ཤིང་གི་བསྟན་བཅོས་བཞུགས་སོ།།

timg.jpegཨོཾ་བདེ་ལེགས་སུ་གྱུར་ཅིག


རིན་ཆེན་སེམས་ཀྱི་རྩ་བ་བརྟན། །

རླབས་ཆེན་ཚོགས་གཉིས་ཡལ་ག་རྒྱས། །

སྐུ་གསུམ་འབྲས་བཟང་སྙེ་མས་དུད། །

སངས་རྒྱས་ལྗོན་པ་དེ་ལ་འདུད། །

སྣང་བ་དཔེ་རུ་ཤར་བ་ཡི། །

རྣལ་འབྱོར་དེ་ལ་གདམས་ངག་མང་། །

ནགས་ཀླུང་སྟུག་པོའི་དོ་ར་རུ། །

ཤིང་ལོའི་ཕུང་པོ་ཟད་པ་མེད། །

དཔག་བསམ་ཤིང་ལ་བརྟེན་བྱས་ན། །

དགོས་འདོད་ཐམས་ཅད་ཆར་དུ་བསྙིལ། །

དེ་བཞིན་བཤེས་གཉེན་དམ་པ་ལ། །

བརྟེན་ན་ལེགས་ཚོགས་ལྷུན་གྱིས་གྲུབ། །

བཤེས་ལ་མི་གུས་སྐྱེ་བོ་དེས། །

གཞུང་བརྒྱ་ཤེས་ཀྱང་དོན་མི་འགྱུར། །

ཤིང་སྐམ་ལོ་བརྒྱ་ཆུར་འཕངས་ཀྱང་། །

ལོ་འདབ་སྐྱེ་བ་སྲིད་ན་མེད། །

དད་ལྡན་རང་བཞིན་བཟང་པོ་དེར། །

ཚིགས་བཅད་གཅིག་ཙམ་གྱིས་ཀྱང་ཕན། །

རྐང་འཐུང་གསར་པའི་མྱུ་གུ་དེ། །

ཆུ་ཆར་གཟེགས་མ་ཡིས་ཀྱང་འཕེལ། །

ཚེར་མ་ཅན་དང་དུག་ཤིང་གིས། །

མི་དགོས་བཞིན་དུ་ས་འདི་གང་། །

མི་ཁོམ་ངན་སོང་སྐྱེ་བོ་ནི། །

ས་ཡི་རྡུལ་བཞིན་གྲངས་ལས་འདས། །

ཙན་དན་ས་མཆོག་ལྗོན་པ་དེ། །

འཇིག་རྟེན་འདི་ན་སྲིད་པ་ཙམ། །

དལ་འབྱོར་ཚང་བའི་རྟེན་བཟང་ཡང་། །

བརྒྱ་ལམ་ཐོབ་པ་མ་བཀག་ཙམ། །

དལ་འབྱོར་སྙིང་པོ་མ་བླངས་ན། །

དུད་འགྲོའི་རྟེན་དང་གཉིས་སུ་མེད། །

ཨ་མྲའི་འབྲས་བུ་མི་སྤྱོད་ན། །

ཨེ་རཎྜ་དང་ཁྱད་པར་ཅི། །

མདངས་དང་ལོ་འབྲས་མེ་ཏོག་སོགས། །

ལྗོན་པ་གཅིག་ཀྱང་དུས་ཀྱིས་འགྱུར། །

སྐྱེ་རྒ་ན་དང་འཆི་བ་ཡི། །

ཟློས་གར་སྐད་ཅིག་སྐད་ཅིག་བསྒྱུར། །

རིང་དུ་འབྲེལ་བའི་ཤིང་ལོ་དེ། །

ལན་གཅིག་བྲུལ་བ་སླར་མི་འབྱོར། །

མཛའ་བ་ཡུན་རིང་འཁོད་འཁོད་ནས། །

ནམ་ཞིག་གཏན་དུ་འབྲལ་བར་འགྱུར། །

སྡོང་པོ་གཤགས་གཏུབ་དྲས་པ་ཡིས། །

ཤིང་མཁན་མྱུར་དུ་ངལ་བར་འགྱུར། །

བསྐལ་པར་དེ་འདྲའི་ལས་བསྒྲུབས་ཀྱང་། །

དམྱལ་སྲུང་རྣམས་ནི་ངལ་བ་མེད། །

ཇི་སྲིད་མི་དགེ་མ་ཟད་པ། །

དེ་སྲིད་སྡུག་བསྔལ་འཁོར་མོར་མྱོང་། །

དུག་གི་ས་བོན་གནས་ཀྱི་བར། །

དུག་ལོ་སྐྱེ་བ་ཆོས་ཉིད་ཡིན། །

གང་ཞིག་གསུམ་ལ་སྐྱབས་སོང་བ། །

དེ་ལ་སྲིད་ཞིའི་རྒུད་པ་མེད། །

ལྗོན་པ་ཆེ་ལ་བརྟེན་པ་དེར། །

གཅན་གཟན་གདུག་པས་གཙེ་མི་ནུས། །

རྩ་བ་རུལ་བའི་ལྗོན་པ་ལ། །

བརྟེན་པར་བྱེད་པ་བླུན་པོའི་རྟགས། །

རང་ཡང་འཁོར་བར་བྱིང་བ་ལ། །

སྐྱབས་སུ་འཛིན་རྣམས་ཀྱེ་མ་འཁྲུལ། །

དུག་དང་སྨན་གྱི་མྱུ་གུ་ལས། །

འབྲས་བུ་འཆོལ་བ་འགར་ཡང་མེད། །

དགེ་དང་མི་དགེའི་ལས་ལས་ཀྱང་། །

འབྲས་བུ་གཞན་འབྱུང་གནས་མ་ཡིན། །

ཐོག་མེད་དུས་ནས་བསགས་པའི་ལས། །

བསྐལ་པ་བརྒྱར་ཡང་ཆུད་མི་ཟ། །

ཏ་ལའི་ཤིང་འབྲས་སྟོང་ཕྲག་ལོར། །

སྐམ་ཡང་རླན་དང་འཕྲད་ན་སྐྱེ། །

ས་བོན་ཆུང་སྨིན་ནྱ་གྲོ་ཏའི། །

ཡལ་འདབ་རྒྱས་པས་རྒྱང་གྲགས་ཁེབས། །

ཁམ་གཅིག་ཟས་ཀྱི་སྦྱིན་པས་ཀྱང་། །

འབྲས་བུ་འཁོར་ལོས་སྒྱུར་བ་འཐོབ། །

རྣམ་བཀྲ་སྲིད་པའི་འཁོར་ལོ་འདིར། །

དོན་ལྡན་སྙིང་པོ་འགའ་མ་མཆིས། །

ཆུ་ཤིང་རློན་པའི་སྡོང་པོ་ལ། །

རྩེ་རྟིང་ཀུན་ན་སྙིང་པོ་མེད། །

ལྗོན་ཤིང་ལོ་བརྒྱར་སྐྱེས་པ་ཡང་། །

ནམ་ཞིག་ཚེ་ན་འགྱེལ་བར་འགྱུར། །

སྲིད་པའི་རྩེ་མོར་ཕྱིན་ནས་ནི། །

སླར་ཡང་མི་བཟད་ངན་འགྲོར་འགྲོ། །

བུར་ཤིང་ཁུ་བས་རབ་བསྒོས་ན། །

ཏིག་ཏའི་ཁ་བ་སེལ་བར་ནུས། །

ལམ་གྱི་བདེན་པ་རབ་གོམས་པས། །

སྡུག་བསྔལ་རྩ་བ་ཀུན་འབྱུང་སྤོང་། །

ཀ་གདུང་ལྕམ་དང་དྲལ་མ་རྣམས། །

ཚོགས་པས་ཡིད་འོང་ལྡིང་ཁང་སྟེ། །

ལྷག་པའི་བསླབ་པ་གསུམ་ཚོགས་པས། །

ཐར་པ་དམ་པའི་ཁང་བཟང་འགྲུབ། །

ཛན་དུའི་ས་བོན་དེའི་ས་བོན། །

གཞན་ལས་སྐྱེ་ཕྱིར་ཐོག་མ་མེད། །

མཐའ་མེད་འཁོར་བར་སྐྱེས་པ་ན། །

ཕ་མར་མ་གྱུར་སུ་ཞིག་ཡོད། །

རྟ་གླང་བརྒྱ་ཡི་ཁུར་ལྕི་བ། །

ཤིང་རྟ་ཆེན་པོ་གཅིག་གིས་འདྲེན། །

ཉན་རང་ཀུན་གྱིས་མ་ལོངས་པའི། །

ཁུར་དེ་རྒྱལ་སྲས་ཕྲག་ན་མཛེས། །

ཤིང་གཞན་འབྲས་བུ་བླངས་པས་འཛད། །

དཔག་བསམ་ཤིང་འབྲས་ཟད་པ་མེད། །

དགེ་བ་གཞན་འབྲས་སྤྱད་པས་འཛད། །

