༸ ཁྱབ་བདག་ཆོས་ཀྱི་རྒྱལ་པོས་བདེ་ཆེན་ཞིང་ཁྲིད་གསུང་བའི་མཐོང་སྣང་ངོ་མཚར་ཕུན་ཚོགས་ལྔ་ལྡན།
རྩོམ་པ་པོ། ཐུབ་བསྟན་རང་བྱུང་། མགོ་ལོག
ཕུན་ཚོགས་ལྔ་ལྡན་སྐུ་གསུམ་ཞིང་སྣང་རུ་དམ་པདྨའི་ཡང་དབེན་ཆེ། །
གནས་ཀྱི་བཀོད་པ་ལྷུན་གྱིས་གྲུབ་པ་བདེ་ལྡན་ཞིང་ལ་ཅོ་འདྲི་བྱེད། །
གཙུག་ལག་ཁང་བཟང་རྟེན་མཆོག་བྱིན་ཅན་རང་བྱུང་སྒྲུབ་ཕུག་ཞི་བའི་གནས། །
འོག་མིན་གཉིས་ས་ལ་ལྷུང་འདྲ་ས་སྤྱོད་ཞིང་ཁམས་པདྨ་ཐང་། །
འབྲས་ལྡན་དུས་བཟང་སྟོན་ཟླ་ར་བ་གཟའ་སྐར་འཕྲོད་སྦྱོར་རྒྱུ་བ་ལེགས། །
གནམ་གཤིས་དྲོ་གྲང་ཅི་དགར་བརྟས་པ་བྱེད་པ་པོ་ཡིས་བཀོད་དང་མཚུངས། །
དེ་ལྟའི་དུས་ཚེས་ཕུན་ཚོགས་ཀུན་འདུས་རྫོགས་ལྡན་ཆོས་ཀྱི་དགའ་སྟོན་ལ། །
ཅི་དགར་བའི་རོལ་བའི་སྐལ་བཟང་འདི་ཀོ་ཚེ་རབས་དུ་མའི་ཚོགས་བསགས་ལགས། །
སྟོན་པ་གཉིས་པ་རྒྱལ་བའི་གདུབ་འཚོབ་བརྒྱུད་ལྡན་བླ་མའི་ཞལ་སྐྱིན་ཆེ།།
སྐུ་གསུམ་རིགས་འདུས་པདྨ་རྒྱལ་པོ་སླར་ཡང་མིར་བརྫུར་སྐུར་སྣང་བ།།
བདེ་ཆེན་ལམ་སྟོན་འདྲེན་པ་མཆོག་གྱུར་སྣང་མཐའ་རིགས་ཀྱི་བདག་པོ་དངོས།།
དེང་གི་དུས་ཀྱི་སྟོན་པ་མཆོག་གྱུར་ཁྱབ་བདག་ཆོས་ཀྱི་རྒྱལ་པོ་བཞུགས།།
དེ་ཡང་རྒྱང་སྙན་གཏམ་གྱི་རོལ་མོ་ཅི་དགར་དཀྲོལ་བའི་དགའ་སྟོན་ལ།།
མ་བོས་མཉམ་འཛོམས་ཆོལ་གསུམ་སྤུན་ཟླ་སྒར་ཆེན་གཡས་གཡོན་འཛོམས་དང་ལྷན།།
ལྷ་ཀླུའི་འཁོར་ཀྱང་དབང་མེད་ཤུགས་ཀྱིས་འདི་གར་ཡོད་སྙམ་གདུལ་བྱའི་འགྲོ།།
དེ་བཞིན་དད་ལྡན་འདུ་བ་རྒྱ་མཚོས་ས་ཆེན་འདི་ཡང་རབ་ཏུ་འགུལ།།
བདེ་ཆེན་ཞིང་མཆོག་མྱུར་དུ་བགྲོད་སླའི་ཞིང་ཆོག་ངོ་མཚར་མྱུར་ལམ་གཙོས།།
སྨིན་བྱེད་ཞིང་དབང་ཉེ་བརྒྱུད་ཐུན་མིན་སྐལ་ལྡན་མངོན་འཚང་རྒྱ་བའི་ལམ། །
གྲོལ་བྱེད་གདམས་ཁྲིད་ཐར་ལམ་གསལ་སྒྲོན་ལག་ཁྲིད་དམར་རྗེན་དཔྱད་འཇོག་སྒོམ།།
ཐེག་ཆེན་འཇུག་སྒོ་བྱང་ཆུབ་སེམས་སྒོམ་རྫོགས་ཆེན་ལྟ་བའི་རང་ངོ་སྤྲད།།
དེ་ལྟར་གནས་དུས་སྟོན་འཁོར་ཆོས་བཅས་ཕུན་སུམ་ཚོགས་པ་ལྔ་ཡི་གྲངས། །
མདོ་སྔགས་ཆོས་ཚུལ་གནད་ཀྱི་གདམས་པ་འཇིག་རྟེན་གསལ་བའི་སྒྲོན་མེའི་འོད། །
གླིང་ལྔ་མཚོ་བཞིའི་ཁྱོན་ལ་ཁྱབ་ཅིང་སྲིད་པའི་མུན་སྟུག་གཏན་འཇོམས་པ། །
