ལུམྦིའི་ཚལ་དུ་སྐུ་བལྟམས་ཚུལ།
མཛེས་ལྷུན་ཆགས་ཀྱི་རྩེ་ཁ་འདེད་པའི། །
གནས་མ་གྷ་ཡི་མཚུངས་མེད་ནོར་བུ། །
ཐུགས་ཡ་མཚན་གྱི་རྐང་གཉིས་གཙོ་བོ། །
དོན་སྙིང་རྗེ་ཡི་སྐྱེས་བུ་དྲན་ནོ། །
ལས་བསམ་དཀར་གྱི་ཚོགས་གཉིས་རྫོགས་པའི། །
འཛུམ་མེ་ཏོག་གི་དྲོད་ཁོལ་དབུས་ནས། །
དཔའ་སྙིང་སྟོབས་ཀྱི་ཡིད་འོང་དགྱེས་པའི། །
གཞོན་མཚུངས་མེད་ཀྱི་སྲས་པོ་དྲན་ནོ། །
རྩལ་ཐོགས་མེད་ཀྱི་དཔལ་མཛངས་ངང་ནས། །
བྱམས་སྙིང་རྗེ་ཡི་པད་དཀར་འཁྱུད་ཅིང་། །
འགྲོ་སེམས་ཅན་ལ་ཞལ་ཏས་བསྐྱངས་བའི། །
རྗེ་བདག་ཉིད་ཀྱི་ངོ་མཚར་དྲན་ནོ། །
སྐུ༵་ལྷུན་པོ་ཡི་གཟི་མདངས་ཁྲོད་ནས། །
ཕྱི་དགྲ་བོ་ཡི་སེམས་རྩ་དཀྲུགས་ཤིང་། །
ནང་གཉེན་ཉེ་ཡི་དབུ་འཕང་བསྟོད་པའི། །
བུ་དམ་ཚིག་གི་སྙིང་སྟོབས་དྲན་ནོ། །
གསུ༵ང་སྙན་འཇེབས་ཀྱི་འབྲུག་སྒྲའི་དབྱིངས་སུ། །
གུང་སྐྱིད་པོ་ཡི་གདན་ལ་བཞུགས་ནས། །
ཡུལ་དཀར་པོ་ཡི་ལྷ་ལུང་ཉིད་དུ། །
སྐྱིད་ཉི་མ་ཡི་བདག་པོ་དྲན་ནོ། །
ཐུ༵གས་འགལ་མེད་ཀྱི་ཞི་བའི་རང་མདངས། །
བྱམས་སྙིང་རྗེ་ཡི་ཡིད་དམ་ལྷ་མཆོག །
སེམས་དད་པ་ཡིས་བརྩེ་ཆེན་ཤོར་བའི། །
ཐུགས་འོད་གསལ་གྱིས་གཟིགས་པ་དྲན་ནོ། །
མ་ག་དྷཱ་རུ་སངས་རྒྱས་ཚུལ།
ལས་ཡ་མཚན་གྱི་ལྟད་མོའི་ཁྲོད་ནས། །
ཞེ་ཆགས་སྡང་གི་རྒྱལ་སྲིད་གཡུགས་ཅིང་། །
ཡིད་སྒྲིབ་བྲལ་གྱི་ཐར་བའི་ལམ་ལ། །
བློ་འཕྲུལ་མེད་ཀྱི་ཆོས་པ་དྲན་ནོ། །
ལུས་མཛེས་སྡུག་གི་འཇའ་ཚོན་འདྲ་བ། །
གནས་གུ་ཡངས་ཀྱི་ནི་ར་ཛཱ་ནར། །
ཟས་ཆུ་རྐྱང་གི་འཚོ་བའི་འགྲམ་ནས། །
སེམས་ཉམས་ལེན་གྱི་གྲུབ་ཐོབ་དྲན་ནོ། །
དབེན་རི་ཁྲོད་ཀྱི་འདུ་འཛི་དབྱིངས་སུ། །
ཚེ་མི་རྟག་གི་ངམ་ཁ་འཕྱུར་བཞིན། །
ནགས་རྒྱལ་རྫོང་གི་སིལ་ཏོག་ལྷན་དུ། །
སྒོམ་རྩེ་གཅིག་གི་དཀའ་ཐུབ་དྲན་ནོ། །
ཟས་ཤིང་ཏོག་གི་བཅུད་ལས་མ་འདང་། །
ལུས་དཀའ་སྤྱད་ཀྱིས་ཏིང་འཛིན་བསྙེགས་པ། །
ཡང་ཟས་བཅད་ཀྱི་ཉམས་ལེན་གཞོལ་བའི། །
དེ་འདྲ་བ་ཡི་སྒོམ་ཆེན་དྲན་ནོ། །
བསྐལ་གྲངས་མེད་ཀྱི་ས་ཆེན་གོང་ནས། །
ཆོས་རྣམ་མཁྱེན་གྱི་ཐར་བའི་གང་ཟག །
འགྲོ་རིགས་དྲུག་གི་ཆོས་ཀྱི་མངའ་བདག །
སྟོན་བསྟན་པ་ཡི་སངས་རྒྱས་དྲན་ནོ། །
ས་ཆེན་པོ་ཡི་གོ་ལའི་དཀྱིལ་ན། །
ཐུགས་འོད་གསལ་གྱི་མཁྱེན་བརྒྱ་གྲོལ་བའི། །
ལམ་ཐེག་ཆེན་གྱི་མངོན་སངས་རྒྱས་ཞིང་། །
ལུགས་ཐེག་དམན་གྱི་ཆོས་འཁོར་དྲན་ནོ། །
རྩྭ་མཆོག་གྲོང་དུ་སྐུ་མྱ་ངན་འདས་ཚུལ།
ཟབ་ཆོས་ཕུང་གྱི་ཆུ་གཏེར་ཀློང་ནས། །
དོན་གདུལ་བྱ་ཡི་གྲུ་ཆེན་སྒྲོལ་ཞིང་། །
ཆོས་དགེ་འདུན་གྱི་བསྟན་པའི་སྲོག་ཤིང་། །
ཆོས་འཁོར་ལོ་ཡི་གཟི་མདངས་དྲན་ནོ། །
སྐུ་བརྗེས་པ་ཡི་ཉིན་གྱི་མཐའ་མ། །
ཞལ་འཛུམ་པ་ཡི་ཟས་ཀྱི་མཐའ་མ། །
ཕྱོགས་རིས་མེད་ཀྱི་གདུལ་བྱ་མཐའ་མ། །
མཐའ་དུས་གསུམ་ལས་འདས་པ་དྲན་ནོ། །
སེམས་ཀུན་སློང་ནི་དེ་བཞིན་འདྲོང་ལ། །
ཕྱི་བྱ་སྤྱོད་ནི་དེ་བཞིན་སྲུང་ཞིང་། །
ཚེ་ཕྱི་མ་ནི་དེ་བཞིན་བསྒོམ་པའི། །
ཚེ་མཐའ་མ་ཡང་དེ་བཞིན་གཤེགས་སོ། །
བོད་ཟླ་༤/༡༥ཉིན་ཏེ་དུས་ཆེན་སུམ་འཛོམས་ཀྱི་ཟླ་བ་ལ་སྦྱར།
རྩོམ་སྒྲིག་པ། དོན་འགྲུབ་རྡོ་རྗེ།