འབྲུག་པ་སྐུ་ཕྲེང་དང་པོ་འབྲུག་པདྨ་རྣམ་རྒྱལ།
གྲུབ་དབང་སྐུ་རབས་གཉིས་པའི་དུས་སུ་བྱོན་པའི་འབྲུག་པ་སྐུ་ཕྲེང་དང་པོ་འབྲུག་པདྨ་རྣམ་རྒྱལ་ནི། སྤྲུལ་གཞི་འཕགས་པའི་ཡུལ་གྱི་པཎ་ཆེན་ན་རོ་པ་བསམ་བཞིན་སྤྲུལ་པའི་ཟློས་གར་བསྒྱུར་པ་གྲུབ་བརྙེས་ཆེན་པོ་འབྲུག་པ་ཀུན་ལེགས་དང༌། དེའི་ཡང་སྤྲུལ་ལྷོ་ཁམས་པ་སྒར་གྱི་འབྲུག་པ་སྐུ་ཕྲེང་སོགས་དཔལ་མཉམ་མེད་བཀའ་བརྒྱུད་པའི་དམ་པའི་སྐྱེས་ཆེན་དུ་མའི་སྐྱེ་བ་བཞེས་པའི་མཐར། ཁམས་པ་འབྲུག་པའི་ཡང་སྲིད་དེ་མ་ཐག་པ་རྫོགས་སྤྲུལ་གཉིས་པ་འགྱུར་མེད་ཐེག་མཆོག་བསྟན་འཛིན་གྱི་མཆེད་དུ་སྐུ་བལྟམས། རྫོགས་ཆེན་དགོན་དུ་སྐུ་བདག་བྱས་ཏེ་ཕྱིས་སུ་བླ་བྲང་ཡང་ཟུར་དུ་ཆགས། གྲུབ་དབང་སྐུ་རབས་གཉིས་པའི་སྐབས་སུ་ཕྱི་ནང་གསང་བའི་བསྟན་སྲིད་ལ་མཐུན་འགྱུར་ཞབས་ཞུ་ཚད་མེད་གནང་བ་སོགས་འགྲོ་དོན་མཐར་ཕྱིན་ངང་སྐུ་གཤེགས་སོ། །
སྐུ་ཕྲེང་གཉིས་པ་འབྲུག་ཐུབ་བསྟན་ཚུལ་ཁྲིམས།
སྐུ་ཕྲེང་གཉིས་པ་འབྲུག་ཐུབ་བསྟན་ཚུལ་ཁྲིམས་ནི། མདོ་ཁམས་རྫ་རྒྱུད་གད་ཐོག་ཅེས་པའི་འབྲོག་སྡེར་སྐུ་འཁྲུངས། སྐུ་གཞོན་ནུའི་སྐབས་འདབ་ཆག་ནམ་མཁར་འཕུར་བ་བསད་ནས་གསོ་ནུས་པ་སོགས་གྲུབ་སྨྱོན་གྱི་སྤྱོད་པ་ཅན་ཞིག་སྟེ་སྐུ་ཚེ་མཐར་མ་ཕྱིན་པར་དགུང་གྲངས་གཞོན་དུས་སྐུ་གཤེགས། །
སྐུ་ཕྲེང་གསུམ་པ་ཐུབ་བསྟན་དགེ་ལེགས་རྒྱ་མཚོ།
སྐུ་ཕྲེང་གསུམ་པ་ཐུབ་བསྟན་དགེ་ལེགས་རྒྱ་མཚོ་ནི། རྫ་རྒྱུད་སྟག་དགོན་ཞེས་པའི་སྡེ་བར་སྐུ་འཁྲུངས། གྲུབ་དབང་སྐུ་རབས་བཞི་པ་མི་འགྱུར་ནམ་མཁའི་རྡོ་རྗེས་ངོས་འཛིན་སྐུ་བདག་མཛད། ལུགས་གཉིས་ཀྱི་གཟིགས་པ་ཡངས་པས་གྲུབ་དབང་སྐུ་རབས་ལྔ་པ་ཐུབ་བསྟན་ཆོས་ཀྱི་རྡོ་རྗེའི་ཕྱག་རོགས་གནང་སྟེ་རྫོགས་ཆེན་དགོན་གྱི་བསྟན་པའི་ཐུགས་འགན་བཞེས། སྐུ་ཚེའི་སྨད་དུ་ཐུགས་དམ་ཉམས་བཞེས་ཀྱི་གནས་ལ་རྩེ་གཅིག་ཏུ་བརྩོན་པས་ལྟ་དགོངས་ཀྱི་རྩེ་མོར་སོན་པ་བཅས་དོན་གཉིས་ལྷུན་གྲུབ་ངང་སྐུ་གཤེགས་སོ། །
སྐྱབས་རྗེ་རྫོགས་ཆེན་འབྲུག་པ་སྐུ་ཕྲེང་བཞི་བ་ཐུབ་བསྟན་ཉི་མ་རིན་པོ་ཆེའི་སྐུ་པར།
སྐུ་རབས་བཞི་པ་ཐུབ་བསྟན་མདོ་སྔགས་བཤད་སྒྲུབ་ཆོས་ཀྱི་ཉི་མ།
སྐུ་རབས་བཞི་པ་སྨིན་གྲོལ་འཁོར་ལོའི་མགོན་པོ་བདག་ཅག་གི་འདྲེན་མཆོག་དམ་པ་ཐུབ་བསྟན་མདོ་སྔགས་བཤད་སྒྲུབ་ཆོས་ཀྱི་ཉི་མ་མཆོག་ནི། སྤྱི་ལོ་༡༩༢༩པ་སྟེ་རབ་བྱུང་བཅུ་དྲུག་པའི་དཀར་པོ་ཞེས་པ་ས་མོ་སྦྲུལ་གྱི ་ལོར་རུ་དམ་གདན་ས་ཆེན་མོའི་ཉེ་འདབས་སུ། ཡབ་བཟོ་རིག་ལ་མཁས་པ་དབང་རྒྱལ་དང་ཡུམ་ནོར་ལྷ་ཟུང་གི་བསྐྱེད་ཁྱིམ་དུ་ངོ་མཚར་བའི་མཚན་ལྟས་དང་བཅས་སྐུ་བལྟམས། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེས་འབྲུག་པའི་ཡང་སྲིད་བཞི་པར་ངོས་བཟུང་སྟེ་ཐུབ་བསྟན་ཉི་མ་ཞེས་མཚན་གསོལ། དགུང་གྲངས་བདུན་ནས་མཁན་པོ་དཀོན་མཆོག་བཟང་པོས་ལྗགས་ཀློག་ཕུལ་བས་ཚེགས་མེད་དུ་མཁྱེན། དགུང་ལོ་དགུའི་ཐོག་རྫོགས་ཆེན་དགོན་དུ་ཞབས་པད་ཁྲི་ལ་བཀོད་དེ་མངའ་གསོལ་བྱས། མཁན་པོ་ཚེ་རིང་ནོར་དགའ་ཡོངས་འཛིན་དུ་བསྐོས་པ་ལས་སྤྱོད་འཇུག་དང༌། སྡོམ་གསུམ། དཔལ་སྤྲུལ་བཀའ་འབུམ། གཞན་ཕན་མཐའ་ཡས་བཀའ་འབུམ། པད་རྡོའི་བཀའ་འབུམ་རྣམས་དང༌། ཐུན་མོང་གི་རིག་གནས་དང་མཐོང་བརྒྱུད་ཀྱི་ཕྱག་བཞེས་སོགས་ལ་གསན་སྦྱངས་མཛད། དགུང་གྲངས་བཅུ་གཅིག་ནས་ངེས་པ་དོན་གྱི་དགེ་བའི་བཤེས་གཉེན་མཁན་ཆེན་པདྨ་ཐེག་མཆོག་བློ་ལྡན་ནམ་ཨ་བུ་ལྷ་སྒང་མཉེས་པ་གསུམ་གྱིས་ཚུལ་བཞིན་བསྟེན་ནས། རྫོགས་པ་ཆེན་པོ་ཀློང་ཆེན་སྙིང་ཐིག་གི་སྔོན་འགྲོའི་ཁྲིད་དང༌། རྫོགས་ཆེན་མཁའ་འགྲོ་སྙིང་ཐིག་གི་སྔོན་འགྲོ་ཐར་ལམ་དཀར་པོའི་ཁྲིད་སོགས་གསན་ཞིང༌། དབེན་པའི་གནས་སུ་བཅད་མཚམས་ཀྱིས་འབུམ་ལྔ་དང་བླ་མའི་རྣལ་འབྱོར་འབུམ་ཕྲག་དྲུག་ཅུ། སྐུ་གསུམ་བསྙེན་པ་ས་ཡ། ལུས་སྦྱིན་འབུམ་བཅས་གྲུབ་པར་མཛད། དེ་ནས་རྫོགས་པ་ཆེན་པོའི་དངོས་གཞིའི་ཁྲིད་ཀྱི་སྐབས་གཞི་དབྱིངས་ཀ་དག་གི་རིག་པ་བདེ་བླག་ཏུ་ངོ་འཕྲོད་པས་བླ་མ་རིན་པོ་ཆེ་ཐུགས་དགྱེས་པ་ཆེན་པོས་གཅིག་ཆར་པའི་རིགས་ཅན་དུ་བསྔགས་བརྗོད་གནང༌། དགུང་གྲངས་བཅོ་ལྔའི་དུས་ཨ་བུ་ལྷ་རྒྱལ་རིན་པོ་ཆེས་མཁན་པོ་དང༌། མཁན་འཇིགས་མེད་བློ་གྲོས་ཀྱིས་ལས་སློབ། ཁ་སྐོང་པ་མཁན་ཟུར་པདྨ་ཆོས་དཔལ་དང༌། མཁན་པདྨ་ཚེ་དབང༌། ཡོངས་འཛིན་ཚེ་རིང་ནོར་དགའ་སོགས་དད་པའི་དགེ་འདུན་གྲངས་ཚང་བའི་མདུན་ནས་རབ་བྱུང་གི་སྡོམ་པ་བླངས་ཏེ་དམ་ཆོས་འདུལ་བ་ལས་བྱུང་བའི་སྤང་བླང་གི་གནས་མཐའ་དག་འགལ་མེད་དུ་སྤྱོད། རྫོགས་ཆེན་ཀོང་སྤྲུལ་རིན་པོ་ཆེ་དཀོན་མཆོག་བསྟན་པའི་རྒྱལ་མཚན་ལས། ཟབ་གསང་རྫོགས་པ་ཆེན་པོ་སྙིང་ཐིག་ཡ་བཞི་དང༌། དུམ་གཉིས་སོགས་ཀྱི་སྨིན་གྲོལ་གདམས་པ་བཅས་གསན། ཉི་སྤྲུལ་དྲུག་པ་ཐུབ་བསྟན་བཤད་སྒྲུབ་བསྟན་པའི་ཉི་མ་ལས་གྲུབ་དབང་རྫོགས་ཆེན་པ་སྐུ་ཕྲེང་རིམ་བྱོན་གྱི་གསུང་ཆོས་རྣམས་དང༌། ཉི་གྲགས་ཆོས་སྐོར་ཡོངས་རྫོགས། ཆེ་ཡོལ་རིག་འཛིན་ཆེན་མོའི་ཆོས་སྐོར་བཅས་ཀྱི་དབང་ལུང་གསན། གླིང་སྤྲུལ་ཐུབ་བསྟན་བཤད་སྒྲུབ་ཕྲིན་ལས་རྒྱ་མཚོའི་དྲུང་ནས་སྔ་འགྱུར་བཀའ་མ་ཡོངས་རྫོགས་དང༌། རིན་ཆེན་གཏེར་མཛོད། འཇིགས་གླིང་པོད་དགུ་སོགས་དང༌། མཁན་ལྷ་རྒྱལ་ལས་ཀློང་ཆེན་མཛོད་བདུན་དང༌། ཚིག་གསུམ་གནད་བརྡེགརྒྱ་ཆེན་སྤྱོད་སྲོལ་གྱི་བྱང་སྡོམ། མི་ཕམ་བཀའ་འབུམ་གསན། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་མདུན་ནས་མཛོད་ཆེན་བདུན་དང༌། འཛིན་པ་རང་གྲོལ་གྱི་དབང་ལུང༌། ཟབ་མོ་ལྟ་བའི་ལུགས་ཀྱི་བྱང་ཆུབ་སེམས་སྡོམ། མཁན་ཆེན་ཐུབ་བསྟན་སྙན་གྲགས་ལས་རྒྱུད་གསང་བ་སྙིང་པོའི་སྐོར་དང༌། ཡབ་རྒན་ངག་དབང་ནོར་བུ་ལས་གསང་འགྲེལ་མུན་སེལ་སྐོར་གསུམ། རྙིང་མ་རྒྱུད་འབུམ། ཡོན་ཏན་མཛོད་རྩ་འགྲེལ་སོགས་ཀྱིས་མཚོན་གསན་བསམ་རྒྱ་ཆེར་མཛད་ཅིང༌། དེ་ལྟར་གསན་པ་ཙམ་དུ་མ་བཞག་པར་རུ་དམ་ཚེ་རིང་ལྗོངས་དང་གཤིན་རྗེ་སྒྲུབ་ཕུག་སོགས་དབེན་པའི་གནས་རྣམས་སུ་ལོ་ཟླ་བསྟུད་མར་སྒོམ་སྒྲུབ་ཀྱིས་ཉམས་སུ་བླངས་པའི་ཚུལ་ནི། དཀོན་མཆོག་སྤྱི་འདུས། བཀའ་བརྒྱད། རྡོར་སེམས། རྒྱུད་ཕུར། རཏ་ཕུར། སྙིང་ཐིག་རྩ་གསུམ། འཛིན་གྲོལ། ཁྲོས་མ། ཡུམ་ཆེན་མོ། ཞི་ཁྲོ་སོགས་ཀྱི་བསྙེན་པ་བཞི་འགྱུར་དང་ལས་རུང་སོགས་བསྙེན་སྒྲུབ་ཚད་དུ་འཁྱོལ་བ་བྱས་པས་དངོས་ཉམས་རྨི་ལམ་རྣམས་སུ་ལྷ་དང་བླ་མ་མཇལ་ནས་ཁྲིད་དང་གདམས་ངག་གནང་བ་དང༌། ཁྱད་པར་ཐོད་རྒལ་གྱི་འཆར་སྣང་རྟེན་ལ་མ་ལྟོས་པ་རྩོལ་མེད་བྱུང་བ་སོགས་ཉམས་རྟོགས་ཀྱི་ཡོན་ཏན་ཁྱད་པར་ཅན་འཁྲུངས། ནད་པ་དང་སྨྱོ་འབོག་སོགས་ལ་གཅོད་ཀྱི་ལུས་སྦྱིན་དང༌། ཁྲུས་དང༌། བཀའ་བསྒོ་གནང་བ་ཙམ་གྱིས་ནད་གདོན་ལས་གྲོལ་བ་སོགས་