སྨོན་ལམ་མཐུ་འགྲུབ་འགྲོ་བའི་མགོན་པོ་སེམས་དཔའ་ཁྱེད་ཀྱི་ཐུགས་བསྐྱེད་ལགས།།
མཁྱེན་པའི་ཡོན་ཏན་ནམ་མཁའི་མཐའ་ཀླས་མདོ་སྔགས་རྒྱ་མཚོའི་གཏེར་འཆང་བ། །
བརྩེ་ཆེན་སྙིང་རྗེས་གཞན་ཕན་དྲི་བསུང་ཕྱོགས་བཅུའི་འགྲོ་རྣམས་ཡོངས་ལ་ཁྱབ། །
ནུས་པའི་མཐུ་སྟོབས་གཞོམ་བྲལ་གོ་ཆ་ཐུགས་ལ་འཆིང་མཁས་དཔའ་བོ་ཆེ། །
དུས་བབས་སྟོན་པ་མི་ཡི་ཚུལ་བཟུང་རིགས་བདག་མཚུངས་མེད་བླ་མ་མཁྱེན། །
ཉིད་སྐུ་དཀྱིལ་འཁོར་ཉ་གང་དུང་ཟླ་མཚན་དཔེ་འབུམ་གྱིས་ཉེར་བརྒྱན་ཅིང་། །
འགག་མེད་གསུང་མཆོག་བདེན་ཚིག་དབྱངས་ཀྱིས་འགྲོ་རྣམས་སྙན་དབང་ལན་བརྒྱས་གསོས། །
ཐུགས་མཆོག་ཏིང་འཛིན་ཞི་བ་ཆེན་པོས་སེམས་ཅན་རྗེས་སུ་བཟུང་བ་དང་། །
ཞིང་མཆོག་འདི་ཡི་མཆོད་པའི་རྟེན་དུ་སྐུ་ཚེ་བསྐལ་བརྒྱར་བཞུགས་གསོལ་འདེབས། །
ཅེས་པ་འདི་ནི་སྤྱི་༢༠༢༥ལོའི་རྫོགས་ཆེན་པདྨ་ཐང་ལུང་རྟོགས་པདྨའི་དགའ་ཚལ་གྱི་བདེ་ཆེན་ཁྲིད་ཆེན་མོ་ཐེངས་བཅུ་དྲུག་པའི་ཆོས་ཀྱི་བདུད་རྩི་་ལ་ལོངས་སྤྱོད་པའི་སྐལ་བཟང་གི་སློབ་བུ་ཐུབ་བསྟན་རང་བྱུང་ངམ་མདོ་གླིང་ཚང་གིས་ལེགས་པར་སྦྱར་བའོ། །
ཀློང་ཆེན་ཐེག་མཆོག་ཆོས་ཀྱི་རང་སྒྲ།
རྩོམ་པ་པོ། པདྨ་འཇིགས་བྲལ་ཕྱོགས་ལས་རྣམ་རྒྱལ། རྫོགས་ཆེན།
༡ གཞི་དབྱིངས་སྟོང་ཆེན་ཀ་དག་ཆོས་ཀྱི་སྐུ།།
རང་བཞིན་འོད་གསལ་ལྷུན་འགྲུབ་ལོངས་སྤྱོད་རྫོགས།།
ཐུགས་རྗེ་ཀུན་ལ་ཁྱབ་པ་སྤྲུལ་བའི་སྐུ།།
སྐུ་གསུམ་ཡེ་རྫོགས་བླ་མར་གསོལ་བ་འདེབས།།
༢ ཀུན་མཁྱེན་བླ་མ་ཐེག་མཆོག་བློ་ལྡན་གྱི།།
དགོངས་བརྒྱུད་རྟོགས་པའི་བྱིན་རླབས་མ་ལུས་པ།།
ཕ་གཅིག་བླ་མ་པདྨ་སྐལ་བཟང་གིས།།
སྣོད་ལྡན་བུ་ལ་གནང་འདི་སྐྱིད་པ་ལ།།
༣ དངོས་པོའི་གཤིས་ནས་མཐར་ཐུག་འབྲས་བུའི་བར།།
རྡོ་རྗེའི་གནས་ཆེན་བཅུ་གཅིག་གསལ་བོ་རུ།།
བསྟན་པའི་ཚི༵ག་དོ༵ན་མཛོ༵ད་དམ་འོད་གསལ་མཛོད།།
བརྗོད་བྱ་དོན་ཟབ་དགོངས་གནད་ཉམས་ཁྲིད་གནང་།།
༤ ཐེག་དགུའི་གྲུབ་མཐའ་སྤྱི་ཡི་གནད་སྟོན་པ། །
ཟབ་ཅིང་རྒྱ་ཆེའི་ལེགས་བཤད་བསྟན་བཅོས་དོན།།
ཡི༵ད་བཞི༵ན་མཛོ༵ད་རྩ་དགོངས་འགྲེལ་ཁྲིད་ཡིག་བཅས།།
ཐོས་བསམ་སྒོམ་པའི་ལམ་ནས་གསལ་བར་མཛད།།
༥ ནང་པའི་མདོ་སྔགས་གྲུབ་མཐའ་གསར་རྙིང་གི།།
བཞེད་སྲོལ་རྒྱ་ཆེར་བསྟན་པ་གྲུ༵བ་མཐ༵འ་མཛོ༵ད།
ཕྱི་ནང་ཐུན་མོང་རྒྱུ་འབྲས་ཐེག་པ་ཡི། །
ལམ་གནད་སྤྱིར་བསྟན་སྒྲོ་འདོགས་རྣམ་པར་བཅད།།
༦གསང་བ་མན་ངག་སྡེ་རྒྱུད་བཅུ་བདུན་དང༌།།
བརྒྱ་དང་བཅུ་དགུ་བང་རིམ་རྩ་ལྔའི་བར།།
རྣམ་བཞག་རྒྱས་པར་བཤད་པ་ཐེ༵ག་མཆོ༵ག་མཛོ༵ད།།
གཞི་ལམ་འབྲས་བུའི་གསང་དོན་མ་སྦས་བསྟན།།
༧རྫོགས་ཆེན་སྔོན་འགྲོ་གང་ཟག་གང་རུང་གི།།
བསླབ་བྱ་གདམས་པ་འབྲས་བའི་ཆོས་རྣམས་ཀྱི།།
དོན་འདུས་སེམས་ལ་བཅིང་བའི་མ༵ན་ང༵ག་མཛོ༵ད།།
ཉམས་ལེན་གནད་རྣམས་དྲིལ་ནས་འགྲོ་ལ་སྤེལ།།
༨འོད་གསལ་རྡོ་རྗེ་རྩེ་མོའི་རང་ལུགས་ཀྱི།།
དམ་ཚིག་མདོ་ཆིངས་བཞི་དང་གནས་བཅུ་དྲུག།
རྩ་བ་ལེའུ་ལྔ་པ་གན༵ས་ལུ༵གས་མཛོ༵ད།།
དེ་དོན་ལྷུག་པོར་བརྗོད་པ་རྡོ་རྗེའི་མགུར།།
༩གདོད་ནས་རྣམ་དག་རང་བཞིན་རྫོགས་ཆེན་གྱི།།
ཡེ་སངས་རྒྱས་པའི་དགོངས་དོན་རྗེན་སྟོན་པ།།
ཆོ༵ས་དབྱི༵ངས་མཛོ༵ད་རྩ་ལེའུ་བཅུ་གསུམ་གྱི།།
ཁྲེགས་ཆོད་གདམས་པས་རིག་པ་ཆོས་སྐུར་བསྟན།།
༡༠མཁས་པའི་དབང་པོ་ཀློང་ཆེན་རབས་འབྱམས་ཀྱིས།།
རྒྱལ་བསྟན་སྤྱི་དང་སྔ་འགྱུར་རྙིང་མ་པའི།།
ལྟ་གྲུབ་གསལ་བར་སྟོན་པའི་མཛོད་བདུན་གྱི།།
དགོངས་དོན་ཇི་བཞིན་ཉམས་ལེན་སྙིང་པོར་གདམས།།
༡༡ཐེག་མཛོད་མཁན་ཆེན་ཐུབ་བསྟན་སྙན་གྲགས་དང་།།
གཞན་པའི་མཛོད་དྲུག་ཡོངས་འཛིན་རིན་པོ་ཆེ།།
འཇིགས་མེད་རྟ་མགྲིན་ཡོན་ཏན་མགོན་པོ་ཡིས།།
བརྒྱུད་པ་སངས་རྒྱས་དངོས་ལས་ཉེ་བརྒྱུད་ཡིན།།
༡༢ཀློང་ཆེན་མཛོད་བདུན་ཡོངས་སུ་རྫོགས་པ་འདི།།
ཐེངས་འདིར་ཐོབ་པའི་ཁྲིད་ལུང་རྒྱས་པ་དང་།།
སྒྲ་ཙམ་ཐོས་པའི་ལུང་གི་གོ་ཆོད་ཞེས།།
དཔལ་གྱི་མགུལ་ནས་རྡོ་རྗེའི་ཚིག་གིས་གསུང་།།
༡༣དབང་ལུང་མན་ངག་ཐོབ་པའི་གཏང་རག་ཏུ།།
བླ་མ་ཡང་ཏིག་ཡིད་བཞིན་ནོར་བུ་ཡི།།
ངག་འདོན་དབང་ཆོག་བྱིན་རླབས་དྲོད་འབར་བའི།།
སྨིན་བྱེད་དབང་དང་གྲོལ་བྱེད་གདམས་པ་གནང་།།
༡༤དེ་ལྟར་ཟབ་རྒྱས་ཆོས་ཀྱི་འཁོར་ལོ་ཡིས།།
འགྲོ་ཀུན་རྗེས་སུ་འཛིན་པའི་བཀའ་དྲིན་ནི།།
སྟོང་གསུམ་གསེར་གྱིས་བཀང་ཡང་གཞལ་མིན་ཡང་།།
གདམས་ངག་ཟགས་སུ་མི་འཇུག་ཉམས་སུ་ལེན།།
