གླིང་གེ་སར་གྱི་སྣང་བརྙན་གར་སྟེགས་སུ་འཁྲབ་པའི་ལོ་རྒྱུས་ཀྱི་ཐོག་མ་རྫོགས་ཆེན་དགོན་ནས་བྱུང་བ།
ལོ་རྒྱུས་ཀྱི་ཐོག་མ་རྫོགས་ཆེན་དགོན་ནས་བྱུང་བ།
གངས་ཀྱི་རི་བོ་མེད་པའི་ཡུལ་ཕྱོགས་སུ། །
གངས་ཀྱི་སེངྒེའི་རྨིག་རྗེས་མི་མངོན་ཏེ། །
དཔའ་བོའི་མེས་པོ་མེད་པའི་མི་རྒྱུད་ལ། །
དཔའ་བོ་ཇོ་རུའི་གཏམ་རྒྱུད་ག་ལ་ཡོད། །
འཇིགས་མེད་དཔའ་བོའི་ཀི་སྒྲ་རེ་རེ་དང་། །
ཤེས་རབ་རལ་གྲིའི་འཕྲུལ་འཁོར་རེ་རེ་ཡིས། །
མཐའ་བཞིའི་རྒྱལ་ཁམས་དབང་དུ་བསྡུས་པའི་གཏམ། །
དེང་སང་སྐྱོ་བ་གསོ་བའི་སྨན་ཐུན་ཙམ། །
དག་པའི་སྣང་ངོར་རིགས་གསུམ་སྤྲུལ་བའི་གར། །
ཕལ་བའི་རྣ་བར་དཔའ་བོའི་སྒྲུང་གཏམ་སྟེ། །
མདོར་ན་གངས་ལྡན་ལྕགས་རིའི་ཕང་པ་རུ། །
འཁྲུངས་པའི་དཔའ་བོ་རང་རེའི་མེས་པོ་ཞིག །
དེ་ལ་འདིར་གླིང་རྗེ་སེང་ཆེན་སྐྱེས་བུ་གེ་སར་ནོར་བུ་དགྲ་འདུལ་ཞེས་འཛམ་གླིང་ན་གྲགས་ཤིང་གངས་ཅན་དུ་འཁྲུངས་པའི་དཔའ་བོའི་རྒྱལ་པོ་དེའི་རྟོགས་བརྗོད་ལ་ངག་རྒྱུན་མ་ཉམས་པའི་སྒྲུང་གཏམ་དང་། སྔོན་གནས་རྗེས་དྲན་གྱི་བབ་སྒྲུང་། དག་སྣང་དགོངས་གཏེར་གྱི་གཏེར་སྒྲུང་སོགས་གླིང་གེ་སར་རྒྱལ་པོའི་སྒྲུང་གཏམ་ངག་གི་ལམ་ནས་མཚོན་པའི་རྣམ་པ་ནི་དུས་ཡུན་རིང་མོ་ཞིག་ནས་དར་མོད། གླིང་རྗེ་གེ་སར་རྒྱལ་པོ་འཁོར་དང་བཅས་པའི་སྣང་བརྙན་མིག་ལམ་དུ་གསལ་བར་བྱེད་པའི་རྣམ་པ་ནི་རྡོ་བརྐོས་ཀྱི་རི་མོ་དང་། ལོག་རིས་སུ་བྲིས་པ། ཐང་ཁར་བྲིས་པ་སོགས་ཀྱང་ཉུང་ཟད་ཡོད། གླིང་གེ་སར་འཁོར་དཔའ་རྟུལ་དང་བཅས་པའི་མི་སྣའི་སྣང་བརྙན་མིག་ལམ་དུ་མངོན་ཐབས་ཟློས་གར་འཁྲབ་སྟོན་གྱི་བྱུང་བ་ལ། སྔ་འགྱུར་རྙིང་མའི་གདན་ས་ཆེན་མོ་གྲུབ་དབང་རྫོགས་ཆེན་དགོན་ནི་གླིང་རྗེ་གེ་སར་རྒྱལ་པོ་དམངས་ཁྲོད་ཀྱི་རིག་གནས་ནས་དགོན་པའི་རིག་གནས་སུ་བཅུག་པའི་དགོན་སྡེ་ཐོག་མ་དེ་ཡིན་ཞིང་དགོན་པ་འདིའི་སྐྱེས་ཆེན་རིམ་བྱོན་དུ་མས་བཞག་པའི་མཛད་རྗེས་ཀྱིས་གླིང་གེ་སར་གྱི་རིག་གནས་འདི་ཉིད་ལོ་རྒྱུས་འཕེལ་རྒྱས་ཀྱི་དཀྱོག་མཚམས་གསར་པ་ཞིག་ཏུ་བསྐྱལ་ཡོད་པ་སྟེ། རྫོགས་ཆེན་པདྨ་རིག་འཛིན་གྱི་དགོང་གཏེར་བབ་སྒྲུང་།
རྫོགས་ཆེན་གྲུབ་དབང་སྐུ་འཕྲེང་དང་པོ་པདྨ་རིག་འཛིན་ལ་དག་སྣང་དགོངས་གཏེར་དུ་བྱོན་པའི 《སྟག་གཟིག་ནོར་འབྱེད།》ནི་བོད་ཡུལ་དུ་ཆེས་གྲགས་པ་ཆེ་བའི་སྒྲུང་ཡིག་ཙམ་དུ་མ་ཟད་དད་རྟེན་གཡང་སྐྱབས་སུ་བཟུང་ནས་བོད་ཀྱི་ས་ཁུལ་མང་པོར་ཁྱིམ་གྱི་ཕུག་རྟེན་དུ་《སྟག་གཟིག་ནོར་འབྱེད།》ཀྱི་དཔེ་ཆ་རེ་མེད་ཐབས་མེད་པ་དང་ལོ་རེ་བཞིན་རིམ་གྲོར་བཀླགས་སྲོལ་ཆགས་ཡོད།
མཁན་ཆེན་པདྨ་བཛྲ་ལ་དགོངས་གཏེར་དུ་བབ་པའི་《གངས་དཀར་ཤེལ་རྫོང་།》ཞེས་མངའ་རིས་གངས་དཀར་ཤེལ་རྫོང་དེ་ཉིད་གླིང་རྗེ་གེ་སར་རྒྱལ་པོས་ཇི་ལྟར་རྫོང་སྒོ་ཕབ་ཅིང་མངའ་འོག་ཏུ་བླངས་པའི་ཚུལ་དཔའ་བོ་གཡུལ་འགྱེད་ཀྱི་སྒྲུང་གཏམ་སྙན་འཇེབས་གསོན་ཉམས་ལྡན་པས་ཡིད་དབང་འཕྲོག་པ་ཞིག་ཡོད་པ་དང་། རྡོ་རྗེ་རྐྱང་རྒོད་ཀྱི་རྔོག་དར་ལས་བཤུས་པ་བཅས་དགོངས་གཏེར་བབ་སྒྲུང་གི་ཚུལ་དུ་ཡོད།
འཇམ་མགོན་མི་ཕམ་རིན་པོ་ཆེས་མཛད་པའི་གེ་སར་སྒྲུབ་ཐབས། རྫོགས་ཆེན་མཁན་རབས་འཇམ་མགོན་མི་ཕམ་རིན་པོ་ཆེ་མཆོག་གིས་རྟ་རྒྱུགས་གསོལ་འདེབས་《བརྡ་གསང་ནོར་བུའི་མེ་ལོང་།》《རྟ་རྒྱུགས་ནོར་བུ་ཆ་བདུན།》གྱི་ས་བོན་དང་། 《གེ་སར་སྐྱེས་བུ་རྡོ་རྗེ་ཚེ་རྒྱལ་གྱི་བསྐང་གསོལ་འདོད་རྒུ་མྱུར་འགྲུབ།》《ཝེར་མའི་གསོལ་ལོ་ཆེན་མོ།》《གེ་སར་གསང་སྒྲུབ་སྙིང་གི་ཐིག་ལེ།》《གེ་སར་གསོལ་མཆོད་འཕྲིན་ལས་མྱུར་འགྲུབ།》སོགས་ཆོས་ཚན་ལྔ་བཅུར་ཉེ་བས་གེ་སར་བླ་མ་ལྟར་བསྟེན་ཐབས། ཡི་དམ་ལྟར་