གདན་རབས་བརྒྱད་པ། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་ནི། དེ་ཡང་སྔ་འགྱུར་བསྟན་པ་རྒྱ་མཚོའི་མངའ་བདག་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཞེས་ཡོངས་སུ་གྲགས་པའི་བདག་ཉིད་ཆེན་པོ་འདི་ནི། ཇི་སྐད་དུ། རྗེ་ཉིད་ཀྱིས་མཛད་པའི་སྐྱེ་ཕྲེང་གསོལ་འདེབས་ཐར་པའི་འཁྲི་ཤིང་ལས། ཁྱད་པར་རིགས་གསུམ་སེམས་དཔའི་སྒྱུ་འཕྲུལ་གར། །ཅིར་ཡང་བསྒྱུར་བའི་བྱེ་བྲག་འཕགས་ཡུལ་གྱི། །གསང་ཆེན་བཀའ་བབ་རྒྱལ་པོ་ཛ་ཞེས་པ། །ཨིནྡྲ་བྷུ་ཏི་ཆེན་པོར་གསོལ་བ་འདེབས། །མགོན་ཁྱོད་སྐུ་གསུམ་སྟོན་པའི་གསུང་རབ་ཀུན། །སྡུད་མཛད་སོ་སོའི་རྣམ་པར་སྣང་བ་ལས། །ཞིང་འདིའི་ཐུབ་དབང་དྲུང་དུ་ཀུན་དགའ་བོར། །བསྟན་ཀྱང་ཐ་མི་དད་པར་གསོལ་བ་འདེབས། །གང་ལས་མཁའ་ཟླ་ཆུ་མཚོར་ཤར་བ་བཞིན། །འགྲོ་ངོར་སྣང་བ་འཇམ་དཔལ་བཤེས་གཉེན་དང༌། །མདོ་ལུང་འགྲེལ་མཛད་དུར་ཁྲོད་བདེ་བ་གསལ། །ཀུ་ཀཱུ་རཱ་ཛ་རྣམས་ལ་གསོལ་བ་འདེབས། །དེ་བཞིན་སློབ་དཔོན་དཔའ་བོ་བི་ན་ས། །ཐུ་མི་སམྦྷོ་ཊ་དང་རྣམ་སྣང་མཛད། །དྷརྨ་བྷ་དྲ་ཟུར་ཆེན་ཤཀྱཱ་འབྱུང༌། །གླང་ལུང་པར་གྲགས་རྣམས་ལ་གསོལ་བ་འདེབས། །གཞན་ཡང་དབུ་ཕྱག་སྲོལ་འཛིན་ཇི་སྙེད་དང༌། །རྡོ་རྗེ་གླིང་སོགས་ཟབ་གཏེར་སྒོ་འབྱེད་པ། །དུ་མའི་གྲངས་མཐར་གཏེར་བདག་གླིང་པ་ཞེས། །ཡོངས་གྲགས་མཆོག་གཟིགས་རྣམས་ལ་གསོལ་བ་འདེབས། །ཞེས་རྡོ་རྗེའི་གསུང་གིས་ཞལ་བཞེས་མཛད་པ་དང༌། གཞན་ཡང་མཁན་ཆེན་བོ་དྷི་ས་ཏྭ་དང་ལོ་ཆེན་བཻ་རོ་ཙཱ་ན་ཟུང་དུ་འཇུག་པའི་རྣམ་འཕྲུལ་དུ་ལུང་གིས་ཡང་ཡང་ཟིན་པ་ལྟར། རྗེས་སུ་ཆགས་པའི་སྙིང་རྗེ་ཆེན་པོས་སེམས་ཅན་གྱི་ཁམས་དང་ཞིང་ཁམས་སྣ་ཚོགས་པར་སངས་རྒྱས་དང་བྱང་སེམས་ཀྱི་རྣལ་རོལ་བསམ་མི་ཁྱབ་པས་མཐའ་ཡས་པའི་འགྲོ་ཚོགས་སྨིན་པ་དང་གྲོལ་བའི་ས་ལ་བཀོད་ཅིང༌། སླར་ཡང་ཡུལ་མདོ་ཁམས་ཀྱི་ལྗོངས་འདིར་གསང་ཆེན་སྙིང་པོའི་བསྟན་པ་སྤེལ་བར་བསམ་བཞིན་དགེ་བའི་བཤེས་གཉེན་གྱི་ཚུལ་དུ་བྱོན་པའི་བདག་ཉིད་ཆེན་པོ་འདིའི་སྐུ་འཁྲུངས་པའི་ཡུལ་ནི། མདོ་སྨད་གླིང་དཀར་གྱི་སའི་ཐིག་ལེརྫ་ཆབ་སྔོན་མོ་དལ་གྱིས་འབབ་པའི་ཉེ་འགྲམ། ཡུལ་སྐྱོང་རྡོ་རྗེ་འཕན་ཕྱུག་གིས་བདག་ཏུ་བཟུང་བའི་གནས་མཆོག། མེ་ཏོག་དང་རྩི་སྨན་གྱིས་བརྒྱན་པའི་སྤང་ཐང་ཉམས་དགའ་བ་དགེ་མང་སྐམ་ཆུང་དུ་གྲགས་པའི་ནོར་འཛིན་གྱི་ལྟེ་བ་རུ། ཡབ་སྨུག་པོ་ལྡོང་གི་རིགས་ལ་བཙན་ཁ་བཞི་ཞེས་གྱེས་པའི་བྱེ་བྲག་དགེ་རྩེའི་ཨ་དོན་ཚེ་དབང་ནོར་བུ་དང་། ཡུམ་མཁའ་འགྲོའི་མཚན་རྟགས་དང་ལྡན་པ་ཀརྨ་ཆོས་སྒྲོན་གཉིས་ཀྱི་སྲས་སུ། སྤྱི་ལོ་༡༨༠༠པ་བོད་རབ་བྱུང་བཅུ་གསུམ་པའི་དྲག་པོ་ཞེས་པ་ལྕགས་སྤྲེལ་ལོར་སྐུ་བལྟམས། གཞོན་ནུ་ཉིད་ནས་དད་བརྩོན་སྙིང་རྗེ་ཤེས་རབ་སོགས་འཕགས་པའི་ཆོས་ཀུན་ལྷན་སྐྱེས་སུ་མངའ་བ་དང༌། ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་ཤིང་རྡོ་རྗེའི་ཆོས་སྲུང་ལུས་དང་གྲིབ་བཞིན་འགྲོགས་པ་སོགས་སོ་སོའི་སྐྱེ་བོ་ལས་རིང་དུ་འདས་པའི་མངོན་རྟགས་མཐོང་ཆོས་སུ་མངའ། དགུང་གྲངས་གསུམ་ཙམ་ན་དམ་པའི་སྐྱེས་བུ་དུ་མས་སྐྱེ་སྲིད་དུ་ལུང་གིས་བསྔགས་ཤིང་དགོན་པ་འགས་ཐོབ་ཤ་བྱས་ཀྱང་མ་བྱིན། སྐུ་ན་ཅུང་ཟད་སོན་ཙམ་པའི་སྐབས་ཤིག་ན་ཁྱིམ་གྱི་རྟ་འགའ་ཨར་ཇག་གིས་བརྐུས་པའི་ར་འདའ་ལ་ཕ་ཡབ་བརྒྱུག་པ་ལྔ་ལམ་དུ་བཏང་བ་དང༌། རྗེ་ཉིད་ཐོག་མ་ནས་འཁོར་བའི་གནས་ལས་ངེས་པར་འབྱུང་བའི་བློ་བཅོས་མིན་མངའ་བ་བཅས་ཀྱིས་རྐྱེན་བྱས་ཏེ་ཕྱོགས་མེད་དབེན་པར་གཤེགས་འདོད་ཁོ་ན་ཐུགས་ལ་ཤར། སྐབས་དེར་འཇམ་དབྱངས་ཆོས་ཀྱི་བློ་གྲོས་སམ་རྡོ་བླ་འཇིགས་མེད་སྐལ་བཟང་ཡུལ་དེར་ཕེབས་པས་ཐུགས་བརྩེ་ཆེན་པོས་ཉེར་བར་བཟུང་ཏེ་ཁྲི་གསོལ་མཛད་ནས་ཁྱེད་ཀྱི་བདག་པོ་ཁོ་བོ་ལས་མེད་ཅིང་། མི་རིང་བར་རྫོགས་ཆེན་དགོན་དང་གྲུབ་དབང་འཇིགས་མེད་ཕྲིན་ལས་འོད་ཟེར་གྱི་དྲུང་དུ་ཕེབས་དགོས་པའི་བཀའ་ལུང་ལྟར་ཐོག་མར་རྫོགས་ཆེན་དུ་ཕེབས་ཏེ་མི་འགྱུར་ནམ་མཁའི་རྡོ་རྗེའི་ཞབས་པད་བསྙེན། གཞན་ཡང་སྔ་ཕྱི་ཀུན་ཏུ་འཇིགས་མེད་རྒྱལ་བའི་མྱུ་གུ་དང་། འཇིགས་མེད་ངོ་མཚར་རྒྱ་མཚོ། རྗེ་དབོན་བསྟན་འཛིན་ནོར་བུ། སྔགས་རམ་པ་སྨོན་ལམ་དར་རྒྱས། གླིང་གྲུབ་ཆེན་སོགས་སྐྱེས་ཆེན་དུ་མ་གཙུག་རྒྱན་དུ་བསྟེན་ཏེ་ཐུན་མོང་དང་ཐུན་མིན་གྱི་རིག་པའི་གནས་ལ་གསན་སྦྱང་དང༌། བཀའ་གཏེར་གྱི་སྨིན་ཁྲིད་གདམས་ངག་མ་ལུས་པ་ཡོངས་སུ་གསན་བཞེས་མཛད། དགུང་གྲངས་བཅུ་དགུ་པ་ས་སྟག་ལོར་དོན་མཐུན་གྱི་གྲོགས་འགའ་ཞིག་དང་བཅས་ཚེ་རབས་དུ་མའི་རིགས་ཀྱི་བདག་པོ་གྲུབ་དབང་འཇིགས་མེད་ཕྲིན་ལས་འོད་ཟེར་མཇལ་དུ་ཕེབས། སྐུ་དངོས་མ་མཇལ་བའི་ལམ་བར་ནས་ཀྱང་འབྲལ་བ་མེད་པའི་ཐུགས་རྗེའི་བྱིན་རླབས་ཀྱི་མཐུས་ཞལ་གཟིགས་ལུང་བསྟན་གནང་བས་དགོངས་བརྒྱུད་ཀྱི་རྟོགས་པ་བརྙེས། ལོ་ངོ་གསུམ་ལ་གྲུབ་དབང་བླ་མའི་མདུན་དུ་བཞུགས་རིང་མདོ་སྔགས་ཀྱི་ཆོས་ཚུལ་སྤྱི་དང་ཟབ་གསང་སྙིང་ཐིག་གོང་འོག་གི་གདམས་ཁྲིད་བུམ་པ་གང་བྱོའི་ཚུལ་དུ་བསྩལ་ནས་དོན་བརྒྱུད་བསྟན་པའི་བཀའ་གཏད་མཛད། དེ་དག་གི་སྐབས་སུ་བླ་མ་སངས་རྒྱས་དངོས་མཐོང་གི་མོས་གུས་ཟབ་མོས་བསྙེན་ཞིང་སྤང་དག་ལན་ལྔ་མཛད་དེ་དངོས་འབྱོར་གྱི་མཆོད་པས་བཉེས་པར་བྱས། ལྕགས་སྦྲུལ་ལོར་གྲུབ་དབང་བླ་མ་ཞིང་དུ་གཤེགས་པས་རྒྱ་རོང་བཻ་རོའི་སྒྲུབ་གནས་སོགས་ངེས་མེད་ཀྱི་རི་ཁྲོད་འགྲིམ་སྟེ་སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ་བར་མཛད། སླར་རུ་དམ་གདན་སར་ཕེབས་ཏེ་མཁན་ཆེན་སེང་ཕྲུག་པདྨ་བཀྲ་ཤིས་ཀྱི་ཞལ་སྔ་ནས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་པས་ཐུབ་བསྟན་པདྨ་རྒྱས་པའི་ཉིན་བྱེད་དཔལ་བཟང་པོ་ཞེས་མཚན་གྱི་ཅོད་པན་གསོལ། སྤྱིར་རྗེ་འདི་ཉིད་ཟབ་གཏེར་གྱི་སྐལ་བ་ལྡན་པའི་སྐྱེས་བུ་ཡིན་པར་གསུངས་ཏེ། དགུང་ལོ་བརྒྱད་ལ་སོན་སྐབས་དཔལ་གྱི་བསམ་ཡས་ཆོས་སྡེ་ལ་མེའི་གནོད་པ་ཟློག་ཐབས་ཀྱི་ཟབ་གཏེར་ཁ་བྱང་ཕྱག་ཏུ་འབྱོར་ཀྱང་ས་ཐག་རིང་བས་ཕེབས་མ་ཐུབ་ཅིང༌། ཕྱིས་བསམ་ཡས་གཙུག་ལག་ཁང་ལ་མེ་ཡི་འཇིགས་པ་བྱུང་བ་གསན་པས་ཐུགས་འགྱོད་ཆེན་པོ་གནང༌། དེ་བཞིན་ལྷ་སར་ཆུའི་འཇིག་པ་བཟློག་པའི་ལུང་བྱང་ཡོད་པ་གཞན་ལ་སྦས་ཚུལ་གྱིས་ལྷ་ལྡན་དུ་བྱོན་ཏེ་ཕྱག་རྡོར་དྲེགས་འདུལ་གྱི་སྐུ་མཚམས་ལ་བཞུགས་པས་ཆུ་ལོག་ཆེན་པོ་བྱུང་ཡང་གནོད་པ་ཆེན་པོ་མ་ནུས་པ་སོགས་ཀྱི་རྣམ་ཐར་དང༌། ཕྱིས་སུ་དཔལ་སྤྲུལ་རིན་པོ་ཆེས་ཀྱང་ཆབ་ཤོག་གི་ལམ་ནས། སོར་མོས་མ་ཡིན་སྨྱུག་གུས་ལྟ་ཅི། །དགོངས་བརྒྱུད་ཁྲོལ་དཀའ་འཁོར་ལྔའི་མདུད་རྒྱ། །གང་གིས་གཞིག་ནུས་བཅོམ་ལྡན་ལྡན་པ། །གྲུབ་བརྒྱས་བསྟེན་པའི་བཞེས་འཕྲོ་མིན་ནམ། །སྟག་ཤམ་ཐིག་ལེའི་འཛུམ་ཆེན་དགོངས་དང་༌། །ཟླུམ་པོའི་མཐང་གོས་པུས་མོའི་འཆིང་ཐགབསླབ་པའི་བཙོན་བུས་སྡོམ་པའི་གྲོགས་ལ། །རོ་མཉམ་རིག་སྔགས་ད་ནི་འདེབས་རན། །རྒྱན་དྲུག་རི་མོའི་འཕྱང་འཕྲུལ་དགོངས་དང་༌། །ཟླུམ་ཚལ་སྣམ་ཕྲན་རེ་དོགས་འཆིང་ཐག། བླང་འདས་བརྩི་བའི་གུ་དོག་བཙོན་ཁང་། །སྤང་བླང་མེ་སྒྱོག་ད་ནི་བརྡེག་རན། །ཐོར་ཚུགས་འཁོར་ལོའི་མཛེས་པ་དགོངས་དང་༌། །མགོ་རེག་བརྟུལ་ཞུགས་དཀྱིལ་འཁོར་བརྙས་བཅོས། །གསོ་སྦྱོང་སྒྲིག་བཅད་འཛིན་པའི་བཙོན་སྲུང་༌། །གཏད་སོའི་སྲོག་དང་ད་ནི་བྲལ་རན། ཕ་གཅིག་པདྨའི་ཚོམ་བུའི་ཚོགས་སུ། སྨོན་ལམ་མཐུན་པའི་སྤྱོད་པའི་བོགས་འབྱིན། །རྒྱུད་པ་ཀུན་ལ་བགོ་སྐལ་ལགས་ན། །སྟོན་མོ་རང་སྐལ་ད་ནི་བཞེས་རན། །ཞེས་སོགས་སྔགས་སྤྱོད་མཛད་ན་སྐུ་ཚེ་མཐར་ཕྱིན་པ་དང་ཟབ་གཏེར་གྱི་ཕྲིན་ལས་རྒྱ་ཆེན་འབྱུང་བར་གསུངས་ཀྱང་། ཕྱི་དུས་འདིར་སྔ་འགྱུར་ཆོས་སྡེ་ཆེན་མོར་གྲགས་པ་ཀུན་ལ་འདུལ་བསྟན་རི་མོའི་མར་མེ་ལྟར་གྱུར་ཅིང་། བསྟན་རྩ་ཆོས་འདུལ་རིན་པོ་ཆེ་རྒྱལ་བསྟན་ཡུན་དུ་གནས་པའི་གཞི་མར་དགོངས་ནས་རྗེ་ཉིད་སྐུ་ཚེ་གང་པོར་ཉེས་ལྟུང་ཕྲ་མོས་ཀྱང་མ་གོས་པ་ཉེ་བ་འཁོར་སླར་བྱོན་པ་ལྟ་བུའི་རྣམ་ཐར་བསྐྱངས་ཤིང༌། གྲུབ་དབང་རྫོགས་ཆེན་པའི་རིང་ལུགས་འཛིན་པའི་ཆོས་སྡེ་ཡོངས་ཀྱིས་གཙོས་མདོ་སྨད་དགོན་ཆེན་ཁག་ལ་གཞི་གསུམ་ཕྱག་བཞེས་གསར་བཙུགས་སོགས་སྔ་འགྱུར་གྱི་བསྟན་པ་རིན་པོ་ཆེ་དྭངས་གཙང་པདྨའི་སྦུབས་ལྟར་བྱི་དོར་མཛད་པའི་བཀའ་དྲིན་བསྐྱངས། བར་ལམ་སྦས་པའི་རྣལ་འབྱོར་འཁོས་ཆུང་གི་རྣམ་ཐར་བསྐྱངས་ཏེ་སྟོད་གངས་རི་ཏི་སེ་ནས་སྨད་རྒྱ་ནག་རི་བོ་རྩེ་ལྔ་ཡན་གྱི་དགོན་གནས་ཆོས་སྡེ་ཁག་དང༌། དབེན་ཁྲོད་སྒྲུབ་གནས་རྣམས་སུ་མཇལ་སྐོར་དང་གནས་འབྲེལ་ལ་ཕེབས་ཤིང་། དེ་དག་གི་སྐབས་སུ་ས་དགེ་བཀའ་རྙིང་གི་དགེ་བའི་བཤེས་རྣམས་ཀྱི་དྲུང་ནས་རྒྱལ་བཀའ་རིན་པོ་ཆེ་དང་དགོངས་འགྲེལ་བསྟན་བཅོས་འགྱུར་རོ་ཅོག་གིས་གཙོས་གངས་ཅན་བོད་ཀྱི་