༡༥མགོན་ཁྱེད་ཚེ་མཐའ་ཡས་པའི་ངོ་བོ་རུ།།
ཇི་སྲིད་འཁོར་བའི་གནས་འདི་མ་སྟོངས་བར།།
དེ་སྲིད་བསྟན་དང་འགྲོ་བའི་དཔུང་གཉེན་དུ།།
སྐུ་ཚེ་བརྟན་ཅིང་མཛད་འཕྲིན་མཐའ་རྒྱས་ཤོག།།
༡༦འགྱུར་མེད་སྐུ་ལ་མཚན་དཔེའི་གཟི་མདངས་རྒྱས།།
ཚངས་དབྱངས་གསུང་གི་ཆོས་སྒྲས་ས་གསུམ་ཁྱབ།།
བརྗོད་བྲལ་ཐུགས་ཀྱི་རྟོགས་པ་མཁའ་དང་མཉམ།།
ཁྱབ་བདག་བླ་མ་བསྐལ་བརྒྱར་ཞབས་བརྟན་ཤོག།
ཅེས་ཕྱི་ལོ༢༠༢༥ཟླ༡༡ཚེས༧བོད་ཤིང་སྦྲུལ་ལོས་ཟླ༩ཚེས༡༧་བླ་གཟའ་སངས་སྐར་ཉིན་ཁྱབ་བདག་བླ་མ་རིན་པོ་ཆེ་སངས་རྒྱས་དངོས་ཀྱི་ཞལ་སྔ་ནས་ཀློང་ཆེན་མཛོད་བདུན་གྱི་ཆོས་ཁྲིད་ཟབ་མོ་ཡོངས་སུ་རྫོགས་པ་ཐོབ་པའི་སྐབས་སུ་ཁོང་གི་བཀའ་དྲིན་ནི་སངས་རྒྱས་ལས་ཀྱང་ལྷག་པ་དང་ཡོན་ཏན་སངས་རྒྱས་ཀུན་དང་མཉམ་པ་ཡིན་པའི་ངེས་ཤེས་སེམས་གཏིང་ནས་སྐྱེས་ཏེ་པདྨ་འཇིགས་མེད་ཕྱོགས་ལས་རྣམ་རྒྱལ་གྱིས་སྨོན་པ་དགེ་བར་གྱུར་ཅིག། །།
༄། ༸ ཁྱབ་བདག་རྫོགས་ཆེན་པདྨ་སྐལ་བཟང་རིན་པོ་ཆེ་ལགས་ཀྱི་ཁྱད་ཆོས་དགུང་སྔོན་དབྱིངས་ཀྱི་འབྲུག་སྒྲ་ཞེས་བྱ་བ།
རྩོམ་པ་པོ། རིག་པའི་ཁུ་བྱུག བླ་བྲང་།
སྟོད་ན་རབ་དཀར་གངས་རི་ཡིད་དུ་འོང་།།
བར་ན་ཚང་ཚིང་གཡུ་ལོའི་ལྗོན་བཟང་བརྗིད།།
འདབས་ན་ཐགས་བཟང་སྤང་ལྗོངས་ཡིད་འཕྲོག་པ།།
རྫོགས་ཆེན་གནས་འདི་ལྷ་ཡི་ཞིང་ཁམས་འདྲ།།
རབ་མཛེས་སྣ་ལྔའི་མེ་ཏོག་མགོ་ལྕོག་ལྡེམ།།
བུང་བ་ཕྱེ་ལེབ་སྒེག་པའི་གར་རྩེ་ཞིང་།།
གཉིས་སྐྱེས་མགྲིན་རྔ་ཐོས་འཛིན་དཔལ་དུ་འཇེབས།།
ཤྭ་རྐྱང་དགོ་བའི་རྩེ་འཇོ་ཅི་ཡང་བགྱིད།།
སྡིག་པའི་མཚན་མའི་མིང་ཡང་མི་གྲགས་ཤིང་།།
དགའ་བའི་དགེ་མཚན་འཛད་པ་མེད་པའི་གནས།།
དེ་ནི་འགྲོ་ཀུན་བརྩེ་བས་དམ་འཁྱུད་པ།།
ཁྱབ་བདག་བླ་མའི་གདན་ས་རྫོགས་ཆེན་པ།།
ཁྱེད་ཀྱི་མཁྱེན་རབ་ནམ་མཁའི་དཀྱིལ་ལྟ་བུ།།
བརྩེ་ཆེན་རྟ་ལྗང་དབང་བོའི་རྗེས་སུ་འགྲོ།།
ནུས་པའི་འགྲོ་ཀུན་འདྲེན་པའི་སེམས་དཔའ་ཆེ།།
དུས་དང་རྣམ་པ་ཀུན་ཏུ་ཕྱག་བགྱིད་དོ།།
ཁྱེད་ཀྱི་གསུང་སྐད་དབྱར་རྔའི་དཔལ་ལ་འཁུ།།
དོན་ལྡན་ལེགས་བཤད་སྦྲང་ཆར་སིལ་མའི་རྒྱུན།།
བདག་ཅག་སྐལ་ལྡན་མདོངས་མཐའི་སྙིང་ལ་ནི།།
