སྐྱབས་རྗེ་པདྨ་སྐལ་བཟང་གི་གསུང་རྩོམ།

WechatIMG2326.jpeg

འདུལ་འཛིན་སྲིད་པའི་རྒྱན་གཅིག་ཤཱཀྱའི་སྲས།།

དམར་སེར་དགེ་འདུན་འདུས་པའི་ཁྱུ་ཆེན་པོའི།།

ཞབས་རྡུལ་སྤྱི་བོར་བཀོད་པའི་དགའ་སྟོན་འདིའི།།

ངོ་མཚར་གྲགས་སྙན་ཕྱི་མའི་དུས་ན་འབར།།


དེང་དུས་རྒྱལ་བསྟན་ཉིན་བྱེད་ནུབ་རིར་ཆས།།

ལོག་རྟོག་རྨོངས་པའི་མུན་པས་འཐུམས་གྱུར་ཚེ།།

ཐུགས་བསྐྱེད་ཟླ་གཞོན་འཛུམ་པའི་འོད་དཀར་གྱིས།།

འགྲོ་བློའི་སྙིང་གི་མུན་པ་སེལ་ལ་རེམས།།


ཡོན་ཏན་གཞི་རྟེན་ཚུལ་ཁྲིམས་ནོར་བུའི་མཛོད།།

བསྟན་པ་རིན་ཆེན་སྲོག་གི་དྭངས་མའི་ཟུངས།།

མ་གཡེལ་རང་གི་རྒྱུད་ནས་གཏན་སྲུང་བ།།

འདི་གཅིག་རྒྱལ་བ་དགྱེས་པའི་མཆོད་སྤྲིན་ལགས།།


ཏིང་འཛིན་མཆོག་ཏུ་མི་གཡོ་ཞི་བའི་དབྱིངས།།

དག་ཆེན་ཡེ་ཤེས་སྣང་བར་འགག་མེད་ཀྱི།།

ངོ་མཚར་སྒྱུ་མའི་རྒྱལ་ཐབས་ལ་གཞོལ་བའི།།

བསམ་གྱིས་མི་ཁྱབ་རྒྱལ་བའི་སྒྱུ་འཕྲུལ་ཉིད།།


བསླབ་གསུམ་ནོར་བུའི་མཛོད་ཀྱིས་རྟག་ཕྱུག་ཅིང་།།

འཆད་དང་རྩོད་དང་རྩོམ་པའི་འཕྲིན་ལས་ཀྱིས།།

རྒྱལ་བསྟན་གསེར་གྱི་འཁོར་ལོར་དབང་བསྒྱུར་བའི།།

མངའ་ཐང་ཉི་ཟླའི་ཁྱོན་དང་རྟག་འགྲོག་ཤོག།


ཤེས་རབ་ཟབ་མོའི་ཆོས་ཀྱི་མིག་བསྒྲུབས་པས།།

རྡུལ་བྲལ་དྲི་མ་མེད་པ་རྒྱལ་བའི་བཀའ།།

གསུང་གི་གསང་བའི་ཡང་དག་ཚུལ་འཆང་བ།།

རིང་པོར་མི་ཐོགས་རྒྱལ་བ་ཉིད་དུ་འགྱུར།།


སྲིད་འདིའི་ཆེ་དགུའི་གཙུག་གིས་མངོན་མཆོད་པའི།།

ཟླ་བྲལ་མཚུངས་མེད་བསྟན་པའི་རྫོང་ཆེན་ཉིད།།

ནང་སྲིད་རང་གི་སྒོ་མོ་ལེགས་བསྲུང་ན།།

ཕྱི་རོལ་འཚེ་བས་འཇིག་པའི་དཔེ་མ་མཆིས།།


ཉམ་ཆུང་གྱི་ནས་འཚོ་བའི་ཀུན་སྤང་ཁྱུ།།

དབེན་པའི་རི་སུལ་འགྲིམ་དང་ཆབས་གཅིག་པར།།

སྐབས་སུ་བབས་ཚེ་མི་འཕྲོག་སྤོབས་པའི་གདེང་།།