ནུས་མཐུ་དང་བྱིན་རླབས་ཚད་མེད་པ་བརྙེས། སྐུ་ན་ཆུང་དུས་སུ་མཁན་རིན་པོ་ཆེ་ལྷ་རྒྱལ་ལས་གཏེར་སྟོན་ཉི་ཟླ་སངས་རྒྱས་ཀྱི་ཟབ་ལམ་འཕོ་བའི་གདམས་པ་གསན་ཏེ་ཁྲིད་སྦྱངས་གནང་བས་ཞག་བདུན་ནས་རྟགས་ཐོན། མཁན་རིན་པོ་ཆེས་དམ་པ་འདི་ཉིད་འཕོ་བ་ལ་བྱང་ཆུབ་པའི་ཚད་དུ་འཛིན་ཅིང་གསོན་གཤིན་གང་ཡིན་རུང་ཁོང་ལས་འཕོ་བ་ཞུས་ན་ལེགས་ཚུལ་གྱི་བསྔགས་བརྗོད་རྒྱ་ཆེར་གནང༌། ཕྱིས་སུ་མགོ་ལོག་དང༌། ཁྲོམ་ཐར་སོགས་ནས་འཕོ་བ་གསུང་སྐབས་གཤིན་པོར་སྐྲ་རྟགས་དང༌། གསོན་པོ་རྟོག་མེད་དུ་འགྲོ་བ་སོགས་ངོ་མཚར་བའི་གྲུབ་རྟགས་མང་དུ་བྱུང༌། གཞན་ཡང་གཞག་སར་ཁོག་ཞི་དར་དགོན་དུ་སེར་སྐྱ་བརྒྱ་སྟོང་མང་པོ་ལ་ཁྲོམ་དབང་གནང་སྐབས་བུམ་ཆུ་ཟད་མེད་དུ་བསྒྱུར་བ་དང༌། རུ་དམ་གདན་ས་ནས་བདག་ཅག་འདུས་པ་སྟོང་ཕྲག་ལྷག་ལ་རིན་ཆེན་གཏེར་མཛོད་ཀྱི་སྨིན་དབང་གནང་སྐབས་ཉི་ཟླ་ནོར་བུའི་གཟུགས་མཁའ་ལམ་དུ་ཆེས་གསལ་བར་ཤར་བ་དང༌། ཐོད་པའི་གསང་ཡེའི་རྫས་བདུད་རྩི་དངོས་སུ་གྱུར་པ་སོགས་གྲུབ་པའིརྟགས་མཚན་ཤིན་ཏུ་མང༌། དུས་འགྱུར་གྱི་བདུད་ལས་སྣ་ཚོགས་པས་ཇི་ལྟར་གཙེས་ཀྱང་བཙོ་མའི་གསེར་བཞིན་དམ་པའི་རང་གཤིས་གཞོམ་གཞིག་བྲལ་ཞིང༌། གདུལ་བྱ་མཆོག་དམན་ཡོངས་ལ་ངོ་སྲུང་ཚུལ་འཆོས་མེད་པར་བུ་གཅིག་པུའི་མ་ལྟར་བརྩེ་བ་ཆེན་པོས་རྗེས་སུ་འཛིན་པ་སོགས་དམ་པའི་རྣམ་ཐར་མཐའ་ཡས། བསྟན་པ་ཡང་དར་གྱི་སྐབས་སུ་བཀའ་གཏེར་དུས་མཆོད་ཆེན་མོ་རྣམས་ཀྱི་དཀྱིལ་འཁོར་རྡུལ་ཚོན་ནས་གར་འཆམ་དབྱངས་རོལ་སོགས་མཐོང་བ་བརྒྱུད་པའི་ཕྱག་བཞེས་ཆེ་ཕྲ་ཀུན་རང་ལུགས་འཁྲུལ་མེད་དུ་རང་རྐང་ཚུགས་པའི་ཉམས་གསོ་ཕྱག་ཁྲིད་མཛད