལྟ་བུར་མངོན་ཞིང༌། དེ་དག་སློབ་བརྒྱུད་ཡང་སློབ་དང་བཅས་པས་ཤར་ནུབ་འཛམ་གླིང་གི་ས་ཆེན་པོའི་ཁྱོན་ཀུན་ཡོངས་སུ་ཁྱབ་པ་བྱུང་ངོ་། །
རྩོམ་སྒྲིག་པ། དོན་འགྲུབ་རྡོ་རྗེ།