གནམ་སྔོན་དབྱིངས་སུ་ཆར་སྤྲིན་ཉེར་མཛེས་དེ་ཡི་དབུས་ན་འབྲུག་སྒྲ་སྙན།།
དབྱར་རྔའི་སྒྲ་ཡིས་སྙིང་ལ་དགའ་བསྐྱེད་རྨ་བྱའི་བུ་མོས་རྩེད་འཇོ་བཞིན།།
དེ་རིང་བཀྲ་ཤིས་ཉིན་བཟང་དུས་འདིར་ཁྱབ་བདག་བླ་མ་རྫོགས་ཆེན་པའི།།
འཁྲུངས་སྐར་ཡིན་ཞེས་ལྷ་དང་མི་ཡིས་བཀྲ་ཤིས་དབྱངས་སྙན་མེ་ཏོག་འཐོར།།
སྔ་འགྱུར་བསྟན་པའི་ཆུ་མགོ་གངས་ལ་ཐུག།
གངས་རི་རབ་དཀར་རྒྱུད་ནས་ལེགས་འོང་བའི།།
སློབ་དཔོན་པདྨ་ཀ་རའི་སྙིང་བཅུད་ཀུན།།
ཁྱེད་ཀྱིས་མ་ལུས་སློབ་ཚོགས་ཅི་ཡང་སྤེལ།།
ཚངས་སྤྱོད་འདུལ་ཁྲིམས་འཕགས་པ་རྟ་ཐུལ་དངོས།།
འགྲན་བྲལ་རྒྱལ་སྲས་སྤྱོད་པའི་སྙིང་སྟོབས་རྫོགས།།
མདོ་སྔགས་རབ་འབྱམས་མཁྱེན་པའི་གདོང་ལྔ་བ།།
ཁྱབ་བདག་རྫོགས་ཆེན་པ་ཡི་འཁྲུངས་སྐར་བསུ།།
འདིར་སྣང་སྒྱུ་མའི་སླུ་བྲིད་ལེགས་རྟོགས་ནས།།
འདོད་ཆུང་ཆོག་ཤེས་གོང་མའི་རྣམ་ཐར་འཛིན།།
གཞུང་ལུགས་རབ་འབྱམས་སྨྲ་བའི་རྫོགས་ཆེན་པ།།
དེ་རིང་ཁྱེད་ཀྱི་འཁྲུངས་སྐར་དགའ་བས་བསུ།།
དམ་པ་ཁྱེད་ཀྱི་ཐུགས་ཡིད་འོ་མཚོ་ལས།།
ལེགས་འཁྲུངས་ཟབ་དོན་ལེགས་བཤད་པད་དཀར་ལྗོན།།
སྐལ་ལྡན་བློ་གསལ་རྐང་དྲུག་སྦྲང་རྩིའི་བཅུད།།
རོལ་བས་ཡིད་དག་རབ་དགས་ཅི་ཡང་མྱོས།།
ལྷོ་སྤྲིན་ཕྱུག་མོའི་ལྟོ་བར་ལེགས་རྩེན་པའི།།
དབྱར་སྐྱེས་རྔ་གསང་ཁོངས་ནས་རྒོད་པ་བཞིན།།
ཁྱབ་བདག་བླ་མ་ཁྱེད་ཀྱི་མཛད་འཕྲིན་དཀར།།
འཛམ་གླིང་ཐ་གྲུ་ཡངས་པོར་ཁྱབ་གྱུར་ཅིག།
མགོ་ལོག་གཡས་དཀོན་མཆོག་བསམ་གཏན་ནམ་མིང་གཞན་རིག་པའི་ཁུ་བྱུག་གིས་དེ་རིང་ཁྱབ་བདག་བླ་མ་རྫོགས་ཆེན་པདྨ་སྐལ་བཟང་མཆོག་གི་འཁྲུངས་སྐར་ལ་ཤིས་ཚིག་གི་ཚུལ་དུ་བླ་བྲང་བཀྲ་ཤིས་འཁྱིལ་གྱི་ཉེ་འདབས་ཤེས་རིག་འདོད་འཇོ་གླིང་ནས་གུས་ཕུལ།
ཕྱི་ལྟར་ཁྲིམས་ལྡན་དགེ་སློང་ཞི་དུལ་ཅན།།
ནང་དུ་བྱང་ཆུབ་སེམས་མཆོག་རང་་དབང་འབྱོར།།
གསང་བ་རིམ་གཉིས་གནད་ཀྱི་དེ་ཉིད་རྟོགས།།
སྐྱབས་རྗེ་ཁྱབ་བདག་མགོན་པོ་སྙིང་ནས་དད།།
རྩོམ་སྒྲིག་པ། དོན་འགྲུབ་རྡོ་རྗེ།