རབ་དགའི་དཔལ་ཡོན་སྩོལ་བ་ཐེངས་གཅིག་མིན།།
ལ་ལ་མདོ་ལ་མཁས་ཤིང་སྔགས་ལ་མིན།།
འགའ་ཞིག་སྔགས་ལ་རབ་མཁས་མདོ་ལ་མིན།།
ཁྱེད་ཀྱི་ཐུགས་ལ་མདོ་སྔགས་རིག་གནས་བཅས།།
མ་ལུས་ཀུན་མཁྱེན་སྙིང་ནས་གུས་ཕྱག་འཚལ།།
གཡས་དཀོན་མཆོག་བསམ་གཏན་ནམ་མིང་གཞན་རིག་པའི་ཁུ་བྱུག་གིས་སྤོས་ལྡན་གྲོང་ཁྱེར་ནས་གུས་ཕུལ།
2025 10 13
བཀའ་དྲིན་གསུམ་ལྡན་གྱི་རྩ་བའི་བླ་མ།
རྩོམ་པ་པོ། ལྷག་པ་རྒྱལ། གསེར་རྟ།
སྐུ་སྣང་སྟོང་གི་བྲོ་གར་ཡེར་རེ་བ།།
གསུང་དམ་ཆོས་ཀྱི་རང་སྒྲ་ལྷིང་ངེ་བ།།
ཐུགས་སྤྲོས་མེད་ཀྱི་འོད་གསལ་དྭངས་ངེ་བ།།
སྐུ་གསུམ་རང་ཆས་ཀྱི་ངོ་བོ་རྡོ་རྗེ་འཆང་།།
ནགས་ལྗོན་ཤིང་གིས་འཛུམ་པ་མེར་རེ་བ།།
བྱ་འདབ་ཆགས་བཟླས་བརྗོད་སྙན་ནེ་བ།།
གྲོགས་རི་དྭགས་ཀྱི་རྩེད་མཆོང་ཕྱལ་ལེ་བ།།
བྱིན་རླབས་རང་འཁྱིལ་གྱི་ཁང་བཟང་མཛེས་སྡུག་བཀྲ།།
མཇལ་བ་མི་ཚོགས་ཀྱི་སྤྲིན་དཔུང་འཇིགས་ཡེ་རེར།།
ཐར་འདོན་སྐལ་བཟང་གི་སློབ་ཚོགས་སྤྲོ་ཡ་ལེ།།
ཆོས་ཀྱི་རྔ་ཆེན་གྱི་གདངས་སྒྲ་སྙན་སིང་ངེ་།།
དད་གདུང་མོས་གུས་ཀྱིས་འཇའ་གུར་གཅིག་ཏུ་ཟླུམ།།
མཐའ་མེད་འཁོར་བ་ཡི་མཚོ་རྫིང་ནག་ངམ་མེེར།།
ཆོས་ཀྱི་གྲུ་ཆེན་ལ་མཉམ་འཛོམས་དགའ་ཡ་ལེ།།
སྨིན་བྱེད་དབང་ཆེན་གྱི་རྫོང་བ་ཡིད་ཚིམས་མེར།།
བཀའ་དྲིན་གསུམ་ལྡན་གྱི་རྩ་བའི་བླ་མ་ལགས།།
གནས་བསྟོད་མེ་ལོང་མ།
རྩོམ་པ་པོ། ལྷག་པ་རྒྱལ།
ཉི་ཟླའི་འོད་ཁྱིམ་མདངས་རེ་གསལ།།
སྤྲིན་དཀར་རྔ་ཡབ་བྲེས་རེ་ལེགས། །
འཇའ་ཚོན་མུ་ཁྱུད་ལྷུན་རེ་སྟུག།
བཀྲ་ཤིས་དགེ་བའི་ལྟས་རེ་བཟང་།།
རབ་དཀར་གངས་རི་བརྗིད་རེ་ཆེ།།
ནགས་ཀྱི་དོ་ཤལ་ངོ་རེ་མཚར།།
མཚོ་དང་མཚེ་འུ་སྒྲོས་རེ་གཙང་།།
རང་བྱུང་སྤང་ཐང་ལྗོངས་རེ་ཡངས།།
ཤྭ་དང་ཤེ་འུས་གར་རེ་རྩེད། །
བྱ་དང་བྱེ་འུ་འཕུར་རེ་མྱུར།།
རི་སྐྱེས་སྲོག་ཆགས་བག་རེ་ཕེབ།།
དེ་འདུན་སྐྱེ་བོའི་སེམས་རེ་ཡག།
མ་བསྟར་མེ་ཏོག་ཕྲེང་རེ་འགྲིག།
མ་བཀྲོལ་ཕུ་ཆུའི་དབྱངས་རེ་སྙན།།
མ་བོས་སློབ་ཚོགས་རྒྱ་རེ་ཆེ།།
དགོན་དང་རི་ཁྲོད་བཀོད་རེ་ལེགས།།
བསྟན་འཛིན་ངང་མོའི་ཚོགས་རེ་འཕེལ།།
བཤད་སྒྲུབ་ཆོས་ཀྱིས་བསྐྱངས་རེ་ལེགས།།
ཆོས་ཀྱི་རྔ་ཆེན་བརྡུང་རེ་མཁས།།
