༄༅།།སྲིད་པའི་ལྷ་གཉན་ཆེན་པོ་རྨ་རྒྱལ་སྦོམ་རའི་གནས་བསྟོད་མུ་ཏིག་ནོར་བུའི་འཁྲི་ཤིང་།
ཟླ་གཞོན་བྱེ་བའི་ལང་ཚོ་ཟིལ་གནོན་པའི།།
དཀར་མཛེས་བརྗིད་ཆགས་ཡིད་འོང་ཀེེ་ལ་ཤ།
སྲིད་པའི་ཏོག་ཏུ་འགྲེང་བའི་ལྷ་གཉན་ཆེ།།
བསྟན་སྲུང་རྨ་རྒྱལ་སྦོམ་རའི་དབུ་འཕང་བསྟོད།།
ཤེལ་དཀར་རྡུལ་མང་བརྩེགས་པའི་ལྷུན་པོའི་སྤོར།།
རབ་དཀར་རྩེ་མོ་རྣམ་གསུམ་མཐོངས་སུ་བསྙེགས།།
འཇའ་ཚོན་ན་བུན་རིན་ཆེན་པྲོག་ཞུ་བསྒྲོན།།
ཉི་ཟླའི་ཅོད་པན་རྒྱུ་སྐར་དོ་ཤལ་འཕྱང་།།
མི་བཟད་སྒྲ་བརྒྱ་གླལ་བའི་ཁ་ཕྲུ་ལས།།
ཟགས་པའི་ལྷ་ཆབ་སྦྲང་ཆར་སིལ་མའི་རྒྱུན།།
ཚ་བའི་གདུང་སེལ་བདུད་རྩིའི་དོག་པ་ཅན།།
ཚེ་དཔལ་བསོད་ནམས་འཕེལ་བའི་དཔྱིད་དུ་འཇོ།།
རབ་དཀར་གངས་ལ་ཟླ་ཟེར་ཕོག་པའི་གཟིས།།
རབ་བསིལ་གངས་ཆུ་འཛད་མེད་གངྒཱའི་རྒྱུན།།
རབ་བརྗིད་གངས་སེང་འོ་མར་འདྲེས་པའི་ཆབ།།
རབ་འབྱམས་རྒྱལ་བའི་ཞལ་རླངས་བྱིན་ཆེན་འཐུལ།།
བསྐལ་བ་བྱེ་བར་མནལ་བའི་འཁྱགས་རོམ་ཀློང་།།
རང་བྱུང་ལྷུན་གྲུབ་གངས་ཐིགས་ནོར་བུའི་ཚོམ།།
ནད་གདོན་ཉེར་འཚེ་རབ་གཞིལ་ཨ་མྲྀ་ཏ།།
མཁའ་ཁྱབ་འགྲོ་བའི་བསོད་ནམས་སྐལ་བར་སྨིན།།
རྐེད་པར་རིན་ཆེན་མཆོང་སྨུག་མདངས་འཛིན་པའི།།
གཡའ་བྲག་བང་རིམ་གཡུ་མདོག་ལང་ཚོས་འཁྱུད།།
ལྷ་ཆབ་མུ་ཏིག་དྲ་བ་དྲ་ཕྱེད་རྒྱན།།
འདྲེན་བྱེད་གཟི་འོད་འཕྲོག་པའི་དཔལ་དུ་འཚེར།།
རྩ་བར་གཡུ་ལོའི་ཚང་ཚིང་འཁྲིགས་པའི་ཚལ།།
རྩི་ལྗོན་སྨན་སྣའི་ཟ་འོག་ཐགས་སུ་བཀྲ།།
འདབ་ཆགས་སྐད་སྙན་དྲུག་སྐྱེས་ངེས་བཅིངས་གླུས།།
དྲི་ཟའི་ཚལ་དུ་སླེབས་སྙམ་ཤེས་པ་འཁྲུལ།།
ཉི་ཟེར་ཁུ་བའི་བཅུད་ཀྱིས་ལེགས་སྨིན་པའི།།
གངས་རིའི་གཟེགས་མས་དར་དཀར་བླ་རེ་བྲེས།།
