༧ དཔལ་ས་སྐྱའི་སྟོན་དང་བསྟན་པ་ལ་མངོན་པར་བསྟོད་པ་ཚངས་ཆེན་ཀུན་ཏུ་དགའ་བའི་གླུ།

timg.jpeg

འོད་གསལ་ལྷ་རིགས་གཙུག་གི་མུ་ཏིག་དཀར། །

འཛམ་གླིང་རྒྱན་དུ་འཕོས་པ་འཁོན་གྱི་གདུང་། །

ངོ་མཚར་བྱིན་རླབས་ཆགས་པའི་ཕྲེང་ཚར་ཞིག །

གངས་ལྡན་ཁ་བའི་ལྗོངས་སུ་འོད་དུ་འཚེར། །


མཁྱེན་དང་བརྩེ་བའི་ལང་ཚོ་མ་ཉམས་པ། །

རིགས་གསུམ་སེམས་དཔའི་སྒྱུ་འཕྲུལ་ཟླ་བ་དཀར།  །

བསིལ་ལྗོངས་བསྟན་འགྲོའི་དཔལ་དུ་ཆས་པའི་ཟེར། །

འཇིག་རྟེན་ཕན་བདེའི་རྒྱན་དུ་མངོན་པར་མཐོ། །


འཇམ་དཔལ་གཞོན་ནུའི་ཡེ་ཤེས་ཟློས་པའི་གར། །

ལྔ་རིག་ཀུན་མཁྱེན་འཇིགས་བྲལ་པཎ་ཏྲི་ཏ། །

འཆད་རྩོད་རྩོམ་ཚུལ་ཟླ་མེད་མཁས་པའི་མཆོག  །

ཀུན་དགའ་རྒྱལ་མཚན་རིགས་པའི་སེང་ཆེན་བསྟོད། །


པོད་ཆེན་དྲུག་དང་གྲགས་ཆེན་བཅོ་བརྒྱད་ལ། །

སྨྲ་བ་རབ་འབྱམས་གོ་ཤཱཀ་སྟག་གསུམ་སོགས། །

མཁས་མང་སེང་ཕྲུག་དར་མའི་དཔུང་ཆེན་ཞིག  །

རྡོལ་བའི་ཕ་ཁྱིམ་ས་ཆེན་ཁྱོན་ན་མཛེས། །


སྙན་བརྒྱུད་ལམ་འབྲས་གསེར་ཆོས་གདམས་པའི་མཛོད། །

སྣང་བ་གསུམ་དང་ཚད་མ་བཞི་ལྡན་གྱིས། །

ཉམས་བཞེས་གྲུབ་བརྙེས་མཆོག་གི་རྒྱལ་ཐབ་ལ། །ད

བང་སྒྱུར་སྒྲུབ་བརྒྱུད་བསྟན་པའི་རིང་ལུགས་རྨད། །


མདོ་སྔགས་ཟུང་འཇུག་ཐུབ་བསྟན་སྙིང་པོའི་སྲོག །

བཤད་སྒྲུབ་གཉིས་ལྡན་བརྩེ་བ་ཆེན་པོའི་སྲོལ། །

ཆོས་སྲིད་མངའ་ཐང་ཕྱོགས་སུ་མཐར་རྒྱས་ཏེ། །

ཕན་བདེའི་དཔལ་གྱིས་འཛམ་གླིང་མཛེས་བྱེད་ཤོག ། 


༧ བདག་ཆེན་ཁྲི་རབས་ཞེ་གཉིས་པ་གསེར་ཁྲིར་མངའ་གསོལ་བའི་དུས་ཚེས་དགེ་བར། དཔལ་བརྩེ་བ་ཆེན་པོའི་རིང་ལུགས་འཛིན་པ་མཆོག་སྤྲུལ་བཀྲ་ཤིས་མགོན་པོ་ནས་རིན་ཆེན་དང་པོའི་མེ་ཏོག་བཅས་བསྐུལ་ངོར། གྲུབ་དབང་རྫོགས་ཆེན་པ་བསྟན་འཛིན་ལུང་རྟོགས་ཉི་མས་གསེར་འཕྱང་ཞེས་པ་མེ་མོ་བྱའི་ལོར་བྲིས་པ་ཀུན་ནས་དགེ་བར་གྱུར་ཅིག་གུ། །

WechatIMG2015.jpeg

རྩོམ་སྒྲིག་པ།  དོན་འགྲུབ་རྡོ་རྗེ།