༄༅། །ཀུན་འདུས་བླ་མ་མཆོག་ལ་ཕྱག་འཚལ་ལོ། །རང་ལོ་ཉེར་དགུ་ལོན་ཚེའི་དུས། །བླ་མ་མཆོག་དང་ཐུགས་བསྟུན་ནས། །ལྷོ་ཕྱོགས་སྐྱེས་ཆེན་འགའ་ཞིག་ལ། །མཇལ་དང་རྟེན་འབྲེལ་བསྒྲིག་ཕྱིར་དང་། །ཕྱོགས་མེད་འགྲོ་བ་སྣ་ཚོགས་ལ། །ཆོས་སྦྱིན་འབྲེལ་པ་བཟང་འཇོག་དང་། །ཉམས་ལེན་རྟོགས་པའི་ངོ་བོ་དེ། །རོ་སྙོམས་ཡུལ་དང་བསྲེ་ཕྱིར་དང་། །བྱ་བཏང་རྣལ་འབྱོར་ཆ་ལུགས་ཕྱིར། །གཏད་མེད་གར་དགར་ཡན་ཕྱིར་དུ། །ལྷོ་ཕྱོགས་ངོས་ལ་འོང་བར་གྱུར། །ལས་སུ་བཟང་འབྲེལ་མང་ཞིག་ལ། །ཆོས་ཀྱི་བྱ་འགས་ཚིམ་པར་བྱས། །ཐོགས་མེད་དངུལ་ཆུའི་འགྲམ་དུ་སླེབས། །ཆུ་ཆེན་གནམ་དུ་འཕྱུར་དུས་བབ། །ཀུན་གྱིས་ཆུ་འདི་ཆོད་མིན་ཞེས། །ཡང་ཡང་བཤོལ་ཡང་མ་ཉན་ཏེ། །བརྟུལ་ཤུགས་ལྡན་པས་ཁལ་མ་རྣམས། །ཆུ་བོ་ཆེ་ལ་ཡང་ཡང་བརྒྱབ། །བརྟུལ་ཞུགས་ཆུ་ལ་མ་སོང་སྟེ། །མ་ཆོད་འགའ་རེ་ཆུས་ཁྱེར་ཚེ། །ཨོ་རྒྱན་སྒྲོལ་མ་ལ་སོགས་ཀྱི། །མཚན་བརྗོད་གསོལ་བ་བཏབ་པ་ལས། །ཉེས་མེད་བདེ་བར་ཐར་བར་གྱུར། །ལྷ་འདུག་ཟེར་ནས་ཀུན་ཡང་དགའ། །ཡུལ་དེར་ཞག་བདུན་མཚམས་བྱས་ཚེ། །ཐོ་རེངས་དྭངས་པའི་རྨི་ལམ་དུ། །ཤར་ཕྱོགས་ནམ་མཁའི་མཐོང་ལས་ཚུར། །རྟ་དཀར་ལ་ཆིབས་དཔོན་སློབ་གཉིས། །པད་ཞྭ་ཆོས་གོས་རབ་མཛེས་ལྡན། །བདག་གི་མདུན་དུ་བྱོན་བཞུགས་མཐོང་། །འདི་ནི་པད་འབྱུང་གཏེར་སྟོན་གཉིས། །ཡིན་པར་འདུག་སྙམ་ཡིད་ལ་ཤར། །དེ་མོད་གཉིད་ལས་ལྡང་བར་གྱུར། །དེ་ནས་སྤོམ་མདའི་ཟམ་པ་བཙུགས། །ཉེས་མེད་བདེ་བར་མྱུར་དུ་གྲུབ། །དེ་ཚེ་དྲུག་བརྒྱ་ཙམ་ཞིག་ཁྲོམ། །དབང་བསྐུར་ཆོས་བཤད་དགེ་བ་ཡི། །ཁས་ལེན་ཆོས་ཕྱོགས་མང་ཞིག་གྲུབ། །ཀུན་འཛོ་ཞེས་པར་མཚམས་འདུག་དུས། །གཏེར་སྟོན་ཀཿཐོག་ངོས་ལ་ཕེབས། །འདིར་ཕྱོགས་མེད་ཅེས་སྐད་ཆ་ཐོས། །དེ་ཚེ་ཡོད་མེད་རྨི་ལམ་བརྟགས། །མ་ཕེབས་ཡོད་པའི་རྟགས་རྣམས་བྱུང་། །ཁྱད་པར་གཏེར་སྟོན་ཡིན་བསམ་པའི། །རྣལ་འབྱོར་གཅིག་གིས་རང་ཉིད་ལ། །ཁྱོད་ནི་རླངས་ཆེན་དཔལ་སེང་ཡིན། །ཁོ་བོའི་ཆོས་བདག་འགྱུར་རོ་ཞེས། །ལུང་བསྟན་དབུགས་དབྱུང་བྱས་པ་རྨིས། །རིག་འཛིན་འཇའ་ཚོན་སྙིང་པོ་ཡི། །སློབ་མ་ཀུན་མཁྱེན་ཞེས་བྱ་ཡིས། །བུམ་སྒྲུབ་རིལ་བུའི་སྦྱིན་བདག་བྱས། །བར་ཆད་མེད་པར་སྒྲུབ་པ་འཕེལ། །དགུན་སྒང་ཡིན་ཡང་གློག་དམར་འཁྱུག །དྲི་བཟང་འཐུལ་ཞིང་རྟགས་མཚན་ཐོན། །ཐམས་ཅད་ཡིད་ཆེས་མོས་པ་སྐྱེས། །རིལ་བུ་འགྱེད་དང་དབང་བསྐུར་དང་། །དགེ་བ་བསྔོ་སྨོན་མཐའ་རྒྱས་གྲུབ། །བླ་མ་དེས་ཀྱང་དབང་ལུང་གི། །བསྐུལ་མ་སྦྱིན་བདག་མཛད་པའི་མཐུས། །ཞི་ཁྲོ་ན་རག་དོང་སྤྲུགས་ཀྱི། །དབང་དང་ངོ་སྤྲོད་གདམས་པ་སོགས། །བརྒྱ་ཕྲག་ལས་ཉུང་ཁྲོམ་ལ་སྤེལ། །གདམས་པ་དབང་ལ་སོགས་པ་འགས། །བླ་མ་དེ་ཡི་ཐུགས་བཞེད་བསྐང་། །ཚུར་ལ་རྟ་ཕག་དབང་ལུང་ཞུས། །གནས་དེར་སྒྲུབ་པ་རྒྱུན་རིང་བྱས། །ཉམས་མྱོང་བྱུང་རྒྱལ་མགུར་མ་འཐེན། །སྐབས་གཅིག་རྨི་ལམ་སྣང་བ་ལ། །གཏེར་སྟོན་འཇའ་ཚོན་སྙིང་པོ་མཇལ། །སྒྲུབ་པ་སྙིང་པོར་གྱིས་ཤིག་ཅེས། །ཞལ་ཏ་མཛད་པའི་མོད་ལ་ཡལ། །དེ་ནས་རང་གི་གྲྭ་པ་གསུམ། །དངོས་པོ་ཅུང་ཟད་འབུལ་དང་བཅས། །ཞུ་ཡིག་གཏེར་སྟོན་དྲུང་དུ་བརྫངས། །ང་ལ་རྟེན་འབྲེལ་ཡོད་མཆིས་ན། །ཕར་ལ་མཇལ་འོང་གནས་སྐབས་སུ། །རྟེན་འབྲེལ་མེད་ན་བྱིན་རླབས་རྟེན། །ཚུར་ལ་བསྐུར་ཞེས་ཆ་འཕྲིན་ཕུལ། །དེ་ཚེ་ཁོང་གསུམ་མགོ་ཐོན་བཅས། །དྲུང་དུ་སླེབས་