མཚོ་རྫིང་རྦབ་ཆུ་གསེར་དངུལ་གཟི་མདངས་ཅན།།
ཕྱོགས་མཚམས་གཡུ་དཀར་མེ་ལོང་གཟུགས་སུ་འཕོས།།
རྨ་གཡང་ཕྱུག་མོའི་ཁོག་ཆེན་བཅོ་བརྒྱད་ཀྱི།།
རྨ་མེད་རྫ་ཆུའི་ཡལ་འདབ་མཛེས་སྡུག་གིས།།
རྨ་བྱའི་སྒྲོ་གུར་ངོ་མཚར་གཟུགས་ཅན་བཞིན།།
རྨ་རྒྱལ་ལྷ་ཞལ་དགྱེས་པའི་ཡོན་ཆབ་བཤམས།།
མུ་ཏིག་འཁྲི་ཤིང་འོད་ཆགས་སྙིང་རྗེའི་ལྷ།།
སར་སྤྱོད་འཁོར་ལོ་སྡོམ་པའི་ཞིང་མཆོག་གི།
ཡིད་འོང་རིན་ཆེན་སྣ་བདུན་ཕོ་བྲང་དབུས།།
ས་བཅུའི་དབང་ཕྱུག་ཟོ་དོར་རྣམ་པར་རྩེན།།
སྔོན་ཚེ་རིག་འཛིན་པདྨས་བཀའ་བསྐོས་བཞིན།།
མངའ་བདག་ཚངས་པ་ལྷ་ཡི་མེ་ཏོག་གི།
ཆོས་སྲིད་རྒྱལ་མཚན་མི་ནུབ་མཐར་རྒྱས་པའི།།
ཐུགས་དམ་དཔལ་བེའུའི་རེ་ཁཱ་གཡང་དུ་འཁྱིལ།།
ཞལ་རས་དཀར་དམར་མདངས་ལྡན་ཞི་བའི་ཉམས།།
ཕྱག་གཡས་མདའ་དར་གཡོན་པས་ནོར་གཞོང་འཛིན།།
དར་ཟབ་ན་བཟའ་རིན་ཆེན་རྒྱན་གྱིས་མཛེས།།
བརྗིད་ཆགས་རྒྱལ་པོ་རོལ་བའི་སྟབས་གྱིས་འགྱིང་།།
རབ་དཀར་ཆུ་འཛིན་གཡོ་ལྡན་ཅང་ཤེས་སྟེང་།།
རུ་མཚོན་མདའ་མདུང་འཕྲུལ་གྱི་ཞགས་པ་བསྣམས།།
འབྲོག་གནས་དཔའ་བོའི་ཉམས་ལྡན་འགྱིང་བག་གིས།།
རབ་འབྱམས་འཕྲིན་ལས་ཐོགས་མེད་སྒྲུབ་པར་དཔའ།།
རེས་འགར་གཡུ་འབྲུག་མཁའ་ལ་འཕྱོ་འདྲ་བའི།།
སྟོང་གསུམ་འཚུབ་མའི་མྱུར་མགྱོགས་རྟ་མཆོག་བཅིབས།།
ཁྲབ་རྨོག་འཁོར་གསུམ་མདངས་བཀྲག་དགྲ་ལྷའི་གཙོ།།
སྣ་ཚོགས་སྒྱུ་འཕྲུལ་རོལ་མོ་འབྱམས་སུ་ཀླས།།
ཟླ་རྒྱས་ཞལ་རས་དར་ཟབ་རྒྱན་མང་མཛེས།།
མདའ་དར་མེ་ལོང་གསེར་གྱི་འཁོར་ལོ་བསྣམས།།
འཇོ་སྒེག་གར་གྱིས་ཡུ་མོའི་སྟེང་འགྱིང་བའི།།
བདེ་སྟོང་དགྱེས་སྐྱེད་གོང་སྨན་ལྷ་རིའི་ཞབས།།
དཔའ་བརྗིད་གར་དགུའི་རྣམ་རོལ་སྲས་པོ་དགུ།།
མཛེས་སྡུག་སྒེག་ལྡན་མཛངས་མའི་སྲས་མོ་དགུས།།