འཇིགས་མེད་སྨྲ་བའི་གཟི་མདངས་ངོམ་པར་འོས།།


སྲིད་དང་ཞི་བའི་ཆོས་ཁམས་བརྟན་གཡོའི་དཔལ།།

སྣང་སྲིད་འོད་དམར་ཞགས་པས་འཆིང་བ་ཡི།།

མི་ཟད་འདོད་དགུའི་འབྱོར་བས་རྟག་ཕྱུག་པའི།།

ཁྱོད་ཞབས་ནོར་བུའི་ཁྲི་ལ་རྟག་འཁོད་ཤོག།


མི་ཤིགས་རྡོ་རྗེ་ནམ་མཁའི་རྒྱལ་སྲིད་ཆེར།།

མཁའ་མཉམ་སྲིད་པ་གཡོ་བའི་ཕྱག་རྒྱ་དང་།།

འགྲོག་པའི་ཟིལ་གནོན་རྟགས་ཀྱི་ཆེ་བ་ཡིས།།

ཕྱོགས་ལས་རྣམ་པར་རྒྱལ་བའི་སྒྱུ་འཕྲུལ་ངོམ།།


དམ་གཙང་མཛའ་བ་མི་ཕྱེད་རྡོ་རྗེ་རྒྱ།།

མི་འགྱུར་སྲོག་གི་ཐིག་ལེར་ཡོངས་ཟླུམ་པ།།

རྡུལ་བྲལ་དྲི་མེད་ཟླ་གཞོན་དྭངས་པའི་ཁམས།།

སྟོང་ཁམས་སྲིད་པའི་མཁའ་དབྱིངས་རྒྱན་དུ་མཛེས།།


ཡོན་ཏན་ནོར་བུ་བརྩེགས་པའི་བ་གམ་བརྒྱ།།

ཏིང་འཛིན་ཟླ་རིས་འབུམ་གྱི་རླབས་ཕྲེང་ཅན།།

ཕྱོགས་དང་དུས་ཀྱི་ཐ་གྲུ་ཟླུམ་པོའི་གཞིར།།

དྲི་མེད་གྲགས་པ་དཀར་པོའི་སྙན་དབྱངས་འབར།།


འཆལ་སྤྱོད་སྙིགས་མར་གྱུར་པའི་གཞན་དབང་གིས།།

སྡོམ་པ་མིན་པའི་གཡང་ལ་ཕྱོགས་པ་ཡི།།

རྟགས་ལ་རེ་བའི་བསྟན་འཛིན་ཟོལ་མའི་ཁྱུ།།

སྤ་སྐོང་བསྟན་པའི་རུ་མཚོན་བསྒྲེངས་དེ་བསྔགས།།


ཚང་ལ་མ་ནོར་རྒྱལ་བསྟན་ནོར་བུའི་ཏོག།

འཛམ་གླིང་རྩེ་མོར་འགོད་པའི་བསྟན་འཛིན་ཁྱུའི།།

མཐུན་སེམས་གོང་བུའི་ནུས་པ་མི་ལྷོད་པའི།།

གཡར་དམ་སྲོག་གི་ཟུངས་ལས་གཅེས་པར་འོས།།


རིགས་ཀྱི་རུས་པ་དཀར་པོའི་ཁྲག་གི་རྒྱུན།།

དང་གཙང་འོ་མས་གསོས་པའི་གཅེན་གཅུང་གི།།

མཛའ་གཅུགས་ཕུ་ནུའི་དུང་སེམས་གནམ་སའི་བཅུད།།

མེས་པོའི་བླ་ཡིད་འབུམ་གྱིས་རྟག་ཏུ་སྲུངས།།


གླེན་པ་མགོ་བོ་འཐོམས་པའི་ཁ་སྟབས་དང་།།

གྲུང་པོ་ཕྱོགས་སུ་ལྷུང་བའི་བློ་གྲོས་ཅན།།

ཐམས་ཅད་འགལ་བར་མཐོང་བའི་གུ་དོག་བློ།།