བྱང་ཆུབ་སེམས་དགེ་ཕྱིར་ཤིང་འཕེལ། །

ཡོངས་སྨིན་འབྲས་བུས་སྤ་བ་ཡི། །

རྐང་འཐུང་དེ་ལ་སྐྱེ་བོ་འདུ། །

འཇུངས་མེད་གཏོང་བའི་དཔལ་ཡོན་ཅན། །

དེ་ཡིས་སྐྱེ་དགུའི་རེ་བ་སྐོང་། །

མངོན་པར་མཐོ་དང་ངེས་ལེགས་ཀྱི། །

རྩ་བ་ཚུལ་ཁྲིམས་ལས་གཞན་མེད། །

ཡལ་འདབ་གཡུར་དུ་ཟ་བ་ཡི། །

རྩ་བ་སྡོང་བུ་ཉག་གཅིག་ཡིན། །

ཚེར་མ་ཟུག་པའི་ལན་དུ་སླར། །

ཁུ་ཚུར་རྡེག་པ་བཞད་གད་རྒྱུ། །

གནོད་བྱེད་ལ་ཡང་སླར་ཁྲོ་བ། །

རང་ཉིད་ཉམས་པའི་རྒྱུ་རུ་ཟད། །

རྒྱུ་དུས་བརྩོན་པ་མང་བཏང་ན། །

འབྲས་དུས་ཡོན་ཏན་ཐམས་ཅད་སྐྱེ། །

རྩ་བ་རླན་དང་མ་བྲལ་ན། །

རྩེ་མོར་ལོ་འབྲས་སྨིན་པར་འགྱུར། །

སྡོང་པོ་རླུང་གིས་ཆེར་བསྐྱོད་ན། །

འབྲས་སུ་ས་ལ་འབྲུལ་བ་ལྟར། །

བྱིང་རྒོད་གཡེང་བས་རབ་གཡོས་པས། །

ཏིང་འཛིན་དམིགས་པ་སྟོར་བར་བྱེད། །

བསམ་གཏན་རྣམ་པར་དག་པ་ལས། །

མངོན་ཤེས་ལ་སོགས་ཡོན་ཏན་འབྱུང་། །

སྡོང་བུ་ཉམས་པ་མེད་གྱུར་ན། །

མེ་ཏོག་གེ་སར་མགོ་ལྕོག་ལྡེམ། །

ཤིང་གི་རལ་གྲི་གཡུལ་གྱི་ངོར། །

འཕྱར་བ་དགྲ་ཡི་དགའ་སྟོན་ཡིན། །

ལྟར་སྣང་ཉི་ཚེའི་ལྟ་བ་ཡིས། །

སྲིད་རྩ་གཅོད་འདོད་ཀྱེ་ཧུད་མཚར། །

ཧ་རི་ཙན་དན་བཟང་པོ་ཡིས། །

ལུས་ཀྱི་ཚ་གདུང་སེལ་བར་བྱེད། །

སྙིང་རྗེའི་བཅུད་ལྡན་ལྟ་བ་ཡིས། །

དུག་གསུམ་ནད་བརྒྱ་དྲུངས་ནས་འབྱིན། །

ཤིང་ལས་སྐྱེས་པའི་སྲིན་འབུ་ཡིས། །

ཤིང་དེ་ཟད་པར་བྱེད་པ་བཞིན། །

འདོད་ཆགས་ལས་སྐྱེས་ཡེ་ཤེས་ཀྱིས། །

འདོད་ཆགས་ཉེས་པ་ཞི་བར་བྱེད། །

ཤིང་སྐྱ་རླན་གྱིས་ཟིན་པ་ལས། །

བཻ་ཌཱུར་མདངས་སུ་འཕོ་བ་ལྟར། །

ཐ་མལ་སྣང་བ་འོད་གསལ་གྱིས། །

སྦྱངས་ཏེ་དག་པའི་ལྷ་སྐུར་ལྡང་། །

ཡལ་འདབ་ཡོངས་སུ་རྫོགས་པ་ཡི། །

ལྗོན་པའི་གྲིབ་མ་ཀུན་ཏུ་བསིལ། །

ཡོན་ཏན་མ་ལུས་རྫོགས་པ་ཡི། །

རྒྱལ་བ་སྐྱེ་དགུའི་མགོན་དུ་གྱུར། །

དེ་ལྟར་ཤིང་གི་བསྟན་བཅོས་ལས། །

ཆོས་ཀྱི་ལམ་བསྟན་སརྒ་སྟེ། །

ད་ནི་འཇིག་རྟེན་ཚུལ་ལུགས་འགའ། །

བཤད་དོ་རྣ་བ་བླགས་ཏེ་ཉོན། །

 