རྣམ་དཀར་དགྲ་ལྷའི་བ་དན་མཁར་འཕྱར་ཏེ།།
གངས་རིའི་ལྗོངས་སུ་ཕན་བདེའི་ལེགས་ཚོགས་སྤེལ།།
རྨ་རྒྱལ་མདུན་རི་གཡུ་བྲག་རང་བྱོན་ལྷུན།།
རྒྱལ་བ་བྱམས་པ་གོས་སྐུ་ཆེན་མོའི་གཟུགས།།
ཡིད་བཞིན་འཁོར་ལོའི་གཟི་བྱིན་འཁྱིལ་བའི་གནས།།
ཡིད་དགའ་ཆོས་འཛིན་ཞིང་གི་བཀོད་པ་རྫོགས།།
འཁོར་སྒྱུར་རྣམ་རོལ་མརྒད་ལྷུན་པོའི་དབུས།།
དཀར་མཛེས་ཡིད་འོང་ཞི་བའི་ཉམས་ཀྱིས་སྒེག།
རྨ་གཡང་བང་མཛོད་འཕྲུལ་གྱི་ལྡེ་མིག་བསྣམས།།
གཏེར་བདག་གཉེར་བ་མགྲོན་དགྱེས་ཞལ་དཀར་བསྔགས།།
ས་འཛིན་ནོར་བུའི་རྒྱལ་མཚན་མུ་ཁྱུད་ཟླུམ།།
རི་ཕྲན་ཁ་འབབ་རྣམ་བཞིས་མཛེས་པར་བརྒྱན།།
དབུས་རི་བྲག་དཀར་འཁོར་སྒྱུར་འགྱིང་སྟབས་ཀྱི།།
གཟུགས་སུ་འཕོས་པའི་རིན་ཆེན་ཕོ་བྲང་དབུས།།
སར་གནས་ཡབ་ཆེན་བསེ་རུ་ངང་ཡག་མཚན།།
ཡིད་འཕྲོག་ཞལ་རས་དར་ཟབ་ན་བཟའ་གསོལ།།
རྣོ་ངར་རུ་མཚོན་ནོར་བུ་ཐུགས་ཀར་འཛིན།།
གཡུ་འབྲུག་སྟེང་འགྱིང་འདོད་དགུའི་གྲུ་ཆར་འབེབས།།
ལྡོང་གི་བླ་ཟོག་རྣམ་ཤེས་སིམ་པའི་གནས།།
སྲ་མཁྲེགས་ཤྭ་རའི་དཔའ་མཁར་རྒྱས་པའི་རྟེན།།
ལྷུན་ཆགས་གོང་ཁའི་ལབ་ཙེ་ཡིད་འོང་བ།།
ཤེལ་དཀར་འཁྲི་ཤིང་ཆུན་པོ་ཚར་དུ་དངར།།
འགྲོ་མགོན་ཞབས་དཀར་ཚོགས་དྲུག་རང་གྲོལ་གྱིས།།
འབྲོང་རྒོད་རྭར་འཇུས་གཉའ་ཞོན་བཏུལ་བའི་སར།།
ཞབས་སེན་ཟླ་ཚེས་འོད་རླབས་འབར་བའི་རིས།།
རབ་གསལ་དཀར་བརྗིད་གོར་མའི་ངོས་སུ་འཚེར།།
བརྗིད་ཆགས་ཇོ་མོ་གཡང་རའི་རིན་ཆེན་བྲག།
གཤིན་རྗེའི་འཕྲང་བགྲོད་རྒྱ་མར་འཇལ་བའི་ཕུག།
མེ་ལོང་གཟུགས་བལྟས་བསྔོ་སྨོན་མཚམས་སྦྱར་དགེས།།
ངན་སོང་སྒོ་འགེགས་བྱིན་རླབས་ཚན་ཁ་འབར།།
རྒྱལ་དབང་པདྨའི་ཕོ་ཉ་སེང་ཆེན་རྗེ།།
གྲུབ་ཆེན་ལྕགས་ཟམ་ཐང་སྟོང་རྒྱལ་པོའི་ཞབས།།