དུས་འདིའི་སྤྱི་ཆུས་མི་ཟིན་ལྟས་སུ་མཐོང་།།


ལ་ལ་ཕྱོགས་བྲལ་ཟས་ནོར་རྒྱལ་ཁ་རྩོད།།

ལ་ལ་ཕྱོགས་ཞེན་རང་གིས་རང་ཉིད་འཆིང་།།

འགའ་ཞིག་སྒྲ་མེད་འཇབ་བུས་རང་ཚུལ་འཛིན།།

ཀུན་ཀྱང་ཀུན་ཕན་དོན་ལས་རིང་བར་སེམས།།


དོན་མེད་སྨྲ་ལྕེ་བརྡར་བ་མང་མོད་ཀྱང་།།

དོན་ལྡན་ལག་ཏུ་ལོན་པ་ཉིན་སྐར་ཙམ།།

དེ་བས་སླར་ཡང་སྨྲ་མེད་ངང་ཚུལ་ལ།།

རྟག་ཏུ་གནས་པ་ཁོ་བོའི་སྤྱོད་ཡུལ་ཉིད།།


ནམ་ཞིག་སྨྲ་བའི་སྤྲོས་པ་ཉེར་ཞི་བ།།

བརྗོད་བྲལ་གསུང་གི་རང་བཞིན་ནཱ་དའི་དབྱངས།།

བདེ་ཆེན་རྡོ་རྗེའི་དབྱིངས་སུ་ཉེར་འཕོས་ཚེ།།

ཟུང་འཇུག་བདེ་བ་ཆེན་པོར་བསྡོམ་ཡང་སྲིད།།


གྲུབ་པ་བཞི་ལྡན་ངག་ལ་དབང་འབྱོར་ནས།།

ཐོགས་མེད་སྨྲ་བའི་མཐུ་ལྡན་གསུང་གི་དཔལ།།

ཡིད་ལ་ཡེ་ཤེས་མཆོག་སྦྱིན་འཇམ་པའི་ལྷས།།

དགྱེས་བཞིན་རྗེས་སུ་བཟུང་བར་ཅིས་མི་སྨོན།།


ལྕང་ལོའི་ཟུར་ཕུད་འཆང་བའི་གོས་དཀར་མདངས།།

རིག་སྔགས་བཙན་པོའི་རྫོངས་ལ་གནས་འཆའ་བའི།།

འབུམ་སྡེའི་གྲལ་དུ་ཕྱོགས་པའི་ལང་ཚོའི་གཟི།།

འོད་འབར་ནང་གི་ཉི་མས་སྙིང་ནས་གསོས།།


ལྔ་ཕྲག་ཐ་མར་ཕྱོགས་པའི་འཇིག་རྟེན་འདིའི།།

རྒུད་པ་སྟོབས་སུ་བདོ་བའི་མ་རུངས་མཐུ།།

རིག་སྔགས་ཚངས་པའི་མེ་ལྕེས་མཐར་བྱེད་པའི།།

ཡ་མཚན་རྫོགས་ལྡན་གསར་པ་མགྲོན་དུ་ཁུག།


སྟོང་ཆེན་དབྱིངས་ཀྱི་ཕྱག་རྒྱར་མཉམ་སྦྱོར་བས།།

བཅུ་དྲུག་ཕྱེད་ཕྱེད་འཆར་བའི་ཉི་ཟླའི་འགྲོས།།

གཙུག་ཏོར་རྩེ་མོར་བཀོད་པའི་འཕོ་བྲལ་སྲོག།

བདེ་མཆོག་བདེ་བ་ཆེན་པོའི་དབྱིངས་སུ་སྡོམས།།


ཁྲག་འཐུང་དཔའ་བོ་དགྱེས་པའི་བརྟུལ་ཞུགས་ཀྱི།།

སེམས་མེད་མཁའ་ཡང་གཡོ་བའི་སྡང་མིག་གིས།།

ལོག་འདྲེན་དགྲ་སྡེ་ཐལ་བར་བརླག་བྱེད་པའི།།

སྙིང་རྗེས་བསྒྲལ་བའི་དམ་ཚིག་དང་དུ་ལོངས།།


མགྲིན་པའི་ཆོས་དུང་གཡས་འཁྱིལ་པདྨ་དཀར།།

གཡང་ཆགས་ནོར་བུ་འཛུམ་པའི་མནྡ་རའི།།

ཆུན་འཕྱང་འོད་འབར་བྱེ་བའི་དགེ་མཚན་གྱིས།།

ཡང་ཡང་མགྲོན་དུ་འབོད་པའི་ངོ་མཚར་འབྱིན།།


འདུས་པ་མི་བདེན་འབྲལ་བའི་ཆོས་ཉིད་ཀྱང་།།

འབྲལ་བ་མི་བདེན་སླར་ཡང་འཛོམས་པ་ཡི།།

རྟེན་འབྱུང་བསླུ་མེད་སྨོན་ལམ་དཀར་པོའི་མདུད།།

མི་ཤིགས་སྙིང་གི་དྭངས་མའི་ཟུངས་སུ་འཆིང་།།


འབྱུང་བཞི་འདུས་པའི་སྒྱུ་ལུས་ཡ་མ་བརླ།།

སྲིད་འབྱོར་མི་བརྟན་སྒྱུ་མའི་ཁང་བཟང་སྟེ།།

ནམ་ཞིག་འོད་ལུས་འཇའ་ཚོན་དྭངས་མའི་སྐུས།

མཁའ་སྤྱོད་དག་པའི་གནས་སུ་འདི་བཞིན་ཚོགས།།


ཤར་ནུབ་ས་གཞིའི་བར་ཐག་རྒྱང་རིང་ཞིང་།།

རི་ཀླུང་ཆུ་ཕྲན་སྟོང་གིས་ཁད་འགྱང་ཡང་།།

དུང་སེམས་ཆོས་ཀྱིས་སྦྲེལ་བའི་མཛའ་མཐུན་ཡིད།།

གམ་ན་གནས་པ་ཇི་བཞིན་འབྲལ་བ་མེད།།


གཡང་ཞགས་ནོར་བུས་མཚན་པའི་ངོ་མཚར་འཕྲུལ།།

སྲིད་ཞིའི་དགེ་མཚན་འགུག་པའི་དཔལ་གྱི་གཟིས།།

འཁོར་ཡུག་ལྗོངས་ཀུན་འགེང་བའི་ལེགས་བྱས་ཀྱིས།།

ཁྱེད་ལ་ཕེབ་སྐྱེལ་བགྱིའོ་དོན་མཐུན་མཆེད།།


སླར་ཡང་འཛུམ་ལྡན་མི་སྨྲའི་བརྟུལ་ཞུགས་ཀྱིས།།

གཅིག་པུར་གནས་པའི་ཉམ་ཆུང་གྱི་ན་བས།།

མཛེས་ལྡན་ནགས་ཀྱི་ར་བའི་སྤྲིན་མཐོངས་ནས།།

ཁྱེད་ལ་ཡང་ཡང་མཇལ་བའི་ལག་ཟུང་གཡོབ།།


སྐུ་ཚེ་མི་ཤིགས་རྡོ་རྗེ་སྲོག་ཏུ་བརྟན།།

མཛད་པ་མཐའ་རྒྱས་དོན་གཉིས་ངང་གིས་འགྲུབ།།

རླབས་ཆེན་བསྟན་དོན་བཞེད་པ་མཐར་ཕྱིན་པའི།།

དགེ་མཚན་སྣང་བ་དཀར་པོས་རྟག་ཁྱབ་ཤོག།


༧  ཁྱབ་བདག་པདྨ་སྐལ་བཟང་རིན་པོ་ཆེ་མཆོག་གིས་༢༠༡༧ ལོར་སློབ་ཚོགས་ཡོངས་ལ་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་ནས་སྙིང་ཐིག་ཡ་བཞིའི་དབང་གནངས་རྗེས་ཀྱི་གསུང་རྩོམ།

རྩོམ་སྒྲིག་པ།  དོན་འགྲུབ་རྡོ་རྗེ།