ཆོས་ལྡན་རྒྱལ་པོའི་གཟི་བྱིན་གྱིས། །

དགྲ་སྡེ་རྣམས་ཀྱང་དབང་དུ་འདུ། །

མ་ལ་ཡར་སྐྱེས་དྲི་བསུང་དེ། །

བུང་བ་འགུགས་པའི་ཕོ་ཉ་ཡིན། །

རྒྱལ་ངན་ཆབ་འབངས་གཟིར་བ་དེར། །

ནམ་ཞིག་གཡོག་ཀྱང་འཁོར་མི་འགྱུར། །

སྲན་ཕུང་དབྱུག་པས་གཏོར་ན་ཡང་། །

དབྱུག་པའི་ངོས་ལ་འབྱར་མི་སྲིད། །

བློན་དང་འབངས་ཀྱིས་མ་བཀུར་ན། །

རྒྱལ་པོ་ཆེན་པོ་ཇི་ལྟར་གནས། །

གདུང་མ་ཀ་བས་མ་བཏེགས་ན། །

རྒྱལ་པོའི་ཕོ་བྲང་གང་ལས་འབྱུང་། །

རྗེ་དཔོན་བཟང་པོའི་བཀའ་དྲིན་གྱིས། །

གཡོག་འཁོར་མངའ་ཐང་དར་བར་གྱུར། །

ལྗོན་པ་ཆེ་ལ་བརྟེན་པ་ཡིས། །

འཁྲི་ཤིང་རྩེ་མོ་དགུང་ལ་བསྙེགས། །

ཚེར་མའི་ཤིང་ལ་བརྟེན་བྱས་ན། །

གནད་དུ་ཟུག་པའི་སྡུག་བསྔལ་སྐྱེ། །

སྐྱེ་བོ་ངན་ལ་བརྟེན་བྱས་ཀྱང་། །

ཕྱི་ཕྱིར་སྡུག་བསྔལ་འབའ་ཞིག་བསྐྱེད། །

ཆབ་འབངས་བདེ་སྐྱིད་རྒྱས་པ་དེ། །

རྗེ་དཔོན་ཉིད་ཀྱི་ཆེ་བའི་རྟགས། །

རབ་རྒྱས་ཡལ་གའི་ཁྱོན་ཡངས་པ། །

སྡོང་པོ་རྩ་བའི་མཛེས་རྒྱན་ཡིན། །

གཡོག་འཁོར་རྒུད་པའི་སྡེ་དཔོན་ནི། །

རང་ཉིད་འབྱོར་ཡང་ངོ་ཚའི་རྒྱུ། །

སྡོང་པོ་ཅི་ཙམ་སྦོམ་ན་ཡང་། །

ཡལ་འདབ་མེད་ན་གཅེར་བུ་ཡིན། །

སྡོང་རུལ་རྩ་བར་གནས་པའི་མི། །

ཉི་མཚན་ཀུན་ཏུ་བག་ཕེབས་བྲལ། །

གཙོ་བོ་ངན་པའི་གཡོག་འཁོར་ཡང་། །

རྟག་ཏུ་སེམས་ཁྲལ་གདུང་བས་གཟིར། །

དཔོན་ངན་གཡོག་འཁོར་བྲོས་ན་ཡང་། །

སྡེ་དཔོན་བཟང་པོས་བསྐྲད་ཀྱང་འདུ། །

ཚེར་ཤིང་འབོར་བའི་བྷྲ་མ་ར། །

ཙཱུ་ཏའི་ཤིང་ལས་བསྐྲད་ཀྱང་འཁོར། །

རྗེ་དཔོན་གསར་ཚེ་བྱམས་བྱེད་ཀྱང་། །

ཕྱི་ནས་བསྒྲུབ་དཀའི་དཔྱ་ཁྲལ་འབེབས། །

ཤིང་ལ་ཆར་སྐྱོབ་བྱེད་མོད་ཀྱང་། །

རྗེས་སུ་ཐིགས་ཕྲེང་ལྕི་བར་འབབ། །

ལྗོན་པའི་གྲིབ་བསིལ་ཀུན་ལ་སྙོམས། །

ཉི་ཟླའི་སྣང་བ་ཀུན་ལ་སྙོམས། །

སྤྲིན་གྱི་ཆུ་ཆར་ཀུན་ལ་སྙོམས། །

རྒྱལ་པོའི་བཀའ་ཁྲིམས་ཀུན་ལ་སྙོམས།

གཙོ་བོ་བཟང་ཡང་འཁོར་ངན་ན། །

དེ་ཡི་དྲུང་དུ་བསྙེན་པར་དཀའ། །

གདུག་པའི་སྦྲུལ་གྱིས་དཀྲིས་པ་ཡི། །

ཙན་དན་ལྗོན་པ་སུ་ཡིས་བརྟེན། །

ཕྱི་ནང་སྨིན་དང་མ་སྨིན་པའི། །

ཨ་མྲའི་འབྲས་བུ་རིགས་བཞིར་གསུངས། །

མི་ཡང་སེམས་དང་སྤྱོད་པ་གཉིས། །

དག་དང་མི་དག་དབྱེ་བ་མང་།

མཁས་པ་ཡོན་ཏན་ཀུན་ལྡན་དེ། །

རློམས་སེམས་མེད་པར་ཞི་ཞིང་དུལ། །

སྙེ་མའི་ཁུར་གྱིས་ལྗིད་པ་ཡི། །

ལྗོན་ཤིང་རྩེ་མོ་དུད་དེ་གནས། །