དཔལ་གྱི་རྡོ་རྗེའི་ཕྱག་ཞབས་རེ་ཁཱའི་གཟུགས།།
གསལ་འཆར་མི་འཇིགས་གོར་མའི་གླེགས་བུར་བཀྲ།།
དལ་བརྒྱད་འབྱོར་བཅུའི་རིན་ཆེན་ལུས་པོ་བསྐྲུན།།
མངར་བའི་ཟས་དང་གཅེས་པའི་སེམས་ཀྱིས་བསྐྱངས།།
བཀའ་དྲིན་གཞལ་བར་དཀའ་བའི་ཕ་མ་ཡི།།
དྲིན་ལན་དྲིན་རྡོས་འཇལ་བའི་ངོ་མཚར་རྨད།།
དཔལ་མཆོག་འཁོར་ལོ་སྡོམ་པའི་ཐུགས་ཀྱི་གནས།།
ཙ་རིའི་གནས་སྒོའི་ཉམས་དགའི་ཕོ་བྲང་བརྗིད།།
འཇིགས་མཛད་དཔའ་བོའི་བྱིན་ཆགས་ཕུག་པའི་སྒོར།།
ལོངས་སྤྱོད་ཆར་འབེབས་གདེངས་ཅན་ཆུ་མིག་བརྡོལ།།
ཤེལ་བྲག་མེ་རི་འབར་འདྲའི་གནས་ཀྱི་བདག།
བཀའ་ཡི་བློན་ཆེན་དགེ་མཐོང་བྲག་དཀར་ཆེ།།
ཟ་འོག་ན་བཟའ་ཡིད་བཞིན་ནོར་བུ་བསྣམས།།
རྒྱལ་པོ་རོལ་བའི་སྟབས་ཀྱིས་དགོས་འདོད་སྩོལ།།
རྒྱ་སྟག་མཆེ་རྣོན་ཤེལ་བྲག་ཕོ་བྲང་ནས།།
དགྲ་ལྷའི་རྒྱལ་པོ་དགྲ་འདུལ་དབང་ཕྱུག་ཉིད།།
དགྲ་ལྷའི་གོ་མཚོན་ལྷུན་རྫོགས་འཇིགས་རུང་ཞལ།།
དགྲ་སྡང་འདུལ་ཞིང་གཡུལ་རྒྱལ་བ་དན་འཕྱར།།
རྩེ་མོ་མེ་རི་འབར་འདྲའི་ཧྭ་བོ་བྲག།
རྐེད་པ་རིན་ཆེན་མཎྜལ་བཤམས་ལེགས་མཛེས།།
རྩ་བ་ཡིད་བཞིན་ནོར་བུ་སྤུངས་པའི་ལྷུན།།
སྔགས་སྲུང་དབྱིངས་ཀྱི་རྒྱལ་མོའི་གཟི་བྱིན་འཁྲིགས།།
གླིང་དཀར་ལྷ་རྟ་ལྷས་སུ་འཇུག་པའི་ར།།
ལྕག་ཚན་བསམ་པའི་དོན་འགྲུབ་རང་བྱོན་ལྷུན།།
སེང་ལྕམ་འབྲུག་མོས་ཕྱུར་བ་བརྡལ་བའི་ཐང་།།
དགྲ་ལྷའི་གོ་མཚོན་གཏེར་གནས་འབྲི་དྷཱིའི་ཕུ།།
ཀླུ་རྒྱལ་ཕོ་བྲང་མ་ཕམ་གཡུ་མཚོ་ལས།།
ཀླུ་མོ་ཀླུ་ཟོག་ནོར་བུ་ཆ་བདུན་བཅས།།
ཀླུ་ཡི་ཡུལ་ནས་སྤྱན་དྲངས་ངོ་མཚར་གཏམ།།
ཀླུ་དང་གླིང་གི་གཉེན་གྱི་བྱུང་བ་འཛུམ།།
ཡིད་འཕྲོག་ཤེལ་དཀར་ལྷུན་པོའི་ཕོ་བྲང་ན།།
རྨ་རྒྱལ་མ་ཡུམ་རྡོ་རྗེ་དྲག་རྒྱལ་མ།།
སྐུ་མདོག་དཀར་ལ་དམར་བའི་གཟི་མདངས་བཀྲ།།
རིན་ཆེན་དབུ་རྒྱན་དར་ལྔའི་འཕྱང་འཕྲུལ་གཡོ།།
ཕྱག་གཡས་སྐྱིན་ཐང་འཁོར་ལོའི་རྣོ་དབལ་ངོམ།།
ཕྱག་གཡོན་གནམ་ལྕགས་རླུང་གི་ཙཀྲ་བསྣམས།།
འཇོ་སྒེག་ཉམས་ཀྱིས་མཛེས་ལྡན་ཡུ་མོར་བཅིབས།།
གངས་ལྗོངས་བདེ་སྐྱིད་རྫོགས་ལྡན་དཔལ་ལ་འགོད།།
སྤྲིན་དཀར་འཕྱུར་འདྲའི་སྦྲ་གུར་སྟོང་ཤོང་ཁོང་།།
འཕགས་པའི་གནས་བརྟན་དགྲ་བཅོམ་འཁོར་ཚོགས་བཅས།།
ཀླུ་སྨན་བྱེ་བ་འབུམ་དགུ་རོལ་བའི་གནས།།
རྔ་གླིང་རོལ་མོའི་ཆོས་སྒྲ་སྒྲོག་པའི་ཞིང་།།
ཙིཏྟའི་དབྱིབས་འཛིན་མ་ཧཱ་ཀ་ལའི་ལྷུན།།
གཏེར་གྱི་མཛོད་བདག་ཕ་བོང་གྲུ་བཞིའི་མཁར།།
གསེར་གཡུའི་མཚོ་མོས་མཎྜལ་བཤམས་པའི་འཕྲུལ།།
འོག་མིན་ཞིང་གི་བཀོད་པ་ལྷུན་གྱིས་གྲུབ།།
ནོར་ལྷ་མཛོད་བདག་ལྷ་རི་དྲེལ་དཀར་གྱི།།
ཤེལ་བྲག་ནོར་བུའི་དབུ་རྩེ་མཐོངས་སུ་འཕྱོ།།
ཆོས་སྐྱོང་བེར་ནག་གྲུབ་པའི་སྒྲུབ་ཕུག་གི།
བྲག་མིག་མེ་ལོང་སྣང་བརྙན་ལྷམ་མེར་མཛེས།།
བསྟན་སྲུང་གཟའ་མཆོག་ཆེན་པོ་རཱ་ཧུ་ལའི།།
བླ་མཚོ་དམར་ནག་གྲུ་གསུམ་འཁྱིལ་བའི་གཟུགས།།
དྲེགས་པ་ལྷ་སྲིན་སྡེ་བརྒྱད་སྤྲིན་ལྟར་གཏིབས།།
མངོན་སྤྱོད་དྲག་པོའི་འཕྲིན་ལས་གྲུབ་པའི་ས།།
ནོར་བདག་ཛམ་བྷ་ལ་ཡི་གནས་སྒོ།།
གསེར་སྒའི་རྒྱན་ལྡན་རྟ་མཆོག་རིན་ཆེན་ལ།།
ཡིད་བཞིན་ནོར་བུ་མེ་འབར་བཀལ་བའི་གཟུགས།།
ཕ་བོང་གསེར་རྡེའུའི་མརྒད་ལྷུན་པོ་བརྗིད།།
གླིང་དཀར་དཔའ་རྟུལ་རྒྱ་ཚ་ཞལ་དཀར་གྱིས།།
རྣོ་ཆོད་ཡ་ཟིས་ཁྲག་གི་འཁོར་ལོ་བསྐོར།།
ཕ་བོང་ཨི་འདེབས་དུམ་གསུམ་བྲག་རྡོ་ཡིས།།
དཔའ་བོའི་མཛད་རྗེས་ཕྱི་རབས་གཟིགས་མོར་འགྲེམས།།
མངའ་བདག་ཉང་རལ་ཐུགས་བསྐྱེད་རོལ་མཚོ་ལས།།
ལེགས་འཁྲུངས་མཆོད་རྟེན་ཤེལ་དཀར་ལང་ཚོ་ཅན།།