བསྟན་པའི་རྒྱལ་མཚན་འཛིན་རེ་ཤེས།།
ཁྱབ་བདག་བླ་མ་བྱིན་རེ་ཆེ།།
ཀློང་ཆེན་མཛོད་བདུན་གཞུང་རེ་བཟང་།།
བདག་ཀྱང་བསོད་ནམས་དཔངས་རེ་མཐོ།།
སྐལ་བཟང་གདུལ་བྱ་ལས་རེ་དག།
༢༠༢༥-༨-༡༣ ཉིན་གཡུ་རྒྱལ་ཁང་ཚན་གྱི་རང་ཤག་ནས་བྲིས་པའོ། །
༈ ཁྱབ་བདག་རྫོགས་ཆེན་པ།
རྩོམ་པ་པོ། རྩེ་སྨྱུག་དཀར། རྨ་ལྷོ།
བགྲེས་པའི་རྒུད་པ་མ་མཆིས་པའི། །
མི་ཤིགས་རྡོ་རྗེ་སྐུ་ལ་འདུད། །
བབ་ཅོལ་ངག་ཀྱལ་མི་མངའ་བའི། །
ཆོས་དབྱངས་ལྷུན་གྲུབ་གསུང་ལ་འདུད། །
རྟོག་བཏགས་འཁྲུལ་བ་མ་མཆིས་པའི། །
ཡེ་ཤེས་གཉུག་མའི་ཐུགས་ལ་འདུད། །
དེ་ལྟའི་སྐུ་གསུང་ཐུགས་མངའ་བའི། །
ངེས་གསང་རྫོགས་ཆེན་རྣལ་འབྱོར་བ། །
བགྲང་ཡས་ཐོས་པའི་རྒྱ་མཚོའི་གོས། །
གོམ་སྟབས་གཅིག་གིས་རྫོགས་པར་མཇལ། །
མཐའ་མེད་བསམ་པའི་ཆུ་གཏེར་འབུམ། །
ཧུབ་གཅིག་གིས་ནི་ལྷག་མེད་བཞེས། །
ཀློང་ཡངས་སྒོམ་པའི་ནམ་མཁའི་ཁྱོན། །
བཞུགས་སྟངས་གཅིག་གིས་ཁོངས་སུ་དྲངས། །
དེ་ལྟའི་ཐོས་བསམ་སྒོམ་མངའ་བའི། །
ཁྱབ་བདག་བླ་མ་རྫོགས་ཆེན་པ། །
ངོ་མཚར་སྟོང་གི་བརྗོད་པའི་ཚུལ། །
གཅིག་ཏུ་ཟླུམ་པར་འཆད་པས་རྒྱལ། །
འགྲན་གྱི་དོ་མེད་རིགས་པའི་དབལ། །
ཕྲ་མོ་ཡིས་ཀྱང་རྒོལ་ཀུན་འཇོམས། །
རིག་པའི་ཀློང་ལས་རྡོལ་བ་ཡི། །
རིན་ཆེན་རྩོམ་རྣམས་ཐང་མར་བསྐྱིལ། །
དེ་ལྟའི་འཆད་རྩོད་རྩོམ་མངའ་བའི། །
ངེས་གསང་རྫོགས་ཆེན་རྣལ་འབྱོར་བ། །
རིམ་དགུའི་ཐེག་པ་མ་ལུས་པའི། །
རང་ལུགས་གནད་ཀུན་འབྱིན་པར་མཁས། །
བསླབ་པའི་འགལ་མཚམས་ཕྲ་མོ་ཡང་། །
མིག་བཞིན་གཅེས་པར་སྲུང་བས་བཙུན། །
རིང་ནས་རྣམ་ཀུན་མཇལ་བ་ལ། །
ཞི་འཛུམ་འགྱུར་བ་མེད་པས་བཟང་། །
དེ་ལྟའི་མཁས་བཙུན་བཟང་མངའ་བའི། །
ཁྱབ་བདག་བླ་མ་རྫོགས་ཆེན་པ། །
ཞེས་བོད་ཤིང་མོ་སྦྲུལ་ལོར་ ༧ ཁྱབ་བདག་བླ་མ་རིན་པོ་ཆེ་མཆོག་གིས་ཀློང་ཆེན་མཛོད་ཆེན་བདུན་གྱི་ཁྲིད་ལུང་གདམས་པ་ཟབ་མོ་གནང་བའི་སྐབས་ཏེ་2025.11.5 ཉིན་རྫོགས་ཆེན་པདྨ་ཐང་ནས་བྲིས་པའོ། །
༄༅། །དད་གསུམ་ལྡོག་མེད་རང་སྒྲ་སྙན་ཚིག་མུ་ཏིག་འཕྱང་འཕྲུལ།
རྩོམ་པ་པོ། རང་མདངས། དཔལ་ཡུལ།
ལྷ་མཆོག་མ་ཧཱ་གུ་རུའི་ཐུགས་རྗེ་ཡིས་ཉེར་བསྐྲུན། །
རུ་དམ་ཆོས་ཀྱི་འབྱུང་གནས་བདེ་ཆེན་གྱི་ཞིང་ས། །
ངོ་མཚར་མཚན་དཔེའི་མེ་ཏོག་ལྷུག་པོ་རུ་གྲོལ་བའི། །
ཡིད་འཕྲོག་དང་བ་འདྲེན་པའི་ཁྱབ་བདག་པར་འདུད་དོ། །
ཡ་མཚན་མཚན་དཔེའི་ལང་ཚོ་མངོན་སུམ་དུ་གསལ་ཞིང་། །
ཞལ་གསུང་ཆོས་ཀྱི་སྒྲ་དབྱངས་ལྷང་ངེ་རུ་འཇེབས་དུས། །
བུ་ང་ཁྱེད་ཞབས་རེག་པའི་སྐལ་བཟང་གི་བསོད་ནམས། །
ཚེ་རབས་བརྒྱ་ཕྲག་བགྱིས་པའི་དགེ་རྩ་ཡིས་མི་མཚོན། །
གནམ་སའི་ཁྱོན་ཡངས་སྒུལ་འདྲའི་མཚན་སྙན་གྱིས་གྲགས་ཤིང་། །
མཁས་རློམ་བརྒྱ་ཕྲག་བགྱིས་ཀྱང་ཁྱེད་ཉིད་ཀྱི་མཚན་དཔེའི། །
ཡོན་ཏན་ཅུང་ཟད་ཙམ་ཡང་འགྲན་པ་ལ་ངལ་བས། །
སེམས་ཀྱི་ཡིད་བཞིན་ནོར་བུ་ཁྱེད་རང་ལས་ལྷག་མེད། །
བླ་མའི་ཞལ་རས་ཟླ་དཀར་འོད་སྣང་གི་བྱིན་མཐུས། །
དད་གུས་ལྟེམ་རྐྱང་མེད་པའི་མེ་ཏོག་གི་ལང་ཚོ། །
དད་པའི་མིག་ཆུ་འཁྲུགས་པའི་བརྗོད་བྲལ་གྱི་ཚོར་དུས། །
བླ་མ་ལྷ་བས་ལྷག་པའི་དད་འདུན་དེ་ཆེ་བྱུང་། །
ཤེས་བྱའི་རྒྱུ་སྐར་བཀྲ་བའི་ལྔ་ཟུང་གི་དགའ་ཚལ། །
བརྩོན་འགྲུས་ཆེན་པོས་བསྐྱལ་བའི་ཕུལ་བྱུང་གི་སློབ་མས། །
མི་ཚེའི་འདུན་མ་འགྲིག་པའི་སྤོབས་པ་དེ་མེད་ཀྱང་། །
ཁྱབ་བདག་བླ་མ་མཇལ་བའི་སྐལ་བཟང་འདིས་ཚིམས་ཡོད། །
ཡར་གིའི་དབེན་པར་སྒྲུབ་པའི་རྣལ་འབྱོར་ཞིག་ཡོད་སྐད། །
མར་ཀིའི་ན་རག་སྐྱོབ་པའི་སངས་རྒྱས་ཤིག་མཐོང་སྐད། །
མཐོང་ཐོས་དྲན་པའི་ཡུལ་ལ་བཙན་དད་རེ་བཅུག་ཀྱང་། །
བདག་ནི་སྐྱེས་ཆེན་ཁྱེད་ལས་རེ་ས་དེ་མི་བྱེད། །
སྐུ་ཡི་ཟུར་ཙམ་བརྗོད་ལ་ཚིག་ཚོགས་ཀྱིས་མི་མཚོན། །
གསུང་གི་ཆེ་བ་བརྗོད་ལ་འཛད་མཐའ་ཞིག་མེད་ན། །
ཐུགས་ཀྱི་གསང་གནད་དཀྲོལ་ལ་ངལ་བ་དེ་སྨྲོས་ཅི། །
དེ་ཕྱིར་སྐུ་གསུང་ཐུགས་ལ་ལྡོག་མེད་ཀྱིས་དད་དོ། །
རི་མོར་མཁས་པས་མ་བྲིས་རང་ཞལ་གྱི་འཛུམ་མདངས། །
བཟོ་བོར་མཁས་པས་མ་བྱས་ཁྱེད་སྐུ་ཡི་བརྗིད་ཉམས། །
རོལ་མོར་མཁས་པས་མ་སྒྲིག་ཁྱེད་གསུང་གི་ཆེ་བ། །
སྙན་ཚིག་མཁས་པས་མ་བཅོས་རང་བཞིན་གྱི་ལང་ཚོ། །
དྲན་པའི་ལོ་ཟླ་མི་གླེང་བག་མེད་ཀྱིས་རྫོགས་ཤིང་། །
འདས་ཟིན་བྱས་པ་མི་གླེང་ཁྲེལ་མེད་ཀྱིས་རྫོགས་ཀྱང་། །