ཡོན་ཏན་མེད་པའི་སྐྱེ་བོ་དེ། །

ང་རྒྱལ་མགོ་འཕང་ཅི་ལས་མཐོ། །

འབྲས་བུའི་བཅུད་ཀྱིས་མི་བཟུང་བའི། །

ལྗོན་པ་རེངས་པ་ཆོས་ཉིད་ཡིན། །

ལྷན་སྐྱེས་ཡོན་ཏན་མེད་གྱུར་ན། །

ཕྱི་ཚུལ་བཅོས་པས་ཅི་ལ་ཕན། །

ཡལ་འདབ་མེད་པའི་ཤིང་སྐམ་དེར། །

ཅོད་པན་བཏགས་ཀྱང་ག་ལ་མཛེས། །

བསླབ་སྦྱངས་དུས་ན་གཡེལ་བ་དེས། །

མཁས་འདོད་རེ་བ་འབྲས་མེད་ཡིན། །

མེ་ཏོག་སད་ཀྱིས་ཁྱེར་བ་ཡི། །

ཤིང་ལ་འབྲས་བུའི་རེ་བ་མེད། །

བློ་གྲོས་རྩལ་དང་མི་ལྡན་ན། །

གོ་ས་མཐོ་ཡང་ཁྲེལ་བའི་གཞི། །

ཤིང་ལས་བྱས་པའི་སེང་གེ་དེ། །

འཇིགས་འཇིགས་འདྲ་ཡང་སྙིང་པོ་མེད། །

དྲི་ཞིམ་བསུང་དང་མ་ལྡན་ན། །

ཙན་དན་ཡིན་ཞེས་སྨྲས་ཀྱང་རྫུན། །

དམ་པའི་ཚུལ་དང་མི་མཐུན་ན། །

དམ་པར་ཁས་འཆེ་དོན་དང་བྲལ། །

དམན་པ་རྒྱལ་སར་བཏོན་ན་ཡང་། །

མ་རབས་སྤྱོད་པའི་རྗེས་སུ་འཇུག །

ཆུ་ཤིང་གྱེན་དུ་སྐྱེས་ན་ཡང་། །

འདབ་མ་ཐུར་དུ་འཕྱང་བར་གྱུར། །

ཨ་གར་དུམ་བུ་བརྒྱར་གཏུབས་ཀྱང་། །

ལྷན་སྐྱེས་དྲི་བཟང་མི་གཏོང་ལྟར། །

དམ་པ་ཅི་ཙམ་རྒུད་ན་ཡང་། །

བཟང་པོའི་རང་བཞིན་ག་ལ་འདོར། །

ཤུག་པའི་ལོ་མ་མེར་བཅུག་ན། །

ལྷག་པར་དྲི་བཟང་རྒྱས་པ་བཞིན། །

དམ་པ་རྣམས་ལ་གནོད་བྱས་པས། །

ཕྱིར་ཞིང་དེ་ཡི་ཆེ་བ་འདོན། །

དམ་པ་དབེན་པར་གནས་ན་ཡང་། །

གྲགས་སྙན་ལྷ་ཡིས་སྒྲོག་པར་བྱེད། །

ལྷོ་ཡི་རི་ལས་སྐྱེས་པ་ཡི། །

ཙན་དན་དྲི་བསུང་རླུང་གིས་འགྱེད། །

ཁྱོག་པའི་ཤིང་དེ་བསྲངས་ན་ཡང་། །

རླན་དང་འཕྲད་ཚེ་ཡ་ཡོར་འགྱུར། །

རང་བཞིན་ངན་པ་བཅོས་ན་ཡང་། །

རྐྱེན་དང་འཕྲད་ཚེ་རང་མཚང་འདོན། །

ཀླད་ཆུང་རང་བཞིན་ངན་པ་ལ། །

ཡོན་ཏན་ཡོད་ཀྱང་ཕན་མི་ཐོགས། །

རྩ་བ་དུག་ཏུ་གནས་པ་ཡི། །

མེ་ཏོག་མཛེས་ཀྱང་སུ་ལ་མཁོ། །

ཙན་དན་ཤུག་པའི་ཀ་བ་གཉིས། །

གདུང་མ་འདེགས་པའི་ནུས་པ་མཚུངས། །

སྙིང་སྟོབས་ལྡན་ན་དབུལ་ཕྱུག་གཉིས། །

བྱ་བ་བྱེད་པའི་དུས་སུ་འདྲ། །

ལོངས་སྤྱོད་མངའ་ཐང་མཉམ་ན་ཡང་། །

བཟང་ངན་ལས་ལ་སྦྱར་ན་ཤེས། །

ཕྲ་སྦོམ་མཉམ་ཡང་ཆུར་འཕངས་ན། །

ཤིང་གི་མགོ་མཇུག་ཤེས་པར་ནུས། །

མཁས་པའི་སྐྱེ་བོ་ཡུལ་གཞན་དུ། །

བྲིན་ཞིང་ཀུན་གྱིས་བཀུར་བར་འགྱུར། །

ནགས་སུ་སྐྱེས་པའི་ཤིང་གིས་ནི། །

གཞན་དུ་ཤིང་གི་བྱ་བ་བྱེད། །

ཤིང་བལ་རླུང་གིས་བདས་པ་དེ། །

རི་རྩེར་མི་སྡོད་གཤོང་དུ་ཆགས། །

བློ་ཆུང་ཕྱོགས་མཐར་འཁྱམས་འཁྱམས་ནས། །