མཐོང་གྲོལ་བྱིན་རླབས་བདུད་རྩི་ཐོ་ལེ་བ།།
མཁའ་ཁྱབ་འགྲོ་བའི་བསོད་ནམས་ཞིང་དུ་ལྷམ།།
ཆུ་ལྷའི་ཕང་བར་མཛེས་སྡུག་བརྗིད་ཆགས་ལྷུན།།
གཡུ་ལོའི་རྐང་འཐུང་རྒྱས་པའི་ཚལ་གྱི་གཞིར།།
བསུང་ཞིམ་སྨན་སྣའི་དྲི་བཟང་འཐུལ་བའི་ལྗོངས།།
གསང་ཡུམ་གོང་སྨན་ལྷ་རི་དགྱེས་དགུར་རོལ།།
གཡས་ཁོག་ཆུ་འགྲམ་དམར་ནག་བྲག་རིའི་རྩེར།།
ལྷ་ཀླུ་གཉན་གསུམ་བླ་ཤིང་སྐྱེ་སྟོབས་རྫོགས།།
ཆུ་གཉིས་བསྣོལ་བ་ཆུ་དཀར་སྣ་ཁའི་ཟུར།།
སྦྲུལ་ནག་ཐུར་རྒྱུག་དགྲ་བགེགས་གཤེད་དུ་རྔམ།།
གླིང་རྗེ་ཉི་མས་ཆོས་འཁོར་བསྐོར་བའི་ཞིང་།།
རྨ་སྨད་བཀྲ་ཤིས་ལྷ་ལུང་གཡུ་བཟང་ཐང་།།
གླིང་དཀར་དཔའ་རྟུལ་ཕུ་ནུ་སུམ་ཅུ་ཡིས།།
གོ་ཁྲབ་གཏེར་སྦས་གོ་མཚོན་རྡོ་རྗེ་བྲག།
མཛོ་མོ་འཕྲང་དགུ་བརྒལ་བས་ཐེག་པ་དགུའི།།
གོ་འཕང་མཆོག་སྩོལ་རྟེན་འབྲེལ་ལྷུན་གྱིས་གྲུབ།།
སྣང་སྲིད་ཟིལ་གནོན་གུ་རུའི་རང་བྱོན་ཁྲི།།
བྲག་དམར་ཁྱུང་གི་གཙུག་ཏོར་རྩེ་རུ་འཕགས།།
ཨ་ཡིག་རང་བྱོན་གཟི་བྱིན་འཁྱིལ་བའི་བྲག།
ཚེ་རིང་མཆེད་ལྔས་བསྟན་པ་སྐྱོང་བའི་ཡུལ།།
གླིང་དཀར་བླ་རི་སེར་པོའི་སྙན་པ་ཅན།།
གླིང་རི་པདྨ་འབུམ་རྫོང་སྲིད་ན་རྒྱལ།།
མཚལ་ནག་ཁ་མདོའི་མིག་སྨན་མི་གཡོ་བ།།
རིགས་གསུམ་མགོན་པོ་རང་བྱོན་གསལ་འཆར་ཞིང་།།
བཅོམ་ལྡན་སྨན་བླའི་ཐུགས་རྗེའི་གཟི་འོད་ཀྱིས།།
གྲངས་མེད་སྨན་ཆུ་ནད་གདོན་གཉེན་པོར་བརྡོལ།།
གཡུ་ལོའི་དགའ་ཚལ་སྒྲོལ་མ་འབུམ་གྱི་རྫོང་།།
མགོན་པོའི་བླ་ཤིང་ལྗོན་བཟང་གཡུར་དུ་ཟ།།
བདུད་རྩི་ལྷ་མོའི་ཆུ་ཚན་རང་བྱུང་འབབ།།
འགག་གསུམ་བརྒལ་བས་ཉོན་མོངས་དུག་གསུམ་སེལ།།
བཅོམ་ལྡན་རྟ་མཆོག་རོལ་པའི་གོང་ཁའི་ལ།།
བདེ་ཆེན་དབང་དྲག་རོལ་བའི་ཕོ་བྲང་དངོས།།
ཁོར་ཡུག་ཛམ་ལྷ་རིགས་ལྔའི་གནས་མཆོག་གི།
