གང་ལུས་ཆར་སྤྲིན་ཕུང་བོ་ནི།།
མཁའ་ལ་དྲག་ཏུ་གཡོ་ལྟར་སྣང་།།
དེ་ཡི་སྣ་དང་ཁ་སྒོ་ནས།།
རླངས་པ་སྤྲིན་ནག་མཆེད་ལྟར་འཕྱུར།།
ལྕེ་ནི་གློག་ལྟར་འགྱུ་བ་སྟེ།།
ངུར་སྒྲ་འབྲུག་གི་སྒྲ་ལྟར་སྒྲོགས།།
ཨིནྡྲ་ནཱི་ལའི་བྲག་ལྟ་བུའི།།
རྨིག་པ་བརྡབས་པའི་ས་གཞི་གཡོ།།
ཤིན་ཏུ་བསྐྱོད་པའི་རྭ་རྩེ་ཡིས།།
རི་བོའི་ལྷུན་ཡང་བསྙིལ་བར་ནུས།།
མིག་གཉིས་ཉི་མ་ཟླ་བ་ནི།།
སྤྲིན་མཐོང་མཁའ་ལ་གཡོ་བ་བཞིན།།
རྔ་མ་ལྗོན་པ་རྒྱས་པ་འདྲ།།
དེ་བསྐྱོད་པ་ཡིས་ནམ་མཁའི་སྤྲིན།།
རྣམ་པར་འཐོར་བ་བཞིན་དུ་སྣང་།།
དེ་ཡི་སྒྲ་ཡིས་གླུ་སྒྲ་ཡང་།།
ཀུན་ནས་རབ་ཏུ་ཟིལ་གྱིས་གནོན།།
འདི་འདྲ་གངས་ཅན་གནས་པ་ཡི།།
རྐང་བཞི་པ་ཡི་ངོ་མཚར་ཏོ།།
འདི་ཡིས་བསྒྲུན་པར་ནུས་པ་ཡི།།
རྐང་གཉིས་པ་ལའང་རབ་ཏུ་དཀོན།།
དེ་འདྲ་བརྩེ་མེད་སྐྱེས་བུ་ཡིས།།
མཚོན་ལས་རབ་ཏུ་རྒྱལ་གྱུར་ཅིག།
ལྗགས་རྩོམ་འདི་ནི་ཆོས་རྒྱལ་འགྲོ་མགོན་འཕགས་པ་བློ་གྲོས་རྒྱལ་མཚན་མཆོག་གིས་མཛད་པ་ཡིན་ལ་ཁོང་གི་གསུང་འབུམ་པོད་གསུམ་པའི་ནང་དུ་ཡོད་ཅིང་མི་རྣམས་ཀྱིས་འདི་ནི་མཐོ་སྒང་གི་རིན་ཆེན་འབྲི་གཡག་ལ་བསྔགས་པའི་ལྗགས་རྩོམ་གྱི་ཡང་རྩེར་ངོས་འཛིན་པར་གྲགས།
རྩོམ་སྒྲིག་པ། དོན་འགྲུབ་རྡོ་རྗེ།