བསྒྲུབས་ཐབས། ཆོས་སྐྱོངས་ལྟར་མཆོད་ཐབས་ཀྱི་རིམ་པ་མང་པོ་མཛད། གླིང་ཚང་རྒྱལ་པོ་གླིང་དཀར་རྒྱལ་པོའི་གདུང་རྒྱུད་ཡིན་པས་གླིང་གེ་སར་གྱི་འཁྲུངས་ཡུལ་སྐྱིད་སོས་ཡག་གི་ཁ་མདོར་གེ་སར་གྱི་ལྷ་ཁང་བཞེངས་ན་རྗེ་དམངས་ཡུལ་གྲུ་ཀུན་ཏུ་ཕན་བདེ་དགེ་བའི་དགོས་པ་ཆེ་ཞེས་པའི་བཀའ་སློབ་ལྟར་གླིང་ཚང་རྒྱལ་པོས་ཚ་ཚའི་གེ་སར་ལྷ་ཁང་བཞེངས་པ་དང་། 《གླིང་བྲོ་སྒྱུ་མའི་རོལ་མོ།》ཞེས་གླིང་གི་གླུ་བྲོ་དག་སྣང་དུ་ཕེབས་པ་སོགས་གེ་སར་རྒྱལ་པོའི་འཕྲིན་ལས་སྔ་ན་མེད་པ་སྤེལ་བ་ལ་འཇམ་མགོན་མི་ཕམ་རིན་པོ་ཆེའི་མཛད་རྗེས་ནི་འབྲལ་ཐབས་མེད་པའོ། །
རྫོགས་ཆེན་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེས་གེ་སར་གྱི་འཁྲབ་སྟོན་ཐོག་མར་གསར་བཏོད་མཛད་པ།
རྫོགས་ཆེན་གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེ་ནི་གླིང་གེ་སར་ལ་ཐུན་མོང་མ་ཡིན་པའི་དུང་བ་དང་དག་སྣང་ལྡན་པ་ཞིག་ཡིན་ལ། རིང་མོ་ཉིད་ནས་གླིང་རྗེ་གེ་སར་རྒྱལ་པོ་འཁོར་ཚོགས་དཔའ་རྟུལ་བརྒྱད་ཅུ་དང་བཅས་པའི་སྣང་བརྙན་དེ་ཇི་ལྟར་ཞིག་གམ་དགོངས་པའི་དོ་སྣང་ཆེན་པོ་ཡོད་པར། ནུབ་གཅིག་ཁོང་གི་གཟིམས་ལམ་དུ་གླིང་རྗེ་གེ་སར་རྒྱལ་པོ་སེང་ཆེན་ནོར་བུ་དགྲ་འདུལ་སྐུ་གཟི་བརྗིད་ལྟ་བས་ཆོག་མི་ཤེས་པ། འཁོར་གསུམ་དགྲ་དར་འཚུབས་སེ། འདོ་རྗེ་རྐྱང་རྒོད་འཕེལ་པོ་ལ་ཆིབས་པ། འཁོར་དུ་ཡབ་རྗེ་སེང་བློན་རྒྱལ་པོ།སྤྱི་དཔོན་རོང་ཚ་ཁྲ་རྒན་སོགས་ཕ་ཁུ་རྒན་པོའི་ཚོགས་དང་། འབུམ་པའི་རྒྱ་ཚ་ཞལ་དཀར། ཚ་ཞང་འདན་མ་བྱང་ཁྲ་སོགས་དཔའ་རྒོད་ཕུ་ནུའི་ཚོགས།གསེར་པའི་ཉི་འབུམ་དར་ཡག འོམ་བུ་ཨ་ནུ་དཔའ་སེང་སོགས་གླིང་དཀར་དཔོན་པོའི་ཚོགས།སྣང་ཆུང་གཡུ་ཡི་མེ་ཏོག