མཁན་རབས་ཉེར་བཞི་པ། ཉག་ཤུལ་མཁན་པོ་འགྱུར་མེད་འོད་གསལ་ནི།ཡུལ་མདོ་སྨད་འབྲོག་ཁུལ་གྱི་ས་ཆ་ཞིག་ཏུ་དཔའ་མཛངས་ལྡན་པ་ཉག་ཤུལ་ཅེས་པའི་རིགས་སུ་སྐུ་འཁྲུངས། སྐུ་ཆུང་ངུའི་དུས་ཁུ་བོ་རྣམས་དང་ལྷན་དུ་རུ་དམ་གདན་སར་ཆོས་མཇལ་ཕེབས་ཚེ་བཟློག་ཏུ་མེད་པའི་ངེས་འབྱུང་དྲག་པོས་རབ་ཏུ་བྱུང་བར་འདོད་པ་བཞིན་ཆོས་སྡེ་ཆེན་མོའི་གཞུང་གྲྭར་མཚན་ཐོ་བཀོད་དེ་ཚོགས་ཞུགས་མཛད། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེས་གཙུག་ཕུད་བཞེས་ཤིང་དགྱེས་བརྩེ་ཆེན་པོས་ཁང་ས་སོགས་གནང་སྦྱིན་མཛད། རྗེ་གང་ཉིད་ཀྱི་ཞལ་སྔ་ནས་ཐོག་མར་རབ་ཏུ་བྱུང་བ་དགེ་ཚུལ་གྱི་སྡོམ་པ་བཞེས་པ་ནས་སོ་བྱང་སྔགས་ཀྱི་དམ་སྡོམ་མ་ལུས་པ་ལེགས་པར་ནོད་ཅིང༌། སྔ་འགྱུར་བཀའ་གཏེར་རྒྱ་མཚོའི་སྨིན་གྲོལ་ཆིག་རྫོགས་སུ་བཞེས་པས་གཙུག་གི་རྒྱན་གཅིག་ཏུ་འཛིན།གཞན་ཡང་མཁས་མཆོག་གཞན་ཕན་སྣང་བ་དང་། ཨ་གྲོའི་མཁན་པོ་བསོད་ཆོས། མཁན་ཆེན་པདྨ་ཐེག་མཆོག་བློ་ལྡན་སོགས་ཡོངས་འཛིན་བཤེས་གཉེན་དུ་མའི་ཞབས་པད་མཉེས་པ་གསུམ་གྱིས་བསྟེན་ཏེ་མདོ་སྔགས་རིག་གནས་དང་བཅས་པར་གསན་སྦྱངས་མཛད། དགུང་གྲངས་སུམ་ཅུའི་སྐོར་འཆད་རྩོད་རྩོམ་གསུམ་ལ་ཐོགས་པ་མི་མངའ་བའི་རྣམ་དཔྱོད་ཀྱི་རྩལ་རྒྱས་པས་དཔལ་སེང་གེ་རིའི་ཆོས་སྡེའི་མཁན་ཁྲིར་བཞུགས་ཏེ་འཆད་ཁྲིད་རྒྱ་ཆེར་སྐྱོང་བཞིན་པའི་སྐབས་བར་ཆད་ཀྱིས་སྐུ་ཚེ་མཐར་མ་ཕྱིན་པར་ཞི་བར་གཤེགས། །
རྩོམ་སྒྲིག་པ། དོན་འགྲུབ་རྡོ་རྗེ།