བྲག་ཆུང་ནོར་བུའི་གཟི་བྱིན་གཡང་དུ་ཆགས།།
ངང་བའི་གཤོག་ལྟེབ་གཟུགས་མཛེས་གཡུ་མདོག་ཐང་།།
གསེར་དངུལ་མེ་ཏོག་གཡུ་མཚོའི་ཡོན་ཆབ་བསྟར།།
འདབ་ཆགས་ཤྭ་རྐྱང་རྩེད་འཇོར་རོལ་བའི་ལྗོངས།།
ཀླུ་སྨན་བྱེ་བ་འབུམ་དགུ་བསྟི་བའི་གནས།།
ཤེལ་དཀར་རྩེ་མོ་མཐོངས་བསྙེགས་རྨ་རྒྱལ་མགུལ།།
ཛམ་ལྷ་རིགས་ལྔའི་བླ་རིའི་གཟི་བྱིན་འཁྱིལ།།
ཐུགས་དཀར་ཆེ་ཆུང་ཡིད་བཞིན་ནོར་བུའི་གནས།།
ལྷུན་སྟུག་བརྗིད་ཆགས་ཙིཏྟའི་རང་གཟུགས་ངོམ།།
ཞང་བོ་བྲག་རིང་དཔའ་བརྗིད་དགྲ་ལྷའི་རྒྱལ།།
རིན་ཆེན་དབུ་རྒྱན་དར་ཟབ་ན་བཟས་སྒེག།
མདའ་དར་མེ་ལོང་ནོར་གཞོང་ཐུགས་ཀར་འཛིན།།
གངས་སེང་སྟེང་འགྱིང་སྲིད་ཞིའི་དྭངས་བཅུད་འགུགས།།
གཡུ་དཀར་བུམ་པ་ཆ་གཅིག་འགྱིང་བའི་སྤུན།།
ལྷ་ཆེན་མོ་བ་གཏོ་བའི་ལྷུན་པོའི་དྲུང་།།
གཡུ་མཚེའུ་མེ་ལོང་ཟུང་གིས་མཆོད་ཡོན་བསྒྲེངས།།
ལྷ་ཡི་དགའ་ཚལ་རྨ་གཡང་རྒྱན་དུ་འཕོས།།
ས་འཛིན་ཤེལ་དཀར་ལང་ཚོ་འབར་བའི་དབུས།།
རྒྱལ་ཡུམ་རྡོ་རྗེའི་ཕག་མོས་དགྱེས་ཞལ་ངོམ།།
གཡང་འཛིན་མར་ཁུས་བཀང་འདྲའི་སྤང་ལྗོངས་མཐིལ།།
བྱེ་མ་འབྲི་རྡེའུས་སྲིད་ཞིའི་ནོར་གཡང་འཛིན།།
འོད་འབར་གཡའ་བྲག་རིན་ཆེན་ཕོ་བྲང་ནས།།
མཆན་ལུང་བྲག་དཀར་དགྲ་ལྷས་ཚེ་དཔལ་སྤེལ།།
ཆུ་སྔོན་གཡུ་བྲག་སྒྲོལ་མ་རང་བྱོན་གཟིས།།
མི་འཇིགས་སྐྱབས་སྦྱིན་མཆོག་ཐུན་དངོས་གྲུབ་སྩོལ།།
རྨ་རྒྱལ་ཕོ་བྲང་རིན་ཆེན་གཏེར་མཛོད་ཀྱི།།
སྒོ་སྲུང་མ་ཧཱ་གསེར་གྱི་རུས་སྦལ་ཉིད།།
ཚང་ཚིང་གཡུ་ལོའི་རྒྱན་ལྡན་མི་གཡོ་བའི།།
ཟོལ་དུ་རྩེན་པ་རྔམ་འཇིགས་གར་དགུས་རོལ།།
ཁ་རྗེ་དབང་ཐང་རླུང་རྟའི་རྒྱལ་མཚན་བསྒྲེངས།།
རྨ་སྟོད་རྩེ་ལྷ་བཅུ་གསུམ་མཐོངས་སུ་བསྙེགས།།