མཐའ་མར་རྒུད་པའི་གནས་སུ་ལྷུང་། །

སྐྱོན་གྱིས་གོས་པ་ཆེས་སླ་སྟེ། །

ཡོན་ཏན་སློབ་པ་དེ་ལྟ་མིན། །

ཤིང་ལ་མེ་ལྕེ་མཆེད་སླ་ཡང་། །

ཆུ་བོ་སོ་སོར་འགྱེས་པར་དཀའ། །

མ་རབས་སྐྱེ་བོ་གཉིས་འགྲོགས་ན། །

ཕུགས་སུ་རང་གཞན་གཉིས་ཀ་འཕུངས། །

གཙུབ་ཤིང་ཟུང་དུ་བརྡར་བ་ཡིས། །

མཇུག་ཏུ་གཉིས་ཀ་བསྲེག་པར་བྱེད། །

ཕུན་སུམ་ཚོགས་པའི་ལྗོན་པ་ཡང་། །

ཆུ་དང་འགྲོགས་ན་རྩ་བ་འབྱིན། །

ཡ་རབས་ཡོན་ཏན་ལྡན་པ་ཡང་། །

གྲོགས་པོ་ངན་པས་ཉམས་པར་བྱེད། །

འབྲས་ལྡན་ཤིང་གཉིས་སྦྱར་བ་ལས། །

འབྲས་བུ་ཕུང་གསུམ་འབྱུང་བ་ལྟར། །

བློ་དང་ལྡན་པ་གཉིས་འགྲོགས་ན། །

སྔོན་མེད་ལེགས་པའི་བློ་གྲོས་སྐྱེ། །

ལྗོན་པའི་གྲིབ་བསིལ་བསྟེན་པ་ཡིས།

གླང་པོས་ཤིང་གི་རྩ་བ་འབྱིན། །

གཡོག་འཁོར་ངན་པ་བསྟེན་པ་ཡིས། །

ལེགས་བྱས་རྩ་བ་ཉམས་པར་བྱེད། །


ཤིང་སྡོང་གཙུག་གིས་བཀུར་བ་ཡི། །

འདབ་ཆགས་འགྲོ་ཚེ་བྱ་ཐལ་གཏོང་། །

ཟླ་གྲོགས་ངན་པ་བསྟེན་ན་ཡང་། །

ནམ་ཞིག་རྗེས་ངན་བཞག་ནས་འགྲོ། །

ངན་པར་ཅི་ཙམ་ཕན་བཏགས་ཀྱང་། །

ལན་དུ་ཕན་པའི་རེ་བ་མེད། །

ཤིང་གིས་རྟག་ཏུ་མེ་གསོས་ཀྱང་།

མེ་ཡིས་དེ་ཉིད་ཐལ་བར་བྱེད། །

བློ་དང་མཐུ་ལྡན་རེ་རེས་ཀྱང་། །

མཆོག་དམན་ཀུན་གྱི་དགོས་པ་བསྒྲུབ། །

འོད་མའི་གནམ་རུ་གཅིག་གིས་ཀྱང་། །

ཉག་ཕྲན་སྟོང་གི་བྱ་བ་བྱེད། །

ལོངས་སྤྱོད་དཔལ་དང་མི་ལྡན་ན། །

རིགས་རུས་མཐོ་ཡང་དགོས་པ་ཆུང་། །

དགོས་པའི་གྲིབ་བསིལ་མེད་གྱུར་ཚེ། །

རྩེ་མོ་མཐོ་བས་ཅི་ལ་ཕན། །

རྩ་བ་བསོད་ནམས་མེད་གྱུར་ན། །

བསགས་པས་དབུལ་བ་མི་སེལ་ཏེ། །

སྡོང་པོ་རླན་དང་བྲལ་བ་ལ། །

ཡལ་གར་ཆུ་བོས་བྱུགས་ཀྱང་ཅི། །

བུན་དང་བསྐྱེད་ཀྱིས་ནོར་སྤེལ་བར། །

འདོད་ཀྱང་རྩ་བ་སྟོང་པ་མང་། །

ཤིང་སྐྱེས་བཅད་ནས་ས་གཞན་དུ། །

བཙུགས་པ་ཕལ་ཆེར་སྐམ་པར་འགྱུར། །

གཡང་ས་མཐོན་པོར་སྐྱེས་པ་ཡི། །

ས་ཧ་ཀཱ་རའི་འབྲས་བུ་བཞིན། །

རང་གཞན་གང་ལའང་མི་ཕན་པའི། །

ལོངས་སྤྱོད་ཆེ་དེ་སྦ་བ་ཡིན། །

ལོངས་སྤྱོད་སྤེལ་བར་འདོད་པ་ཡིས། །

ཆ་ཤས་གཏོང་བ་མན་ངག་སྟེ། །

ལྗོན་ཤིང་ཡལ་ག་རྒྱས་འདོད་ན། །

རྩེ་མོ་འབྲེག་པ་ཐབས་སུ་བཟང་། །

དམན་པས་བསགས་ཀྱང་མི་འགྲུབ་ལ། །

བསོད་ནམས་ལྡན་པས་བཏང་ཡང་འབྱོར། །

རླན་སར་བཅད་ཀྱང་སྐྱེ་བའི་ཤིང་། །

སྐམ་སར་བཙུགས་ཀྱང་ག་ལ་སྐྱེ། །

ལམ་ཁའི་ཤིང་གི་འབྲས་བུ་དེ། །

