གུང་ཐང་དཀོན་མཆོག་བསྟན་པའི་སྒྲོན་མེ།

གུང་ཐང་དཀོན་མཆོག་བསྟན་པའི་སྒྲོན་མེ་མཆོག་ནི་ ༡༧༦༢ ལོར་མདོ་སྨད་མཛོ་དགེ་ནས་འཁྲུངས་ཤིང་། ༡༨༢༣ ལོར་གཤེགས། ཁོང་ནི་སྐབས་འདིའི་མཁས་པའི་ནང་ནས་གཟེངས་སུ་ཐོན་ཞིང་། གསར་རྩོམ་གྱི་རིགས་ལ་ཡང་། བསླབ་བྱ་དང་ཆུ་ཤིང་གི་བསྟན་བཅོས་སོགས་མང་ཙམ་སྣང་། མཁས་པ་འདིའི་གསུང་བསླབ་བྱ་ནོར་བུའི་གླིང་དུ་བགྲོད་པའི་ལམ་ཡིག་ནི་ཆེས་གྲགས་ཅན་གྱི་བསླབ་བྱ་ཞིག་ཡིན་ཞིང་། དཔེར་ན། སྡིག་གྲོགས་ཡིན་ཞེས་རྭ་ཅན་མི་འབྱུང་གིས། །གཅེས་ཤིང་ཕན་པའི་ཟོལ་གྱིས་འཛུམ་བསྟན་ནས། །རྩེ་རྒོད་གཡེང་བའི་གྲོགས་བྱེད་བག་མེད་ཀྱི། །ལས་ལ་སྦྱོར་དེ་སྡིག་པའི་གྲོགས་ཡིན་པས། །འགོ་བའི་ནད་བཞིན་རིང་དུ་སྤོངས་ཤིག་ཨང་། ། ཞེས་དང་།ཉིན་རེར་ཟས་ཀྱང་མི་དྲན་བརྩོན་འགྲུས་རྩོམ་། །ཞུགས་མ་ཐག་ནས་མཁས་པའི་གོ་འཕང་འདོད། །ཞག་གསུམ་ལོན་ཚེ་རྗེས་མེད་གཡེང་བས་ཁྱེར། །དེ་འདྲ་དེ་ལ་ཅི་ཡང་མི་ཡོང་བས། །བརྩོན་པ་ཆུ་བོའི་རྒྱུན་བཞིན་སྟེན་ཅིག་ཨང་།། ཞེས་དང་། ཟབ་ཟབ་མན་ངག་ཟེར་དགུ་འཚོལ་བ་དང་། །ཐོབ་ཐོབ་མང་པོའི་རྣམ་གྲངས་གསོག་བྱེད་ཅིང་། །སྒྲ་སྙན་སྨན་རྩིས་སོགས་ལ་མགོ་འཁོར་བ།།གཞུང་ལུགས་ཐོས་བསམ་རྣལ་མའི་གེགས་ཡིན་པས། །རྩ་བ་བོར་ནས་ཡལ་ག་མ་འཛིན་ཨང་། ། སོགས་ཀྱིས་མཚོན་ལ། བསླབ་བྱ་འདི་ལ་མཚོན་ན་ཚིགས་བཅད་རྣམས་གོ་སླ་ཞིང་། དཔེ་དང་རྒྱུ་མཚན་སོགས་ཀྱང་དོན་ལ་ཤིན་ཏུ་འཇུག་པ་བཅས་ཀྱིས་བསླབ་བྱ་འདིའི་འཕྲིན་ལས་ཀྱང་འཕེལ་བར་གྱུར་ལ། ད་དུང་ཚིགས་བཅད་གཅིག་ལ་ཚིག་རྐང་ལྔ་ཡོད་པའི་བསླབ་བྱ་ཞིག་ཡིན་བརྟེན་འབྲི་ཐབས་ཀྱི་ཆ་ནས་ཀྱང་ཆེས་ཐུན་མོང་མ་ཡིན་པ་ཞིག་ཆགས་འདུག་སྙམ་མོ།། ཡང་ཁོང་གིས་ས་སྐྱ་ལེགས་བཤད་དང་མཚུངས་པར་བརྩམས་པ་ཡིན་ཞེས་མཇུག་རྩོམ་དུ་བཀོད་པའི་ཤིང་གི་བསྟན་བཅོས་ལ་མཚོན་ན་ཡང་།ཚེར་མ་ཟུག་པའི་ལན་དུ་སླར། །ཁུ་ཚུར་བརྡེག་པ་བཞད་གད་རྒྱུ། །གནོད་བྱེད་ལ་ཡང་སླར་ཁྲོ་བ། །རང་ཉིད་ཉམས་པའི་རྒྱུ་རུ་ཟད།། ཅེས་དང་།།  རྗེ་དཔོན་བཟང་པོའི་བཀའ་དྲིན་གྱིས། །གཡོག་འཁོར་མངའ་ཐང་དར་བར་འགྱུར། །ལྗོན་པ་ཆེ་ལ་བརྟེན་པ་ཡིས། །འཁྲི་ཤིང་རྩེ་མོ་དགུང་ལ་བསྙེགས། །ཚེར་མའི་ཤིང་ལ་བརྟེན་བྱས་ན། །གནད་དུ་ཟུག་པའི་སྡུག་བསྔལ་སྐྱེ། །སྐྱེ་བོ་ངན་པ་རྟེན་བྱས་ཀྱང་། །ཕྱི་ཕྱིར་སྡུག་བསྔལ་འབའ་ཞིག་བསྐྱེད།། སོགས་ཀྱིས་མཚོན་ནོ།། ཡང་ཁོང་གི་གསུང་ཉམས་མྱོང་རྒན་པོའི་འབེལ་གཏམ་ཡིད་འབྱུང་དམར་འཁྲིད་ལ་མཚོན་ན་ཡང་། སྲིད་པའི་འབྲོག་དགོན་ཐང་དཀྱིལ་ན། །རྒས་འཁོགས་རྒད་པོ་ཉལ་བ་ལ། །ལང་ཚོས་དྲེགས་པའི་གཞོན་ནུ་ཞིག། འོངས་ཏེ་ཅོ་འདྲི་འདི་སྐད་གླེང་། །རྒད་པོ་འགྲོ་འདུག་བྱ་བྱེད་ཀུན།།གཞན་དང་མི་མཐུན་ཅལ་ཅོལ་རང་། །བྱེད་པའི་རྒྱུ་མཚན་ཅི་ཡིན་ཟེར། །དེ་ལ་རྒད་པོས་ལན་སྨྲས་པ། །ཡོག་ལི་ཤ་དར་ཁྲག་དར་གྱི།འཕུར་མ་ལྡིང་ཁྱོད་ང་ལ་ཉོན། །ང་ཡང་ལོ་འགའི་སྔོན་ཙམ་ན། །ཁྱེད་ལས་ལྷག་སྒོས་ལྷག་ཅིག་ཡིན། །བརྒྱུགས་ན་གྱི་ལིང་རྟ་ཡང་ཟིན། །བཟུང་ན་བྱང་ཁའི་འབྲོང་ཡང་ཐུབ། །ཡང་ཟོར་ནམ་མཁའི་བྱ་དང་མཚུངས། །མཛེས་པ་ལྷ་ཕྲུག་གཞོན་ནུ་འདྲ།།བཀྲག་མདངས་ཅན་གྱི་གོས་ཀྱང་གྱོན། །རིན་ཐང་ཅན་གྱི་རྒྱན་ཡང་བཏགས། །ཞིམ་མངར་ཅན་གྱི་ཟས་ཀྱང་ཟོས། །བང་རྩལ་ཅན་གྱི་རྟ་ཡང་ཞོན། །རྩེ་རྒོད་མ་བྱས་གཅིག་ཀྱང་མེད། །དགའ་སྐྱིད་མ་མྱོང་གཅིག་ཀྱང་མེད། །འཆི་བ་འོང་དོགས་ག་ལ་ཡོད། །རྒ་བའང་ཐོག་ཏུ་འོང་མ་སྙམ། །སོགས་གསུངས་ཏེ་རྒན་གཞོན་བར་གྱི་འགྱུར་བ་རྣམས་དྲངས་ཡོད་ཅིང་། མཐར་ཆོས་བསྟེན་དགོས་པའི་བསླབ་བྱ་མཛད་ཡོད། འདི་ཡང་རྩོམ་སྲོལ་རིགས་གསར་པ་ཞིག་གི་ཁོངས་སུ་ཨེ་འགྲོ་སྙམ་ནས་བཀོད།     

རྩོམ་སྒྲིག་པ། དོན་འགྲུབ་རྡོ་རྗེ།