སྤྲིན་པའི་ཚལ་དུ་ཟླ་བའི་གཟུགས་བརྙན་འཆར།།
པད་མའི་ཚལ་དུ་ཨུཏྤལའི་འཛུམ་མདངས་ངོམ།།
གེ་སར་དབུས་སུ་དབྱངས་ལྷའི་འགྱུ་བ་འཁྲུངས།།
འཇིག་རྟེན་འཁོར་གྲོང་འདི་ལ་མཚར་སྡུག་ལྡན།།
ཚིག་རྒྱན་གསར་བའི་འདབ་མ་དལ་གྱིས་འཛུམ།།
ཟླ་འོད་འོག་ཏུ་རོལ་དབྱངས་སྙན་ཞིང་འཇེབས།།
རྟག་མེད་བཞུར་རྒྱུན་སྟོན་ཀའི་གཞུང་ན་ཟགས།།
བརྒྱད་པའི་སྟོན་གྱི་མཚན་གཞུང་འཇམ་ལྷོད་པ།།
ཞི་དུལ་དགོན་པའི་འདུ་ཁང་ལྷིང་འཇགས་ཅན།།
ནུབ་ཁའི་ཉི་འོད་གསེར་མདངས་གངས་ལ་ཕོག།
གངས་ཀྱི་བུ་ཡུག་གསེར་གྱི་མདངས་སུ་ཆགས།།
དོ་ནུབ་ཟླ་གཞོན་གཟུགས་བརྙན་མཚོ་ལ་ལྷུང་།།
རླབས་ཀྱི་ཕྲེང་བས་འོད་ཟེར་གཡོ་བར་གནང་།།
སྟོན་གྱི་སྣང་བརྙན་དབེན་པའི་གནས་སུ་ཐིམ།།
སེར་མདོག་ངོམ་པས་ཁོར་ཡུག་སྔར་ལས་ཡག།
ཟླ་བ་གསལ་བས་མཚོ་ངོགས་སྔར་ལས་མཛེས།།
མཚོ་ཡི་འགྲམ་དུ་ཁྲུང་ཁྲུང་བག་ཕེབས་བགྲོད།།
ཕན་ཚུན་སྨྲ་བའི་སྙིང་གཏམ་ཤུབ་ཤུབ་གྲགས།།
ནུབ་ཁའི་ཉི་འོད་གངས་རྒན་དབུ་ནས་འཛུམ།།
ཟླ་བ་གསལ་བས་གཙང་བོ་སྔར་བཞིན་མཛེས།།
མཛེས་པའི་ཁམས་ལ་སྐར་མས་བྲོ་གར་འཁྲབ།།
དབྱར་གཞུང་མ་མཐོང་མི་ལོ་དྲུག་བདུན་ཡིན།།
དཔྱིད་ཙམ་བརྒལ་བའི་སྟོན་གཞུང་ལོག་པ་ལ།།
དབྱར་ཟླ་ར་བའི་འཛུམ་མདངས་སུ་ཡིས་རྐུས།།
སླར་ཡང་སྤྲིན་ལ་ཞུགས་ནས་ལོག་པར་འདོད།།
སྐྱིད་ན་འཛུམ་དཀར་སྟོན་ས་དབྱར་གཞུང་སྟེ།།
སྡུག་ན་སྨྲེང་ངག་འདོན་ས་དབྱར་གཞུང་ཡིན།།
ཆུང་ཆུང་བྱིས་དུས་ལྟ་བུའི་དབྱར་གཞུང་དྲན།།
རྩོམ་སྒྲིག་པ། དོན་འགྲུབ་རྡོ་རྗེ།