བྱིས་པའི་རྡོ་ཆར་འབེབས་པའི་རྒྱུ། །

བདག་པོ་ངན་པའི་ལོངས་སྤྱོད་ཀྱང་། །

ཕལ་ཆེར་དགྲ་ཡི་གཡབ་མོ་ཡིན། །

བསོད་ནམས་དམན་པའི་སྐྱེས་བུ་དེར། །

དཔལ་འབྱོར་བྱུང་ན་སྲོག་ཀྱང་བརླག །

སྨྱུག་མའི་ཤིང་གི་རྩེ་མོ་ལ། །

འབྲས་བུ་ཆགས་པ་ཉམས་པའི་ལྟས། །

བུར་ཤིང་གཅོད་པ་རོ་ཡི་ཕྱིར། །

ཝ་སྐྱེས་གསོད་པ་པགས་པའི་སླད། །

དོན་མཐུན་འཇོམས་པ་ནོར་གྱི་དོན། །

རྒྱལ་པོར་རྒོལ་བ་འབངས་ཀྱི་ཆེད། །

ཤིང་ལ་ཐོག་མར་ཐིག་འདེབས་ཀྱི། །

དྲས་ཤིང་གཏུབས་ནས་བསྒྱུར་དུ་མེད། །

བྱ་བའི་ཐོག་མར་བསམ་དགོས་ཀྱི། །

རྗེས་ནས་གྱོད་བརྡལ་བླུན་པོའི་རྟགས། །

སྟབས་ལེགས་ཙམ་གྱིས་དོན་གྲུབ་ཀྱང་། །

བློ་དང་ལྡན་པར་སུ་ཞིག་རློམ། །

ལོ་མ་འཁུམས་ནས་ཉལ་བའི་ཤིང་། །

སེམས་ལྡན་བསྒྲུབས་པ་མུ་སྟེགས་ལུགས། །

སྲང་མདོར་ལོ་འདབ་ཉལ་ཉིལ་དུ། །

གནས་པའི་ཤིང་དེ་ཀུན་གྱིས་བརྫི། །

དོན་མེད་འཆོལ་བའི་གཏམ་མང་བའི། །

མི་དེ་ཀུན་ལ་ངོ་ཐང་ཆུང་། །

མི་ངན་བྱས་པ་ཆུང་ན་ཡང་། །

དྲིན་ཆེའི་ཡུས་ཀྱིས་རྣ་བ་འགེངས། །

བུད་ཤིང་རློན་པ་མེ་ཆུང་ཡང་། །

དུད་པ་ནག་པོས་ཚང་མང་འགེངས། །

ཤིང་ལ་ལན་གཅིག་སྦྲུལ་གནས་དེ། །

ཕྱིས་ཀྱང་མཐོང་ཚེ་འཇིགས་པ་ལྟར། །

རྐུ་དང་རྫུན་ལ་གཅིག་ཞུགས་པའི། །

མི་དེར་རྟག་དུ་དོགས་པ་སྐྱེ། །

ཚེར་མ་རྣོ་ཡང་བྲག་རི་ལ། །

བསྣུན་ན་རྩེ་མོ་འཇིལ་བར་བྱེད། །

སྐྱེས་བུ་དམ་པར་ཕྲག་དོག་གིས། །

སྨོད་པ་རང་གི་དམའ་འབེབས་ཡིན། །

གནས་མིན་ལ་ཡང་དུལ་ཆེ་ན། །

སྙིགས་མའི་དུས་འདིར་ཀུན་གྱིས་བརྙས། །

ཤིང་བལ་འཇམ་མོ་འཇམ་མོ་ཞེས། །

ཀུན་གྱིས་གདན་དུ་མི་བྱེད་དམ། །

ཤིང་སྐྱེས་དྲང་པོ་མཛེས་ན་ཡང་། །

སྒ་ཤིང་འཁྱོག་པོ་ཅི་ལས་བཟང་། །

རང་བཞིན་དྲང་ན་བཟང་མོད་ཀྱང་། །

རེས་འགའ་ལྡེམ་པོ་རྒྱལ་བས་གསུངས། །

མདེའུ་མེད་པའི་མདའ་འཕེན་པ། །

དགྲ་བོ་སྤྱན་འདྲེན་ཕོ་ཉ་ཡིན། །

དགྲ་བོ་འཇོམས་པའི་མཐུ་མེད་ན། །

དོན་མེད་དཔའ་སྐད་ཅི་ལ་སྨྲ། །

གཉེན་ལ་ཧ་ཅང་བྱམས་པ་ཡང་། །

འཁོན་གྱི་རྒྱུ་རུ་འགྲོ་བ་མང་། །

བུར་ཤིང་མངར་མོ་སྤྱོད་ཆེས་ན། །

མ་ཞུས་སྒྲེགས་པ་སྐྱུར་མོ་བྱུང་། །

ཤིང་དགྲ་སྟ་རེ་ཡིན་མོད་ཀྱང་། །

དེ་ཡི་ཡུ་བ་ཤིང་གིས་བྱེད། །

དགྲ་ཡིས་བརྩམས་པའི་ཕུང་ཀྲོལ་ཀྱང་། །

ཕལ་ཆེར་རྩ་བ་གཉེན་གྱིས་བྱེད། །

སྡོང་པོ་གཅོད་པའི་ཐབས་ཉེས་ན། །

