༄༅། ། མཚམས་སྤྲིན་གཞོན་ནུའི་མདངས་བཞིན་མཛེས་པའི་སྐུ། །
འཆི་མེད་བདག་པོའི་དབྱངས་ལྟར་སྙན་པའི་གསུང་། །
ཆུ་གཏེར་ཆེན་པོའི་ཀླུང་བཞིན་ཟབ་པའི་ཐུགས། །
འཇམ་དབྱངས་རྒྱལ་བའི་ཡུམ་ལ་ཕྱག་འཚལ་ལོ། །
རབ་འབྱམས་བསྐལ་བ་གྲངས་མེད་རྒྱལ་བ་ལ། །
རབ་འབྱམས་ཞིང་དུ་དཔག་མེད་ལེགས་བཤད་ཚོགས། །
རབ་འབྱམས་བརྩོན་པས་ཐོས་པའི་མཐར་སོན་པའི། །
མཚུངས་མེད་མཁྱེན་པའི་དབང་ཕྱུག་ཁྱོད་ལ་འདུད། །
འཁོར་བའི་ཐ་མའི་མཚམས་གང་ཇི་སྲིད་པ། །
དེ་སྲིད་ཉམ་ཐག་འགྲོ་ཀུན་བསྐྱབ་པའི་ཕྱིར། །
སེམས་ཅན་ཁུར་ཆེན་ཁྱེར་བས་མི་ངལ་བའི། །
མཚུངས་མེད་སྙིང་རྗེའི་དབང་ཕྱུག་ཁྱོད་ལ་འདུད། །
རྒྱལ་སྲས་ཐུ་བོ་སྐུ་ཡིས་ཞིང་ཀུན་ཏུ། །
རྨད་བྱུང་བཀོད་པའི་མཛད་པ་རྒྱ་མཚོ་ལས། །
སྐྲ་རྩེས་བླངས་པའི་ཆ་ཤས་ཕྲ་མོ་ཙམ། །
མཁའ་མཉམ་འགྲོ་བའི་དོན་དུ་འདི་བཀོད་པས། །
ཚེ་རབས་ཀུན་ཏུ་རྗེ་བཙུན་འཇམ་དབྱངས་ཀྱིས། །
ཐེག་མཆོག་སྟོན་པའི་བཤེས་གཉེན་མཛད་པ་དང་། །
སྡུག་བསྔལ་རྒྱ་མཚོར་བྱིང་བའི་དྲིན་ཅན་རྣམས། །
མ་ལུས་སྒྲོལ་ལ་འཇམ་དབྱངས་འདྲ་བར་ཤོག །
རྩོམ་སྒྲིག་པ། དོན་འགྲུབ་རྡོ་རྗེ།