བཅོ་ལྔའི་དཔའ་གསལ་ཟླ་བ་སོགས་གཅེས་ཕྲུག་ཨ་ནུའི་ཚོགས། སྡིག་གཅོད་ཤན་པ་དམར་པོ། འཇང་ཕྲུག་གཡུ་ལྷ་ཐོག་འཇུ་སོགས་ཕྱི་གླིང་དཔའ་བོའི་ཚོགས། སྐྱ་ལོའི་སེང་ལྕམ་འབྲུག་མོ། མ་ཡུམ་འགོག་བཟའ་ལྷ་མོ་སོགས་མ་སྲུ་མོ་སྨན་ཚོགས། ཕུ་བོ་དུང་ཁྱུང་དཀར་པོ། ནུ་བོ་ཀླུ་སྦྲུལ་འོད་ཆུང་སོགས་གླིང་གི་ལྷ་སྲུང་སོགས་འཁོར་ཚོགས་དཔའ་རྟུལ་བརྒྱད་ཅུ་དང་དགྲ་བླའི་ཝེར་མ་བཅུ་གསུམ་བཅས་པས་རང་རང་གི་སྐུ་མདོག་རྣམ་འགྱུར།ཆ་བྱད་རྒྱན་ཆས། ལག་ཏུ་ཐོགས་པའི་མཚོན་ཆ། འོག་ཏུ་ཞོན་པའི་འདོ་བ་སོགས་རེ་རེ་བཞིན་མ་འདྲེས་པ་ཤིན་ཏུ་གསལ་པོའི་གཟུགས་སྣང་བསྟན་པས་ཁོང་ཉིད་ཐུགས་ཤིན་ཏུ་དགྱེས་ནས་ཕྱི་ཉིན་ནས་བཟུང་བཅའ་བཟོ་མཁས་པ་དྲུང་དུ་བཀུག་སྟེ་ཁོང་གི་གཟིགས་སྣང་ཇི་ལྟ་བུ་བཅའ་བཟོ་བ་ལ་དཔའ་རྟུལ་རེ་རེ་བཞིན་གདོང་གི་བྱད་དབྱིབས། ཉམས་དང་འགྱུར་བག་འདི་འདྲ་ཡོད་ཅེས་གསུངས་ནས་ཁོང་ཉིད་ཀྱིས་ཡི་རང་གི་དབུག་དབྱུང་མ་གནང་བར་ཡང་ཡང་བཅའ་བཟོ་བྱས་ནས་དཔའ་རྟུལ།ཕ་ཁུ། མ་སྲུ། གླིང་ལྷ་ཝེར་མ་བཅས་པའི་ཞལ་འབག་དང་། ཆས་གོས། ལག་ཆ། ཡོ་བྱད་རྣམས་ལེགས་པར་གྲུབ་པར་མཛད་ནས་ཁྲོ་བོའི་རྩ་འཆམ་གྱིས་འགབས་པའི་གར་འཆམ་གྱིས་སྔ་འགྱུར་གྲུབ་དབང་རྫོགས་ཆེན་དགོན་ཨོ་རྒྱན་བསམ་གཏན་ཆོས་གླིང་གི་མདུན་ཐང་དོ་ར་ཆེན་མོར་འཁྲབ་སྟོན་ཐེངས་དང་པོ་བྱས། ཡང་དེའི་དགོང་མོའི་གཟིམས་ལམ་དུ་མི་ཕོ་སྐུ་མདོག་སེར་པོ། ཤིན་ཏུ་སྟོབས་དང་ལྡན་པ། སོག་པོའི་ཆ་ལུགས་ཅན་གྱི་དཔའ་བོ་ཞིག་ཁོང་གི་དྲུང་དུ་སླེབས་ནས་མི་དགའ་བའི་རྣམ་འགྱུར་ཅི་རིགས་བསྟན་པས། ཁོང་གིས་ཁྱོད་སུ་ཡིན་ནམ་གསུངས་པས། ཁོ་ན་རེ། སྔོན་ཆད་གླིང་རྗེ་སེང་ཆེན་རྒྱལ་པོས་མཐའ་བཞིའི་རྒྱལ་ཁམས་དབང་དུ་བསྡུས། རྫོང་ཆེན་བཅོ་བརྒྱད་ཆམ་ལ་ཕབ། དཀར་པོ་ཆོས་ཀྱི་དབུ་འཕང་བསྟོད། ནག་པོ་བདུད་ཀྱི་བསྟན་པ་བསྣུབས། ཁྲ་མོ་གླིང་གི་རྒྱལ་ཁབ་དབུ་འཕང་དགུང་ལས་མཐོ་དུས།ངའི་མིང་ལ་སོག་གི་རྟ་དམར་སྟོབས་ཆེན་ཟེར་ཞིང་། གླིང་རྗེ་སེང་ཆེན་སྐྱེས་བུ་དང་། ཁྲ་མོ་གླིང་གི་རྒྱལ་ཁབ་ལ། ངས་དཔའ་རྒོད་སྟངས་མ་ཇི་ཙམ་བླངས། ཕྱོགས་ཀྱི་དགྲ་བོ་དེ་ཙམ་བཏུལ་ཡང་དེ་རིང་ཁྱེད་གླིང་ཕུ་ནུ་བརྒྱད་ཅུ་རྗེས་སུ་དྲན་པའི་འདུ་ར་ཁྲ་མོར་ང་རང་མ་བོས་པ་ཅི་ཡིན།སེམས་ཤིན་ཏུ་སྐྱོ་ཟེར་བས། གྲུབ་དབང་མཆོག་གིས་སང་ཉིན་ནས་ཁྱེད་ཀྱི་སྐུ་འབག་བཅའ་བཟོ་བྱེད་ནས་གླིང་དཀར་ཕུ་ནུའི་སྐུ་གྲལ་དུ་འཇོག་ངེས་ཡིན་གསུངས་པས་མི་སྣང་བར་གྱུར། ཕྱི་ཉིན་ལག་རྩལ་བ་བོས་ནས་སོག་གི་རྟ་དམར་སྟོབས་ཆེན་ལུས་འདུག སྐུ་མདོག་ཕྱག་མཚན་འདི་འདྲ་གདའ་གསུང་བ་ཇི་བཞིན་བཅའ་བཞེངས་བྱས་པ་བཅས་ཀྱི་གཏམ་རྒྱུད་ཡོད།
གང་ལྟར་འདི་ཡན་དུ་གེ་སར་གྱི་ཟློས་གར་མ་བྱུང་བ་མངོན་ལ་རྫོགས་ཆེན་དགོན་དུ་གླིང་གེ་སར་གྱི་གར་འཆམ་གསར་གཏོད་གནང་བ་དེ་གེ་སར་ཟློས་གར་གྱི་ཐོག་མར་གྱུར་བས་དེ་དུས་བོད་ཡུལ་གང་དུ་ཡང་རིག་རྩལ་གྱི་འཁྲབ་སྟོན་ཆེས་དཀོན་པར་བརྟེན། དེ་དུས་སུ་གྲགས་པ་ཆེ་ཙམ་བྱུང་ཡོད་འདུག དེ་སྐབས་ནས་བཟུང་དགོན་པ་མང་པོར་རྫོགས་ཆེན་དགོན་པའི་གེ་སར་གྱི་འབག་འཆམ་དར་བར་གྱུར་པ་དང་། ཕྱིས་སུ་གསེར་རྟ་ཟློས་གར་ཚོགས་པས་རྟ་རྒྱུགས་རྒྱལ་འཇོག་སོགས་ཟློས་གར་འཁྲབ་སྟོན་དང་། གཞན་ཡང་གེ་སར་གློག་བརྙན་ཟློས་གར་ཀྱང་འཁྲབ་དང་འཁྲབ་མུས་ཅི་རིགས་དར་རྒྱས་ཆེན་པོ་འབྱུང་བཞིན་པ་འདི་ལྟར་རོ། །
རྫོགས་ཆེན་དགོན་པའི་གེ་སར་འབག་འཆམ་གྱི་མི་སྣའི་ངོ་སྤྲོད་ཞིབ་པ་སྐྱབས་རྗེ་མཆོག་སྤྲུལ་པདྨ་སྐལ་བཟང་གིས་མཛད་པའི་འཛམ་གླིང་གེ་སར་རྒྱལ་པོ་དཔའ་རྟུལ་ཕུ་ནུའི་འཁོར་ཚོགས་དགྲ་ལྷ་རླུང་རྟ་དང་བཅས་པའི་གར་འཆམ་གྱི་མཚམས་སྦྱོར་ཡིད་འཕྲོག་ནོར་བུའི་དོ་ཤལ་ཞེས་བྱ་བར་གསལ་བས་དེར་གཟིགས་པར་ཞུ། །