རང་གི་སྟེང་དུ་ལྷུང་བར་འགྱུར། །

དགྲ་ལ་ཧ་ཅང་སྡང་བ་ཡང་། །

རང་གི་གཤེད་དུ་འགྲོ་བ་མང་། །

ཤིང་སྐམ་དགུགས་པར་མི་ནུས་དེ། །

རླན་གྱིས་བསྒོས་ན་ལས་སུ་རུང་། །

དགྲ་བོ་མི་བསྲུན་སེམས་ལྡན་ཡང་། །

ཐབས་ལ་མཁས་ན་འདུལ་བར་ནུས། །

ཉི་ཟླས་མི་ཕྱེད་མྱ་ངན་མེད། །

ན་ཆུང་རྐང་གདུབ་རེག་པས་འབྱེད་། །

ལེགས་པར་བཤད་ཀྱང་མི་གོ་བའི། །

མ་རབས་ལ་ལ་སྨད་པས་ཐུལ། །

གནས་ན་གནས་རྣམས་ཁང་བཟང་དང་། །

དེར་གནས་སྐྱེད་མོས་ཚལ་ལ་དགའ། །

འཚོ་བས་དབུལ་བ་རབ་བྱུང་དང་། །

རྒྱགས་པས་མྱོས་པ་ཁྱིམ་ལ་ཕྱོགས། །

ནགས་དེར་སྐྱེས་པའི་སྤྲེའུ་ཡང་། །

འབྲས་བུ་ཟད་ན་གཞན་དུ་འགྲོ། །

རྒུད་ཚེ་སྙིང་དུ་སྡུག་པ་ཡི།

བུ་ཡང་གཞན་གྱི་ཕྱོགས་སུ་འབྲོས། །

ནགས་ཚལ་ཕུན་སུམ་ཚོགས་པ་དེར། །

དོན་མེད་ནམ་མཁའི་བྱ་ཡང་འཁོར། །

གང་ན་བདེ་སྐྱིད་འཛོམས་པ་དེར། །

མ་བསྡུས་པར་ཡང་སྐྱེ་བོ་འདུ། །

ཤིང་གི་འབྲས་བུ་ལེགས་བསྐྱངས་ན། །

ལོ་འདབ་ལ་སོགས་ཞར་ལ་འབྱུང་། །

དམ་པའི་ཆོས་ལ་བརྩོན་བྱས་ན། །

སྲིད་ཀྱི་དཔལ་ཡང་དེ་ཡིས་འགྲུབ།

དེ་ལྟར་ལུགས་གཉིས་བླང་དོར་ཀུན། །

ཤིང་གི་ཁྱད་པར་ཁོ་ན་ཡིས། །

མཚོན་བྱེད་གཏམ་གྱི་སྦྱོར་བ་འདི། །

སྔོན་མེད་མཁས་པའི་དགའ་སྟོན་ཡིན། །

གང་མགྲིན་འོ་མའི་རྒྱ་མཚོ་རུ། །

དབྱངས་ལྡན་ངང་མོ་རྣམས་རོལ་བ། །

དེ་ཡི་ཁ་ལས་ལེགས་བཤད་ཀྱི། །

རྦ་རླབས་འཁྲི་ཤིང་ཅི་ཡང་གཡོ། །

གྲགས་སྙན་ནོར་བུའི་ཞགས་པ་ཡིས། །

རྒྱ་བོད་འཛིན་མའི་མཐའ་བཅིངས་པ། །

དཔལ་ལྡན་ས་སྐྱ་པཎྜི་ཏའི། །

ལེགས་བཤད་ལམ་ལ་བརྟེན་པ་ཡིན། །

དོན་གྱི་སྒོ་ལྕགས་མཁྱིད་གང་ལ། །

དཔེ་ཡི་ལྡེ་མིག་ཁྲུ་གང་བ། །

དེ་ལྟའི་གཞུང་ཡང་སྣང་མོད་དེ། །

མཁས་བླུན་སུ་ཡི་དབང་དུ་བྱས། །

ལུགས་གཉིས་བླང་དོར་ཤེས་འདོད་རྣམས། །

དཔེ་ཡི་སོར་མོ་ཙམ་མིན་པར། །

དོན་གྱི་ཟླ་ཤེལ་ལྟོས་ཤིག་དང་།

ངོ་མཚར་རི་དྭགས་མཚན་མ་ཡོད། །

འདིར་འབད་ལེགས་བྱས་ནྱ་གྲོ་ཏའི། །

ས་བོན་སྨིན་པའི་དགེ་མཚན་གྱི། །

ཡལ་ག་ཕྱོགས་བཅུར་རྒྱས་པ་ཡིས། །

འགྲོ་བ་ཀུན་གྱི་དོན་བྱེད་ཤོག །

ཅེས་ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་འདི་ནི་མཐོང་སྣང་སྣ་ཚོགས་ཀྱིས་རྐྱེན་བྱས་ཏེ།

བཙུན་པ་དཀོན་མཆོག་བསྟན་པའི་སྒྲོན་མེས་ཚ་རྒན་སྨན་ཆུར་ཕྱིན་པའི་ལམ་ཁར་གང་དྲན་སུག་བྲིས་སུ་བགྱིས་པའོ། །

རྩོམ་སྒྲིག་པ།   དོན་འགྲུབ་རྡོ་རྗེ།