མཁས་གྲུབ་ཕལ་མོ་ཆེའི་གསུང་འབུམ་ཐམས་ཅད་ལ་གསན་བསམ་ཕྱོགས་མེད་དུ་མཛད་ནས་ཐོས་པ་རྒྱ་མཚོའི་ཕ་རོལ་ཕྱིན། ཕྱིས་སུ་རུ་དམ་གདན་ས་ནས་འཆད་སྤེལ་གྱི་ཕྲིན་ལས་རྒྱ་ཆེར་བསྐྱངས་པའི་རྒྱུན་ད་ལྟའི་བར་དཀར་ནག་རྒྱ་ཡི་ཡུལ་གྲུ་ཚུན་ཡོངས་སུ་ཁྱབ་པ་བྱུང༌། དུས་དེར་དཔལ་རི་སྤྲུལ་སྐུ་པདྨ་དབང་རྒྱལ་དང་སྨིན་གླིང་ཁྲི་ཆེན་སངས་རྒྱས་ཀུན་དགའ་སོགས་ཀྱིས་བཀས་བསྐུལ་བ་ལྟར་སྔ་འགྱུར་གྱི་ཕྲིན་ཆོག་བཞུགས་སོ་འཚལ་ཀུན་ཆོག་སྒྲིག་གནང་བ་སྔ་འགྱུར་བཀའ་མའི་གླེགས་བམ་རིན་པོ་ཆེ་ཐེག་དགུའི་གྲངས་ལྡན་པར་དུ་བརྐོས་ཏེ་དབང་ལུང་གི་རྒྱུན་སྤེལ། དེ་བཞིན་དཔལ་གསང་བ་སྙིང་པོའི་རྒྱུད་འགྲེལ་ཆེན་མོ་རྣམས་དང་ཀུན་མཁྱེན་རོང་ཟོམ་པའི་གསུང་འབུམ་སོགས་ཆེས་ཉམས་པར་ཕངས་པའི་གསུང་རབ་དུ་མ་དབུས་གཙང་གི་ཕྱོགས་ནས་སྐུ་ངལ་ཆེན་པོས་འཚོལ་སྡུད་མཛད་ཅིང་པར་དུ་བརྐོས་ནས་བཤད་ལུང་གི་རྒྱུན་སྤེལ་བ་སོགས་གསང་ཆེན་སྔ་འགྱུར་གྱི་བསྟན་པ་ལ་སྨན་པའི་མཛད་པ་མཐའ་ཡས་པ་བསྐྱངས་ཚུལ་འཇམ་དབྱངས་མཁྱེན་བརྩེའི་དབང་པོས་མཛད་པའི་རྣམ་ཐར་གསོལ་འདེབས་བྱིན་རླབས་སྣང་གཏེར་ལས། རྒྱལ་སྲས་འཇམ་དཔལ་གཞོན་ནུའི་ཡེ་ཤེས་སྐུ། །ཐེག་མཆོག་དགེ་བའི་བཤེས་ཀྱི་ཚུལ་བཟུང་བ། །གཞན་ཕན་ཕ་མཐའ་ཡས་པའི་ཕྲིན་ལས་ཅན། །ཀུན་མཁྱེན་བླ་མའི་ཞབས་ལ་གསོལ་བ་འདེབས། །ཅེས་དང༌། སོ་སོར་ཐར་བ་གཞི་གསུམ་ཕྱག་བཞེས་དང་། །རྒྱུད་རྒྱལ་གསང་བ་སྙིང་པོའི་བཤད་སྲོལ་སོགས། །མདོ་སྔགས་ཤིང་རྟའི་ལམ་ཆེན་རབ་དབྱེ་བས། །རྒྱལ་བསྟན་ཉིན་མོར་མཛད་ལ་གསོལ་བ་འདེབས། །དགེ་འདུན་འདུས་སྡེ་ཉམས་གསོ་གསར་སྤེལ་དང་། །གསང་གསུམ་རྟེན་བཞེངས་མཆོད་སྤྲིན་སྤྲོ་བས་མཚོན། །རླབས་ཆེན་བྱ་བ་ལས་ཀྱི་འཁོར་ལོ་ཡིས། །ཕན་བདེའི་དགའ་སྟོན་སྦྱིན་ལ་གསོལ་བ་འདེབས། །ཞེས་སོགས་བསྔགས་བརྗོད་རྒྱ་ཆེར་མཛད། དགུང་གྲངས་ཞེ་དགུ་བཞེས་པ་རབ་བྱུང་བཅུ་བཞི་པའི་ས་སྤྲེལ་ཏེ་སྤྱི་ལོ་༡༨༤༨པར་མི་འགྱུར་ནམ་མཁའི་རྡོརྗེའི་བཀའ་ལུང་ལྟར་གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ཆོས་གྲྭ་གསར་དུ་ཕྱག་བཏབ་མཛད་ཅིང༌། རྗེ་ཉིད་མཁན་རབས་གཉིས་པའི་གསེར་ཁྲིར་བཞུགས་ཏེ་མདོ་སྔགས་གཞུང་འགྲེལ་གྱི་འཆད་ཁྲིད་སྤྱི་དང༌། ཁྱད་པར་རྒྱུད་རྒྱལ་གསང་བ་སྙིང་པོའི་བཤད་པ་དང་དབུ་སེམས་བཀའ་སྲོལ་གཅིག་འདུས་ཀྱི་བྱང་སྡོམ། མཁན་ཆེན་ཞི་འཚོ་ནས་རྒྱུད་པའི་སྨད་འདུལ་སོ་ཐར་སྡོམ་རྒྱུན་བཅས་བཤད་སྒྲུབ་ལུང་རྟོགས་ཀྱི་བསྟན་པའི་རྒྱུན་ཕྱོགས་ཀུན་སྤེལ་བས། དེང་གི་དུས་འདིར་སྔ་འགྱུར་པའི་རིང་ལུགས་འཛིན་པ་ཞེས་རབ་ཏུ་བྱུང་བའི་སྡེ་ཆེན་པོས་སའི་ཁྱོན་ཡོངས་སུ་ཁེངས་པ་བདག་ཉིད་ཆེན་པོ་འདིའི་བཀའ་དྲིན་ཁོ་ན་ལས་བྱུང་བ་ཡིན་ནོ། ། དེ་བཞིན་བརྒྱུད་འཛིན་མཁས་གྲུབ་གཉིས་ལྡན་གྱི་ཞལ་སློབ་དཔལ་སྤྲུལ་འཇིགས་མེད་ཆོས་ཀྱི་དབང་པོ། བཀའ་བབ་བདུན་ལྡན་མཁྱེན་བརྩེའི་དབང་པོ། མཁན་ཆེན་པདྨ་བཛྲ། ཞེ་ཆེན་མ་ཧཱ་པནྚི་ཏ་མཐུ་སྟོབས་རྣམ་རྒྱལ། གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན། སྨིན་གླིང་ཁྲི་ཆེན་སངས་རྒྱས་ཀུན་དགའ། རྒྱལ་རོང་དབོན་སྤྲུལ། པད་གླིང་བརྒྱད་པ་ཀུན་བཟང་བདེ་ཆེན་རྡོ་རྗེ། རྡོ་བྲག་རིག་འཛིན་ཆེན་པོ་སོགས་བགྲངས་ཀྱིས་མི་ལང་པ་བྱུང་བ་དང༌། ཕྱི་རབས་བསྟན་པའི་བཙས་སུ་གསང་སྙིང་སྤྱི་དོན་དང་ཞི་ཁྲོའི་དཀའ་འགྲེལ། སུམ་རྟགས་ཀྱི་འབྲུ་འགྲེལ་སོགས་ཐུན་མོང་དང་ཐུན་མོང་མ་ཡིན་པའི་གཙུག་ལག་གི་གནས་གསལ་བར་བྱེད་པའི་ལེགས་བཤད་དུ་མ་ལྗགས་རྩོམ་གནང་ནས་མཐར་དགུང་གྲངས་ལྔ་བཅུ་རྩ་དྲུག་བཞེས་པ་རབ་བྱུང་བཅུ་བཞི་པའི་ཤིང་ཡོས་ལོར་ཆོས་ཉིད་ཞི་བའི་དབྱིངས་སུ་གཤེགས་པའི་ཚུལ་བསྟན་ཏོ། །སྤྱིར་རྗེ་འདི་ཉིད་གྲུབ་དབང་སྐུ་རབས་བཞི་པ་མི་འགྱུར་ནམ་མཁའི་རྡོ་རྗེ་ལས་སྐུ་ན་ཅུང་ཟད་གཞོན་ཡང་བར་ཆད་ཀྱི་དབང་གིས་སྐུ་ཚེ་མཐར་མ་ཕྱིན་པར་མི་འགྱུར་ནམ་མཁའི་རྡོ་རྗེ་ཞིང་དུ་མ་གཟིགས་པའི་སྔོན་དུ་སྐུ་གཤེགས་ཀྱང་། གསང་ཆེན་སྔ་འགྱུར་པའི་བསྟན་པ་སྤྱི་དང་ཁྱད་པར་གྲུབ་དབང་རྫོགས་ཆེན་པའི་བསྟན་པ་ལ་ཐུགས་བསྐྱེད་མཛད་འཕྲིན་འགྲན་ཟླ་དང་བྲལ་ཞིང་། རྒྱལ་སྲས་གཞན་ཕན་མཐའ་ཡས་ཉིད་ཞལ་བཞུགས་སྐབས་གདན་ས་ཆེན་མོའི་མཆོག་གི་རྡོ་རྗེ་སློབ་དཔོན་གྱི་གསེར་ཁྲིར་མངའ་དབང་སྒྱུར་བར་མཛད་པ་དང་། ཕྱིས་ཀྱི་སྐུ་ཞབས་རིམ་བྱོན་ལ་བསྟན་བདག་མཆོག་སྤྲུལ་རྣམ་གསུམ་ཞེས་གྲགས་པའི་ཡ་གྱལ་གསེར་ཁྲི་གསུམ་པར་འདྲེན་པ་སོགས་རྒྱུ་མཚན་དུ་མས་སྐབས་འདིར་དོན་ཐོབ་ལྟར་གདན་རབས་སུ་བཀོད་པ་ཡིན་ལ། གཞན་ཡང་གྲུབ་དབང་བཞི་པ་ཞིང་དུ་གཤེགས་རྗེས་དཔོན་སློབ་བཞི་པ་འཇིགས་མེད་ཆོས་དབྱིངས་འོད་གསལ་ནས་བསྟན་སྲིད་ཀྱི་ཐུགས་འགན་བཞེས་པར་གྲགས་ཀྱང་ཕྲིན་ལས་དེ་ཙམ་མ་རྒྱས་ཤིང་། དཔལ་སྤྲུལ་རིན་པོ་ཆེ་དང་མཁན་ཆེན་པདྨ་བཛྲ་རྣམ་གཉིས་ནས་བཤད་སྒྲུབ་ཀྱི་བསྟན་པའི་ཐུགས་འགན་བཞེས་ཏེ་གྲུབ་དབང་ལྔ་པ་སོགས་ལ་མན་ངག་གི་བརྒྱུད་པ་སྤེལ་བའི་འཕྲིན་ལས་ནམ་མཁའི་མཐའ་དང་མཉམ་པ་བྱུང་ན་ཡང་། སྐུ་ཚེ་ཧྲིལ་པོར་བྱ་བཏང་དུ་བཞུགས་ཏེ་བསྟན་སྲིད་ལ་གཟིགས་གཏོགས་མ་མཛད་པས་གདན་རབས་སུ་མ་བཀོད་པའི་ཚུལ་ཡང་མཁྱེན་པར་འཚལ་ལོ། །
རྩོམ་སྒྲིག་པ། དོན་འགྲུབ་རྡོ་རྗེ།