རྩྭ་ཐང་དཔའ་བོའི་གཏམ་གྱི་རོལ་མོ་ཡང་། །
རྨ་རྫ་འབྲི་ཆུའི་འཕྱོ་རླབས་དེས་དྲངས་ནས། །
ཤར་ནུབ་རྒྱ་མཚོ་སྲུང་བའི་སྐྱེ་བོ་ལ། །
སྔར་མེད་རྣ་བའི་དགའ་སྟོན་འཛད་མེད་བཀྱེས། །
ཕུང་བྱེད་ནག་ཕྱོགས་འདུལ་བའི་སྒྲུང་གཏམ་ནི། །
འཛམ་གླིང་མི་རིགས་རེ་ལ་རེ་རེ་སྟེ། །
ས་སྟེང་སྐྱེ་རྒུ་མ་ལུས་རེ་བའི་གཉེན། །
ཞི་བདེའི་ཉི་མ་གླིང་བཞིར་འཆར་གྱུར་ཅིག །
གླིང་རྗེ་གེ་སར་རྒྱལ་པོ།
གླིང་ལྷའི་སྐོར།
ལྷ་ཆེན་ཚངས་པ་དཀར་པོ།
གཉན་ཆེན་སྐུ་ལྷ་གེ་མཛོ།
ཀླུ་རྒྱལ་གཙུག་ན་རིན་ཆེན།
ཕུ་བོ་དུང་ཁྱུང་དཀར་པོ།
ནུ་བོ་ཀླུ་སྦྲུལ་འོད་ཆུང་།
སྲིང་ལྕམ་ཐ་ལེ་འོད་འཕྲོ།
ཨ་ནེ་གནམ་སྨན་དཀར་མོ།
དགྲ་ལྷའི་མེ་སྟག་དམར་པོ།
དཔའ་རྟུལ་ཞི་བའི་སྐོར།
གསེར་པའི་ཉི་འབུམ་དར་ཡག
འོམ་བུའི་ཨ་ནུ་དཔའ་སེང་།
མི་སྤྱང་རིན་ཆེན་དར་ལི།
འབུམ་པའི་རོང་ཚ་དམར་ལེབ།
སྤྱི་དཔོན་སྣང་ཆུང་གཡུ་སྟག
ཁྲོ་ཐུང་ཉ་ཚ་ཨ་བརྟན།
གདོང་སྲས་གནང་ལི་ཨ་འཕེན།
འཇང་སྲས་གཡུ་ཁྲི་གོང་སྔོན།
འབྲུ་མི་དཀར་ལྷ་བུ་བསམ་འགྲུབ།
བོད་ཕྲུག་མི་ཆུང་ཁ་བདེ།
རྨ་ཉིན་རྗོང་དཔོན་པོ་ལྷ་ལི།
དཔའ་རྟུལ་རྒྱས་པའི་སྐོར།
གདོང་སྤྱི་དཔོན་རོང་ཚ་ཁྲ་རྒན།
ཡབ་རྗེ་སེང་བློན་རྒྱལ་པོ།
སྟག་རོང་དཔོན་པོ་ཁྲོ་རྒྱལ།
ཨ་སྐྱིད་ནམ་མཁའི་སེང་ཞལ།
རོང་ཚ་ནོར་བུ་ལྷ་དར།
ཕྱུག་སྐྱ་ལོའི་བསྟན་པ་རྒྱལ་མཚན།
མི་ཆེན་རྒྱལ་བའི་ལྷུན་གྲུབ།
སྟག་རོང་ཨ་ནུ་གཟིག་འཕེན།
སྟག་རོང་ཨ་ནུ་ཁྲ་གཤོག
སྟག་རོང་ཁྲོ་ཚ་འཁྱིལ་ཆེན།
སྟག་རོང་གཟུ་བ་རིན་ཆེན།
གཟུ་ཆེན་ཝེར་མའི་ལྷ་དར།
མུ་བའི་དར་འཕེན་ནག་པོ།
གདོང་བཙན་པོ་བུ་ཡི་ཨ་དཔལ།
དཔའ་རྟུལ་དབང་གི་སྐོར།
ལྷ་སྲས་དགྲ་ལྷ་རྩེ་རྒྱལ།
ཨ་འགེ་ཚངས་པའི་ངོ་ལུག
