ༀ་ཨཱ་ཧཱུཾ༔ བཛྲ་གུ་རུ་ཨ་ཡུར་སིདྡྷི་ཧཱུྃ༔
འོད་མཚན་སྟོང་འབར་རྒྱལ་བའི་ཡེ་ཤེས་ཁམས།།
རྗེས་ཆགས་སིནྡྷིའི་དྭངས་མཚོར་འཕོས་པའི་དཔྱིད།།
འཕོ་ཆེན་འཇའ་ལུས་རྡོ་རྗེའི་སྐུ་བརྙེས་པ།།
འཆི་མེད་པདྨ་རྒྱལ་པོས་བྱིན་ཆེན་སྩོལ།།
ཇི་སྙེད་བརྟན་དང་གཡོ་བའི་ཕྲ་རགས་དངོས།།
གཞོམ་མེད་རྡོ་རྗེའི་སྲོག་ཏུ་ཡོངས་གྲུབ་པ།།
ཚེ་དང་ཡེ་ཤེས་དཔལ་ཀུན་བསྩལ་བའི་ལྷ།།
རབ་འབྱམས་རྒྱལ་བ་འཕགས་མའི་ལྷ་ཚོགས་དགོངས།།
དངོས་ཀུན་མི་ཤིགས་དོན་དམ་གཉུག་མའི་དབྱིངས།།
འཕོ་ཆགས་མཚན་མ་ཀུན་བྲལ་དེ་བཞིན་ཉིད།།
རིག་སྟོང་དབྱེར་མེད་ཀ་དག་ཆོས༵་ཀྱི་སྐུ༵།།
བཅོམ་ལྡན་དང་པོའི་ངོ་བོར་ཞབས་བརྟན་གསོལ།།
འཆི་མེད་རྟག་པ་དམ་པའི་ཡེ་ཤེས་གཟུགས།།
ངེས་པ་ལྔ་དང་ཁ་སྦྱོར་བདུན་གྱི་བདག།
བདེ་སྟོང་དབྱེར་མེད་ལྷུན་གྲུབ་ལོང༵ས་སྤྱོད༵་རྫོག༵ས།།
ཚེ་མཐའ་ཡས་པའི་ངོ་བོར་ཞབས་བརྟན་གསོལ།།
མི་མཇེད་ཞིང་དུ་སྣ་ཚོགས་གཟུགས་ཀྱི་སྐུ།།
རྟག་ཁྱབ་ལྷུན་གྲུབ་སྒྱུ་འཕྲུལ་དྲྭ་བའི་གར།།
ཡོངས་བཞེངས་གསལ་སྟོང་དབྱེར་མེད་སྤྲུལ༵་པའི་སྐུ༵།།
འཕོ་ཆེན་རྡོ་རྗེའི་ངོ་བོར་ཞབས་བརྟན་གསོལ།།
རྣམ་པར་མི་རྟོག་ཏིང་འཛིན་བརྟན་པའི་ཐུག༵ས།།
ཡེ་ཤེས་ཆེན་པོའི་རོལ་བར་འབྱམས་ཀླས་པ།།
མཚན་འཛིན་རྟོག་པའི་འགྱུ་བས་མི་གཡོ་བ།།
གཉིས་མེད་མཉམ་པ་ཆེན་པོར་ཞབས་བརྟན་གསོལ།།
གྲགས་སྟོང་སྐྱེ་བ་མེད་པ་རྡོ་རྗེའི་གསུ༵ང་།།
ཐོས་གྲོལ་ཡན་ལག་དྲུག་བཅུའི་དབྱངས་རྫོགས་པ།།
ཀུན་ཉོན་ལས་རླུང་འཁྲུལ་བས་མི་བསྐྱོད་པ།།
བརྗོད་བྲལ་བློ་འདས་ཆེན་པོར་ཞབས་བརྟན་གསོལ།།
རྡུལ་བྲལ་དྭངས་མ་མཚན་རྫོགས་གཟུགས་ཀྱི་སྐུ༵།།
ཚེ་དབང་རིག་འཛིན་གྲུབ་པའི་རྩལ་འཆང་བ།།
སྐྱེ་འཆི་བགྲེས་རྒུད་བྲལ་བ་རྡོ་རྗེའི་ལུས།།
འཕོ་མེད་རྟག་པའི་ངོ་བོར་བཞུགས་གསོལ་འདེབས།།
སྐུ་མཆོག་འགྱུར༵་མེད༵་གདུལ་བྱའི་དཔལ་དུ་བརྟན།།
གསུང་གསང་འགག་མེད་ཕྲིན༵་ལས༵་རྒྱུན་མི་ཆད།།
ཐུགས་མཆོག་མི་གཡོ་ཏིང་འཛིན་རྒྱ༵་མཚོ༵འི་གཏེར།།
རྡོ་རྗེ་སློབ་དཔོན་བསྐལ་བརྒྱར་ཞབས་བརྟན་ཤོག།
ཅེས་རྫོགས་ཆེན་གདན་རབས་པ་བཞི་བ་རྗེ་དབོན་པདྨ་ཀུན་གྲོལ་རྣམ་རྒྱལ་གྱི་དག་ཆེན་སྤྲུལ་བའི་འཁྲུངས་རབས་དྲུག་པ། དབོན་སྤྲུལ་རིན་པོ་ཆེ་འགྱུར༵་མེད༵་ཕྲིན༵་ལས་རྒྱ༵་མཚོ༵འི་སྡེ་ཉིད་དགུང་གྲངས་བརྒྱད་བཅུར་ཕེྃབས་པར་བརྟན་བཞུགས་ཀྱི་སྐབས་སུ། རྒྱ་རོང་ནམ་སྤྲུལ་རིན་པོ་ཆེས་རབ་དཀར་ཟླ་བའི་མདངས་འཛིན་གྱི་དར་དང་། སྐྱེ་མེད་རིག་སྟོང་མཚོན་པའི་ཨ་དརྴའི་རྟེན་བཅས་བསྐུལ་ངོར། གྲུབ་དབང་རྫོགས་ཆེན་པ་བསྟན་འཛིན་ལུང་རྟོགས་ཉི་མས་མེ་བྱ་ཟླ་བ་གཉིས་པའི་དཀར་ཕྱོགས་ཀྱི་གྲལ་ཚེས་དགེ་བར་སྨོན་པ་ཀུན་ནས་ཀུན་ཏུ་དགེ་བར་གྱུར་ཅིག་གུ།།
རྩོམ་སྒྲིག་པ། དོན་འགྲུབ་རྡོ་རྗེ།