༄༅། །ཨེ་མ་ཧོ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །གསང་གསུམ་ཐུགས་རྗེས་ཆོས་ཀྱི་འཁོར་ལོ་བསྐོར། །བཞི་བཅོམ་དྲུག་ལྡན་གཉིས་འདས་ཤཱཀྱའི་སྲས། །ཐུབ་དབང་དོན་ཀུན་གྲུབ་པས་དགེ་ལེགས་སྩོལ། །མཁན་སློབ་ཆོས་གསུམ་གཏེར་སྟོན་བརྒྱ་རྩ་བཅས། །མདོ་སྒྱུ་སེམས་གསུམ་རྒྱུད་ལུང་མན་ངག་གི། །བཀའ་གཏེར་དག་སྣང་སྨིན་གྲོལ་ལུང་གི་མཛོད། །གང་ན་སུ་བཞུགས་རིས་མེད་བསྟན་པའི་རྒྱན། །ཇོ་འབྲོམ་ཁུ་རྔོག་འཇམ་མགོན་ཙོང་ཁ་པ། །བཀའ་གདམས་གསར་རྙིང་བྱང་ཆུབ་ལམ་སྔགས་སོགས། །མདོ་རྒྱུད་མན་ངག་ལེགས་བཤད་འབྱུང་བའི་གཏེར། །གང་ན་སུ་བཞུགས་རིས་མེད་བསྟན་པའི་རྒྱན། །གྲུབ་ཆེན་ཏེ་ལོ་ནཱ་རོ་མཻ་ཏྲི་ནས། །མར་མི་དྭགས་གསུམ་བརྒྱུད་པའི་ཕྱག་ཆེན་གྱི། །ཐབས་གྲོལ་ལམ་གྱི་ཆེ་བ་འབྱིན་པ་པོ། །གང་ན་སུ་བཞུགས་རིས་མེད་བསྟན་པའི་རྒྱན། །གྲུབ་ཆེན་བིར་ཝ་ས་སྐྱ་གོང་མ་ནས། །ངོར་རྫོང་ཚར་གསུམ་མཁས་གྲུབ་གསེར་རིའི་ཕྲེང་། །འཁོར་འདས་དབྱེར་མེད་ལམ་འབྲས་བརྒྱུད་པའི་སྲོལ། །གང་ན་སུ་བཞུགས་རིས་མེད་བསྟན་པའི་རྒྱན། །རིགས་ལྡན་པད་དཀར་ཆོས་རྒྱལ་ཟླ་བཟང་ནས། །ཀུན་མཁྱེན་དོལ་བོ་ཏཱ་ར་ན་ཐ་སོགས། །ཐབས་ལམ་སྦྱོར་དྲུག་དུས་ཀྱི་འཁོར་ལོའི་རྒྱུད། །གང་ན་སུ་བཞུགས་རིས་མེད་བསྟན་པའི་རྒྱན། །རྒྱ་གར་དམ་པ་མ་ཅིག་ལབ་སྒྲོན་ནས། །ཤེར་ཕྱིན་ཉམས་ལེན་ཟབ་ཆོས་ཞི་བྱེད་གཅོད། །ཤངས་པ་བཀའ་བརྒྱུད་རྡོ་རྗེ་བསྙེན་སྒྲུབ་བཅས། །གང་ན་སུ་བཞུགས་རིས་མེད་བསྟན་པའི་རྒྱན། །གངས་ཅན་སྒྲུབ་བརྒྱུད་ཤིང་རྟ་བརྒྱད་རྣམས་ཀྱི། །རྨད་བྱུང་ཟབ་ཆོས་ཡིད་བཞིན་ནོར་བུའི་གཏེར། །བསྟན་འགྲོའི་རྒུད་པ་རྨང་ནས་གསོ་བའི་ཕྱིར། །རང་གཞན་ཡོངས་ཀྱིས་རྒྱལ་མཚན་རྩེ་མོར་མཆོད། །མདོར་ན་སྟོན་པ་མཆོག་གི་བསྟན་པ་ཉིད། །གངས་ཅན་བཤད་སྒྲུབ་བཀའ་བབས་བཅོ་བརྒྱད་པོ། །མ་གཅིག་སྤུན་ལས་ལྷག་པའི་མཐུན་སྒྲིལ་གྱིས། །རྒྱལ་བསྟན་ཡུན་དུ་གནས་ན་ཅི་མ་རུང་། །ཀྱེ་མ་ལྔ་བདོ་སྙིགས་མའི་དུས་སྐབས་འདིར། །བསྟན་འཛིན་རྣམས་ཀྱིས་བསྟན་པ་རིན་པོ་ཆེ། །ཕྱོགས་དུས་ཀུན་ཏུ་འཛིན་སྐྱོང་སྤེལ་གསུམ་ཉིད། །སྲོག་བཞིན་གཅེས་པའི་རེ་འབྲས་དོན་སྨིན་ཞུ། །ཞེས་སྔ་འགྱུར་བཀའ་གཏེར་མན་ངག་གིས་མཚོན་པའི་སྒྲུབ་བརྒྱུད་ཤིང་རྟ་བརྒྱད་དང་བཅས་པའི་ཐུན་མིན་སྙན་བརྒྱུད་ཀྱི་གདམས་པ་ཡོངས་ཀྱ་ིསྨིན་གྲོལ་ལུང་གི་བདུད་རྩིས་ཡིད་ཚིམ་བཞིན། གྲུབ་དབང་རྒྱལ་བ་རྫོགས་ཆེན་པའི་གདན་ས་པདྨ་ཐང་གི་གཙུག་ལག་ཁང་ཆེན་མོར་༸ཁྱབ་བདག་བླ་མ་མཆོག་ནས་རྫོགས་ཆེན་སྙན་བརྒྱུད་ངོ་མཚར་ནོར་བུའི་མེ་ལོང་གི་དབང་ལུང་ཁྲིད་གསུམ་དང་། རྫོགས་ཆེན་ཡིད་བཞིན་ནོར་བུའི་ཐུགས་བསྐྱེད་བླ་ན་མེད་པའི་་བཀའ་དྲིན་ལ་བརྟེན་ནས་ཞབས་དཀར་མཆོག་སྤྲུལ་ཨྱོན་འཇིགས་མེད་བསྟན་པའི་རྒྱལ་མཚན་ཉིད་ནས་རྫོགས་ཆེན་རིན་པོ་ཆེ་དཔལ་བཟང་བོ་ཉིད་དང་ཕྱོགས་ཀྱི་མཁན་སྤྲུལ་འགའ་ལ་ཞབས་དཀར་གསུང་འབུམ་པོད་ཉེར་ལྔའི་ལུང་ཆ་ཚང་འབུལ་སྐབས། གྲུབ་དབང་རྫོགས་ཆེན་ཡབ་སྲས་ཀྱི་ཞབས་རྡུལ་སྤྱི་བོས་ལེན་པའི་བཀའ་འབངས་སུ་གཏོགས་པའི་བྱ་བྲལ་རིག་པ་འཛིན་པ། ཡུལ་རེབ་ཀོང་གཅན་ཚ་མདའ་མོ་གཡང་རྫོང་གི་ཨ་བུ་ཀརྨའི་མིང་གིས་ལྷག་བསམ་བཟང་བོས་སེམས་བསྐྱེད་དང་བཅས་རྩོད་བྲལ་དུས་བབས་ཀྱི་ཟབ་ཆོས་རིན་པོ་ཆེ་འདི་ཉིད་ནམ་མཁའ་མ་འཇིག་འཁོར་བ་མ་སྟོངས་ཀྱི་བར་དུ་འཛིན་སྐྱོང་སྤེལ་གསུམ་བྱེད་ནུས་ན་ཅི་མ་རུང་སྙམ་པས་རབ་ཏུ་དགའ་ཞིང་སྤྲོ་བཞིན་རྫོགས་ཆེན་ཕོ་བྲང་ཕྱོགས་ལས་རྣམ་པར་རྒྱལ་བའི་ཁང་བརྩེགས་ཆེན་མོར་བོད་མེ་རྟ་ལོའི་སྣྲོན་ཟླའི་ཡར་ཚེས་ལ་སྦྱར་བ་ཕྱོགས་དུས་ཀུན་ཏུ་འབྲེལ་ཚད་དོན་ལྡན་ཡོངས་སུ་དགེ་བར་གྱུར་ཅིག །
རྩོམ་སྒྲིག་པ། དོན་འགྲུབ་རྡོ་རྗེ།