མུ་བའི་དར་འཇམ་ངོ་ལུག
སྟག་རོང་སྲིན་ཚ་ངོ་ལུག
རོང་སྲས་ལྷ་རྒོད་འབུམ་ལི།
སྟོང་དཔོན་ཡ་མེད་སོ་ཁྲ།
བརྒྱ་དཔོན་ཁྲོ་ཚ་དམར་ལེབ།
འབུམ་དཔོན་ཐོག་རྒོད་འབར་བ།
འབྲུ་དགའ་སྡེའི་མི་ཆེན་སེར་པོ།
བཅོ་ལྔའི་དཔའ་གསར་ཟླ་བ།
སྐྱ་ལོའི་ཁེར་བུ་འབྲུག་རྒྱལ།
སོག་སེར་པོའི་སྟག་དམར་སྟོབས་ཆེན།
དཔའ་རྟུལ་དྲག་པོའི་སྐོར།
གདོང་འབུམ་པའི་རྒྱ་ཚ་ཞལ་དཀར།
དཔའ་ཚ་ཞང་འདན་མ་བྱང་ཁྲ།
དཔའ་ལ་མི་སྤྱང་དཀར་པོ།
འབྲུ་དགའ་སྡེ་ཆོས་སྐྱོང་བེར་ནག
གདོང་ཆོས་ལུ་བུ་ཡི་དར་འཕེན།
ཧོར་སྡིག་གཅོད་ཤན་པ་རྨེ་རུ་རྩེ།
འཇང་ཕྲུག་གཡུ་ལྷ་ཐོག་འགྱུར།
གདོང་བེ་རུ་ཉི་མ་རྒྱལ་མཚན།
གླིང་ཨ་ཡག་ཤཱཀྱ་རྒྱལ་མཚན།
འབྲུག་རྗེ་ཐར་པ་རྒྱལ་མཚན།
གོ་འཇོའི་བླ་མ་རྒྱལ་མཚན།
བཙན་རྒོད་ཕུར་པ་ཁེར་སྐྱེས།
སྡེ་བ་སྒྲོ་རྒོད་མདའ་བཙན།
ཤོང་ཚ་ཨ་ནུ་ཁྲ་རྒོད།
བྱང་ཨ་སྟག་འཁྱིལ་བའི་ཀླུ་མོ།
མོན་དུང་སྐྱོང་སྟག་ལྷ་ཁྲི་དཀར།
གླིང་གི་མོ་སྨན་བདུན།
སྒ་སྐྱ་ལོའི་སེང་ལྕམ་འབྲུག་མོ།
གུང་མ་ཡག་གི་སེང་ལྕམ།
སྤྱི་དཔོན་བུ་མོ་གཡུ་སྒྲོན།
འདན་མའི་བུ་མོ་དར་ལི།
འབྲུ་རག་དཀར་སྟོན་པའི་བུ་མོ།
ཕ་ཆེན་རག་བཟའ་དགེ་མཚོ།
ནིས་ཆུང་ལུ་གུའི་མཚར་ཡག
དགྲ་ལྷ་ཝེར་མའི་ཚོགས།
རྩལ་ལྡན་ཁྱུང་ཆེན་དར་མ། དགྲ་བླའི་གཡུ་འབྲུག་སྔོན་མོ།
འགྱིང་རོགས་གངས་སེང་དཀར་མོ།
ངར་རོགས་རྒྱ་སྟག་དམར་པོ། རྒྱུག་རོགས་སྤྱང་ཆུང་ཁ་དཀར། ཟ་རོགས་སྤྱང་ཐང་སྔོན་མོ། འཛིང་རོགས་གླག་མོ་ཁྲ་འབར། ངར་རོགས་དོམ་བུ་སྙིང་དཀར། རྣ་མྱུར་སྐྱ་ཁྲ་ཧོར་བ། རྭ་རྒྱལ་ཤྭ་བ་རྒྱ་ལྡིང་། རྔམས་འཇིགས་དྲེད་མོང་སོག་དཀར། འཁྱིལ་རོགས་གསེར་སྦྲུལ་སེར་པོ། སྟོབས་ཆེན་འབྲོང་གཡག་དར་མ་བཅས་སོ། །
ཡོང་ཁུངས། 《གེ་སར་འཁྲུངས་ཡུལ།》དེབ་དྲུག་པ།
རྩོམ་སྒྲིག་པ། དོན་འགྲུབ་རྡོ་རྗེ།