གླིང་བླ་སྐུ་ཕྲེང་དང་པོ་གླིང་གྲུབ་ཐོབ་བསོད་ནམས་སྦྱིན་པ།
གྲུབ་དབང་སྐུ་རབས་གསུམ་པའི་སྐབས་སུ་བྱོན་པའི་གླིང་བླ་སྐུ་ཕྲེང་དང་པོ་གླིང་གྲུབ་ཐོབ་བསོད་ནམས་སྦྱིན་པ་ནི། བོད་རབ་བྱུང་བཅུ་གསུམ་པའི་དཀྱིལ་ཙམ་ལ་རྫ་རྒྱུད་ཁྲོ་ཤུལ་དུ་གླིང་ཚང་ཟེར་བའི་དུད་ཁྱིམ་ཞིག་ཏུ་སྐུ་འཁྲུངས་པར་གྲགས། རུ་དམ་ཨོ་རྒྱན་བསམ་གཏན་ཆོས་གླིང་དུ་ཕེབས་ཏེ་རྗེ་དབོན་པདྨ་ཀུན་གྲོལ་རྣམ་རྒྱལ་དང༌། གྲུབ་དབང་གསུམ་པ་ངེས་པ་དོན་བསྟན་འཛིན་བཟང་པོ། དཔོན་སློབ་གསང་སྔགས་བསྟན་འཛིན་སོགས་བླ་མར་བསྟེན་ཏེ་བཀའ་གཏེར་ཀྱི་ཆོས་སྐོར་སྤྱི་དང་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་ཟབ་ཁྲིད་མན་ངག་རྣམས་གསན་བཞེས་མཛད། གདན་ས་འདིའི་སྒྲུབ་གནས་དབེན་ཁྲོད་རྣམས་སུ་ཐུགས་དམ་ཉམས་བཞེས་ལ་གནད་དུ་བསྣུན་པས་གྲུབ་བརྙེས་རིག་འཛིན་ཆེན་པོ་གླིང་གྲུབ་ཐོབ་ཅེས་པའི་གྲགས་པ་དོན་ལྡན་གྱི་རྟོགས་པའི་དབང་ཕྱུག་ཆེན་པོར་གྱུར། བསྟན་འགྲོའི་འགྲོ་དོན་རྒྱ་ཆེར་བསྐྱངས་ཏེ་སྐུ་ན་མཐོན་པོར་སོན་པའི་སྐབས་སུ་དགོངས་པ་རྫོགས་སོ། །
སྐུ་ཕྲེང་གཉིས་པ་ཐུབ་བསྟན་ཉིན་བྱེད་རྒྱལ་མཚན།
མཁས་བཙུན་གྲུབ་པའི་དབང་ཕྱུག་གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན་ནི། མདོ་ཁམས་སྡེ་དགེའི་མངའ་ཁོངས་སུ་སྐུ་འཁྲུངས། གྲུབ་དབང་མི་འགྱུར་ནམ་མཁའི་རྡོ་རྗེ་མཆོག་གིས་གླིང་གྲུབ་ཐོབ་བསོད་ནམས་སྦྱིན་པའི་ཡང་སྲིད་དུ་ངོས་འཛིན་སྐུ་བདག་མཛད། གདན་ས་ཆེན་མོར་ཞབས་པད་བཀོད་ནས་ཆོས་སྤྱོད་ཆོ་གའི་ཕྱག་ལེན་སོགས་ལ་སྦྱངས་པ་མཛད་པས་ཚེགས་མེད་པར་མཁྱེན། གྲུབ་དབང་བཞི་པ་མཆོག་དང༌། རྒྱལ་སྲས་གཞན་ཕན་མཐའ་ཡས། དཔལ་སྤྲུལ་རིན་པོ་ཆེ། མཆོག་གྱུར་བདེ་ཆེན་གླིང་པ་སོགས་ལས་སྔ་འགྱུར་བཀའ་གཏེར་གྱི་ཆོས་ཚུལ་རྒྱབ་རྟེན་དང་བཅས་པ་གསན་ཞིང༌། ཁྱད་པར་རྗེ་གཞན་ཕན་མཐའ་ཡས་འོད་ཟེར་ལས་ཚིགས་གསུམ་རིམ་ནོད་ཀྱིས་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་པས་ཐུབ་བསྟན་ཉིན་བྱེད་རྒྱལ་མཚན་ཞེས་མཚན་གྱི་ཅོད་པན་དཔྱངས། དཔལ་སེང་གེ་རིའི་ཆོས་སྡེའི་མཁན་རབས་བདུན་པའི་གསེར་ཁྲིར་བཞུགས་ནས་མདོ་སྔགས་ཀྱི་འཆད་ཁྲིད་དང་༌། གཞི་གསུམ་གྱི་ཕྱག་བཞེས་སྤེལ་བ་སོགས་ཐུབ་པའི་ལུང་རྟོགས་ཀྱི་བསྟན་པ་རིན་པོ་ཆེ་ཉམས་མེད་མཐར་རྒྱས་སུ་བསྐྱངས། སྐབས་དེར་འོག་མིན་ཨོ་རྒྱན་སྨིན་གྲོལ་གླིང་གི་མཁན་ཆེན་ཁྲི་པ་ཚུལ་ཁྲིམས་རྡོ་རྗེ་ཁམས་སུ་ཕེབས་ནས་རྗེ་འདི་ལས་བསྙེན་རྫོགས་ཀྱི་སྡོམ་པ་བཞེས་ཤིང་། དམ་པ་དེ་ལས་རྡོར་འཛིན་མཁན་པོ་འགྱུར་མེད་ངག་དབང་ནོར་བུ། དེའི་མཁན་བུ་གཅུང་འགྱུར་མེད་ཆོས་གྲགས། དེའི་མཁན་བུ་དེང་གི་དུས་སུ་འཕགས་ཡུལ་དུ་ཞལ་བཞུགས་པ་ཞྭ་དེའུ་འཁྲུལ་ཞིག་རིན་པོ་ཆེ་ངག་དབང་ཆོས་ཀྱི་བཟང་པོའི་བར་འོག་མིན་ཨོ་རྒྱན་སྨིན་གྲོལ་གླིང་སོགས་དབུས་གཙང་དུ་སྡོམ་རྒྱུད་ཡར་མཆེད་པ་སོགས་སྔ་འགྱུར་གྱི་བསྟན་པ་ལ་མཛད་རྗེས་དང་ཕྲིན་ལས་འགྲན་ཟླ་བྲལ། ཕུར་ཚའི་མཁན་པོ་ཨ་དཀོན་དང༌། གཏོ་རུ་མཁན་པོ་སྐལ་ལྡན། སྡོམ་བརྩོན་དཀོན་མཆོག་གྲགས་པ་སོགས་རྒྱུད་པ་ཟིན་ངེས་ཀྱི་ཞལ་སློབ་དུ་མ་བྱུང་ཞིང༌། མཐར་ས་ལམ་གྱི་རྟོགས་པ་མཐོན་པོར་གཤེགས་པའི་རྟགས་སྣང་དང་བཅས་དགོངས་པ་གཞན་དོན་དུ་གཤེགས་པར་མཛད་དོ། །
སྐུ་ཕྲེང་གསུམ་པ་ཐུབ་བསྟན་སྐལ་བཟང་རྒྱ་མཚོ།
སྐུ་ཕྲེང་གསུམ་པ་ཐུབ་བསྟན་སྐལ་བཟང་རྒྱ་མཚོའམ་འཇིགས་མེད་ཚེ་དབང་ཕྲིན་ལས་རྒྱ་མཚོ་ནི། མདོ་ཁམས་སྡེ་དགེའི་རྒྱལ་ཁམས་སུ་སྐུ་འཁྲུངས་ཤིང་རུ་དམ་གདན་སར་གསེར་ཁྲིར་བཀོད། མཁན་ཆེན་པདྨ་བཛྲ་དང༌། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ ། འབྲུག་ཆོས་དབྱིངས་རོལ་པའི་རྡོ་རྗེ་སོགས་མཁས་གྲུབ་ཀྱི་སྐྱེས་ཆེན་དག་གི་ཞབས་པད་བཏུད་དེ་གསན་བསམ་རྒྱ་ཆེར་མཛད་ཀྱང་། སྐུ་ཚེ་དང་ཕྲིན་ལས་མཐར་མ་ཕྱིན་པར་སྐུ་ན་གཞོན་པའི་སྐབས་སུ་དགོངས་པ་རྫོགས། །
སྐུ་ཕྲེང་བཞི་པ་ཐུབ་བསྟན་ཕྲིན་ལས་རྒྱ་མཚོ།
སྐུ་ཕྲེང་བཞི་པ་ཐུབ་བསྟན་ཕྲིན་ལས་རྒྱ་མཚོ་ནི། རབ་བྱུང་བཅོ་ལྔ་པའི་དཀྱིལ་དུ་འདན་ཆོས་འཁོར་གྱི་ཉེ་ཕྱོགས་རྣམ་རྒྱལ་གླིང་དུ་ཡབ་རིག་འཛིན་རྡོ་རྗེ་དང་། ཡུམ་རིག་འཛིན་ལྷ་མོ་གཉིས་ཀྱི་སྲས་སུ་སྐུ་འཁྲུངས། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་མཆོག་ནས་གླིང་བླ་སྤྲུལ་སྐུའི་ཡང་སྲིད་དུ་ངོས་འཛིན་སྐུ་བདག་མཛད། མཁས་མཆོག་གཞན་ཕན་སྣང་བ་དང་། བྱ་བྲལ་ཀུན་དགའ་དཔལ་ལྡན། མུ་ར་པདྨ་བདེ་ཆེན་བཟང་པོ། ཨ་གྲོའི་མཁན་ཆེན་བསོད་ནམས་ཆོས་འཕེལ་སོགས་ཡོངས་འཛིན་བཤེས་གཉེན་དུ་མ་གཙུག་རྒྱན་དུ་བསྟེན་ཏེ་ཐུན་མོང་ཐུན་མིན་གྱི་རིག་པའི་གནས་ལ་གསན་བསམ་མཛད། ཁྱད་པར་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེའི་ཞལ་སྔ་ནས་སྔ་འགྱུར་བཀའ་མ་དང་༌། རིན་ཆེན་གཏེར་མཛོད་ཀྱི་དབང་ལུང་མ་ཚང་བ་མེད་པ་གསན་ཏེ་རྫོགས་སྤྲུལ་དྲུག་པ་འཇིགས་བྲལ་བྱང་ཆུབ་རྡོ་རྗེ་དང་། བདག་ཅག་གི་བླ་མ་དམ་པ་འབྲུག་སྤྲུལ་ཐུབ་བསྟན་བཤད་སྒྲུབ་ཆོས་ཀྱི་ཉི་མ་སོགས་ལ་བསྩལ་བའི་བསྟན་རྒྱུན་ཕྱི་མའི་མཐར་ཡང་ཉམས་པ་མེད་པ་འདི་བཞིན་བྱུང་༌། རྗེ་འདི་དགུང་གྲངས་ཉི་ཤུ་རྩ་སྟོད་ཙམ་ན་གྲུབ་དབང་ལྔ་པ་ཞིང་དུ་གཟིགས་ཤིང་གཙུག་ལག་ཁང་ཆེན་མོ་ལ་མེ་དགྲ་བྱུང་བ་དང༌། དུས་མཚུངས་དཔོན་སློབ་དང་དགེ་མང་སྐུ་ཞབས། ཀུན་འབྲུག་གཉིས་སོགས་བསྟན་འཛིན་གཞན་དག་ཀྱང་ཞི་བར་གཤེགས་ཤིང་ཡང་སྲིད་འཁྲུངས་པ་རྣམས་ཀྱང་སྐུ་ན་ཆེས་གཞོན་པ་བཅས་གདན་ས་ལ་གོད་ཆགས་ཆེན་མོ་སྟབས་གཅིག་ཏུ་བྱུང་། དུས་དེར་གདན་རབས་བཅུ་པའི་བསྟན་སྲིད་ཀྱི་ཐུགས་འགན་མཆོག་སྤྲུལ་བདེ་དགའ་རིན་པོ་ཆེས་བཞེས་པ་ལ་དམ་པ་འདིས་ཕྱག་རོགས་རྒྱ་ཆེར་མཛད་ཅིང༌། ཡར་མར་འབུལ་སྡུད་ལ་ཕེབས་སྐབས་དངོས་རྫས་ཆེ་ཕྲ་ཅི་ཡོད་ཐམས་ཅད་ཚོགས་པའི་གྲལ་ནས་དགོན་གཞུང་ལ་འབུལ་ཏེ་ང་རང་གི་ཁོངས་སུ་ཅུང་ཟད་ཀྱང་སོང་བ་མེད་ཅེས་འགག་མཛད་པར་གྲགས། རྗེ་འདི་བྱ་བཏང་ཁོ་ན་ལ་ཐུགས་དགྱེས་ཤིང་དད་པས་ཕུལ་བའི་སྐུ་རྫས་རྣམས་སྔ་ཕྱིར་ལན་གྲངས་གསུམ་དུ་སྤང་དག་མཛད། སྐུ་ཚེའི་སྨད་དུ་དཔོན་སློབ་སྐུ་ཡི་སྤྲུལ་བ་རྒྱ་ཟིལ་སྤྲུལ་སྐུ་ལ་གླིང་བླ་སྐུ་ཆུང་དུ་མཚན་གསོལ་ནས་བླ་བྲང་གི་བརྒྱུད་འཛིན་པར་བཞག་ཅིང་། རྗེ་ཉིད་ཤྲཱི་སེང་ཆོས་གྲྭའི་རི་ངོགས་ཀྱི་སྔར་དུས་མི་ཕམ་སྒྲུབ་ཕུག་ཏུ་འབོད་པ་དེར་བྱ་བྲལ་སྒོ་གཅིག་པའི་ཚུལ་གྱིས་སྐུ་མཚམས་ལ་གཏན་བཞུགས་མཛད་པས་ཕྱིས་སུ་གླིང་བླའི་སྒྲུབ་ཕུག་ཏུ་གྲགས་པ་བྱུང་༌། དུས་འགྱུར་ཆེན་མོའི་སྐབས་སུ་བཙོན་ཁང་དུ་ཉིན་འགར་བཞུགས་རྗེས་ཟབ་ལམ་འཕོ་བའི་ཉེ་ལམ་ལ་བརྟེན་ཏེ་དགོངས་པ་ཆོས་དབྱིངས་སུ་བསྡུ་བར་མཛད་དོ། །
རྩོམ་སྒྲིག་པ། དོན་འགྲུབ་རྡོ་རྗེ།