པའི་བཀའ་ཤོག་ལས། །ཁྱེད་ནི་རྫོགས་ཆེན་ཆོས་ཀྱི་སྣོད། །པདྨའི་བཀའ་འཛིན་ངེས་པར་ཡིན། །ད་ནི་བར་ཆད་དབང་མ་བཏང་། །མྱུར་དུ་སླེབ་པར་ཤོག་ཅིག་ཅེས། །ཨ་མ་རིལ་བུ་དང་བཅས་བྱུང་། །གསུང་ལྟར་མྱུར་དུ་སླེབ་པར་བྱས། །མཇལ་རྒྱུའི་ནུབ་མོ་རྨི་ལམ་དུ། །ཨོ་རྒྱན་ཞལ་ཐང་ལེགས་པོ་ནི། །རྗེ་འབངས་ཉེར་ལྔས་བསྐོར་བ་མཇལ། །དད་དང་འདུན་པ་འཕེལ་བར་བྱུང་། །ཕྱིར་ནང་དྲུང་སླེབ་མཇལ་བའི་ཚེ། །ཞུ་དོན་ཉམས་མྱོང་མགུར་དུ་བླངས། །སྔ་སོར་འབུལ་བ་བདུན་ཚན་གཅིག །མཇལ་དུས་གསེར་ཞོ་གཉིས་གསུམ་གྱིས། །མགོ་བྱས་འབུལ་བ་དགུ་ཚན་གཅིག །ཡིན་ལུགས་ཞུས་པས་དགྱེས་དགྱེས་མཛད། །ཆོས་བདག་ནོར་མེད་མཁའ་འགྲོའི་ལུང་བསྟན་བྱུང་། །ཞེས་གསུངས་དེ་ཡིན་ཕྱིར་དུ་ནི། །ངེས་པར་ཆོས་བདག་ཡིན་པ་དང་། །ཁྱད་པར་སྤྲུལ་སྐུ་སྙིང་ཐིག་གི། །ཡིག་མེད་སྐོར་གྱི་བདག་པོ་ཡིན། །རང་ལ་ཡང་ཡང་ཞལ་ནས་གསུངས། །གཞན་ལའང་འདི་ནི་ཆོས་ཀྱི་བདག །ཡིན་ཞེས་ཀུན་ལ་བསྔགས་པ་མཛད། །དབང་ལུང་བཀའ་གཏད་བཅས་པ་དང་། །ཉམས་ལེན་སྤེལ་བའི་གཏད་རྒྱ་མཛད། །བརྟགས་པ་འགའ་ཞིག་གྱིས་གསུངས་པ། །དེ་ལྟར་བྱས་ནས་དོན་འབྲས་ཕུལ། །ཐོག་ཏུ་ཅི་ཕེབས་མ་ཤེས་སོ། །སྐུ་རིམ་བཟློག་པ་ཞག་བདུན་བཅས། །ཚེ་སྒྲུབ་ཆོ་ག་བརྒྱ་རྩ་དང་། །ཡབ་ཡུམ་སྲས་གསུམ་ཉིད་ལ་ནི། །སྲུང་འཁོར་རེ་རེ་འདོགས་པ་སོགས། །ཞབས་ཏོག་ཕྲན་བུ་རང་གིས་ཀྱང་སྒྲུབ། །དེ་ཚེ་བླ་མ་གཞན་གཅིག་གིས། །ཕྲག་དོག་ཟུག་རྔུའི་སེམས་ཀྱིས་ནི། །འདི་ཡིས་གཏོར་བཟློག་བྱེད་པ་ལས། །སྒོམ་དང་གདེངས་ཆེན་མི་འདུག་པས། །གྲྭ་པ་གཅིག་གཉིས་འཐབ་སོང་བ། །འདི་ཡི་ལན་ཞེས་སྨྲས་སོ་ཟེར། །དེ་སྐད་ཐོས་ཀྱང་ཉམ་ང་མེད། །བཟོད་པ་སྒོམ་པ་མ་གཏོགས་པ། །ངན་ལན་ཅུང་ཟད་མ་བྱས་སོ། །དེ་སྐབས་ཆོས་མཐུན་རྣལ་འབྱོར་པ། །སྦས་ཚུལ་ལས་ཅན་སྐྱེས་བུ་ནི། །ཚུལ་ཁྲིམས་བསྟན་འཛིན་ཞེས་བྱ་དང་། །ཡིད་མཐུན་སྙིང་གི་གྲོགས་སུ་གྱུར། །དེ་ནི་དམ་ལྡན་སྐྱེས་བུ་སྟེ། །མཁའ་འགྲོའི་ལུང་བསྟན་རྒྱུན་དུ་འོང་། །གཞན་ཡང་རྟགས་མཚན་བསམ་མི་ཁྱབ། །དེ་ལ་མཁའ་འགྲོས་ལུང་བསྟན་ནས། །ཁོང་གཉིས་སྔོན་ཚེ་རྒྱ་གར་དུ། །ཀྲྀཥྞ་འཛིན་གྱི་ཚ་བོ་རུ། །སྐྱེས་དུས་བརྟུལ་ཞུགས་མཐར་ཕྱིན་པ། །བིར་ཝ་པ་ཞེས་བྱ་བ་དང་། །ན་རོའི་སློབ་མ་ཕག་ཚང་པ། །ཨོ་རྒྱན་དྲུང་དུ་རླངས་ཆེན་དཔལ། །ཡིན་ཞེས་མཁའ་འགྲོས་སྒྲོགས་ཞེས་ཟེར། །རག་ཞི་གཏེར་སྟོན་འཇའ་ཚོན་པ། །བདུད་འདུལ་རྡོ་རྗེ་གསུམ་གྱིས་ནི། །ལས་ཅན་དཔའ་བོར་ལུང་བསྟན་པའི། །སྦས་ཚུལ་རྣལ་འབྱོར་སྐྱེས་བུ་ནི། །སྐལ་ལྡན་སྙིང་པོ་ཞེས་བྱ་དེས། །སྔར་འདྲིས་མེད་ཀྱང་ཐུགས་མ་འཕྲིས། །ཁྱོད་ནི་ལས་ཅན་ཞིག་ཡིན་ཕྱིར། །ང་ཡི་འདི་ཡང་སྟོན་ཞེས་ཟེར། །ཁོ་རང་གཏེར་ནས་བཏོན་པ་ཡི། །ཨོ་རྒྱན་ཕྱག་རྗེས་ངོ་མཚར་ཅན། །འདུག་པ་ང་ལ་མཇལ་ཁ་བྱས། །ཁམས་ཕྱོགས་འགྲོ་དོན་རྒྱ་ཆེན་འོང་། །གླིང་རས་སྤྲུལ་པའི་གྲུབ་ཆེན་ཞིག །སྐྱེ་བ་ཁྱོད་རང་ཡིན་འདུག་ཅེས། །དགའ་ཚོར་དང་བཅས་སྤྲོ་བོ་མཛད། །དེ་ནས་བཻ་རོ་ཙཱ་ན་ཡི། །སྐྱེ་བ་ཡིན་ཞེས་ལུང་བསྟན་ནི། །གཏེར་ཁ་དུ་མ་གཅིག་ཏུ་མཐུན། །གྲུབ་པའི་རིག་འཛིན་ཆེན་པོ་ནི། །བོད་ཁམས་ཡོངས་ལ་གྲགས་པ་ཡི། །བྷ་ཁ་སྤྲུལ་སྐུ་ཞེས་བྱ་དེ། །མཇལ་ཕྱིར་སོང་ནས་སླེབས་གྱུར་ནུབ། །ཨོ་རྒྱན་ཡིན་ནམ་གཏེར་སྟོན་ཡིན། །དེ་འདྲ་གཅིག་གི་བདག་ཉིད་ཀྱི། །སྐྱེས་རབས་ཡིན་ཞེས་ལུང་བསྟན་དང་། །རྗེ་འབངས་འགའ་ཞིག་མཇལ་སྣང་བྱུང་། །ཕྱིར་ཉིན་མཇལ་ཞིང་དགྱེས་མཛད་ནས། །ལུགས་གཉིས་བདག་རྐྱེན་ལེགས་པོར་མཛད། །ཨོ་རྒྱན་དྲུང་དུ་དཔལ་སེང་དང་། །མི་ལའི་དྲུང་དུ་ངོམ་རྫོགས་པ། །ཡིན་ཞེས་གསུངས་ཤིང་ལུང་བསྟན་གནང་། །དེ་རུ་ཡུན་རིང་མཚམས་འདུག་ཚེ། །རྨི་ལམ་སྣང་བར་སྤྲུལ་སྐུ་དེས། །ཁྱོད་ཀྱིས་གཏེར་ཡང་ཐོན་འོང་ཞེས། །གསུངས་ཤིང་དགྱེས་དགྱེས་མཛད་པའང་བྱུང་། །རང་ཉིད་གྲོ་ལོད་གསལ་བ་ལས། །ཕག་མོ་ཐོད་ཁྲག་དང་བཅས་པས། །འཁྱུད་ཅིང་དགྱེས་པ་བསྐང་ཚུལ་ནི། །གསལ་པོར་རྨི་ལམ་སྣང་བ་བྱུང་། །སྐབས་གཅིག་གྲོ་ལོད་དཀར་པོ་གཅིག །ནམ་མཁའ་འཇའ་ཚོན་ཀློང་དུ་ནི། །སྟག་ལ་ཆིབས་པའི་སྐུ་སྣང་ཞིག །རྨི་ལམ་ཉམས་ཀྱི་མཚམས་སུ་བྱུང་། །ནུབ་གཅིག་རྟེན་འབྲེལ་བཞག་པའི་དུས། །གཏེར་སྒོ་ལེགས་པོ་གཉིས་གསུམ་མཐོང་། །ངེས་པར་རྗེས་སོར་འདོན་བསམ་རྨིས། །དངོས་སུ་བྱུང་བའི་སྒྲ་རང་ནི། །མཎྜལ་ཕུལ་བའི་ཚིག་བརྗོད་ཐོས། །སྨིན་དྲུག་ཟླ་བའི་ཚེས་བཅུའི་ནུབ། །མཆོད་གཏོར་བཟླས་པ་བཟང་བྱས་ནས། །དབེན་པར་ཉལ་བའི་རྨི་ལམ་དུ། །མ་གཅིག་ཡེ་ཤེས་མཚོ་རྒྱལ་དེ། །བུད་མེད་དར་མའི་ན་ཚོད་ཅན། །དབུ་སྐྲ་ཐོར་ཅོག་ན་བཟའ་ཀླུབས། །མཛེས་ཤིང་བག་ཆགས་གཟི་བརྗིད་ལྡན། །མཇལ་བས་དད་འཕེལ་གུས་པ་ལས། །ཨོ་རྒྱན་མཇལ་བར་སོང་ཞེས་དང་། །གཞན་ཡང་ལུང་བསྟན་གཅིག་ཀྱང་གསུངས། །དེ་ནས་ཡར་ལ་སོང་བ་དང་། །བྲག་ཕུག་ལྟ་བུར་སླེབས་པའི་ཚེ། །ཨོ་རྒྱན་དངོས་ཡིན་སྙམ་པ་ཡི། །བདག་གི་སྐྱབས་གཅིག་བླ་མ་མཆོག །ཀརྨ་ཆགས་མེད་དེ་ཉིད་ནི། །མངོན་སུམ་ལྟ་བུར་མཇལ་བ་དང་། །ཕྱག་དང་བསྐོར་བ་དུ་མ་མཛད། །རང་ཡང་དགའ་སྤྲོ་དད་པ་འཕེལ། །ཡང་གཅིག་མེ་ལས་གྲུབ་པ་ཡི། །ཕྱག་རྡོར་དྲེགས་འདུལ་ཡིན་སྙམ་པའི། །ཞལ་ཕྱག་གསལ་ཞིང་གཟི་བརྗིད་ཅན། །འདོམ་གང་ཙམ་གྱི་མཁའ་ལ་བཞུགས། །དེ་ཉིད་མཇལ་བས་དད་པ་སྐྱེས། །བྱིན་རླབས་ཞུས་པས་བདུད་རྩིའི་རྒྱུན། །དྭངས་པར་བྱུང་བ་བདག་གིས་འཐུང་། །རྗེས་གནང་རང་དང་དབྱེར་མེད་པའི། །ངོ་བོ་གཅིག་ཡིན་སྙམ་པའང་བྱུང་། །དེ་མོད་སེར་བ་བརྒྱབ་ནས་བྱུང་། །གཞན་ཞིག་བཟློག་པས་ཐུབ་མ་སོང་། །བདག་ཉིད་དྲེགས་འདུལ་མེ་དཔུང་ཅན། །ང་རྒྱལ་བཟུང་ནས་བཟློག་པ་ལས། །དེ་མ་ཐག་ཏུ་བཟློག་པས་ཐུབ། །སྤྲུལ་སྐུའི་གཟིམས་ཁང་ནང་ཉལ་ཚེ། །སྐུ་ཚེ་བརྟག་པ་བསྐུར་བྱུང་ནུབ། །མིི་ནག་བྲན་གྱི་ཚུལ་ཅན་ཞིག །བདག་རྩར་བྱུང་ནས་དགའ་གུས་བྱས། །ཁམས་འདྲི་བྱེད་ཅིང་ཡོད་པའི་མོད། །མགོན་པོ་མ་ནིང་ཡིན་པར་འདུག །དགའ་དགའ་བྱེད་ཅིང་དགོས་པའི་དོན། །སྨྲས་ནས་བྱུང་ཡང་སྒྲ་དེ་ལས། །ཚིག་དོན་ཅི་བཞིན་གོ་མ་ཐུབ། །དེ་ནས་ཕར་ཕར་ཡལ་ནས་སོང་། །རླུང་སྒྲ་བརྟགས་པས་བརྒྱ་ལྔ་ཟེར། །ཐོ་རེངས་གཟུགས་མེད་སྨྲ་བ་གཅིག །བདུན་ཅུ་དོན་ནི་དྲུག་བདུན་ཙམ། །ཟེར་བའི་སྣང་བ་བྱུང་བ་དང་། །ཡང་གཅིག་ལྷ་མོ་བུད་མེད་ནི། །རྒྱན་ཅན་གཅིག་བྱས་ལྡེ་མིག་བཟུང་། །སྤྲུལ་སྐུའི་གཉེར་བ་བྱེད་པ་རྨིས། །ནུབ་གཅིག་དག་པའི་འོད་གསལ་ངང་། །ཐིག་ལེ་སྟོང་སྒྲོན་མུ་ཁྱུད་ཅན། །གཅིག་གི་ནང་དུ་རྡོ་རྗེ་སེམས། །འགྱིང་བག་ཆ་ལུགས་ཚུལ་བཞིན་པ། །གསལ་པོར་མཇལ་ཞིང་ཡང་གཅིག་གི། །དབུས་སུ་ཐུགས་ཆེན་ནམ་མཁའ་རྒྱལ། །ལམ་མེར་བཞུགས་པ་མཇལ་བ་བྱུང་། །སྤོ་བོ་རྟ་ནག་དགོན་པར་བྲིས། ། མདྒ་ལཾ། །
རྩོམ་སྒྲིག་པ། དོན་འགྲུབ་རྡོ་རྗེ།