་པ་དང༌། སྒྱུ་འཕྲུལ་ཞི་ཁྲོ། སྙིང་ཐིག་ཡ་བཞི། ཀར་གླིང་ཞི་ཁྲོ། ཆེ་ཡོས་ཆོས་སྐོར། སྔ་འགྱུར་བཀའ་མ། རིན་ཆེན་གཏེར་མཛོད་ཆེན་མོ། ཉི་གྲགས་ཆོས་སྐོར། སྙིང་ཐིག་དུམ་གཉིས། བར་དོ་དྲུག་ཁྲིད་སོགས་ཀྱི་སྨིན་ཁྲིད་བསྩལ་ཏེ་བསྟན་རྒྱུན་མི་ནུབ་པར་སྤེལ། དེ་བཞིན་ལྷ་སར་ལྷ་ཁང་དང༌། ཕོ་བྲང་ཆེན་མོ་སོགས་དགོན་གྱི་བླ་སྤྲུལ་རྣམས་དང་ལྷན་དུ་བསྐྱར་བཞེངས་དང༌། སྔ་ཕྱིར་ཚེ་སྒྲུབ་ཆེན་མོ་སོགས་དགོན་གྱི་དུས་མཆོད་རྣམས་ཀྱི་སྤྱི་པ་ལོ་སུམ་ཅུ་ལྷག་མཛད། སྤྱི་ལོ་༡༩༩༩ལོར་བསྟན་འགྲོ་སྤྱིའི་ཞབས་རིམ་དང་ས་གནད་ཀྱི་མེ་བཙར་གཟིགས་ཏེ་མཐོང་གྲོལ་སྒྲོལ་མ་ལྷ་ཁང་རྒྱུ་སྤུས་ཤིན་ཏུ་ལེགས་པ། ནང་རྟེན་དུ་སྒྲོལ་མའི་སྐུ་བརྙན་ཐོག་བརྩེགས་གཉིས་པ་གཡས་གཡོན་དུ་རྡོར་སེམས་དང་འཇམ་དབྱངས་བཅས་གསེར་ཟངས་ལས་གྲུབ་པ་རིན་པོ་ཆེ་སྣ་ཚོགས་ཀྱི་ཕྲ་རྒྱན་ཅན་བྱོན་ལེགས། མཐའ་སྐོར་དུ་སྒྲོལ་མ་ཉེར་གཅིག་གི་སྐུ་བརྙན་རྒྱ་ནག་གི་བཟོ་བོས་ལུགས་སུ་བླུགས་པ་བཅས་ངོ་མཚར་བ་གསར་བཞེངས་གནང་བ་དང༌། ལོ་འདིར་ཚོགས་ཆེན་ལྷ་ཁང་བསྐྱར་བཞེངས་བྱུང་བའི་ནང་རྟེན་གཙོ་བོ་སྟོན་པ་ཐུབ་པའི་དབང་པོ་དང༌། སློབ་དཔོན་ཆེན་པོ། རྡོ་རྗེ་སེམས་དཔའ་བཅས་ཀྱི་སྐུ་བརྙན་ཐོག་བརྩེགས་གསུམ་ཅན་ཤ་སྟག་བཞེངས་གནང་མཛད་པ་བཅས་བསྟན་འགྲོ་སྤྱིའི་དཔལ་མགོན་དུ་སྐུ་འཚོ་ཞིང་གཞེས་པ་དང༌། ད་དུང་ཕྱི་མའི་དུས་སུ་ཟབ་རྒྱས་ཆོས་ཀྱི་བདུད་རྩིས་གདུལ་བྱ་སྨིན་ཅིང་གྲོལ་བའི་བཀའ་དྲིན་མཛད་པ་དང་། ༢༠༡༦ སྤྲེལ་ལོ་སྤྲེལ་ཟླའི་ཚེས་ལྔ་ཉིན་རུ་དམ་གདན་སར་སྐུ་གཤེགས་སོ།།
རྩོམ་སྒྲིག་པ། དོན་འགྲུབ་རྡོ་རྗེ།