ཁ་འཛིན་སྡོངས་གྲོགས་བསམ་པའི་དོན་ཀུན་སྒྲུབ།།
རྨ་སྨད་མཐོན་པོ་དགུ་སྒྲིག་རྔམ་བརྗིད་འབར།།
རྨ་རྒྱལ་བཀའ་ཉན་གཉན་ཆེན་སྡེ་བཞིའི་དཔུང་།།
རྨ་རིགས་སུམ་བརྒྱ་དྲུག་ཅུ་སྤྲིན་ལྟར་གཏིབས།།
རྨ་འཁོར་སྟོང་དང་ལྔ་བརྒྱའི་འཁོར་ཚོགས་རྒྱས།།
རྨ་རི་རབ་འབྱམས་དབུ་འཕང་སྲིད་ན་བརྗིད།།
གྲུབ་དབང་པད་འབྱུང་ལོ་ཆེན་བེེ་རོའི་ཞབས།།
མངའ་བདག་ཉང་རལ་རྒྱལ་མཆོག་ཐོགས་མེད་རྩལ།།
ཚོགས་དྲུག་རང་གྲོལ་དང་བཅས་སྐྱེས་མཆོག་གི།
གཟི་བྱིན་དུས་གཅིག་གངས་དཀར་ལྷུན་པོར་སིམ།།
རིགས་གསུམ་སྒྱུ་མའི་རྣམ་རོལ་སེང་ཆེན་རྗེ།།
དཔལ་རྟུལ་སུམ་ཅུ་དྭངས་སྨན་མཁའ་འགྲོའི་ཚོགས།།
བླ་གནས་སྙིང་ནོར་གཟི་བྱིན་གཡང་ཆགས་པའི།།
མདོ་སྨད་འདོད་དགུའི་བང་མཛོད་རྨ་གཡང་བྲག།
འཛམ་གླིང་གོ་ལའི་རྒྱན་གཅིག་ཤེལ་དཀར་ལྷུན།།
རྨ་གཡང་ཕྱུག་མོའི་འབྱུང་ཁུངས་གཏེར་གྱི་མཛོད།།
སྣོད་བཅུད་སྐྱེ་དགུའི་ཚེ་སྲོག་ཉེར་འཚོའི་རྟེན།།
སངས་རྒྱས་སྟོང་གི་བླ་རི་རྨ་ཆེན་གངས།།
བསྟན་སྲུང་དགྲ་ལྷའི་དབུ་འཕང་མཆོད་བསྟོད་དགེས།།
ཡངས་པའི་རྒྱལ་ཁམས་རྫོགས་ལྡན་དཔལ་གྱིས་འཚོ།།
ནད་མུག་འཁྲུགས་རྩོད་མི་མཐུན་དབྱིངས་སུ་ཞི།།
དགེ་མཚན་བྱེ་བའི་དགའ་སྟོན་རྒྱས་གྱུར་ཅིག།
ཅེས་པ་འདི་ནི་བོད་རབ་རྒྱན་མེ་རྟ་ལོའི་གནམ་ལོ་གསར་ཚེས་ཀྱི་དགའ་སྟོན་མངོན་པར་བཞད་པའི་ལྷ་ཆེན་རྨ་རྒྱལ་སྦོམ་རའི་གནས་འདུས་ཀྱི་བགྲང་བྱ་【2026】ཁྱད་པར་ཅན་གྱི་བོད་ཟླ ༦ པའི་ཚེས ༤ སྟེ་ཆོས་འཁོར་དུས་ཆེན་ཉིན། རྨ་རྒྱལ་གངས་རི་རྩེ་མོ་རབ་དཀར་གྱི་མདུན་སར། རྩེ་གཞུང་ཡ་མ་ཐར་མི་ཕམ་དབྱངས་ཅན་དགྱེས་པའི་ལང་ཚོར་འབོད་པས་མཇུག་གྲུབ་པར་བགྱིས་པ་དགེ་ལེགས་འཕེལ། །། ཛ་ཡནྟུ།།
རྩོམ་སྒྲིག་པ། དོན་འགྲུབ་རྡོ་རྗེ།