བོད་དུ་སངས་རྒྱས་ཆོས་ལུགས་མ་བྱུང་གོང་གི་གནའ་རབས་ཀྱི་ཆོས་ལུགས་ཤིག་ཡིན། བོན་གྱི་ལོ་རྒྱུས་སྐོར་སངས་རྒྱས་ཆོས་ལུགས་པའི་མཁས་པ་རྣམས་ཀྱིས་མཛད་པ་དང་བོན་རང་ཉིད་ཀྱི་མཁས་པས་མཛད་པ་བཅས་སྣ་ཚོགས་ཤིག་འདུས་པ་བཤད་ཚུལ་མི་མཐུན་པ་ཡོད། བོན་རང་ཉིད་ཀྱི་བཤད་ཚུལ་ལྟར་ན་བོན་ལ་ཡང་བསྟན་པ་སྔ་དར་བར་དར་ཕྱི་དར་གསུམ་ཡོད་པ་དང་། གསང་སྔགས་རྙིང་མའི་རྫོགས་ཆེན་གྱི་ལྟ་བ་ཡིན་ཚུལ་བཤད་འདུག བོན་དཀར་ནག་ཁྲ་གསུམ་ཟེར་བའི་བཤད་ཚུལ་དང་། བརྡོལ་བོན་དང་། འཁྱར་བོན། བསྒྱུར་བོན་བཅས་ཀྱི་བཤད་ཚུལ་ནི་སངས་རྒྱས་ཆོས་ལུགས་པས་བོན་གྱི་ལོ་རྒྱུས་འཆད་སྐབས་ཀྱི་བཤད་ཚུལ་ཡིན་པས་དེ་འདྲ་བོན་རྣམས་ཀྱིས་ཁས་མི་ལེན། བོན་ཆོས་ཐོག་མར་གསར་གཏོད་མཛད་པ་པོ་བོན་སྟོན་པ་གཤེན་རབ་ཡིན། ཁོང་གང་དུ་འཁྲུངས་བའི་སྐོར་བོན་རང་གི་ལོ་རྒྱུས་སུ་སྟག་གཟིག་འོལ་མོ་ལུང་རིང་ཟེར་བ་ཁ་ཆེའི་ཡུལ་དང་ཐག་ཉེ་བའི་གནས་ཤིག་ཡིན་པར་བཤད། བོད་ཀྱི་ལོ་རྒྱུས་འགའ་ཞིག་ཏུ་ཞང་ཞུང་གི་ཡུལ་ཡིན་པ་དང་། འགའ་ཞིག་ཏུ་འོན་མདའ་མངའ་རིས་གྲྭ་ཚང་ཆགས་སའི་སའི་གནས་དེ་ཡིན་པར་བཤད་པ་སོགས་མི་མཐུན་པ་ཡོད། བོན་གྱི་སྟོན་པ་གཤེན་རབ་ནི་སངས་རྒྱས་བཅོམ་ལྡན་འདས་མ་འཁྲུངས་གོང་དུ་བྱུང་བ་དང་། བོན་ཆོས་བསྟན་ནས་མྱ་ངན་ལས་འདས་རྗེས་སངས་རྒྱས་ཤྰཀྱ་པར་སྤྲུལ་ནས་ནང་པ་སངས་རྒྱས་པའི་ཆོས་བསྟན་པ་ཡིན་ཞེས་འཁོད་འདུག་པས། བོན་དང་ཆོས་གཉིས་ཕན་ཚུན་འཁོན་འཛིང་ཆེན་པོ་བྱེད་དགོས་དོན་མི་འདུག་སྙམ།
རྩོམ་སྒྲིག་པ། དོན་འགྲུབ་རྡོ་རྗེ།