༄༅། །ཧྲཱིཿ ཚངས་པའི་ཡིད་ཀྱི་སྲས་མོ་ནི། །རོལ་བའི་མཚོ་ཆེན་ལས་བྱུང་བ། །ཟླ་ལྟར་དཀར་བའི་ཞལ་མངའ་མ། །དབྱངས་ཅན་ལྷ་མོར་ཕྱག་འཚལ་བསྟོད། །རིག་བྱེད་གསང་ཚིག་འཛད་མེད་གཏེར། །དེ་བཞིན་གཤེགས་གསུང་ཆོས་ཕུང་ཆེ། །འཆི་མེད་ལམ་ཡང་མཐར་ཁྱབ་བྱེད། །དབྱངས་ཀྱི་ལྷ་མོར་གུས་པས་འདུད། །ཏམ་བུ་ར་ལ་འཁྱུད་བྱས་ཏེ། །སོར་རྩེས་དལ་གྱིས་བསྒྲེངས་བ་ཡིས། །འཇིག་རྟེན་འདས་དང་མ་འདས་ཀུན། །ཡིད་ཀྱི་བརྟན་པ་འཕྲོག་ལ་འདུད། །ངེས་དོན་ཤེས་རབ་ཕ་རོལ་ཕྱིན། །རྣམ་པ་ལྷ་མོའི་གཟུགས་སུ་བསྒྱུར། །ངོ་མཚར་སྒྱུ་འཕྲུལ་བསམ་མི་ཁྱབ། །ས་བཅུ་དབང་ཕྱུག་ཆེན་མོར་འདུད། །དེ་བཞིན་གཤེགས་ཀུན་རྗེས་ཆགས་ཀྱིས། །ཡེ་ཤེས་སྤྱན་གྱིས་ཟུར་མདའ་གཡོ། །སྙོམས་ཞུགས་བདེ་ཆེན་མཆོད་སྤྲིན་བསྟོད། །དགྱེས་ཡུམ་ཆེན་མོར་གུས་པས་འདུད། །བློ་ལྡན་གང་གི་མགྲིན་སྙིང་ལ། །ཞུགས་པ་དེ་ཡི་མོད་ཉིད་དུ། །སྨྲ་བའི་དབང་ཕྱུག་ཆེན་པོར་བསྒྱུར། །བློ་གྲོས་མཆོག་སྩོལ་མ་ལ་འདུད། །དེ་ལྟར་བསྟོད་པའི་བྱིན་རླབས་ཀྱིས། །བདག་ཡིད་དད་པའི་འོ་མཚོར་རུ། །བཞུགས་ནས་མཁྱེན་གཉིས་ཡེ་ཤེས་ཀྱི། །སྣང་བ་ཆེན་པོ་སྩལ་དུ་གསོལ། །
ཨོཾ་པི་ཙུ་པི་ཙུ་པྲ་ཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷི་ཝརྡྷ་ནི། དྷི་རི་དྷི་རི་བུདྡྷི་ཝརྡྷ་ནི་སྭཱ་ཧཱ། ། ཞེས་བཟླས་བློ་གྲོས་འཕེལ་བ་བྱེད། །
ཅེས་པའང་རྗེ་དབོན་བསམ་གཏན་སྤྲུལ་སྐུ་རིན་པོ་ཆེས་རྟེན་བཅས་གསུང་གིས་བསྐུལ་ངོར་འཇམ་དབྱངས་ཆོས་ཀྱི་བློ་གྲོས་ནས་དཔལ་སྤུངས་ཡིད་དགའ་ཆོས་འཛིན་དབྱངས་ཅན་གྲུབ་པའི་དགའ་ཚལ་དུ་བྲིས་པ་དགེ་ལེགས་འཕེལ།
རྩོམ་སྒྲིག་པ། དོན་འགྲུབ་རྡོ་རྗེ།