གསང་གསུམ་ཡོན་ཏན་བསྡུས་པའི་རྣལ་འབྱོར་པ་ཆེན་པོར། །
དུས་ཀུན་རོལ་བའི་ནོམ་པས་ཞེ་འགྱོད་ཅིག་མི་འདུག །
ཤར་ཟླའི་འཛུམ་དཀར་དེ་ཡིས་དང་བ་རང་འདྲེན་ལ། །
ནང་སེམས་སྐྱོ་བའི་ངལ་དུབ་ཞིབ་མོ་རུ་གཏོང་བའི། །
འདྲེན་མཆོག་ཁྱབ་བདག་བླ་མའི་སྐུ་བརྗིད་ཀྱི་ཟུར་ཙམ། །
མཇལ་བའི་སྐལ་བཟང་འདིས་ཀྱང་བདག་སེམས་ནི་མགུ་ཡོད། །
ཀ་དག་འོད་གསལ་གདིང་ལ་མཉམ་བཞག་གིས་རོལ་མཁན། །
ཡེ་གྲོལ་གདོད་མའི་གཤིས་ལ་གཟིགས་སྟངས་དེ་མཛད་མཁན། །
མ་གྲོལ་འགྲོ་བའི་དོན་ལ་ཐབས་ཤེས་ཀྱིས་སྐྱོབ་མཁན། །
སློབ་དཔོན་སངས་རྒྱས་གཉིས་པའི་མཛད་པ་ལ་རོལ་མཁན། །
རིས་མེད་བསྟན་པའི་འཁོར་ལོ་ཁྱེད་ཉིད་ཀྱིས་བསྐོར་ཞིང་། །
ཕྱོགས་མེད་འགྲོ་བའི་དོན་སྒྲུབ་ཁྱེད་ཉིད་ཀྱིས་མཛད་ལ། །
ཤེས་མེད་བློ་ཡི་གཏེར་ཁ་ཁྱེད་ཉིད་ཀྱིས་འབྱེད་པས། །
ས་འདིའི་མཁས་པའི་སྙན་པ་ཁྱེད་ཉིད་ཙམ་ཐོབ་འོས། །
གཟུར་གནས་བློ་གྲོས་མིག་སྒོ་མཁའ་དབྱིངས་ལ་ཅེར་བཞིན། །
ཐུགས་བརྩེའི་ཉིན་བྱེད་འོད་དཀར་ཕྱོགས་མེད་དུ་གཟིགས་པའི། །
རུ་དམ་དྲང་སྲོང་ཆེན་པོ་ཁྱབ་བདག་གི་བླ་མར། །
སྒོ་གསུམ་གུས་པས་མི་འདུད་རང་དབང་ནི་ཅི་ཞིག །
ང་ཁྱོད་མཚན་མའི་དྲུང་ན་གུད་གུད་དུ་རྒྱུ་ཞིང་། །
ཡོད་ཡོད་ཆོས་ཀུན་རྙེད་པའི་བདེན་སྣང་དུ་རློམ་མཁན། །
སྐྱབས་མེད་སྐྱབས་ཀྱི་དྭངས་མར་ཁྱེད་ཉིད་ཙམ་བཞུགས་ནས། །
ཕན་བདེའི་དགེ་ལེགས་སྟོང་གི་བྱིན་རློབས་ཤིག་ཞུའོ། །
འདིས་མཚོན་དུས་གསུམ་བསགས་པའི་རྣམ་དཀར་གྱི་དགེ་འབྲས། །
གསང་གསུམ་ཡོན་ཏན་དཔལ་ལ་མཁྱེན་རྒྱ་རང་ཡངས་པའི། །
ཡེ་གསང་རྫོགས་པ་ཆེན་པོའི་ཉམས་གླུ་དེ་ལེན་མཁན། །
ཡང་ཡང་མཇལ་བའི་དོད་དུ་སྙན་ཚིག་འདི་ཕུལ་ལོ། །
ནང་སེམས་ཚིག་གིས་མཚོན་པའི་ཀ་ཁ་ཡི་མགུར་མ། །
རྩོམ་རིག་སྨྲ་བའི་ཡུལ་ན་སྙན་འཇེབས་ཤིག་མིན་རུང་། །
བདག་སེམས་དད་པའི་མེ་ཏོག་རང་བྱུང་གི་མཛེས་པ། །
ཕྱག་ཟུང་སོར་རྩེའི་བར་ནས་ཡིད་འོང་གིས་བཀྲམ་ཡོད། །
ཅེས་དད་གུས་ལྟེམ་རྐྱང་མེད་པའི་བཀྲ་མིང་པས་༢༠༢༥ ལོར་སྟོན་མཇུག་དེར་ཁྱབ་བདག་རྫོགས་ཆེན་པ་པདྨ་སྐལ་བཟང་མཇལ་བའི་མྱོང་སྣང་ཡིག་གཟུགས་སུ་བཏབས་པའོ། །
རྩོམ་སྒྲིག་པ། དོན་འགྲུབ་རྡོ་རྗེ།